01.11.2019

01.11.2019, कार्तिक (कतक)
ज़ूनॖ पछॖ (शुक्ल पक्ष) पऻन्च़म (पन्चमी), शॊकुरवार (शुक्रवार/ जुम्मा) श्री सप्तार्षि सम्वत 5095, राश धनु (चलान), ऋतु (हरुद/शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1.मु: कनि गरॖ बरुन जान
        वान्गॖज गरॖ नॖ
   अ: मकानस अन्दर किरायदार
       थावुन छु ॴखरस न्वकसान
        वातॖनावान
2. मु: कुन्य गबि छु शाल पतय
    अ: कुनिस छि सऻरी ज़ागान
         आसान
3. मु: कुनुय ॳछ गाश
    अ: कुनुय न्यॆचुव यस प्यठ
          सऻरॖय आश आसि
4. मु: कुनुय पान छु रऻहति जान
    अ: ज़िम्मवऻरी रॊस आसुन छु
         बॊड स्वख
5. मु: कुनुय छु शूबान दय
    अ: कुनिस छॆ नॖ शूब/दयी यॊत
          छु कुन
**************************
1. अगरॖ नगरॖ...All over/From
                villages to cities/
                In all sides
2. अगादि गछ़ुन....Run after/
                Pursue/Follow/
                Doggedly
3. अखाडॖ....Field/Wrestling
                field/Arena
4. अख दमाह....For a while
5. अकॖहऻठ...Sixty one
6. अकॖसतथ....Seventy one
7. अकड...Stiffness/Pride/
                 Dispute/Quarrel
                 Argument
8. अकडाय मऻसुम....Simple
                 boy/Innocent/
                To show simpli-
                 city
9. अकरफु....Pride/Vanity/
                Pomp and show
                Haughtiness
10. अकसर.... Often/Gene-
                     rally/Mostly/
                     Frequently
**************************
          गीता ज्ञान  :अध्याय 18
यऺगॖन्य दान तप करुन कर्तव्य मान, यिम त्यागॖन्य लायक़ छिनॖ आसान, यिम मनुश प्वन्य करन वऻल्य ज़ान
वॊन भगवानन गीता ज्ञान
**************************
मन गव ख्वश यि वुछिथ ज़ि सानि ज़ऻच़ मंज़ छि वुनि ति कॆंह गरॖ तिम यिम पनॖनि सभ्यतायि रऻछ कऺरिथ छि। पनॖन्यन रसमन रिवाजन तिथय पऻठ्य व्यतरावान छि यिथॖ पऻठ्य कऺशीरि मंज़ अज़ त्रॖह पांच़ॖत्रॖह वऺरी ब्रौंठ कऻशिर ॴस्य वरतावान। ख़ास कर यज्ञन्योपवीत यानि मेखला तॖ खान्दरस प्यठ। रोहिनी स्यकटर त्रुवाह, ॴशिर्वाद पार्टी हाल,  दिल्लि मंज़ म्यूल म्यॆ मोकॖ ग्वडॖ प्यठॖ अंदस ताम ॳकिस म्यॆथरॖ  (रूप कृष्ण रैना)सॖन्दिस निकॖ सॖन्ज़ि मेखला वुछॖनुक। ॳमिस लऺडकस छु नाव अनुराग (कल्हण)। अथ मेखलाय मंज़ आयि सऻरॖय परम्परा अंजाम दिनॖ  तमी अंदाज़ हूबहू यिथपऻठ्य वख अकि ॴस यिवान वरतावनॖ कऺशीरि मंज़। कऻशुर पठित ब्रह्मन  तॖ तमिस सॗत्य तऺम्यसुन्द च़ाठ ओस आमुत ज्यॆमि प्यठ। वेदॖ मंत्र पॊर तऺम्य नफ़ीस पऻठ्यन तॖ अंद वातनोवुन कारस स्यठाह जान पऻठ्य। यॆति छि ॳस्य यि कऻम करनावान नक़ली ब्रह्मनव दऺस्य अकि मजबूरी तॖ लाचऻरी मूजूब। ज़नानव ग्यॊव ह्यॆन्ज़ॆ तॖ ॴही शास्त्रॖ विधि हिसाबॖ प्रऻन्य पऻठ्य तॖ बासान ओस ज़ि ज़न छि ॳस्य कऺशीरि मंज़ॖय बिहिथ यि संस्कार पूरॖ करान। अज़कल छि नॖ व्वंय ह्यॆन्ज़ॆ परन वऻल्य तॖ ज़ाननवऻल्य