01.10.2018

01.10.2018, ॴशिद (आश्विन/ असूज), गटॖ पछॖ (कृष्ण पक्ष), सतम (सप्तमी), च़न्द्रवार (सोमवार), श्री सप्तार्षि सम्वत 5094, राश मिथुन (दुहचि 1.17 बजि प्यठॖ), ऋतु हरुद (शरद) (चलान)...अज़ छि साहिबॖ सतम ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: आव जाव बराबरॖय
    अ: नफ़ा न्वकसान बराबरॖय/
         सॊन व्वगुन नॖ वुछुन
2. मु: आव स्वनॖसुन्द तॖ गव
          गासुव
   अ: फ़ऻयदॖ तॖ न्वक्सान मसऻवी
         ज़ानुन
3. मु: ओखुन सऻब गुर छु नॖ
         ख्यवान ज़ब यॆलि नॖ प्यॆयस
         तॆलि ख्यॆयि पनॖन रब
   अ: ख्यनस नऺखरॖ करॖन्य
 4. मु: ऒबरस डींग्य दिन्य
    अ: ति सौंचुन यि नॖ बऺन्यथॖय
         ह्यॆकि/ख़यऻली प्वलाव
5. मु: ऒबरॖ तलुक आफ़ताब
    अ: मुसीबतॖ पतॖ आसऻयिश/
         नाव्वमीदि पतॖ आश
*************************
1. व्वखुर.....Turn
2. व्वखुर द्युन....To turn up-
                       side down
3. ववुन....To sow/To plant
4. व्वफुन...To bark
5. व्वथा बीठी.... Frequently
                standing up and
                sitting down/
                Restlessness
6. व्वटॖ तुलॖन....To jump/To
                become happy
7. व्वदास.....Sad/Cheerless
                Dejected/Sullen
                heart/Sorrowful
                Dull
8. व्वदॖन्य रोज़ुन....To keep
                           standing
9. व्वलास... Beautiful dress
                  Royal dress
10. व्वलुर.....Wular lake in
                    Kashmir
*************************
       गीता ज्ञान  :  अध्याय-6 :
यूग ब्रष्ट प्वरुश स्वर्ग प्रावान
स्यठाह कालस तति स्वख बूगान
पतॖ प्वनिवान गरि ज़न्म प्रावान
वॊन भगॖवानन गीता ज्ञान
*************************
ॳज़्यकि प्यठॖ बऻश ताम छि काम्बर्य पछिक श्राद्द पनॖनि द्वह यानि सतम हुन्द सतम द्वह, ॴठम हुन्द ॴठम द्वह....बऻश्य तॖ त्रुवुश हुन्द श्राद्द यी बाश्य द्वह।
बॖ ओसुस राथ कथ करान मोबायलस प्यठ नागरीयस यानि हॆन्दियस मंज़ कऻशुर लेखनॖच। मन गव म्यॆ ख्वश यॆलि म्यॆ नन्याव ज़ि वारियाहव म्यानव ब्यॆन्यव बायव ह्यॊत यि कऻशुर की-बोर्ड छ़ान्डुन पनॖन्यन पनॖन्यन मोबायलन प्यठ तॖ ह्यॆच़ॖख लेखनॖच कूशिश करॖन्य। यि छि स्यठाह खुशी हॖन्ज़ कथ। क्याज़ि नॖ। ॴखॖर छि असि यि पनॖन्य माजि-ज़्यव। हालातव कऺर्य ॳस्य मजबूर पनुन डेरॖ कऺशीरि मंज़ त्रावॖनॖ बापथ। पनुन जाय जायदाद त्रऻविथ आयि अज़ त्रॖह वऺरी ब्रौंठ ॳस्य जबरन त्रऻविथ मगर पनॖन्य माजि ज़्यव ॴस पानस सॗत्य अदॖ यॊत वऻत्य ज़ि तॊत। पनॖन्य प्रज़नथ पनॖन्य पहचान रूज़ पानस सॗत्य। यि ह्यॆकि नॖ कांह असि निशि थपि निथ। मगर विडम्बना छि यि ज़ि असि ह्यॆच़ पानय रावरावॖन्य पनॖन ज़ान तॖ ज़बान। ॳस्य वऻत्य यॊत ताम ति ज़ि वारिहाव म्यानव ब्यॆन्यव छु खान्दरॖ पतॖ ड्यॆजहोर ताम थोवमुम कनव मंज़ॖ कऺडिथ, यि छु हालांकि त्युहुन्द मंगल सुत्र युस नॖ पानस निशि अलग गॊछ़ गछ़ुन मगर ज़ानि दय तिमन क्याह छु बासान। म्यऻन व्यनती तिमन ब्यॆन्यन छि ज़ि तिमन पज़ि पनॖनि सुहागॖच निशऻनी पानस सॗतय थवॖन्य।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

30.09.2018

30.09.2018, ॴशिद (आश्विन/असूज) गटॖ पछॖ (कृष्ण पक्ष), पऻन्च़म देवा शॆयम (पंचमी/षष्टी), आथवार, श्री सप्तार्षि सम्वत 5094, राश वृष (चलान), ऋतु हरुद (शरद) (चलान)...
शॆयम हुन्द वॊहरवोद यी अज़
ति क्याज़ि शॆयम छि रावान
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अनंतनागॖ ख्यॆयि ऊंटन
         कपस तॖ वरमुलि च़ऺटॖख
         दूनिस नस
   अ: कऺम्यताम कॊर ग्वनाह तॖ
        कऺमिसताम म्यूल सज़ा
2.मु:ॳन्यसॖन्ज़ क्वलय ख्वदायस
        हवालॖ
  अ: यथ नॖ कांह ति प्रछ़ान आसि
        बे मऻलिख माल
3. मु: ॳन्य लूर गिलवॖन्य
    अ: अनि-खलि चौब दिन्य
4. मु: ॳन्य दांद
    अ: अहमक़/युस नॖ पथ-
          ब्रौंह वुछि
5. मु: अनिमॖ नॖ श्रपान तॖ नीज्यन
         ग्वगज्यन ॴस दारान
  अ: कमज़ोर इन्सानसॖन्ज़ ताक़त
        वरन सॗत्य मान-मान करॖन्य
*************************
1. व्वड......Head/Hair of
                 the head
2. व्वडि-वुछुन....To look for
              lice etc. in the
              head
3. व्वडि-व्वडि दिनि....To beat
             head in grief
4. व्वखुल..A grinding stone
                or mortar
5. वऺहम.... Superstition/
            Fear/Doubt/Appre
            hension
6. वऺहमॖलद.... Superstitious
            Frightened person
7. वहराव.....Spread
8. वहराथ.....Rainy season
9. वह्यक.... Name of a
              month (Baisakh)
10. वुह.......Twenty
*************************
      गीता ज्ञान : अध्याय-6  :
        श्री भगवान वनान
भगवान वनान सु छु नॖ दुरगऺती प्रावान
यॆमि लूकॖ न परिलूकॖ नाश सपदान
युस भगवत प्राप्ती म्वखॖ कर्म करान
वॊन भगॖवानन गीता ज्ञान
*************************
अथ मंज़ छु नॖ कांह शक ज़ि मोबायलस प्यठ हॆन्दियस या नागरीयस मंज़ कऻशुर लेखनॖच
रफ्तार छि अंग्रीज़ॖस मुक़ाबलॖ कम पाहन। मगर लगातार लेखान लेखान छि ओंगज्यन हॖन्ज़ त्राय ति बदलान तॖ रफ़तार ति तेज़ गछ़ान। म्यॆ वोत वारियाहव जायव प्यठॖ फ़ोन ति ज़ि तिमन आव नॖ यि कऻशुर की-बोर्ड मोबायलस प्यठ अथि। ग्वडॖ-ग्वडॖ गयो म्यॆति यी मगर वारॖ-वारॖ सनान-सनान, पृछ़ान-पृछ़ान आव म्यॆ अथि तॖ छुस बॖ अथ की-बोर्डस प्यठ कऻम करान। गुगलस मंज़ गछ़िथ छु प्ले-स्टोरॖ प्यठॖ 'G'- Board छ़ान्डुन तॗ तति छु ब्यॊन ब्यॊन ज़बानन मंज़ छ़ान्डुन 'Devanagari (Koshur) की-बोर्ड । यि छु सुय की-बोर्ड युस बॖ इस्तिमाल छुस करान। यॆमिस नॖ म्यऻन्य पऻठ्य मोबायलॖच ज़ऻन्यकऻरी आसि तमिस छि थोडा मिन्नथ ह्यॆन्य तॖ पनॖनिस शुरिस, यॆमिस अमिच ज़ऻन्यकऻरी आसहि, अथि यि की-बोर्ड छ़ान्डनावुन। अकि फिरि यी अथि तॖ पतॖ यीव नॖ तॊह्य ति कुनि अथि। तॊह्य ति ह्यॆकिव फटा-फट कऻशुर लीखित तॖ पऺरिथ। करिव वुनिकि प्यठय छ़ान्डुन शुरु। अज़ नय तॖ अदॖ कर, मऻज्यऻय दया कर
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

29.09.2018

29.09.2018, ॴशिद (आश्विन/असूज), गटॖ पछॖ (कृष्ण पक्ष), च़ोरम (चुतुर्थी), बटॖवार (शनिवार /शनिश्चरवार), श्री सप्तार्षि सम्वत 5094, राश वृष(दुहचि 8.25 बजि प्यठॖ), ऋतु हरुद (शरद)(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अय ज़र यि ख्वश यियिय
         ति कर
   अ: पौंसस छु ताक़त
2. मु: अंद्रमन ग्रंद करॖन्य
    अ: कऻन्सि हॖन्दिस मनस साम
          ह्यॆन्य
3. मु: ॳनिस अनिगटि च़ौंग
         हावुन
   अ: फ़ज़ूल कूशिश करॖन्य
4. मु: ॳनिस राथ तॖ द्वह ह्युवुय
    अ: बेकॖलस यज़थ तॖ बेज़ती
         छि हिशी
5. मु: ॳनिस मुश हावॖन्य न
         सवाब न ग्वनाह
    अ: स्व कऻम यथ नॖ कांह
         नतीजि नेरि
*************************
1. व्यस.....Friend (Female)
2. व्यसतोन... Friendliness
               (Among women)
3. व्यसतार.... Description/
           Expansion/Spread
           Elaboration
4. व्यछ़य....Dearth/Short-
           fall/Scarcity/Short
           -age
5. व्यछ़नावुन....To discuss
         in depth/To winnow
         To have a fully dis-
          cussion
6. व्यच़ुन....To be pleasing/
          To be agreeable/To
           look nice
7. व्यच़ार करुन....To consi-
           der/To decide/To
           imagine
8. व्यद्या.... Knowledge/
           Education/Learn-
           ing/Attainment
9. व्यसरुन....To fall from
           hand/To lose self
           restraint
10. व्यच़ारुन....To think/To
                   To decide/To
                    ponder
*************************
       गीता ज्ञान : अध्याय-6  :
ही कृष्ण यि म्योन समशय कऺरिव
दूर
त्वहि सिवाय दॊयिम कांह करि नॖ
बर पूर
म्योन शक़ दूर करुन छु नॖ आसान
वॊन भगॖवानन गीता ज्ञान
*************************
सनुन छु ज़रूरी ज़ि ॴखॖर क्याह वजह छु ज़ि असि ह्यॆच़ॖन्य पनॖनि माजि ज़्यॆवि हॖन्ज़ॖय दॖय गछ़ॖन्य। ॳस छि ज़ऻनिथ-मऻनिथ कऻशिर्य पऻठ्य कथ करनॖ निशि परिहेज़ करान। पनॖन्यन गरन मंज़ छि नॖ पनॖन्यन शुर्यन सॗत्य कऻशिर्य पऻठ्य कथबात करान। यि कऻच़ाह हमाकतॖच कथ छि ज़ि सऻन्य बच्चॖ यॆलि कऻशिर लीला परान छि या कऻशुर बऻथ ग्यवान छि सु बच्चॖ छु नॖ ह्यकान नागरीयस मंज़ कऻशिर्य पऻठ्य पनॖनि कापी प्यठ लीखित। यॊदवय ज़ोर-ज़बरदऺस्ती मंज़ लेखान ति छु, तमिचि मात्रायि, तमि बऻतॖक्य अछर छि आसान ऊट-पटांग पऻठ्य लीखिथ। वारियाहन बच्चन वुछ म्यॆ ज़ि तिमव छु आसान अंग्रीज़स मंज़ कऻशुर ल्यूखमुत तॖ सु परान।त्रॖह वरी गऺयि असि कऺशीरि प्यठॖ च़ऺलिथ आमतिस। यिमन त्रॖहन वऺरियन हुन्द दॊद छु लेखुन किताबन मंज़ मगर नागरीयस मंज़ कऻशिर्य पऻठ्य। अंग्रीज़स मंज़ छु वारिहाव ल्यूखमुत तॖ लेखान ति छि मगर नागरीयस मंज़ कऻशुर लेखन वऻल्य छिम नॖ नज़रि यिवान। सान्यन संस्थायन हॖन्ज़ छि यि अख ज़िम्वऻरी बनान ज़ि तिम तुलन तिम क़दम यॆमि सॗत्य सऻन्य यि माजि-ज़्यव कऻशुर ज़िन्दॖ थविथ। म्यॆ छु नॖ ह्यॆन्दी तगान परुन या लेखुन, यि छु अख अपुज़ बहानॖ कॆंच़व म्यानव ब्यॆन्यव तॖ बायव रॊटुमत तॖ ज़ऻनिथ-मऻनिथ छि नॖ कऻशिर ज़बऻन्य मंज़ कथ करान या कऻशिरिस मंज़ (नागरी यानि हॆन्दी) मंज़ लेखनॖच कूशिश करान। न्वकसान छि पनुन करान पनॖनि समाजुक करान, पनॖन प्रज़नथ पानय रावरावान। पनुन वजूद पानय नाहवनावान। हवनॖव ख्वतॖ छु यिमन ॴबन परदॖ त्रावनुक ज़्यादॖ ज़रूरथ। व्हाटसापस प्यठ कऺरिव अंग्रीज़स मंज़ कऻशुर लेखुन बंद। या मॖ लीखिवॖय न तॖ लीखिव नागरीयस यानि हॆन्दियस मंज़ॖय योत।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

