26.08.2018

26.08.2018, श्रावणॖ (श्रावण/ सावन) ज़ूनॖ पछॖ (शुक्ल पक्ष), पुनिम (पूर्णिमा), आथवार (रविवार/एतवार), राश कुम्भ (चलान), ऋतु वर्षा (चलान), द्रठॖपऻन्च़ुक (पंचक)(चलान)..
अज़ छु रक्षा बंधन ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳछन पचि फ्युर गछ़ुन
    अ: कऻन्सिहुन्द कॊरमुत मदद
          या एहसान मऺशरावुन
2. मु: यॊत ताफ़ तॊत शुहुल
    अ: प्रथ कमालस छु ज़वाल/
         द्वख स्वख छु बराबर
3. मु: यॊत ताम छ़ॊट पिलन करि
         तॊत ताम ज़्यूठ यड बरि
    अ: क़द थॊद आसुन छु फऻयदॖ
          मंद
4. मु: यॊत ताम छ़ॊट नॆन्दॖर करि
         तॊत ताम ज़्यूठ जाय
         छ़ान्डि
   अ: ज़्यूठ क़द आसुन छु बाज़े
        खुर/छ़ॊट करि कुनि ति
        जायि आराम
5.मु: यॊत ताम दम तॊत ताम ग़म
   अ: यॊत ताम इन्सान ज़िन्दॖ छु
        तॊत ताम छि तस परेशऻनी
*************************
1. हॊल... Twisted/Crooked
               Bent/Uneven/
               Waist cloth
2. होल.... Love/Affection
3. हाल... A big room (Hall)
              To know welfare/
               Condition of
4. होर... Two/Pair/There/
              Lost
5. हऻल... Habit/Practice/
               Custom
6. हार.. Garland/Necklace
            Failure/Sea-shell
7. हारॖ... Sea-shell/Money
8. हाख..Greens/Khol seed
9. हाकॖ-बॊद..Bundle of
                    Knoll Khol
10. हाकॖ-रंग....Colour of
             Knoll Khol/Green
             colour
*************************
गीता ज्ञान  : अध्याय-6  :
पानॖ संसार सागर तार लबान
पनुन पान नर्कस मंज़ नॖ त्रावान
मनुष्य पनुन मॆथॖर तॖ पानय शॊत्रु आसान
वॊन भगॖवानन गीता ज्ञान
*************************
अज़ छु बॊड द्वह वारियाहव रऺन्ग्य। अज़ छि श्रावणॖ-पुनिम यानि ॳज़्यकि द्वह छि लूख करान अमरनाथ गॊफाय मंज़ शीनॖ-शिव-लिंग दर्शुन। यिम नॖ तोर ह्यकान वऻतिथ तिम ॴस्य कऺशीरि मंज़ शंक्राचार खसान तॖ तति मंदरस मंज़ शिव-लिंगसुन्द दर्शुन करान या पुंछॖ बूढा अमरनाथ गछ़ान तॖ शिवनाथुन दर्शुन करान। ॳज़्यकि द्वह ओस कऺशीरि मंज़ त्र्यन ख़ास जायन मेलॖ लगान। तिम गयेयि हरिश्वर, सर्यश्वर तॖ द्यऻन्यश्वर। यिमन त्र्यन जायन ति ॴस आसान बीरॖ वख्तॖ अकि। कऺशीरि मंज़ य्यॊस छॆड नेरान ॴस अमराकऺदलॖ अखाडा प्यठॖ अज़ दऺह-पन्दह द्वह ब्रौंठ स्व ॴस अज़ वातान अमरनाथ गॊफाय ताम। म्यॆ छु बासान यि वनुन ज़रूरी ज़ि बॖ छुस आमुत यिमन सारिनीय जायन फीरिथ पनॖनि माजि सॗत्य कर ताम। त्यूतुय योत नॖ बऺल्कि वुछमॖत्य छिम यिमन जायन कॆंह चमत्कार ति। श्रीनगरॖ ओस अज़ सुबहऻय च़ोरि बजि प्यठॖ शंक्राचारॖ म्वत मत्यॊमुत। पार्थीश्वर बापथ म्यॆच़ वालान। पैदल खसान-वसान। च़्यलॖ-च़्यल, दक्कम-दक्की, लऻनि मंज़ खडा रूज़िथ दर्शनस प्रारुन।अख स्वन्दर क्षण ओस बासान। अज़ छु फ़ाकॖ ति कॆंह बख्त थवान तॖ गारि-पूर्य, तलिथ ओलव, शकर-पारॖ ख्यवान कऺहवस सॗत्य।क्याह मज़ॖ ओस यिवान। अज़ छु रक्षा-बंधन द्वह ति। असि कऻशिर्यन मंज़ ओस नॖ अम्युक ज़्यादॖ असर आसान। यॆम द्वहन छु रंग रॊटमुत सऻनिस समाजस मंज़ अख-ॳकिस वुछिथ। म्यॆ छु नॖ याद प्यवान ज़ि म्यऻनिस ल्वकॖचास मंज़ ओस राखी गन्डनुक बोल-बाला। म्यॊन ल्वकचार यानि 1944 प्यठॖ 1960-स ताम। पतय लॊग यथ हवा ज़्यादय पाहन कशीरि मंज़ म्यॆ यॊत ताम ज़्वन छु
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)
म्यऻन सी डी सोज़-ए-दिल छि जल्दॖ यिनॖ वाज्यन यथ मंज़ थदि पायक्व कलाकारव छि बऻथ ग्यवमॖत्य। बुक करनऻविव पनॖनि बापथ ति।