नज़रि गछ़ान। मेखलि माहराज़स छ़ोग थावुन, वीगिस प्यठ नच़ुन, नऻर्यवन खारॖन्य, ट़्यॆक-तालॖ लागनि, अटॖहऻर्य लागॖन्य,  लूकॖ-बऻथ सॗत्य सॗत्य ग्यवॖन्य वगैरा वगैरा आव तिथय पऻठ्य पूरॖ करनॖ यिथॖपऻठ्य कऻशिर्य कऺशीरि मंज़ करान ॴस्य। अलबतॖ अख कऺमी गऺयि नज़रि स्व गऺयि यि ज़ि यारबल न आसुन। मॆखलि माहराज़ॖ आव यारबलॖ बजायि कुनि ॳकिस मंदरस ताम निनॖ यॆति तऺमिस पाठ पूज़ा आव करनावनॖ मंदरस मंज़ बिहिथ पूज़ऻरिस अथि। अमि वखतॖ खल्यव तॖ च़्यून  यि ज़ि ॳस्य छि कऺशीरि न्यबर तिमव यारबलव निशि स्यठाह दूर तॖ छि स्यठाह मजबूर।
**************************
"बान गॊल तय प्रकाश आव ज़ूने
च़ऺन्दॖर गॊल तय मॊतुय च़्यथ
च़्यथ गॊल तय कॆंह ति ना कुने
गय भूर भवह सूर व्यसरऺज़िथ क्यथ"
  पऺरिव यि लल वाख ति
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

28.10.2019

28.10.2019, कार्तिक (कतक) गटॖ पछॖ (कृष्ण पक्ष) मावस (देवादेव) (अमावस्या) च़ऺन्दॖरवार (सोमवार) श्री सप्तर्षी सम्वत 5095, राश तुला (चलान) ऋतु हरुद (शरद) (चलान)...चूंकि पगाह छु ऒक्दॊह रावान, पगहुक वॊहरवोद यी ॳज़्य। अज़ छि सुमरीमावस ति।
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कम ख्यॊन ग़म नॖ ह्यॊन
    अ: ज़्यादॖ लालॖच करनॖ ख्वतॖ
         छु क़नाथ करुन बेहतर
2. मु: कऺमीनस खऺदमत करॖन्य छि
         ज़मीनस चोब
    अ: कऺमीनॖ शख्सस खऺदमत
          करॖन्य छि बेकार
3. मु: कमस छु कमाल तॖ च़ऺरिस
         छु ज़वाल
    अ: कमसॖय प्यठ गुज़ारॖ करुन
          छु बेहतर
4. मु: कुनुय फ़ाकॖ तॖ द्राग कुनुय
         ऒबुर तॖ माघ
    अ: रछ़ ति नॖ च़्यड या बर्दाश
         आसुन
5. मु: कुन्य हऺट छॆ नॖ दानस ति
         दज़ान
    अ: कुन ज़ॊन छु नॖ कऻम
          कऺरिथ ह्यकान
**************************
1. अलपार...A type of cloth
2. अलतश.... Struggle/
                   Effort/Strong
                   longing
3. अलथान.....Wine shop/
                      Pub
4. ॳलरुन......To shake
5. अलगॖज़ार...Feeling/Have
                     a feeling
6. अलम तुल..Height/Swing
7. अलम गलम.....To digest/
                To refuse to own
                up/Go back on
                one's words
8. अलबतॖ....Surely/How-
                ever/Certainly/
                Of course
9. अलारम.....Alarm/Signal/
                To ring a bell
10. अलाप.... Modulation/
                Prelude to sing-
             ing/Time and tune
**************************
         गीता ज्ञान  :अध्याय 18
ईश्वर भक्ती तॖ दीवताहन पूज़ा, माता पिता गुरु जनन हॖन्ज़ सीवा, यऺगॖन्य तप दान करन वरनॖ अनुसार, शरीर न्यरवा पुछ़ॖय ख्यन
वारॖकार यॆहिलूकॖक्य तॖ परिलूकक्य यिम कर्म ज़ान, यॆमि नावॖ सऻरी कर्म फल त्यागन ज़ान कॆंह व्यदवान कर्म दूशॖ लद मानान, यिम सऻरी त्यागन लायक़ ज़ानान कॆंह तप दान यऺगॖन्य त्यगुन
नॖ मानान
वॊन भगवानन गीता ज्ञान