28.09.2018

28.09.2018, ॴशिद (आश्विन/असूज), गटॖ पछॖ (कृष्ण पक्ष), त्रय (तृतीय), शॊकुरवार (शुक्रवार/जुम्मा),श्री सप्तार्षि सम्वत 5094, राश मेष (चलान), ऋतु हरुद (शरद) (चलान)...अज़ छि संकट-च़ोरम (संकट निवारण चतुर्थी) ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अतूल ख्यॊमुत हाप्तव
    अ: हदॖ रॊस ख्यॊन
2. मु: अंदॖर्य छ़ॊच़ कोन न्यॆबॖर्य
         नुन्दॖ बोन
    अ: अंदरी फॊटुमुत न्यॆबॖर्य नॖ
         बास द्युन
3. मु: अंदॖर्य दज़ुन पानॖ तॖ न्यॆबॖर्य
         ज़ालॖन्य लूख
    अ: यॆलि कऻन्सि स्वख आसि नॖ
         अमापॊज़ न्यॆबॖर्य हावि
         ख्वशहऻली हदॖ रॊस
4. मु: अंदॖर्य छ़ॖनिहऻस थ्वकॖ
         न्यॆबॖर्य वॊनुन गुमॖ आम
    अ: पनॖन बेशर्मी च़ूरि थवॖन्य/
          पनॖनि बेज़ती पर्दॖ करुन
5. मु: अंदरिम शाह अंदर तॖ
         न्यॆबरिम शाह न्यबर
    अ: दम-फुट्य गछ़ुन
*************************
1. व्यपॖवुन.... Suitable/
                     Agreeable
2. व्यतरुन....To bear/To
            tolerat/To endure
3. व्यठुन..... To become
                    fatty
4. व्यच़ार.....An idea/Consi-
            deration/Observa-
            tion/View/Verdict
5. व्यदाख....Crying out/
            Weeping and wail-
            ing/Lamentation
6. व्यलायत... Foreign
7. व्यलायती....Foreigner
8. व्यशटा.....Refuse/Shit/
                   Reject
9. व्यगलावुन....To melt/To
                    dissolve
10. व्यकार....Honour/
              Respect/Dignity/
          Reputation/Esteem
*************************
       गीता ज्ञान : अध्याय-6  :
सु भगवती प्रापती अडॖवति रोज़ान
सु ऒबरॖक्य पऻठ्य छलि छलि गछ़ान
सु ब्रष्ट गऺछ़िथ नष्ट गछ़ान
वॊन भगॖवानन गीता ज्ञान
*************************
कऻशिर्य ज़बान छि स्यठाह मॊदुर ज़बान। दफ अमापॊज़ असि मंज़ छि कॆंह तिम यिमन यि ज़बान छि क्याहताम ब्यॊन ज़बान बासान। तिहुन्द क़सूर छु नॖ। दर-असॖल रूद कशीरि मंज़ असि अथ ज़बऻन्य प्यठ हमेशि टपलॖ। म्यॆ छु ज़्वन ज़ि म्यऻनिस ल्वकचारस मंज़ ओस च़ाटॖहालन मंज़ कऻशुर कऻयदॖ यिवान परनावनॖ मगर सु ओस नस्तालीखस मंज़ यानि उर्दुहस मंज़ आसान। सु कऻयदॖ रूद कमसॖय कालस चलवुन पतॖ गव गऻबॖय। सानि कशीरि मंज़ रुद नागरीयस तॖ नस्तालीखस मंज़ लेखुन तॖ परुन। मुसलमान ओस यछ़ान नस्तालीखस मंज़ पनॖनि किताबॖ ति क्याज़ि तम्युक वाठ ओस लगान तिमन उर्दूहस सॗत्य तॖ तिहन्ज़न मज़हबी किताबन सॗत्य। कऻशिर्य बटस ओस मनशा ज़ि नागरियस मंज़ गछ़ॖ किताबॖ आसिनि ति क्याज़ि तम्युक वाठ ओस लगान तिहन्ज़न धार्मिक किताबन सॗत्य यिम हॆन्दियस तॖ संस्कृतस मंज़ छि। अथ कशमॖकशस मंज़ ज़्यून मुसलमानवॖय तॖ ततिच सरकऻर्य ज़बान ति बनेयि उर्दू। हॆन्दी तॖ संस्कृत गव दूर गछ़ान तॖ कऻशिर ज़बान ति आयि ब्रकनॖ उर्दूहस तॖ हॆन्दियस मंज़ तॖ यि ज़बान आयि नॖ सही पऻठ्य ह्यॆछनावन ततिक्यन बसकीनन। मगर अख कथ छि ग़ोर करॖन वऻज्यन मुसलमानन रूज़ उर्दू ज़बान चलवॖन्य तिहन्द्यन मदरसन मंज़, मशीदन मंज़ मगर कऻशिर्य बटन हन्ज़ आयि नॖ ह्यॆछनावनॖ पाठशालायन मंज़ या कुनि मंदरस मंज़। यि छु अख ख़ास वजह म्यॆ बासान ज़ि ॳस्य कयाज़ि छि नॖ ह्यकान सऻरी कऻशिर्य ज़बऻन्य मंज़ परिथ तॖ लीखिथ। कऺशीरि न्यबर छु म्यॆ बासान बाकयन शहरन मंज़ वोत तिमन पनॖनि पनॖनि ज़बऻन्य रऺछ़रावनुक जान सबीलॖ।च़ाटहालव दऺस्य या पनॖन्यन पनॖन्यन गरन मंज़। तिमन शहरन मंज़ रूद नॖ तनाव ज़ि तिहिन्ज़ ज़बान रोज़्याह नस्तालीखस मंज़ किनॖ नागरीयस मंज़।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

27.09.2018

27.09.2018, ॴशिद (आश्विन), गटॖ पछॖ (कृष्ण पक्ष),द्वय (द्विती), ब्रसवार (वीरवार/ बृहस्पतवार), श्री सप्तार्षि सम्वत 5094, राश मेष (चलान), ऋतु हरुद (शरद)(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अंदरी फटुन ठानॖ दिथ
    अ: ग़मुक इज़हार नॖ करुन
2. मु: अंदॖर्य ख्वश तॖ न्यॆबॖर्य व्वश
    अ: अपुज़ ग़म हावुन
3. मु: आंचारॖ नॊट ॳकिस खॊत
         तॖ ब्यॆयिस हॊत
    अ: कारॖ बारस पनुन पनुन
         कॖस्मत
4. मु: अन्यन मंज़ कऻन्य स्वंदर
    अ: बेक्लन मंज़ गाटुल
5. मु: अन मनाह कर फ़ना रछुन
         छुय बॊड गॊनाह
   अ: फ़ज़ूल ख़र्च/युस नॖ पौंसॖ
        बचावि
*************************
1. व्याकुल.... Perplexed/
                    Restless
2. वयकुन्ठ... Paradise
3. व्यॊद....... Known/Well-
                    known
4. व्युप........ Flood/An over
             flow/High water/
             A deluge/Eager/
             Inundation
5. व्याद....... Disease/Sick-
            ness/Illness/Ail-
            ment
6. व्यूग......Rangoli
7. वीर.......Brave/Bold/
                 Courageous
8. व्यापुन...To adjust/To
         penetrate/To match
9. व्यवहार... Behaviour/
          Conduct/Manners
10. व्यवाह... Marriage/
           Wedding/Matri-
           mony
*************************
       गीता ज्ञान  :  अध्याय-6  :
यूगॖ अब्यास कऺरिथ न स्यॆदी प्रावान
न बूगिथ सरूपस प्राप्त सपदान
ॴखॖर सु क्वस गऺती छु प्रावान
वॊन भगॖवानन गीता ज्ञान
*************************
ब्वमबियि मंज़ रूज़िथ अख म्यॊन बरादर श्री एम के रैना छु पनॖनि माजि-ज़्यॆवि यानि कऻशिर्य ज़बऻन्य मंज़ स्यठाह कऻम करान। सु छु यि ज़बान ह्यॆछनिवान तति रोज़न वाल्यन कऻशिर्य बायन तॖ ब्यॆन्यन। यि ज़बान ज़िंदॖ थावनॖच अख ज़बर्दस्त कूशिश करान। बॖति छुस पनॖनकिन्य कूशिश करान ज़ि असि गऺछ़ नॖ यि पनॖन पहचान यथ जटॖ-जोशस मंज़ पानस निशि दूर गछ़ॖन्य। हालांकि पनॖनि यथ माजि-ज़्यॆवि ब्रौंहकुन पकनावनॖ बापथ छि प्रथ अंदॖ कॆंह रुत कांछन वऻल्य अनथक कूशिश करान। रूप कृष्ण बट सऻब, रत्न लाल शांत सऻब, प्रेम नाथ शाद सऻब, डाक्टर रमेश राज़दान सऻब, अरविंद शाह सऻब, संतोश नादान जी वगैरा वगैरा छि लगिथ पनॖन यि ज़बान बचावनॖस मंज़।मगर यिहॖन्ज़ या म्यऻन्य यि मॆहनत गछ़ि तॆली सफल यॆलि तॊह्य सऻरी पज़ि मनॖ असि साथ दीव। नागरीयस मंज़ कऻशुर लेखुन तॖ कऻशुर परुन तॖ पनॖन्यन शुर्यन पनॖन्यन पनॖन्यन गरन मंज़ कऻशिर्य ज़बऻन्य मंज़ कथबात करान रूज़िव। सऻन्य यि मॆहनत वाति तॆली अंद। असि छु पनुन इतिहास ब्रौंहकुन पकनावुन ताकि नवि पुयि गछ़ि पताह रोज़ुन ज़ि सऻन्य असली ज़ान पहचान क्याह छि। वारियाहव ह्यॆच़ पहल करॖन्य मगर वारियाहन छि वुनि पहल करॖन्य। पनुन अहम् त्रऻविथ पनॖनि ज़ऻच़ हॖन्ज़ प्रज़नथ पनॖनि ज़बऻन्य दऺस्य ज़िंदॖ थावनॖच कूशिश रूज़िव करान
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
****************"********
नऺविव तॖ फोलिव
 भूषण कौल "दीप"   
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

26.09.2018

26.09.2018, ॴशिद (आश्विन/असूज) गटॖ पछॖ (कृष्ण पक्ष), ऒकदॊह (प्रतिपदा), ब्वदवार (बुधवार), श्री सप्तार्षि सम्वत 5094, राश मेष (रऻच़ हॖन्ज़ॖ 1.54 बजि प्यठॖ), ऋतु
हरुद (शरद) (चलान) द्रठॖपऻन्च़ुक (पंचक) ति म्वकलि अज़
रऻच़ हॖन्ज़ॖ 1.54 बजि प्यठॖ)
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अख वोनान वगुव तॖ ब्याख
         छुस पिलनावान प्यच़
    अ: ख़ामॖख़ा वख्त ज़ायि करुन
         अख करान कऻम ब्याख
         रावरावान वख्त
2. मु: इन्सान नय आसि द्वसन
        सॗत्य गछ़ि मशवरॖ करुन
  अ: कुनि मसलस मंज़ छि ब्यॆयि
        सॖन्ज़ राय ज़रूरी
3. मु: अनहॗर्यॆन अर्मान तॖ हॗहॖर्य-
         मॖत्य पशेमान
    अ: यस नॖ न्येथॖर सु परेशान तॖ
         यस छु सु बिदाद दिवान
4. मु: इन्सानस गछ़ि आसॖन्य
         खॊय तॖ पोशस बॊय
   अ: मनुष्य गव सु यस जान तॖ
         रॖत्य ग्वन आसन
5. मु: इन्सान छु पोशि ख्वतॖ
        ॴव्युल तॖ कनि ख्वतॖ सख़
   अ: इन्सान सुन्द मज़बूत तॖ
        ॴव्युल आसुन
*************************
1. हून....... Dog
2. हून्य......Bitch
3. हून-ख्यॊन...To take bribe
                     To embezzle
4. हून्य-लॊट... Mean/Mali-
             cious (which can
             not be upright)
5. हून्य-माज़...Dog's flesh/
                  Dirty/Impure
6. हून्यम्यॆट.... Dog's share/
             Handful rice kept
             for dog while tak
             ing lunch/dinner
7. हून्य-बुथ.... Dog's face/
                     Unashamed
8. हॊप तॖ दॊप...To sit with
                       silence
9. हॊट चीरुन...To twist
          (someone's) throat
          To seize (someone)
           by neck
10. हॊट च़टुन... To cut one's
           throat/To oppress/
       To suppress/Defraud
*************************
      गीता ज्ञान :अध्याय-6 :
         अर्ज़नदीव वनान
कृष्ण युस यूगॖच श्रदा थवान
मगर अथ प्यठ छु नॖ दऺरिथ ह्यकान
अंत: समयस छु अमी यूगॖ डलान
वॊन भगॖवानन गीता ज्ञान
*************************
काम्बॖर्य पछ गव शुरु। अज़ छु ऒक्दॊह, दॊय हुन्द श्राद यी अख द्वह ब्रौंठुय यानि अज़। यि पकि पऻन्च़म ताम। यानि शॆयम हुन्द श्राद यी पऻन्च़म द्वह। चूंकि शॆयम छि रावान, सतम हुन्द श्राद यी सतम दूहुय।ॴठम प्यठॗ कऻश ताम यी श्राद पनॖनि दुहुय। मगर बऻश द्वह यी बऻश हुन्द श्राद तॖ त्रुवुश हुन्द श्राद ति। पतॗ यी च़्वदॖश हुन्द श्राद त्रुवुश द्वह तॖ मावसि तॖ पुनिम हुन्द श्राद च़्वदॖश द्वह यानि ॴठमि ओक्टूबर 2018, माने पित्रामवस यी च़्वदॖश दुहुय (यानि 08.10.2018)। यिम सऻन्य अंग-ॴशनाव स्वर्गस गऻमॖत्य छि तिहिन्दि नावॖ यी यथ पछस मंज़ दान-दक्षणा दिनॖ। यॊदवय श्राद ह्यकव नॖ हऻविथ, तिहिन्दि नाव श्राद-संक्लप यानि त्वमुल, फल-मूल मनसावुन। तमिच विधि छि विजयेश्वर जंत्री (ओंकार नाथ जीयनि) मंज़ सफ़ॖ 144-45-हस प्यठ हऻविथ।
**********************"**
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

25.09.2018

25.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष), पुनिम (पूर्णिमा), बॊम्वार (मंगलवार),श्री सप्तार्षि सम्वत 5094, राश मीन (चलान), ऋतु हरुद (शरद)(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार त्वहि सारिनीय माहरा म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴसॖ बब नेरॖन्य
    अ: वसीलॖ नॖ रोज़ुन
2. मु: अन्न पोशि तॆली यॆलि वन
         पोशि
   अ: वनुक बजर/वन आसुन छु
        स्यठाह ज़ॊरूरी
3. मु: अनतन तॖ हावनय
    अ: यॆलि कऻन्सि हुन्द पय पता
          आसि नॖ मोलूम
4. मु: अंदॖ रोस गव गन्डॖ रॊस
    अ: प्रथ कुनि चीज़स गछ़ि हद
         आसुन
5. मु: इन्सानस तॖ इन्सानस छि
         तीच़ फ़र्ख यीच़ बन्दस तॖ
         ख्वदायस छि
   अ: मुख्तिफ़ इन्सानन छु अलग
        अलग तबीयत आसान
*************************
1. हर....Hari/God
2. हऺर....Milk crust/A piece
            of wood
3. हड... Quarrel
4. हरॖज/हरजॖ... Objection/
            Obstruction/Dam-
            age/Wastage/
            Trouble
5. हर दम/हर विज़ि...Every
         time/Every moment
6. हर जायि.... Everywhere
7. हर दिल ॳज़ीज़...Popular
                     Affectionate
8. हरजानॖ... Compensation
             Penalty/Damages
9. हरश..... Happiness/
             Pleasure/Delight
10. हरफ़न मौला...Jack of
             all trades/Expert
             in every art
*************************
    गीता ज्ञान  :   अध्याय-6  :
यॆमिस नॖ मन पनुन वश आसान
सु प्वरुश छु नॖ ज़ांह यूग प्रावान
यि सादनाय सॗत्य हऻसिल छु सपदान
वॊन भगॖवानन गीता ज्ञान
*************************
विजयेश्वर यानि पंडित प्रेम नाथ शास्त्री जीनि जंत्री मुतऻबिक छु पितृ पक्ष ॳज़्यकि प्यठॖ शुरु ति ज़न गव ज़ि पगाह ऒकदुहुक श्राद्द यी ॳज़्य हावनॖ। हालांकि ॳथ्य जंत्री मंज़ छु हऻविथ ज़ि पुनिम हुंद श्राद्द यीहे राथ यानि च़्वदॖश द्वह तमि हिसाबॖ छु पितृ पक्ष रातॖ प्यठय शुरु मगर हऻविथ छु ॳज़्यकि प्यठॖ। म्यॆ आयि ज़ॖ त्रे फ़ोन ति अथ मुतलक मगर बॖ मा ह्यकॖ फऻसलॖ कऺरिथ, अमा पॊज़ कॆंह बऻय छि हऻरान तॖ परेशान ज़ि पुनिम हुन्द श्राद्द किथपऻठ्य यी बऻद्रप्यथ च़्वदखश दुहुय यॆलि जंत्री हावान छि पुनिम प्यठॖ पितृ पक्ष शुरु। दपान पुनिम छि लगान च़्वदॖश दॊह शामन 5.14 बजि प्यठॖ जंत्री मुतऻबिक तॖ श्राद्द किथपऻठ्य यी हावनॖ पांच़ि बजॖ पतॖ। ताहम व्वंय छु त्वहि पानय फऻसलॖ करुन पनॖनि व्यस्तारॖ। यि आज़ऻदी छि जंत्री मुतऻबिक। या मऻनिव तऺम्यसुन्द न तॖ गव करुन पनॖनि मनॖ।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

24.09.2018

24.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष) च़्वदह (चतुर्दशी), च़न्द्रवार (सोमवार), श्री सप्तार्षि सम्वत 5094, राश मीन (दुहचि 5.14 बजि प्यठॖ), ऋतु हरुद (शरद) (चलान) द्रठपऻन्च़ुक (पंचक) (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
****************"********
1. मु: अगर च़ेर करि जल्द यी
         अगर जल्दी करि च़ीर्य
         वाति
    अ: ज़्यादॖ जल्दी करनॖ सॗत्य
         छि ख़रऻबी गछ़ान
2. मु: अगर स्यॊद कथ आसि हॊद
         बतॖ छु नॖ बोज़नॖ यिवान
  अ: जान पऻठ्य कथ बात करॖन्य
        छि ख्यावनॖ-च्यावनॖ ख्वतॖ
        जान/लोलस छु वारियाह
        म्वल
3. मु:अगरखान च़ायो गगर-वाजि
         मीजिस नॖ कॊम-यऻज
    अ: स्यठाह मॆहनत करनॖ पतॗ नॖ
          कॆंह मेलुन/मॆहनत ज़्यादॖ
          हऻसिल कम
4. मु: आमॖच़ क्वकॖर गऻमॖच़ पऺत्य
    अ: बन्योमुत चीज़ अथॖ गछ़ुन
5. मु: आम्यन पनन गन्डॖ-गन्ड
    अ: कुनि चीज़ॖच व्वमेद
*************************
1. हटॖ-कटॖ..... Stout
2. हटुन........ To get back/
              To be driven back
              To stop/To finish
3. हठ......... Shoe bite/
                   Blister
4. हठ करुन....To be shrewd
                   To stick to
5. हऺट.......A piece of wood
6. हिट ...... Kick/Hit
7. हऺट्यवस... Necklace/
             Ornament of neck
8. हऺट्य वुसुर...A disease of
                     throat
9. हुजरॖ....House/Little hut
10. हिजरथ... Migration
*************************
      गीता ज्ञान : अध्याय-6 :
       श्री भगवान वनान
कृष्ण जी वनान हे महा बाहू
बेशक़ कठ्युन मन करुन कऻबू
यि वऻराग तॖ अब्यास वश छु सपदान
वॊन भगॖवानन गीता ज्ञान
*************************
अज़ छि अन्त च़्वदह। कऺशीरि अनन्त नागॖ नागबलॖ ओस ॳज़्यकि द्वह मेलॖ ज़न लगान श्रान करनॖ विज़ि। वैसे ति ॴस्य ततिक कऻशिर्य बटॖ सुबहऻय वऺथित नागॖबलॖ श्राना-वाना कऺरिथ पतॖ मंदरस गछ़ान ध्यान-व्यान करनि। म्यॆति छु द्वयि-त्रॆयि लटि म्यूलमुत नागॖबलस मंज़ श्रान करनुक मौकॖ। बॖ ओसुस पनॖनिस ॳकिस म्यथरस निश रूज़िथ तॖ सुबहऻय नॆन्द्रि वऺथितॖय न्यूनस बॖ पानस सॗत्य नागॖबल तॖ श्रान-वान कऺरिथ वापस गरॖ कुन फेरनॖ विज़ि ॳन्य कान्दॖर्य-वानस निशि गर्म-गर्म गिरदॖ तॖ गरॖ वऻतिथ च्यॆयि म्वगॖल्य चाय गिरदस सॗत्य। वाह क्याह मज़ॖ आव। याद छि प्यवान तिम द्वह तॖ बासान ज़न स्वपनाह ह्यु। कति यिन तिम द्वह ब्यैयि फीरिथ। मगर अख तऻजिब ओस तिमन दॊहन ति ज़ि बसन प्यठ ओस लीखित आसान इस्लामाबाद। यि नाव करॖ प्यठॖ ओस तिहॖन्दिस ज़ेहनस मंज़ ज़ानि दय। के एम डी च्यन सारिनीय बसन ओस आसान बोर्डस इसलामाबाद लीखित तॖ खाल कुनि कुनि बसि ओस आसान अनन्तनाग लीखित।
लूकन तम्य वख्तॖ ॴस नॖ कांह फर्ख बासान। मगर व्वंय छु याद प्यवान ज़ि किथॖ पऻठ्य ॴसय ततिक मुसलमान बटॖ-जायन हॖन्द्य नाव बदलावनॖ बापथ बेताब। नागॖबल छु वुनि तऺती, ॳसी छि नॖ तऺति व्वंय। कर करव ब्यॆयि अकि फिरि तिथय पऻठ्य श्राना-वाना नागॖबलस प्यठ ज़ानि दय
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

23.09.2018

23.09.2018,बऻद्रप्यथ (भाद्र) ज़ूनॖ पछॖ (शुक्ल पक्ष), च़्वदह (चतुर्दशी), आथवार (रविवार/ एतवार), श्री सप्तार्षि सम्वत 5094, राश कुम्भ (चलान), ऋतु हरुद (शरद)(चलान), द्रठपऻन्च़ुक (पंचक)(चलान)...चूंकि च़्वदह छि ज़ॖ गछ़ान, ॳज़्युक वॊहरवोद यी पगाह...अज़ छु पन्न साथ ति (ॴखरी)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अखताब बालस प्यठ
         वातुन
   अ: बुजरुक पऺतिम पडाव/
        मरनांतस ताम वातुन
2. मु: अमानतस ख़यानत
    अ: बेयीमऻनी करॖन्य
3. मु: ॳम्य यारबलन वुछमॖत्य
         कऻत्याह नऺट्य
   अ: यॆम्य वारियाह खुशी तॖ ग़म
        आसन वुछमॖत्य
4. मु: अमी फ्वकॖ दज़ान च़ौंग
         अमी फ्वकॖ गछ़ान छ़्यतॖ
   अ: कुनि चीज़ुक ब्यॊन ब्यॊन
        असर
5. मु: अमी ज़्यॆवि कऺलमॖ तॖ अमी
         ज़्यॆवि राम राम
   अ: ॳकिस कथि प्यठ न दरुन
*************************
1. ह्यावुन....To make some-
                  one buy
2. हावुन..   To show/To
                  guide
3. होहराय...Noise of deep
                  breath
4. हु.......... He/That
5. ह्व........  She
6. हॊस.....  Elephant
7. ह्यडर...  Mushroom
8. ह्यडुन... To criticize
9. हॊलॖज... Measles
10. हॊछर.. Dryness
*************************
      गीता ज्ञान  : अध्याय-6  :
यि मन म्योन च़ंच़ल स्वबाव वोल
वावॖ मॊछि मंज़ रटुन छु नॖ मखोल
छु स्यठाह दॊर तॖ बलवान
वॊन भगॖवानन गीता ज्ञान
*************************
म्यानि जंत्री मुतऻबिक छु अज़ पऺतिम पन्नॖ साथ। वुनि छु यि मसलॖ अती तॖ नॊव मसलॖ गव खड़ा तॖ सु गव काम्बॖर्य पछुक मसलॖ। म्यानि यानि ओंकार नाथ जीयनि जंत्री मुतऻबिक छु काम्बॖर पछ पगहॗकि प्यठय शुरु गछ़ान हालांकि बऻद्रप्यथ मॊकलि कऻल्यक्यथ यानि मावसि द्वह या पंच़ॗहमि सितम्बर 2018 तॖ बॊम्वारि द्वह मगर पंडित ओंकार नाथ जीयुन गणित छु हावान काम्बॖर्य पछ पगहॗकि प्यठय यानि च़ॊवुहमि सितम्बरॖ प्यठय या दॊयिमि च़्वदॖश प्यठय। अश्वनी मास छु शुरु गछ़ान शतवुहमि सितम्बर प्यठ तॖ काम्बॖर्य पछ ति ओस शुरु गछ़ान अश्वनी कृष्ण पछॖ ऒकद्वह प्यठॖ मावसि ताम।मगर व्वंय बदल्यव इतिहासॖय।यूतुय योत नॖ, ग्वडॖ-ग्वडॖ अगर त्वहि याद आसिवॖ ओस काम्बॖर्य पछकि मावसि दॊहय यिवान पुनिम हुन्द श्राद्द ति हावनॖ मगर कॆंच़ॖ कालॖ प्यठॖ छु व्वंय दपान ज़ि पुनिम हुन्द श्राद्द गछ़ि युन हावनॖ बऻद्रप्यथ पुनिम दुहॖय यानि पछ ब्रौंठॖय यि कथ छॆ नॖ व्यपॖन लायक़ कॆंह ति मगर क्याह करव। नारस दिमवॖ नरि। ॳक्य ज्योतिश जियन वॊन बॊम्वार तॖ बटॖवार निषैद पन्नॖ बापथ, ब्यॆयि ज्योतिश जियन कॊड व्वंय काम्बॖर्य पुनिम श्राद्द मावसि श्राद्दॖ निशि ब्यॊन तॖ होवुन अख पछ ब्रौंठॖय यानि काम्बॖर्य पछ लगनॖ ब्रौंठॖय। तॖ लूकव ति ह्यॊत ॳछ वऺटिथ ती करुन। कुस करि फऻसलॖ ज़ि ब्रूंठिम ज्योतिश ॴस्या ग़लत किनॖ ॳज़्यिक ज्यॊतिश छि वथ डालनस प्यठ तुलेमॖत्य किनॖ शास्त्र आव नवि क़लमॖ सॗत्य लेखनॖ।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