**************************
राथ आयि दीवऻली जोश खरोश सान मनावनॖ। मोबाईलॖ दऺस्य आयि पूरॖ दुह्यकिस दॊहस ब्यॊन ब्यॊन ग्रुपन मंज़ मुबारक बाद दिनॖ तॖ माहोल ओस शादमान। मॊबाईलस प्यठॖय आव मुबारक बाद सोज़नॖ अख ॳकिस तॖ यि सिल्सिलॖ रूद चलवुन दुह्यकिस दॊहस। द्वह डऺल्यथॖय गव पटाखन हुन्द शोर कनन तॖ बास्यव ज़ि दीवऻली छि यिवान मनावनॖ खुलॖ डुलॖ पऻठ्य। मिठऻय ति आयि बऻगरावनॖ यारन दोस्तन मंज़, अंगन ॴशनावन मंज़। पूज़ा पाठ लक्ष्मी हुन्द ति आव करनॖ। सत्यदीव आव करनॖ कॆंच़न गरन मंज़ । म्वखसरॖ आयि दीवऻली मनावनॖ परि पूर्ण पऻठ्य। ज़ूल ऒस रातॖ प्यठय आमुत करनॖ।थज़ॖ थज़ॖ इमारतॖ आसॖ गाह त्रावान तॖ प्रज़लान। मऻज्य दीवी कऺरिन सारिनी अथॖरॊट तॖ रूज़्यनख सहायतस हर हमेशॖ।
**************************
"परुन पोलुम अपॊरुय पॊरुम
केसर वनॖ वोलुम रऺटिथ शाल
परस प्रॖनुम तॖ पानस वॊलुम
अदॖ गोम मोलूम तॖ ज़ीनिम हाल"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.10.2019

27.10.2019, कार्तिक (कतक) गटॖ पछॖ (कृष्ण पक्ष)च़्वदह (देवादेव) (चतुर्दशी) आथवार (रविवार/एतवार),श्री सप्तर्षी सम्वत 5095, राश तुला (दुहचि 4.31 बजि प्यठॖ), ऋतु हरुद (शरद)(चलान)...अज़ छि दीवऻली
******************"*******
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कऺल्यसुन्द बोल बोश ज़ानि
         कऺल्यसुन्द मोल मऻज्य
    अ: मऻलिस माजि छि शुर्य   
          सॖन्ज़ दग आसान
2. मु: कऺलिस मऺलिस ख़वदा
          रऻज़ी
    अ: स्यॆदिस सालस छु दय
          मद्दतस यिवान
3. मु: कुल मुल छु शूबान लंगव
         लंज्यव सान
    अ: बजर छु अथ मंज़ ज़ि
          ल्वकॖट्य ति रछोख पानस
          सॗत्य
4. मु: कुलिस खऺसिथ ग्वड दब
    अ: पनॖन्य कऻम कऺडिथ ब्यॆयिस
         क्युथ कॊठॖरावुन/दोखॖ
5. मु: कलस ति रज़ तॖ नलस ति
          रज़
    अ: यॆलि इन्सान मुकमल पऻठ्य
         कुनि ह्यनॖ आमुत आसि
**************************
1. हाक (हाख)....Collard
                          greens
2. स्वच़ल....... Mellow
3. क्रछ़...........Knapweed
4. ऒबुज........Sorrel
5. हन्द........... Dandelion
6. लीसॖ..........Amaranth
7. नुनर..........Purslane
8. मॊंजि.........Knol Khol
9. बम्बच़ुंठ .... Quince apple
10. पालक.....Spinach
**************************
          गीता ज्ञान  :अध्याय 18
त्रॖय पॊथॖर धन आदि प्रावनॖ बापथ ब्यॆयि रूग तॖ संकट दूर करनॖ बापथ यऺगॖन्य तप ज़प यिम कर्म करान
वॊन भगवानन गीता ज्ञान
**************************
त्वहि सारिनी छुवॖ अज़ बडि दुहुक  यानि दीवऻली हुन्द हथ हथ मुबारक तॖ पोशतॖ। मऻज्य लक्ष्मी टूठ्यनवॖ तॖ थऺव्यनवॖ तुहॖन्द्य गरॖ ऒरुत तॖ ब्वरुत, धन तॖ द्यारव सॗत्य, मील्यनवॖ स्वख तॖ सम्पति, ॴश तॖ आराम। नऺविव तॖ फॊलिव सऻरी। रूज़िव असान तॖ गिन्दान, शुर्य कऺट्य रूज़्यनवॖ बजाह युस यॆतिनस छुवॖ। ॳज़्युक द्वह नीर्यनवॖ ह्रॊच़ तॖ फ्रूच़। मनोकामनायि गऺछ़नवॖ स्यद्ध।