22.09.2018

22.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष), त्रुवाह (त्रयोदशी), बटॖवार (शनिवार/ शनिश्चरवार), श्री सप्तार्षि सम्वत 5094, राश कुम्भ (सुबहॖचि 6.10 बजि प्यठॖ), ऋतु हरुद (शरद)(चलान)...द्रठॖपऻन्च़ुक (पंचक) छु शुरु ॳज़्यकि प्यठॖ
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अख बराय ख्वदा तॖ ब्यॆयि
         हऺस्तिस खऺसिथ
    अ: अपुज़ तेह हावॖन्य
2. मु: अलॖ नेरनय तालि च़्यल
   अ: ग्वडॖ प्यठय मुसीबत आसुन
3. मु: अलॖ कऺर्यतनस या वांगन
    अ: ठीक कऺर्यतन या नाकारॖ
         तथ नॖ सनुन
4. मु: अलॖ कुलिस तुलॖ कुल
    अ: ल्वकचि कथि बऺडहऻन
         करॖन्य
5. मु: अलि च़ूरस गलि चपाथ
    अ: ल्वकटॖ ख्वतॖ ल्वकटिस
         जुर्मस ति छु सज़ा प्यवान
         द्युन
*************************
1. हऻन्ज़.....A boat-man/
              Sailor/Seaman
2. हऻबथ.....Fear/Terror/
              Dread/Scare/
              Danger/Awe
3. हऻपुन.....To breath heavi
              ly/To heave/To
              wheeze/To gasp
4. हिबॖ.... Present/Gift
5. हु....... He/That
6. हपुन....To wait/To antici
                pate
7. हतख.... Disrespect/Dis-
               honour
8. हथ...... Hundred
9. हथकऺर्य...Handcuffs
10. हतॖज़ंगुल... Centipede
*************************
  गीता ज्ञान  : अध्याय-6  :
           अर्ज़नदीव वनान
अर्ज़न वनान ही मधुसॗदन युस युग समबावॖ सॗत्य कॊरवॖ वरनन
च़ंच़ल मनॖ किन्य दरुन छुम नॖ बासान
वॊन भगॖवानन गीता ज्ञान
*************************
अज़ ति छु पन्न साथ हालांकि ॳकिस यानि पंडिथ ओंकार नाथ जीयनि जंत्री मंज़ छु अज़ पन्न साथ हऻविथ तॖ पंडित पुनीत या मनमॊहन जीयनि जंत्री मंज़ छु नॖ ॳज़ पन्न साथ हऻविथ। बऺल्कि छु तथ जंत्री मंज़ तलॖकनि यिति आमुत लेखॖनॖ ज़ि बॊम्वारि तॖ बटॖवारि द्वह छु पन्न द्युन निषेध हालांकि यि कथ छॆ नॖ हटि वसॖन्य लायख ति क्याज़ि अज़ ताम छु नॖ असि कऺशीरि मंज़ या कऺशीरि न्यबर ति यि बूज़मुत ज़ि पन्न छु नॖ द्युन बॊम्वारि तॖ बटॖवारि द्वह। ताहम ॳड्य मानन तॖ ॳड्य मानन नॖ कॆंह। यॆमिस यिथ पऻठ्य वथ पकि सु करि ती। प्रथ कऻशिर्य बटस छे नॖ दॊनवय जंत्रीय। ॳकिस छि अख तॖ ब्यॆयिस छि ब्याख। दॊनॖवय पकन पनॖनि पनॖनि जंत्री मुतऻबिक। यि रोज़ि तॊत ताम यॊत ताम नॖ फऻसलॖ गछ़ि ज़ि सही कुस छु। कर सऻ म्यॊन न्याय अंदे मऻर्यमंदे मदनवारो कर सऻ म्योन न्याय अंदे।।।।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
  नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

21.09.2018

21.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष), बाह (द्वादशी), शॊकुरवार(शुक्रवार/ जुम्मा),श्री सप्तार्षि सम्वत 5094, राश मकर (चलान), ऋतु हरुद (शरद)(चलान)....
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अल्लाह अल्लाह खऻर
         सलाह
    अ: मामलॖ गव ख़तम/न्याय
         अंद्यऻव
2. मु: अलन हॖन्दि खऻरातॖ वांगनन
         सग
   अ: ॳक्यसॖन्दि फ़ऻयदुक असर
        छु ब्यॆयिस ति तरान
3. मु: अला टोसि द्वह कर लोसि
    अ: छ़्रठ दॖनिथ द्वह गुसावुन
4. मु: अलन फल तॖ न्यन्दन दानि
    अ: मॆहनतस छि मॊज़ूर्य
5. मु: अलि ति शाफ बलि ति
         शाफ
    अ: न हुथ वार तॖ न यथ वार
*************************
1. हंगामॖ...Hue and cry/Up
            roar/Disturbance
2. हंगऻमी हालात..Emergency
3. हंगदार...Relative/Kins
            man/Kith and kin
4. ह्यंग....Horn
5. हन-हन...All the pieces/
            But by bit/Every bit
            The whole of
6. हंद.. Dandelion/A green
            vegetable
7. हन्दि-पोश...Flowers of
                     Dandelion
8. हंदुर....Cold
9. हंगॖ तॖ मंगॖ.. Suddenly/All
               of a sudden/All
               at once
10. हॖनुन....To swell/To
                 inflammate
*************************
     गीता ज्ञान  :  अध्याय-6  :
युस सऻरी ज़ीव पनॖन टऻठ्य ज़ानान
सारिनी हॖन्द्य द्वख तॖ स्वख हिवी मानान
सु यूगी परम श्रेष्ठ मानॖनॖ यिवान
वॊन भगॖवानन गीता ज्ञान
*************************
नाव छु कुनुय "विजयेश्वर" जंत्री। जंत्री हॖन्दिस कवरस प्यठ छु भगवान कृष्णॖ सुन्द फोटू  ब्यॊन ब्यॊन। दपान अख छि पंडित ओंकार नाथ जीनि अथॖ आमॖच़ तयार करनॖ तॖ ब्याख छि पंडित मनमोहन जीनि अथॖ आमॖच़ तयार करनॖ। यिम द्वनवय छि अकीय क्वटम्बॖक्य मगर युहुन्द गणित छु ब्यॊन ब्यॊन। अख छु वनान म्यॆ ह्यु नॖ कांह, ब्याख छु वनान म्यॆ प्यॆठ नॖ कांह। ॳस्य कऻशिर्य बटॖ गऺयि गीर। हुम्यसुन्द मानवा किनॖ यॆम्यसुन्द मानव। यिम द्वनवय छि नॖ अख ॳकिस सॗत्य मीलिथ कुनी कथ करान। म्यॆ सूज़ ॳक्य बऻय पनॖनि जंत्री हुन्द अकि सफुक फॊटू यथ मंज़ छु हेरथ हावान त्रॆयिमि मार्च 2019 मंज़ तॖ म्यानि जंत्री मुतऻबिक छि हॆरथ यिवान च़ूर्यमि मार्च 2019। टंडॖ रूद अथ प्यठ ति। ब्यॆय ॳक्य बऻय सूज़ म्यॆ पनॖनि जंत्री हन्दि अकि सफुक फोटू यथ मंज़ हऻविथ छु ज़ि पन्न गछ़ि नॖ दिनॖ युन बॊम्वारि तॖ बटॖवारि। तम्यसॖन्दि हिसाबॖ छु नॖ पगाह यानि ज़तोवुह्यमि सितम्बरॖ पन्नॖ साथ मगर ओंकार नाथनि जंत्री मुतऻबिक छु अज़ ति तॖ पगाह ति पन्नॖ साथ। म्यॆ आयि ख़बर ज़ि पगाह ति दिन कॆंह म्यऻन्य बऻय पन्न ति क्याज़ि तिमन छि ओंकार नाथ जीयिनी जंत्री। म्यॆ करेयो ओंकार नाद जीयस फोन अथ मुतलक जवाब म्यूलुम ज़ि यि म्यॆ ल्यूखमुत छु ती छु पज़र, यि ब्यॆयिस जंत्री प्यठ छु सु छु तऺम्यसुन्द मच़र। तच़र आव लूकन ज़ि कोरकुन गछ़न। यिति बूज़ म्यॆ ग्वडनिचि लटि ज़ि बॊम्वार तॖ बटॖवार छु पन्नॖ बापथ निशेद हालांकि अख वुम्बराह द्रायि वुन्युखताम तॖ यि ओस नॖ बूज़मुत कॆंह। मंज़्य कति आव मनमोहन जियस यि नज़रि ज़ि बॊम्वार तॖ बटॖवार छि निषेद, ज़ानि दय। बटॖस पोवख ख़ामॖखा शख। अथ वनव धर्मॖच आज़ऻदी। फाटवॖतन पानॖवुन्य कलॖ। असि यि व्वंय ख्वश करि ति करव।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

20.09.2018

20.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष) काह (एकादशी), ब्रसवार (वीरवार/ बृहस्पतवार), राश मकर (चलान),ऋतु हरुद (शरद)
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार त्वहि सारिनीय म्योन माहरा
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अकि वख्तॖ प्रानॖ कुज तॖ
         ब्यॆयि वख्तॖ प्रानॖ द्यल
   अ: ॳमीरी हन्द्य द्वह तॖ ग़रीबी
         हॖन्द्य द्वह ति
2. मु: अख ज़नानॖ छि हथ लंजि
         बून्य ब्याख छि बरॖ तलॖच
         हून्य
  अ: अख ज़नान छि स्वख दिवान
        तॖ ब्याख छि द्वख दिवान
3. मु: अख डुडॖ ब्यॆयि माजि
          क्युत टोक
    अ: बेछॖ लागुन
4. मु: अख ख्वजस सॗत्य बतॖ
         ख्यॊन ब्यॆयि हा सिनिस
         कुन अथॖ न्युन
   अ: बऺडिस सॗत्य मान करॖन्य/
        बऺडिस थी नॖ ल्वकटिसुन्द
        जुर्रत करुन
5. मु: अख तॖ अख गव काह
    अ: इतिफ़ाकस मंज़ छु ताक़त
*************************
1. हमाशुमा.....Every body
2. हम सीनॖ.....Of same age
3. हम प्यालॖ- ....Companion
    हम निवालॖ     Intimate
                        friend
4. हमसूस.....Desire/Woe/
                   Remorse
5. हुमुन.... To make offer-
                 ings in yegnya
                 To sacrifice
6. हमुन... To be distressed
                To be fatigue
7. हमेशॖ... Always/Cons-
          tantly/Continuously
8. हमेशॖ बहार.... Evergreen/
           Name of a flower
           which blooms all
           round the year
9. हम शकॖल....Look alike/
           Resembling/
           Similar
10. हमवार..... Smooth/
           Even/Level
*************************
    गीता ज्ञान  : अध्याय-6  :
आत्मॖ रूप म्यॆ वासु दीवस डेंशान
ज़ीव म्यॆ सारिनॖय मंज़ वुछान
सु म्यॆ निश दूर नॖ, न बॖ तस दूर
रोज़ान
वॊन भगॖवानन गीता ज्ञान
*************************
अज़ छु ति अज़ छु नॖ ति पन्नॖ साथ (मुहूर्त)। म्यानि जंत्री मतऻबिक छु नॖ अज़ साथ। मगर कऻन्सि ॳकिस बऻयिस सॖन्ज़ि जंत्री मुतऻबिक छु अज़ पन्नॖ साथ। म्यॆ निश छि विजयेश्वर वऻल्यसॖन्ज़ जंत्री, सु म्योन बोय छु वनान ज़ि तऺमिस निश ति छि विजयेश्वर वऻल्यसॖन्ज़ जंत्री। माने विजयेश्वर वऻल्य छि जंत्री ब्यॊन-ब्यॊन छापि मच़ॖ। हॆन्दियस मंज़ छि द्वनवय छपिथ। तॆलि क्याज़ि छि यि फ़र्ख यि प्यॆयि विजयेश्वरवऻलिस प्रुछ़ुन।
उर्दूहस तॖ हॆन्दी जंत्री मंज़ छयी छॆ फ़र्ख, मगर हॆन्दियस तॖ हॆन्दियस मंज़ स्व ति अकी नामॖच यानि विजयेश्वरस मंज़ फ़र्ख यि छु तऻजिब। अम्युक मतलब गव ज़ि ॳड्य दिन पन्न तॖ ॳड्य दिन नॖ। अथ छि वनान धर्मस दरार। विश्वासगात। ॳस्य छि मजबूर।बऺहस कऺमिस सॗत्य करव। मल्लॖ छु कुनुय। पंचागॖच नाव छि तऺम्यसॖय अथि। सु नाव यीरॖ त्रावि या चीरॖ रटि तम्यसॖय ताम। असि छि सवऻर्य करॖन्य।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
  नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

19.09.2018

19.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष) दऺहम (दशमी),ब्वदवार(बुधवार), श्री सप्तार्षि सम्वत 5094, राश मकर (शामन 5.22 बजि प्यठॖ), ऋतु शरद (हरुद)..पन्नॖ साथ (मुहूर्त) छु नॖ अज़ ति
*************"******"*****
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार त्वहि सारिनीय म्योन माहरा
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अकि लटि खस्य नॖ गुरिस
         ब्यॆयि लटि पक्य नॖ पैदल
   अ: यॆमिस च़ंचल मन आसि/
        युस नॖ ॳकिस कथि प्यठ
        रोज़ि
2. मु: अख बुडॖ मेठि ब्याख बुडॖ
         ब्रेठि
    अ: ॳड्य छि बुडिथ गाटॖल्य
          बनान तॖ ॳड्य बेकॖल
3. मु: अख बऺच्यतन तॖ सासा
         मऺर्यतन
    अ: अख जान इन्सान छु सासॖ-
         बद्यव बद इन्सानव ख्वतॖ
         जान
4. मु: अखा गोमुत यीरॖ तॖ वीरि
         मंगान टंग
   अ:  मऻयूसी तॖ मॊहतऻजी मंज़
         छु न हवासॖ डंजि रोज़ान
5. मु: अकीय जन्दुक पैयवन्दॖ
    अ: ह्यिवी इन्सान
*************************
1. हमहऺस्ती हावॖन्य...To show
          superiority/To
          exhibit power
2. हम आग़ोश.... Locked in
          each other's arms
3. हम बिस्तरी....To sleep
          together/Cohabita
          tion/Copulation
4. हम पेशॖ.... Colleague (of
       the same profession)
       Engaged in the same
       trade
5. हम जमाथ.... Classmate/
                      Class fellow
6. हम ख़याल....Of the same
                        opinion
7. हमदर्दी........ Sympathy
8. हमदम........ Friend
9. हमराह/....Fellow traveler
     हमसफ़र  Co-passenger/
                    Comrade
10. हमसायि.... Neighbour
*************************
     गीता ज्ञान  :  अध्याय-6  :
समबावॖ दऺरिथ आत्मॖवोल यूगवान
सारिनी बूतन मंज़ आत्माहस वुछान
सऻरी ज़ीव आत्मऻहस मंज़ डेंशान
वॊन भगॖवानन गीता ज्ञान
*************************
आज़ऻदी मीज्य असि धर्म-कर्म करनॖच। छ़्यॊट-श्रूच़ करनॖच। पोज़-अपुज़ वनॖनॖच। हय्या-शर्म ज़ानॖनॖच। रिश्तॖ निबावनॖच। ॳस्य छि व्वंय आज़ाद। बूठ छ़ॖनिथ ॴस्य नॖ वख्तॖ अकि कमरस मंज़ अच़ान। च़ौकस मंज़ गऺयेयि नॖ कथॖय। ख्यनॖ-च्यनॖ ब्रौंठ गऺयो सन्यवार्यन त्रावुन, पतॖ कावन ख्यावुन, हून्यम्यॆट त्रावॖन्य, पथर बिहित ख्यॊन-च्यॊन, अज़ कल छि यिमन चीज़न निशि छूट। कुनि कुनि गरस मंज़ छि अज़कल हून्य ति पलान। हून्य क्याह छि पलान दफ यि दऺप्यज़ि ति अख बऻज़ छु पलान युस गर्यक्यन बऻच़न सॗत्य सॗत्य कमरन मंज़ नच़ान-फेरान रोज़ान छु। यॊदवय साईज़स मंज़ ल्वकुट आसि तॆलि छु सु खॊनि मंज़ ति ललॖनावनॖ यिवान तॖ कऻम-कार ति छु सॗत्य सॗत्य चलान। बिस्तरस मंज़ ति छु सावनॖ यिवान। ज़मानॖ बदल्यव कति कोर। ॳस्य व्वंय न छि होर तॖ न छि योर। सारिनी कथन बदल्यव मतलबॖय। पाठ-पूज़ायि, ख्यनस-च्यनस, व्वथनस-बॆहनस, तुलनस-त्रावनस, अख-ॳकिस सॗत्य वर्तावनस/रऺछ़रावनस, यिनस-गछ़नस, सौंचनस-समॖजनस। कतिनस लगि थख ति ह्यकव नॖ वऺनिथ।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
 नऺविव तॖ फोलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

18.09.2018

18.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष) नवम (नवमी),बॊम्वार (मंगलवार),श्री सप्तार्षि सम्वत 5094, राश धनु (चलान), ऋतु शरद (हरुद), अज़ ति छु नॖ पन्नॖ साथ (मुहूर्त)
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴसस मंज़ कथ शिठॖन्य
  अ: खोच़नॖ दादि कथ नॖ फोरॖन्य
2. मु: ॳकिस च़्यड ब्यॆयिस यड
         त्रॆयमिस ह्वड
   अ: ॳकिस छु सबॖर आसान
        दॊयमिस छु ख्यन-च्यन टोठ
        आसान तॖ त्रॆयमिस छु ह्वड
        करनुक आदत
3. मु: ॳकिस मॊठ नॖ लचि दोद
         ब्यॆयिस मॊठ नॖ बच्चॖ दोद
    अ: प्रथ कऻन्सि छु पनुन पनुन
         दोद च़्यतस रोज़ान
4. मु: ॳकिस मनुट पोशि नॖ दऺहन
         दऺह मन गलन नॖ
    अ: हुरिस छि बरकथ
5. मु: ॳकिस ख्वतॖ अख शॆ मन
         त्रख
    अ: अख ॳक्यसॖन्दि ख्वतॖ
          चालाख
*************************
1. हल..... Solution/Plough
2. हलम... Lap
3. हलकॖ... Light weight/
               Soft/Mild/Cheap
              Inexpensive/Area
              Group of some
               villages
4. हलाक.... Killing
5. हल-शीरी...A joint effort
6. हलॖ-हु....To cry for help
7. हलकॖ-आवाज़.... Slow
              voice/Low sound
              Mild voice/Soft
              voice
8. हलकॖ-गॖज़ा....A light food
9. हुल्ड-बऻज़ी..  Uproar/Row
                        Noise
10. हम हम करुन...To boast
               with arrogance/
                Feel proud of
*************************
     गीता ज्ञान  :  अध्याय-6  :
पापॖ रॊस यूगी छु लगातार परमॖ
आत्मॖ स्वरूपुक करान व्यच़ार
परम ब्रह्मस छु प्राप्त सपदान
वॊन भगॖवानन गीता ज्ञान
*************************
अकुय चीज़ छु अज़कल कऻशिर्य बटस निश स्व गऺयि जंत्री यथ वुछ्य वुछ्य सु पनॖनि धर्मुक आधार बनऻविथ छु पनुन दुहुक कार्यक्रम करान रोज़ान। वॊहरवोद मनावान, फाकॖ थवान, खान्दर व्वछ़ब करान, या बाकय संस्कऻरिक रिति-रिवाज पकनावान। अगर व्वंय अथ जंत्री मंज़ ति यिन ग़लत मुहूर्त हावनॖ, यि बटॖ गछ़ि क्वत? कऺमिस प्रॖछ़ि तॖ कुस बोज़्यस। अख वन्यस अख चीज़ तॖ ब्याख वन्यस ब्याख चीज़। ॳम्यसॖन्दिस विश्वासस लगि दॖनन तॖ गछ़ि परेशान। सान्यन कॆंच़न बचेमॖत्य ब्रहमन पज़ि म्यॆ बासान क़दम तुलुन तॖ यि न्याय ॳन्ज़रावुन। विजयेश्वर वऻलिस सॗत्य कथबाथ करॖन्य तॖ अथ मसलस हल छ़ान्डुन। यिम सानि संस्थायि वुन्यक्यनस चलान छि तिमन पज़ि विजयेश्वर कार्यालयस सॗत्य संपर्क करुन तॖ पनॖनि मसलुक हल प्रुछ़ुन। असि छु पनॖन्यन शुर्यॆन बुथ द्युन, तिमन ह्यॆछनावुन मगर यॊदवय किताबय ग़लत आसन तॖ ॳस क्याह ह्यॆछनावोख तॖ तिम क्याह ह्यॆछन।
हालस पकव ॳस्य तमी जंत्री हिसाबॖ य्यॊस सान्यन गरन मंज़ छि ॳछ वऺटिथ थऺविथ करव विश्वास तिमनॖय तिथियन प्यठ यिम तथ मंज़ हऻविथ छि। हालांकि ॳकिस जंत्री मंज़ छु वुहमि तऻरीखॖ पन्नुक साथ होवमुत तॖ ॳकिस मंज़ छु नॖ। धर्मॖच आज़ऻदी मऻनिथ कऺर्यतव यॆमिस यि ख्वश करि। वतॖहावुकॖय अगर वति रोवमुत छु, ब्यॆयिस क्याह हावि वथ।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*****"*******************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

17.09.2018

17.09.2018, बऻद्रप्यथ (भाद्र),ज़ूनॖ पछॖ (शुक्ल पक्ष), ॴठम (अष्टमी), च़न्द्रवार (सोमवार), श्री सप्तार्षि सम्वत 5094, राश धनु (चलान), ऋतु शरद (ॳज़्यकि प्यठॖ)...अज़ छु नॖ पन्नॖ साथ...अज़ छि गंगॖ-ॴठम/शारदाष्टमी ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴसस मंज़ॖय अथॖ थवुन
    अ: ख्यनस नॖ थख करुन/
             ख्यवान रोज़ुन
2. मु: ॳकिस दज़ान दऻर ब्याख
         वुशनावान अथॖ
    अ: ॳकिस गछ़ान न्वकसान तॖ
         ब्याख छुस वुछान
3. मु: ॳकिस ॳछ सॊरमॖ ॳकिस
         ॳछ नीलॖथ्वथ
   अ: द्वन मंज़ फरॖख गन्ज़रॖन्य/
        ज़ॖ नज़रॖ करनि
4. मु: अकी वानॖ नून तील
    अ: अकुय वसीलॖ आसुन
5. मु: अकीय नालॖ ज़ऺट कडॖन्य
  अ: अख-ॳकिस लऻरिथ आसुन
      जऻनी यारज़/ब्यॆन नॖ आसॖन्य
*************************
1. हवऻयी.....By air/Airy/Per
               training to air/
               Moving in air/
               False/Invalid
2. हवऻयी जहाज़...An aero-
              plains, an airship
3. हवऻयी ख़बर... Rumour
4.  हवा...Air/Wind/Breeze/
              Atmosphere
5. हवस.....Desire/Greed/
              Lust/False love/
              Pseudo passion
6. हावस.....Will show
7. हवादार....Airy
8. हवा बदलुन....To go for a
           change/To change
           condition
9. हवा खुरी.... Walk/A stroll
10. हवानवा..... Conditions
*************************
  गीता ज्ञान  : अध्याय-6  :
यिहॖन्द्य मन पापॖ रॊस तॖ शांत आसन
रजूगन गोमुत समाप्त आसन
सु यूगी ब्रह्म आनन्द प्रावान
वॊन भगॖवानन गीता ज्ञान
*************************
ॳस्य छि आज़ाद। सानि धार्मिक किताबॖ ति ह्यच़न छपनि पनॖनि पनॖनि अंदाज़ॖ। कॆच़व संस्थायव छि पनॖनि पनॖनि संस्थायि दऺस्य नित्य पाठ-पूज़ा बापथ किताबॖ छपवायमच़ॖ। मगर यॆलि द्वन किताबन मंज़ अकुय पाठ परनस तल यिवान छु तॖ हऻरऻनी छि गछ़ान यि वुछिथ ज़ि कुनि-कुनि जायि छु अकुय पाठ ब्यॊन-ब्यॊन बासान। यि गयि संस्थायन हॖन्ज़ हालथ, व्वंय अगर वुछव विजयेश्वरी जंत्री कुन, परनवोल छु परेशान गछ़ान ज़ि विजयेश्वरचि जंत्री मंज़ॖय छि ज़मीन-आसमानॖच फरॖख कुनि-कुनि जायि। ति ज़न गव ज़ि ऊतरॖ ल्यूख म्यॆ ज़ि पन्नॖ साथ छु पन्दऻहमि सितम्बरॖ ति। यि साथ वुछ म्यॆ पनॖनि जंत्री वुछिथ। तमी सातॖ सूज़ म्यऻन ॳक्य बऻय पनॖनि जंत्री मंज़कि अकि सफ़ुक फोटू व्हाटसापस प्यठ यथ मंज़ पन्नॖ मुहूर्त पंदॖहऻमि सितम्बर 2018 छुयी नॖ हऻविथ। तथ मंज़ छु वुह्यम्युक साथ हऻविथ तॖ म्यानि जंत्री मंज़ छु नॖ वुह्यम्युक साथ दिथ। जंत्री छि ह्यॆन्दियस मंज़ तऺम्यसॖन्ज़ ति तॖ म्यऻन्य ति। विजयेश्वर जंत्री तऺम्यसॖन्ज़ ति तॖ म्यऻन्य ति। म्यॆति सूज़ तऺमिस बऻयिस पनॖनि जंत्री मंज़कि तमि सफुक फोटू व्हाटसापस प्यठ यथ प्यठ पंदहऻयम्युक साथ छु हऻविथ। य्यॊस जंत्री ॳस्य छि अज़कल मानान अख वतॖहावक, तमी जंत्री ह्यॆत्य ॳस्य कऻशिर्य बटॖ दु-च़्यॆतिस मंज़ त्रावॖन्य। अमि दऺस्य ति ह्यॆच़ॖन असि वथ रावॖन्य। मगर असि छि धर्मॖच ति आज़ऻदी। कुस कऺमिस क्याह वनि कथ मुतलक वनि। वनॖनस छु नॖ वार या व्यस्तार। सान्यन ज़ानन वाल्यन बायन छु ना फ़र्ज़ बनान ज़ि विजयेश्वर वोल बुलावुन तॖ तऺमिस ब्रौंह कनि यिम ग़लती थावनि तॖ तऺम्यसॖन्ज़ राय ज़ानॖन।
कुस करि फऻसलॖ? व्वंय ह्यॊतुन असि जंत्री प्यठॖ ति विश्वास व्वथुन म्यॆ बासान
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

15.09.2018

15.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष), शॆयम (षष्ठी), बटॖवार (शनिवार/ शनिश्चरवार),श्री सप्तार्षि सम्वत 5094, राश वृश्चिक (चलान), ऋतु वर्षा (चलान)...अज़ ति छु पन्नॖ साथ...
*************************
जे के विचार मंचॖ तरफॖ छुस बॖ त्वहि सारिनीय यछ़ान
         ऒरज़ुव तॖ दॊरकॊठ
*************************
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴशनाव गव पोशनाव
    अ: ॴशनऻवी छि तॊत ताम
         यॊत ताम रऺछ़रावव
2. मु: अकि कनॖ बोज़ुं तॖ ब्यॆयि
         कनॖ त्रावुन
  अ: कथ बूज़िथ तथ प्यठ अमल
         न करॖन्य/कनॖ डॊल द्युन
3. मु: अकि बालॖ खारुन तॖ ब्यॆयि
         बालॖ वालुन
   अ: कऻन्सि कॆंह वऺन्य-वऺन्य स्यठा
     व्वलग्वतॖन्य दिन्य/श्रौंग वनॖन्य
4. मु: अकऻल्य पोश तॖ क्वकऻल्य
         दर्शुन
   ॶ: बे-मोकॖ कॆंह चीज़ सपदुन
5. मु: आहऻम तॖ ऒनथम क्याह
         यिमय तॖ ख्यावहऻम कयाह
    अ: रटनॖच हऻल तॖ दिनस नॖ
          व्वंदॖ/ख्वदगर्ज़ी हावॖन्य
*************************
1. होग...False news/Noise
             Rumour
2. होग गछ़ॖन्य.. Spreading of
                false news
3. होरॖ योर...Here and there
                  Right and left/
          Wander/Hither and
          thither/To and fro/
          On all sides
4. हॊखय..... Drought
5. हॊखॖ-फल...Dry fruit
6. होलनाक.. Fearful/Fright-
                   ful/Dangerous
7. होवॖर्य-बाय...Wife's bro-
                   ther's wife
8. होवॖर्य-गरॖ.In laws/Wife's
                   parents home
9. हॊंड...... Sheep
10. हॊखॖर....She calf
*************************
     गीता ज्ञान :अध्याय-6  :
यि डंजि नॖ रोज़न वोल च़ंच़ल मन
वॆशयव पॊछॖय सम्सारस फेरान
ओर योर रोकुन कर ईश्वर ध्यान
वॊन भगॖवानन गीता ज्ञान
*************************
असि छि आज़ऻदी। पन्नॖ बापथ युस ओट कान्दरस दऺस्य यी मांडनावॖनॖ या नोकरन दऺस्य यी मांडनावॖनॖ तमि ख्वतॖ छु ना जान ज़ि कान्दरसॖय वॊन ज़ि रोठ बनऻविथ थवि तॖ तिमय ॳन्य तॖ वरतऻव्य। अड्यव म्यान्यव बायव-ब्यॆन्यव ह्यॆत्य स्यॆदी पूर्य बनावॖन्य तॖ द्युतुख तिमन रोठुक नाव तॖ रूद्य ख्वश तऺथ्य मंज़। पाबंदी छॆ नॖ कुनिच। ॳस्य छि आज़ाद व्वंय अमि दऺस्य ति। पन्नॖ कथ ति ह्यॆच़न बदलॖन वारॖ-वारॖ। स्वामी कुमार जीयनि तॖ म्यानि माजि हॖन्ज़ि पन्न कथि मंज़ बास्येयम ज़मीन्-आसमानॖच फ़र्ख। मगर पऺज़ कथ क्याह छि अम्युक फ़ऻसलि कुस करि। कऺशीरि मंज़ ॴस्य लगान च़ोर-पांछ़ द्वह पन्नुक नवीद अंगन ॴश्यनावन ताम वातनावनस। रस्तॖ ओस लगान। बासान ओस ज़ि कऻशिर्य-बटव छु पन्न द्युतमुत।
पांच़न सतन दॊहन ओस कान्दुर ति राहत करान ति क्याज़ि गरस मंज़ बन्येमॖत्य रोठ ॴस्य पोशान तीतिस कालस। ग्यवॖ रोट, तावि रोठ, ॴस्य रोज़ान चलान। कोर्यन ॴस्य रोठ सोज़ान, न्वश्यन हॖन्द्य रोठ ॴस्य वातान। अथ सिलसिलस मंज़ ति व्वंय स्यठाह बदलाव। दूर्यॆर लॊग यूत ज़ि अख ॳकिस निश वातुन छु मुहाल। कऺशीरि न्यबर नीरिथ गव असि हालस बे-हाल। समिथ गरन मंज़ ओस यिवान पन्न पर्वॖ मनावनॖ। अज़ छु अख गरॖ च़्वन गरन तॖ च़्वन ब्यॊन-ब्यॊन जायन तॖ पन्न कुस कथ जायि दी, ज़िठिस निश दिया, ॳक्यसॖय जायि दिया, ब्यॊन-ब्यॊन दिया, कुस करि फ़ऻसलॖ। व्वंय छि अमि रंग्य ति आज़ऻदी यॆमिस यिथॖपऻठ्य व्यस्तार यी। सोरुय छु ठीख। वुछनवोल कुस छु, वननवोल कुस छु। प्रॖछ़नवोल कुस छु। पन्नॖच रस्म कोत ताम पकि यॆमि ब्रौंहकुन, दय ज़ानि
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
 नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

14.09.2018

14.09.2018, बऻद्रप्यथ भाद्र ज़ूनॖ पछॖ (शुक्ल पक्ष), पऻन्च़म (पंचमी), शॊकुरवार (शुक्रवार/ जुम्मा), श्री सप्तार्षि सम्वत 5094, राश वृश्चिक (शामन 7.13 बजि प्यठॖ), ऋतु वर्षा (चलान)...
अज़ छि कुमारॖ शॆयम ति....
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴलि मंज़ रौंग
    अ: सु शख्स युस कॆंह ब्यॊन
         तॖ सख्त कऻम करान
2. मु: आयेयि वऻनिस तॖ गऺयि
         कान्दरस
   अ: यस यि नसीबॖ आसि तस
         ति छु वातान
3. मु: अफ़ज़लन च्यॆयि बंगॖ तॖ
         चिल्यमि ख्वत कऻन्फ
   अ: कऺम्य ताम कॊर अतुर तॖ
        कुस ताम लॊग बऺल्य/
        ॳक्यसुन्द बजर ब्याख
        थ्यकॖनावान
4. मु: अफ़ज़ल ज़ानि तॖ क़यामत
        ज़ानि
    अ: यस ज़िमॖवऻरी आसि सु
         वालि नखॖ
5. मु: असलस छु ज़ाफ़
   अ: स्यज़रस छु खुर
*************************
1. ह्यॊत-द्यॊत.... Dowry
2. हॊतॖमुत....... Rotten
3. हॊगाड.........Dry-fish
4. हॊखॖस्युन...Dry vegetable
5. हूबहू...... Resembling/
                   Exact/Similar
6. हॊमरावुन...To pacify/To
                  mild/To quiet
7. हॊंगॖन्य रटॖन्य...To make a
                         request
8. हॊंगॖन्य...........Chin
9. हॊनरमंद.....Artist/Skillful
                     Meritorious
10. हॊनर.......Art/Craft/
                     Skill/Talent
*************************
    गीता ज्ञान : अध्याय-6  :
वारॖ वारॖ कर अब्यास ह्यमथ थव
सबरॖ सान ब्रह्मस मंज़ मन दऺरॖराव
दयस रॊस नॖ कऻन्सि रोज़ स्वरान
वॊन भगॖवानन गीता ज्ञान
*************************
असि छि पूरॖ पूरॖ आज़ऻदी। धर्मॖच, कर्मॖच, ख्यनॖच, च्यनॖच, फ़ाकॖ थवनॖच, न थवनॖच, पनॖन फ़ाकॖ, पर-धर्मॖक्य फ़ाकॖ। पाबंदी छे नॖ कुनिच या ह्यकव वऺनिथ ज़ि वुछन वोल छु नॖ कांह, ह्यॆछनावन वोल छु नॖ कांह, प्रॖछ़नवोल छु न कांह। ज़ाननवऻल्य छि सऻरीय मगर ज़ाननवोल नॖ कांह। इस्लिये छि असि पूरॖ आज़ऻदी। जान छा या न बॖ ह्यकनॖ यि फऻसलॖ कऺरिथ। मगर पनॖनिस समाजस मंज़ बदलाव वुछ्य वुछ्य छुस बॖ सौंचान ज़ि म्यॆ क्वस वथ पज़ि पनॖन्यन शुर्यन-कट्यन हावॖन्य, म्यॆ आव नॖ समजाह कॆंह। हालांकि बॖ प्योस आसमानॖ राथ यॆलि म्यॆ बूज़ ज़ि पन्नुक-ओट मांडनावॖनॖ बापथ छु कऺम्यतान्य म्यऻन्य बऻय या ब्यॆनि सथ-हथ रॊपियि दिच़ॖमच़ॖ ॳकिस कान्दरस तॖ अदॖ नवीद बनोवमुत। वुनि वऻच़ॖय यऻच़ यि ख़बर म्यॆ ज़ि ब्यॆयि तरफ़ॖ बूज़ुम ज़ि म्यॆ अख ब्यॆनि वनान ज़ि आहन माहरा व्वंय कति छि नर्यन स्व ह्यकथ तॖ ओट मांडव। तमि ब्यॆनि वॊन ज़ि सिरिफ नवीदकुय योत ओट छि स्व पानॖ मांडान तॖ बाकय ओट छि स्व पनॖन्यन नोकरन अथि मांडनावान। मरहबा छु असि यि बदलाव अनॖनॖ बापथ पनॖनिस समाजस मंज़। असि वोत मोबायलस प्यठ सोज़ान अख ॳकिस विनायक च़ोरम हुन्द पोश्तॗ। ॳक्य बऻय प्रुछ़ म्यॆ ज़ि गणॖ-च़्वदुश द्वह या संकट-च़ोरम द्वह क्याज़ि छि नॖ ॳस्य अख ॳकिस पोश्तॖ करान, हालांकि तिम द्वह ति छि महागणेश जीयनि द्वह। म्यॆ सूज़ तमिस जवाब ज़ि असि छि आज़ऻदी। कऺमिस करव पोश्तॖ या कऺमिस करव नॖ। कथ जि जऻरी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

13.09.2018

13.09.2018,बऻद्रप्यथ (भाद्र), ज़ूनॖ पछॖ (शुक्ल पक्ष), च़ोरम (चुतुर्थी), ब्रसवार (वीरवार/ बृहस्पतवार),श्री सप्तार्षि सम्वत 5094, राश तुला (चलान), ऋतु (वर्षा)(चलान), अज़ छि विनायक च़ॊरम...अज़ ति छु पन्नॖ साथ
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार त्वहि सारिनीय माहरा म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴमिस पनस दरॖ दरॖ
    अ: कमज़ोर इन्सानस सॗत्य हर
         च़ुवॖन्य माने लडऻय करॖन्य
2. मु:ॴसस मज़ॖ तॖ यॆड वॖज़ॖ वॖज़ॖ
    अ: सु चीज़ यस ख्यनॖ खऻतरॖ
         मज़दार आसि मगर सेहतॖ
         खऻतरॖ आसि ख़राब
3. मु: अछ़ खचि मंज़स
    अ: कऻन्सॖ हॖन्दिस माम्लस मंज़
         बऺल्य दख़ॖल द्युन
4. मु: अज़ न तॖ अदॖ कर
    अ: वख्त नॖ ज़ायि करुन/
         वख्तॖच क़दॖर करॖन्य
5. मु: अज़मोवमुत गव पथर
         पोवमुत
   अ: ज़ोनॖमुत गव ज़्यूनमुत
*************************
1. हिवुय..... Similar/Same-
               ness/Likeness/
               Similarity
2. ह्यमॖ...     Beans
3. ह्यन्दव्यन्द.... Watermelon
4. ह्युक...... Hiccup
5. हॊख...... Dry
6. ह्यॆजि..... Spelling
7. ह्यस .....  Conscious
8. ह्यसॖ...... Carefully/With
             full mind and soul
9. हिसॖ...... Share/Part
10. हेर....Staircase/Ladder
               Step
*************************
     गीता ज्ञान :अध्याय-6 :
सऻरी संकल्प तॖ कामनायि त्यऻगिथ
सारेय यऺन्द्रयि प्रथ तरफ़ॖ रूकिथ
ठीख पऻठ्य रोज़ि अब्यास करान
वॊन भगॖवानन गीता ज्ञान
*************************
असि छि आज़ऻदी। म्यॆ छु अज़ ति कनन गछ़ान पनॖनि ब्यॆनि हुन्द रामायण बोज़नावुन युस तऺमिस ज़्यॆवि-पॆतिस प्यठ याद ओस। स्वर्गस ॴस्यनस व्वंय जाय। ज़्यादॖ ओसुन नॖ पॊरमुत, बस ॷठिमि तामथ ओसुन पॊरमुत मगर भगवद्-गीताय हॖन्ज़ॖ अरदाहवय अध्यायि, पंचस्तवी, भवऻनी सहस्रनाम ओस तस ज़बऻन्य प्यठ। म्यानि माता श्री ति ओस कऻशुर रामायण ज़बऻन्य याद तॖ बोज़नावान ॴस। बॖ ओसुस स्यठा ल्वकुट तिमन दॊहन म्यॆ ॴस नॖ अमिच ब्वया कॆंह। अल्बतॖ बोज़ान ओसुस यॆलि-तॆलि मॊकॖ म्यॆलिहे। मगर ज़्वन छुम ज़ि सान्यन ज़िठ्यन ॴस्य यिम ज़ॖ-त्रॆ चीज़ ज़बऻन्य प्यठ। माज्यन ओस वनवुन ति आसान ज़बऻनी याद। अज़कल सानि ज़ऻच़ मंज़ कऻत्यहान छि यिम चीज़ ज़बऻन्य याद, म्यॆ गव नॖ पत्यम्यव त्रॖहव-च़दजिहव वऺरियव प्यठॖ त्युथ कांह नज़रि। आसि मा कांह ख्वशकॖस्मत यॆमिस यिम मंत्र, वनवुन, गीता जी, रामायण, भवऻनी सहस्नाम, पंचस्तवी, इन्द्राक्क्षी ज़बऻन्य याद आसि।मगर नज़र आम नॖ कांह। बॖति रूदुस हालातन सॗत्य सॗत्य यिमन चीज़न निशि स्यठाह दूर। यूत याद ओस सु ति ह्यॊतुन मशुन। बॖ ओसुस ल्वकचारस पाठशालायि गछ़ान। द्वन-आनन ॴस ल्वकॖट भगवद्-गीता यिवान तॖ ॴस्य तति परनावान। ब्यॆयि ओस सु ब्रह्मा जी ह्यॆछनावान संस्कार। अदॖ सु पॊरॖमुत छु याद वुन्युखताम तॖ तिमन संस्कारन हुन्द असर छु वुन्युखताम मगर सऻन्य शुर्य छि यिमव चीज़व बापथ करान अरॖसरॖ। तिम ज़िठ्य रूद्य नॖ, तिम ह्यॆछनावन-वऻल्य नॖ कुनीय । छुट छि व्वंय प्रथ तरफ़। असि छि आज़ऻदी ज़ि ॳस्य ह्यॆछिवा या न ह्यॆछव। पाबंदी छे नॖ कांह। कथ जि जऻरी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

12.09.2018

12.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष) त्रय (तृतीय), ब्वदवार (बुधवार), श्री सप्तार्षि सम्वत 5094, राश तुला (दुहचि 1.30 बजि प्यठॖ), ऋतु वर्षा (चलान), अज़ छि हरितालिका त्रय तॖ ॳज़्यकि प्यठॖ छि पन्न साथ शुरु
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴमिस द्वदस सॗत्य दब दब
    अ: कमज़ोरस सॗत्य लडऻय
         मऺल्य ह्यॆन्य
2. मु: असलुक रॖच़र दर्शुन मूजूद
    अ: ज़ुव ऒर तॖ जहान् ऒर
3. मु: असि नय तॖ लसि किथॖ
    अ: मुश्किलन मंज़ ति छु
         प्यवान ख्वश रोज़ुन
4. मु: ॴसॖम क्वलॖया मोसूम छम
    अ: पनॖनि ज़नानि हॖन्ज़ि
         सादगी हज़ल करुन/पनॖन
         नाबकऻरी बयान् करॖन्य
5. मु: असल असल मूद्य बाकय
         फ़िच़ऻल्य रूद्य
   अ: कमज़ाथ बारसस यिन्य
*************************
1. हर तुलॖन्य...To pick a
                     quarrel
2. होर गछ़ुन...To go there
3. हारुन........To lose
4. हून.......... Dog
5. ह्यॊन........ To buy/To
                  start/To feel
6. ह्यॊर...Up/On/At/Upon/
             Over/Above/High
7. ह्युहुर..... Father-in-law
8. ह्यदायथ....Instruction/
           Guidance/Counsel
9. ह्यकन-वोल... Strong per-
            son/Powerful/
            Might
10. ह्यल....Dirt/Mud/Mire
*************************
गीता ज्ञान  :  अध्याय-6  :
द्वखॖ रूपी सम्सारॖकि संयोग रॊस
ॳथ्य वनान यूग सुय ज़ानान युस
कर्तव्य मऻनिथ करान उत्साह सान
वॊन भगॖवानन गीता ज्ञान
*************************
आज़ऻदी छि असि प्रथ रंगॖ। गरस मंज़ पाठ-पूज़ा करव या न करव पाबंदी छॆ नॖ। हालांकि कऺशीरि मंज़ यॊताम म्यॆ ख़याल छु ओस प्रथ ॳकिस गरस मंज़ ठोकुर-कुठ आसान तॖ सऻन्य ज़िठ्य ॴस्य अति पाठ-पूज़ा करान। गरिक्य बाकय बऻच़ कोताह ॴस्य पाठ पूज़ायि मंज़ लीन रोज़ान, यि वनुन छु स्यठाह मुश्किल। कऺशीरि न्यबर ति छु असि हर गरस मंज़ ल्वकुट-म्वकुट मंदर थोवॖमुत।मगर सान्यन शुर्यन कऻच़ाह फुर्सथ छि अथ मंदरस मंज़ पाठ-पूज़ा करनॖ बापथ, यि वनुन ति छु मुश्किल। अल्बतॖ बड्यन दॊहन प्यठ छि यिम मंदर प्रथ गरस मंज़ शोलवुन्य नज़र यिवान। वननुक मतलब छु म्यॊन ज़ि असि छॆ नॖ पाबंदी थऻवमॖच़ ज़ि पाठ पूज़ा छु करुनॖय करुन। मुसलमान शुर्यन छि कुरान/कऺल्यमॖ परनॖ बापथ मदरसन मंज़ सोज़ान रोज़ान मगर असि बटन मंज़ छॆ नॖ यिछ़ हिश्य कांह व्यवस्था म्यॆ बासान। सान्यव शुर्यव ति छु यी ज़ोनमुत ज़ि पाठ-पूज़ा ह्यॆछुन छु नॖ ज़्यादॖ ज़रूरी। यि छु ननान असि प्रथ तथ जायि यॆति सामूहिक आरती आसि, बजन-कीर्तन आसि। प्रोन त्वमुल छु वुनि मॊदुर, नॊव त्वमुल छु वुनि स्यठाह ऒदुर। कथ छि जऻरी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

11.09.2018

11.09.2018, बऻद्रप्यथ (भाद्र) ज़ूनॖ पछॖ (शुक्ल पक्ष), द्वय (द्विती), बॊम्वार (मंगलवार), श्री सप्तार्षि सम्वत 5094, राश कन्या (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु : ॴबन पेयियन गऻबॖच
          बलाय, मंदछि पतॖ छय
          ख़जालथ
   अ: सु शख्स यॆम शर्म आसि
        बुज़िथ ख्येमॖच़
2. मु: आसमानस सॗत्य बुज़्य-
         बुज़्य गाडॖ ख्यॆनि
   अ: तक्कबुर आसुन/थद्यन
         गुर्यन खसुन
3. मु: आसमानॖ वसिथ बुतरऻच़
         दब
   अ:अकि बलायि तलॖ म्वकलिथ
        ब्यॆयिस तल लगुन
4. मु: आसुन छु ह्यॆछनावान तॖ न
         आसुन छु मंदछावान
   अ: द्यार आसॖनॖ सॗत्य छि अथ-
         वथ/ग़रीबी छि ख़जालथ
5. मु: असुन गेलुन पानस मेलुन
    अ: ब्यॆयिस ह्यडुन छु पानस
         बऺनिथ यिवान
*************************
1. यॆच़कऻल्य...After a long
                     time
2. यछ़.... Appetite/Will/
              View/Intention
3. यछ़ुन....To desire/To
               wish/To want/
               To propose
4. यछ़-पछ़....Beliefe/Hope/
               Trust/Support/
               Confidence/
               Assurance
5. यसलॖ....Fully/Countless
                Innumerable/
                Often
6. यसास कमत्री.... Inferiority
                            complex
7. युस......Who/Which one
8. यश.....Fame/Greatness
              Reputation/Glory
              Character/Splen-
              dor/Renown
9. यक़बाल.....Luck/Dignity
              Eminence/Power
              Good fortune/
              Acceptance
10. यक़रार..... Agreement/
              Promise/Assuran
              ce/Acknowledge-
              men
*************************
गीता ज्ञान :  अध्याय-6  :
पर्मॖ ब्रह्मॖ प्रावुन बॊड लाब ज़ान
अमि थॊद ब्यॆयि कॆंह छु नॖ ज़ानान
कुनि ति द्वखॖ छु नॖ सपदान परेशान
वॊन भगॖवानन गीता ज्ञान
*************************
असि छि आज़ऻदी। प्रथ रंगॖ आज़ऻदी। म्यॆ छु प्यवान याद कऺशीरि मंज़ ओस आसान प्रथ बटॖ गरस अख म्यॆच़ि-खॊत, याम अथ लगिहे बूटस, फीतस, दालस, सऻन्य ज़िठ्य ॴस्य आसान पतय ज़ि अथॖ छल म्यॆच़ि सॗत्य। लॊयवॖस थालस मंज़ ॴस्य बतॖ रटान तॖ चौकि या पीरि प्यठ ॴस्य थाल थवान तॖ बतॖ ख्यवान। लॊयवॖस खऻसिस मंज़ ॴस्य म्वगॖल्य चाय या कऺहवॖ च्यवान तॖ खोस आसिहे या कॆंज़ि खोस आसिहे यि ॴस्य रटान फ्यरनॖ नऺरिस प्यठ या कुनि दजि या तौलियायि प्यठ। फुल्कॖ या कान्दॖर्य-वानॖच च़ॊट ॴस्य रटान दजि सॗत्य या फ्यरनॖ-नरि सॗत्य। यि गयो श्रुच़्य-पऻठ्य ख्यॊन। बतॖ ख्यनॖ ब्रौंठ ग्वडॖ हून्य-म्यॆट त्रावान। अथ सॊरशावान। मगर वख्तस सॗत्य सॗत्य प्यव असि ति बदलुन। खऻस्य गऺयि गऻब, लॊयिव थालव ह्यॊत लॊब, म्यॆच़ि खॊत ह्यॊतुन गछ़ुन नाबूद। चौकि हॖन्ज़ जाय रऺट प्लास्टिक शीटन या डाईनिंग टेब्लन, खास्यव बदलॖ आयि कप, मग, बेतरी। वारिहास कालस ओस नॖ सान्यन ज़िठ्यन कपस मंज़ चाय च्यनस वारॖय मगर हालातन सॗत्य सॗत्य प्यव पकुन तॖ प्रोन प्यव मऺशरावुन। म्यॆ छु वुनि ज़्वन ज़ि कॆंह सऻन्य ज़िठ्य ॴस्य आदतॖ मूजूब कप ति रटान दजि सॗत्य या तौलियायि प्यठ। बूटस या दालस अथॖ लऻगिथ पतॖ म्यॆच़ि सॗत्य अथॖ छलुन तॖ श्रुच़ करुन ब्यूठ लबि ताकस। यि करनॖ बापथ ह्यॆतिख कॖसॖ करॖन काकॖनि ति तॖ काकस। काक तॖ काकॖन्य क्याह करि नरि दिया नारस। सऻरीय पकान पानस पानस। कथ जि जऻरी।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

10.09.2018

10.09.2018, बऻद्रप्यथ (भाद्र), ज़ूनॖ पछॖ (शुक्ल पक्ष), ऒक्दॊह (प्रथमा/ प्रतिपदा), च़न्द्रवार (सोमवार), श्री सप्तार्षि सम्वत 5094, राश कन्या (दुहचि 11.8 बजि प्यठॖ), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॴब पनुन माशोख
    अ: इन्सानस पनॖन ॴब ख्वश
         करान
2. मु:ॳछव ख्वरव हावुन
    अ: इशारॖ द्युन/च़ेनवॖन्य
3. मु: ॳछन हुन्द गाश
    अ: स्यठाह टोठ आसुन
4. मु: ॳछन म्यॆच़ प्यॆन
    अ: बद-लिहाज़ॖ आसुन
5. मु: ॳछन मंज़ न आब रोज़ुन
    अ: लिहाज़ॖ नॖ रोज़ुन
*************************
1. यपुन.....To digest
2. यापुन.... To adjust
3. याद .....  To remember
4. याद पावुन....To remind
5. यारि कुल.....Pine tree
6. याशा.... Suddenly/All of
             a sudden/At once
             With the name of
             God
7. यब/यब.....Going back/
     करुन    Retract/To deny
8. इतिमिनान... Confidence/
             Satisfaction/Ease
              Comfort
9. यिथॖ तिथॖ...Somehow/By
             hook or by crook
10. यख़लाक... Character/
             Manners/Virtues
             Morality/Disposi
             tion
*************************
  गीता ज्ञान  : अध्याय-6  :
निर्मल ब्वज़ॖ परम आनन्द प्रावान
यथ अवस्थायि मंज़ अनुबव करान
ब्रह्म रूपस मंज़ दऺरिथ रोज़ान
वॊन भगॖवानन गीता ज्ञान
*************************
असि छु पनुन धर्म बासान अख आज़ाद धर्म ह्यु या असि छु बनोवमुत यि धर्म आज़ाद पानॖ आज़ाद। यॊदवय वुछव तॖ धर्म गव फ़र्ज़ यानि पनुन फ़र्ज़ निबावुन। फ़र्ज़ गव क्याह? यि विषय छु स्यठाह बॊड। छ़ॊटॖरऻविथ छि ॳस्य धर्म पनॖनि पाठ-पूज़ायि सॗत्य जोडान, पनॖन्यन संस्कारन सॗत्य जोडान वगैरा वगैरा। अज़ छि करान ॳस्य अमिचि आज़ऻदी हॖन्ज़ कथ। ॳस्य मन्दरस गछ़व या न गछ़व, कांह पाबन्दी छॆ नॖ, असि यॆमिस दीवी-दीवतासॖन्ज़ पूज़ा ख्वश करि करॖन्य, पाबन्दी छॆ नॖ। ॳस्य छि कऻन्सि ति भगवानसुन्द दरजि दिवान, पाबन्दी छॆ नॖ। ॳस्य कांह ति पाठ, कांह ति पूज़ा कुनि जायि ति ह्यकव कऺरिथ, पाबन्दी छॆ नॖ। ॳस्य ह्यकव कुनि ति श्रुच़ या छ़्यॊट मऻनिथ, पाबन्दी छॆ नॖ। यानि मुक्कमल तौर पऻठ्य छि असि पनॖनि धर्मॖच आज़ऻदी, य्यॊस नॖ बाकयन मज़हबन मंज़ नज़रि यिवान छि। यि ति छु अख वजह म्यॆ बासान बिखरावुक या ब्यॊन ब्यॊन रोज़नुक असि पनॖनिस समाजस मंज़ या सऻरसीय हिन्दू धर्मस मंज़। ॳस्य छि गोपी नाथ जियस भगवानसुन्द दरजि दिवान, पज़्या द्युन या न पज़्या द्युन अम्युक फऻसलॖ कुस करि, शंकराचारियाहन वॊन पतिमि लटि ज़ि साईं बाबाहस मॖ करिव पूज़ा या साईं बाबा मॖ मऻन्यून मगर असीय मंज़ छि तिम ति यिम ॳमिस सॗत्य नालो-नाल छि, पज़्याह रोज़ुन या न पज़्याह रोज़ुन कुस करि फऻसलॖ। यिथीय छि सासॖ-बऺद्य मसलॖ मगर कांह अख फऻसलॖ छुनॖ नज़रि यिवान। यॆमिस यपऻर्य वथ यी सु तपऻर्य पकान। कथ छि जऻरी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

09.09.2018

09.09.2018, बऻद्रप्यथ (भाद्र),गटॖ पछॖ (कृष्ण पक्ष), मावस (अमावस्या), आथवार (रविवार/ एतवार), श्री सप्तार्षि सम्वत 5094, राश सिंह (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
    ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳलिम बे-अमल गोया कि
         ॳन्य सॖन्दिस अथस मशाल
  अ: ज्ञान गछ़ि ब्यॆयिसॖन्दि फऻयदॖ
       बापथ बऻगरावुन
2. मु:ॳछन ब्वछि
   अ: तमाह/कुनि चीज़ॖच बऺल्य
        त्रॆशना आसॖन्य
3. मु: ॳछ लागय
    अ: दुश्मनुत/शुत्रथ
4. मु: ॳछन पचि-फ्युर
    अ: बिल्कुल बदलुन/लिहाज़ॖ नॖ
         रोज़ुन
5. मु: ॳछ पूर तॖ बलाय दूर
    अ: ज़ुव रूज़्यनय ऒर तॖ
          रीज़ॖक़ बऺनिनय स्यठाह
*************************
1. यवॖ...... Yesterday
2. यावॖ..... Beautiful/Lovely
            Handsome/Pretty
3. यावुन...Youth/Manhood
               Puberty
4. यावुन छावुन...To enjoy
                         youth
5. यावरी..... Kindness/Aid
              Assistance/Re-
              inforcement
6. यकुत.....Unity/Oneness
              Union/Sameness
              Unison
7. यकॖ.....Tonga/Horse-
              cart/Ace in cards
              One/Single
8. यकीन.Faith/Confidence
              Assurance/Truth
              Certainty
9. यकमुश...At once/At a
                  stretch
10. यलाज.... Treatment/
             Remedy/Cure/
             Treat
*************************
   गीता ज्ञान  : अध्याय-6  :
यूगॖ अब्यासॖ वश कॊरमुत मन
यथ अवस्थाय मंज़ महू सपदान
ब्रह्मस मंज़ संत्वष्ट रोज़ान
वॊन भगॖवानन गीता ज्ञान
*************************
जंत्री हॖन्ज़ कथ ॴस्य ॳस्य राथ करान। म्यॆ आव वुछॖनस मंज़ ज़ि
नस्तालीकस यानि उर्दूहस मंज़ छपॆमॖच़ तॖ नागरीयस मंज़ यानि हॆन्दियस मंज़ छपेमॖच़ जंत्री ति छॆ नॖ वारियाहन मंत्रन मंज़ पानॖवुन्य मेल ख्यवान। ॳकिस गरस वुछुम ज़ि मर्द परान उर्दू पऻठ्य लीछमॖच़ जंत्री तॖ तऺम्यसॖन्ज़ आश्यन परान हॆन्दियस मंज़ लीछमॖच़ जंत्री। गयो ठीख मगर असुना आम यॆलि तिमव दॊयव वॊन म्यॆ ज़ि ॳस्य माहरा छि सुबहस वथित यॆलि मंदरस मंज़ बिहान छि जंत्री अथस मंज़ रऺटिथ पाठ परनि, बॖ छुस परान क्वसताम लऻन तॖ म्यऻन्य आश्यन छि परान क्वस ताम लऻन। तिमव वॊन ज़ि मंज़ॖ-मंज़ॖ गव असि दुच़्यॊत ज़ि अमा जंत्री मा छि अलग-अलग वऺरियिच मगर यॆलि वारॖ वुछ तॖ पताह लॊग ज़ि छपायि मंज़ छि फ़र्ख । मगर पकॖनावान हुति तॖ पकॖनावान यिति। अख-ॳकिस वुछान तॖ पकान। मगर सौंचुन छु ज़ि ॳस्य क्याह वातनावव पनॖन्यन शुर्यन ताम। शालॖमऻर-गार्डन छि कऺम्यताम बख्तन पाठॖ किताबॖ क्षीरभवऻनी मंदरस भेंट करिमच़ॖ। ओत ताम गऺयि रॖच़ कऻम मगर अथ पाठॖ कितबि छि छपायि मंज़ गल्ती हथा आमॖच़ करनॖ। म्यॆ वॊन कस ताम नफ़रस अथ मुतलक तॖ जवाब बूज़िथ गोस रूज़िथ। दॊपनम माहरा शुकॖर कऺरिव तोति बिचऻर्य छ्यन यीच़ मॆहनत कऺरमॖच़ ज़ि मुफ्तस मंज़ बऻगराव्यन यिम किताबॖ। म्यॆ वॊनमस माहरा पाठन मंज़ छि गल्ती रोज़मच़ॖ अम्युक असर प्यॆयि ना गलत दॊपनम करन माहरा पानय ठीख। पऺर्यमॖत्य लीख्यमॖत्य छि सऻरीय तॖ द्राव यलाह दिथ। बॖति रूदुस सौंचान ज़ि म्यॆय मा कॊर अतुर यि वऺनिथ। कुस क्याह  कमिस वनि तॖ क्याज़ि वनि बॖ छुस वुन्युख ताम सौंचान।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

08.09.2018

08.09.2018, बऻद्रप्यथ (भाद्र) गटॖ पछॖ (कृष्ण पक्ष), च़्वदह (चतुर्दशी), बटॖवार (शनिवार/ शनिश्चरवार), श्री सप्तार्षि सम्वत 5094, राश सिंह (दुहचि 10.28 बजि प्यठॖ), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
         ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳलिम छु समंदर
    अ: ज्ञानस छु नॖ कांह अंद
2. मु: अजि म्यॆंगि दस्तार
    अ: किबॖर या नख्वत या गमंड
         आसुन
3. मु: अजि ॳछ गाश
    अ: स्यठाह टोठ
4. मु: ॴठन वऺरियन पऺच्य क्वल
         तॖ शेठन वऺरियन लावॖ
   अ: इन्सान छु मरान तसॖन्ज़
        नीकी छे नॖ मरान
5. मु:अटि मंज़ॖ बानॖ खार
         फुटॖरावॖन्य
    अ: सिरस फ़ाश करुन
*************************
1. युन....To come
2. यनॖ/यनॖ प्यठॖ... From the
              time/Since
3. यंगॖ....Asafetida
4. यनामॖ..Prize/Award/Gift
5. यॆन्दॖर... Spinning wheel
6. यॆन्द्राज़ॖ...Lord Indra
7. यम/यमराज़...Death/Lord
                         of death
8. यंत्र....Machine/Amulet
9. युवॖनुक....First born
10. येनवोल.A bridegroom's
               party/A marriage
               party
*************************
गीता ज्ञान:  अध्याय-6  :
यिथकऺन्य वावॖ रॊस जायि च़ोंग प्रज़लान
च़ऻग्य रॆह छे नॖ ओरॖ योर डलान
यूगी सुन्द मन तिथुय शांत आसान
वॊन भगॖवानन गीता ज्ञान
*************************
प्रथ गरस मंज़ वॖछ म्यॆ कॆंह न तॖ कॆंह समस्या। समस्या छि इन्सानस छ़ाय हिश सॗत्य सॗत्य रोज़ान। ग्वडॖ प्यठॖ अंदस ताम। अख समस्या छु इन्सान हल करान ज़ि दॊयिम छि कलॖ कडान या यि दऺप्यज़ि ति कॆंह समस्यायि छि इकॖवटॖ व्वतलिथ यिवान। कॆंह समस्यायि छि ख्वश यिवॖन्य आसान मगर कॆंह समस्यायि छि इन्सानस परेशान करान रोज़ान। दपान छि इन्सानसॖन्ज़ ज़िन्दगी छि हऻदिसव सॗत्य बरपूर आसान तॖ यि इन्सान छु वारॖ वारॖ अमि ज़ालॖ मंज़ न्यबर नेरनॖच ता ऊम्र कूशिश करान रोज़ान। यि कथ प्यॆयि म्यॆ याद यॆलि म्यॆ पनॖन्यव ॳछव वुछ ज़ि किथॖ पऻठ्य छु प्रथ कांह इन्सान अंदॖर्य-अंदॖर्य च़न्द्रगोम वोतमुत। गाह सु अमीर छु या गाह सु ग़रीब छु। समस्यायन हुन्द वज़न ति छु तमि वज़नॖ बासनॖ यिवान। युस इन्सान पनॖन्यव समस्यायव मंज़ॖ बे-दाग़ पऻठ्य नेरान छु सु गव नारॖ द्राव स्वन। अल्बतॖ युस ख्वदा-नखास्ता समस्यायन मंज़ वलनॖ यिवान छु सु छुनॖ ज़ांह ठऺठ्य यिवान। तवय छि सुबहऻय नॆन्द्रि वऺथित भगवानस मंगान ज़ि द्वह गछ़ि नेरुन असान तॖ गिन्दान। ह्रॊच़ तॖ फ्रुच़। ग़मव तॖ फिकिरव रॊस। ख्वश तॖ ख्वशहाल पऻठ्य। कथ जि जऻरी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

07.09.2018

07.09.2018, बऻद्रप्यथ (भाद्र), गटॖ पछॖ (कृष्ण पक्ष), बाह (द्वादशी), शॊकॖरवार (शुक्रवार), श्री सप्तार्षि सम्वत 5094, राश कर्कट (चलान), ऋतु वर्षा (चलान)...चूंकि त्रुवाह छि रावान यानि अज़ छि बाह देवा त्रुवाह, त्रुवॖश हुन्द वॊहयवोद यी ॳज़्य यानि बऻश द्वह
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1.मु: अंदॖर्य छ़न्यहऻस थ्वख न्यॆबॖर
        दॊपुन गुमॖ आयम
   अ: पनॖन बेज़ती या ज़लालत
        छुपावॖन्य
2. मु: अज़ गव बॆगाह व्वंय वलॖ
         पगाह
   अ: अज़ तॖ पगाह करिथ कांह
         कऻम टालॖन्य
3. मु: ॳर्य आयि सऻरीय तॖ ऒर
        गव नॖ कांह
   अ: दुनियाहस मंज़ यिथ छु वारॖ
        रोज़ुन नामुम्किन
4. मु: ॳरिस पानस दॖरकॗ
    अ: हंगॖ तॖ मंगॖचि बलायि मटि
         ह्यॆन
5. मु:आरॖम्य कऺड मुज फ़कीरन
        दोरनस हलम
   अ: कांह करि कऻम तॖ ब्याख
        रोज़्यस थपि
*************************
1. यल......Jerk
2. यलॖ...... Open
3. यॆलि..... When
4. येल अनुन...To subdue
5. येज़ार..... Trouser
6. पऻज़ार.... Shoe
7. यीरुन.....To float
8. यीत्य..... As much as/So
              much/That much
9. यॆति/यॆतिनस/यॆती.....Here
10. येर.......Wool
*************************
  गीता ज्ञान  :  अध्याय-6  :
वश कऺरमॖति मनॖ कामनायि रॊस
जान पऻठ्य ब्रह्मस दऺरिथ युस
बूग नॖ बूगन वऻलिस वनान यूगवान
वॊन भगॖवानन गीता ज्ञान
*************************
जंत्री हॖन्ज़ ॴस राथ ति कथ चलान। बॖ गयोस श्री भूषण लालस निश युस ज्यॆमिस मंज़ विजयेश्वर कार्यालय चलावान छु तॖ म्यॆ करेये तमिस निवेदन ज़ि यिम ति मंत्र जंत्री मंज़ लेखनॖ यिवान छि यिहुन्द स्रोत ति गॊछ़ युन लेखनॖ ति क्याज़ि परन वऻलिस तरिहे फिकिरी ज़ि फलऻन्य मंत्र छु फलऻन्य ग्रंथॖ पयठॖ आमुत तुलनॖ। भूषण जियन कऺर वुछनऻना तॖ डऻजिन कथ। दॊयिम निवेदन करेमस ज़ि अड्यन मंत्रन हुन्द तरजमॖ छु हॆन्दियस मंज़ आमुत करनॖ तॖ अड्यन छु नॖ आमुत करनॖ। राय दिच़्यॆमस ज़ि तिमन मंत्रन ति गॊछ़ तरजमॖ करनॖ युन हॆन्दियस मंज़। जवाब द्युतुन ज़ि संस्कृत ज़ानन वाल्यन हॖन्ज़ छि व्यछ़य। असि मंज़ छि संस्कृत परन वाल्यन हॖन्ज़ वाकय व्यछ़य। बॖ छुस यॆलि बाकय धर्मन हॖन्ज़ॖ किताबॖ वुछान या परान छुस, प्रथ कांह मंत्र छु लीखित आसान तम्युक स्रोत ह्यथ। गाह सु कुरान छु, बाईबॖल छु या ग्रंथ-साहब छु। मगर सानि जंत्री मंज़ छु नॖ अमि कॖस्मॖच कांह व्यवस्था आमॖच़ करनॖ। आम परनवऻलिस छॆ नॖ पतहॗय ज़ि कुस मंत्र कमि किताबि मंज़ॖ छु आमुत तुलनॖ तॖ जंत्री मंज़ आमुत छापनॖ। परनवऻलिस गऺछ़ यि ख़बर आसॖन्य ताकि यॊदवय तमिस मन करिहे सु ह्यॆकिहे यिमन मंत्रन हुन्द पूरॖ ज्ञान हऻसिल कऺरिथ। म्यॆ छु बासान ज़ि भूषण जी ज्यॊतिश माहराज छु नॖ यछ़ान यि ज्ञान आम इन्सानस ताम वातॖनावुन। अथ कथि प्यठ पज़ि असि ग़ोर करुन
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

06.09.2018

06.09.2018, बऻद्रप्यथ (भाद्र) गटॖ पछॖ (कृष्ण पक्ष), काह (एकादशी), ब्रसवार (वीरवार/ बृहस्पतवार), श्री सप्तार्षि सम्वत 5094, राश कर्कट (दुहचि 9.45 बजि प्यठॖ), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अंदॖर्य-अंदॖर्य च़न्द्रगोम वातुन
   अ: अंन्दॖर्य कुनि ग़मन रॊटमुत मगर न्यॆबॖर्य नॖ बास द्युन

2. युं: ॳडजि कोनो बचेयि पनुन आम नॖ कांह
    अ: बऻज़्य छि पनॖनिसॖय तारनॖ यिवान

3.मु: अड्यव ख्यव चीनि अड्यव ख्यव टाकि
   अ: पनॖनि कॖस्मतॖ पनुन बोग / पनुन हिसॖ

4.मु:अड्यन अश तॖ अड्यन खश
   अ: सख़ बे-इन्सऻफ़ी

5. मु: अडॖ गऺज़ मामन्य ड्वड गऺज़ पूच़
   अ: कऻन्सि मोमूली शख्सस अहमियत आसॖन्य

*************************

1. स्यज़र..........Straight forwardness / Frankness/Simplicity
2. सेर..............Satisfied / Stomachful
3. सेर करुन.....To satisfy
4. सिर.............Secret
5. सीर.............Brick
6. सार.............Central idea / To search
7. सोर.............Pig
8. सोरुय..........Entire / Complete
9. स्यथुर..........Mud plaster
10. स्यठ..........Indigestion

*************************

गीता ज्ञान  :  अध्याय-6 :
================
युहुन्द आहार विहार सॊम आसान
कर्म करान शॊंगान व्वथान हिशरॖ सान
द्व:ख नाश करवुन यूग फऻंफलान
वॊन भगॖवानन गीता ज्ञान

*************************

जंत्री हॖन्ज़ कथ ॴस चलान राथ। बॖ ओसुस वुछान ज़ि प्रथ वऺरियि यॆलि बॖ जंत्री अनान छुस अथ मंज़ क्याह छु नॊव सु चीज़ा युस म्यऻनिस ज्ञानस बऺडरावि मगर म्यॆ बासेयिनॖ कांह फर्खा प्रानि तॖ नवि जंत्री मंज़ सिवाय तिथि वार तॖ मुहूर्त तॖ ब्यॆयि रऻष-फल रॊस। जंत्री मंज़ छि 404 सफ़ॖ यिमव मंज़ 260 सफ़ॖ छि तिमय यिम प्रानि जंत्री मंज़ छि छपिथ कुनि बदलावॖ रॊस यानि असि छि प्यवान यि जंत्री द्वगनॖ कॗमतस। पाठ तिमय, मंत्र तिमय, साद-संतन हॖन्द्य नाव तिमय, गोत्र तिमय, ज़ातक मिलाप विधि सॊय वगैरा वगैरा। मगर वनन-वोल छु नॖ कांह। ति क्याज़ि शास्त्रात ज़ानन वोल छू कुनुय तॖ अमिकुय नाजऻयज़ फऻयदॖ छु यिवान तुलनॖ यिहॖन्दि दऺस्य। पतॖ यॊदवय वुछव ज़ि यिम जंत्री प्रानान छि तिमन क्याह छि करान। म्यॆ छु नॖ बासान असि मंज़ आसि कांह यिम प्रानि जंत्री सॊम्बरऻविथ थवान। आसन शायद कबऻडिस कॖनान, रद्दी किताबॖ ज़ऻनिथ। गव ज़ि यि सोन शास्त्र छु रद्दियस सॗत्य मेलान। हालांकि पाठॖ किताबॖ छि मूजूद थवान मगर जंत्री हुन्द क्याह। ज़रा करव ग़ोर अथ कथि प्यठ ति ज़ि क्याह यीच़ म्वट किताब आसॖन्य छा ज़रूरी।

*************************

कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव

*************************

नऺविव तॖ फोलिव
भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)