आदिदीव महागणीश रूज़्यनवॖ नखि तॖ डखि। सऻरी विघ्नॖ, द्वख संकट गऺछ़नव दूर तॖ मील्यनव नूरॖय नूर बरपूर।
वारियाह कथॖ छि यिवान आमच़ॖ वनॖनॖ ॳज़्युक द्वह मनावनॖ बापथ। राम जीयनि वनवास प्यठॖ वापस अयोध्या यिनस ताम, लक्ष्मी हुन्द गरॖ युन कुबेर ह्यथ, गणपत जीयुन द्वह मनावनॖ बापथ, वगैरा वगैरा आसनॖ किन्य छु ॳज़्यकिस दॊहस स्यठाह थॊद महत्व। अज़ छि टास पटास यिवान त्रावनॖ खुशी मनावनुक अख अंदाज़ ज़ऻहिर यिवान करनॖ, अज़ छि प्रथ गरस मंज़ धन दीवी लक्ष्मी हॖन्ज़ पूज़ा पाठ यिवान करनॖ, कारॖबारस मंज़ लऺगिथ लूख छि ॳज़्यकि द्वह पनॖन्यन वानॖन, दुकानन, गुदामन हॖन्द्य बहीखातॖ नऺव्य बनावान। नफा न्वकसानस हिसाब थवान। कॆंच़न गरन मंज़ छि अज़ सत्यदीव करान महागणीश सॖन्दिस नावस प्यठ। कॆंच़न गरन मंज़ छि अज़ ज़ार ति गिन्दान रोज़ान युस नॖ वऻजिब छु।मिठऻय छि यिवान अनॖनॖ, बऻगरावनॖ, दीवऻली तॊफॖ छि यिवान दिनॖ ॳकिस ब्यॆयिस तॖ यिथपऻठ्य छु दीवऻली हुन्द जॆशन मनावनॖ यिवान तॖ सॗती छि करान पनॖन्यन गरन ज़ूल हॆरि प्यठॖ ब्वन ताम, ॳन्दरॖ प्यठॖ न्यबर ताम। तॖ यिथ पऻठ्य छि शूबान दीवऻली शाम ईश्वर के नाम। राम राम
**************************
"पानस लऻगिथ रुदुख म्यॆ च़ॖय
म्यॆ च़ॖय छ़ान्डन लूसुतुम द्वह
पानस मंज़ यॆलि ड्यूंठुख म्यॆ च़ॖय
म्यॆ च़ॖय तॖ पानस द्युतुम छ़ोह"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

26.10.2019

26.10.2019, कार्तिक (कतक) गटॖ पछॖ (कृष्ण पक्ष) त्रुवाह (देवादेव) (त्रॆयॊदशी) बटॖवार (शनिवार शनिश्चरवार),श्री सप्तर्षी सम्वत 5095, राश कन्या (चलान) ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1.मु: क्रेरुक न्यॆनि मॊन्डुक
   अ: सु यस नज़र कम आसि/
         यस नॖ दुन्यहॖच ख़बरॖय
         आसि
2. मु: क्रालस खॊंड बानॖ
    अ: फुटॖमुत चीज़ छु बनावन
         वऻलिसॖय हिसस यिवान
3. मु: क्रऺयि ख्वतॖ छु इन्साफ़ बॊड
    अ: रसॖम पूरॖ करनॖ ख्वतॖ ज़्यादॖ
          छु इन्साफ़ करुन सवाब
4. मु: करनॖ करुन मगर वऺद्य वऺद्य
    अ: खुशी सान नॖ कऻम करॖन्य/
         बे-दिलॖ कऻम
5. मु: क्रुहुन ऒबुर गॖर गॖर करे
         छॊत ऒबुर दरे नॖ ज़ांह
    अ: क्रुहन ऒबुर छु गगरायि
         करान तॖ सफ़ेद ऒबुर छु
         बारानॖ वालान
**************************
1. अमि पतॖ.....After this
2. अमानथ.....Entrusted
                      thing/Deposit
3. अमानथ द्युन....To refund/
                           To die
4. अम करुन....To eat/To
                       embezzle
5. अलुन..........To move
6. अलॖ गॊड....Covering of
                      pumpkin
7. अलॖ गऺड्य तॖ मलॖ गऺड्य
     तुलॖन्य..To raise hue and
                cry
8. अलॖ ब्यॊल.....Pumpkin
                        seed
9. अलविदा......See off
10. अलनफ़सी..Selfish man
**************************
         गीता ज्ञान  :अध्याय 18
          श्री भगवानन वॊन     
भगवान वनान छुस कॆंह पंडित जन, कामि कर्म त्यागुन सन्यास
ज़ानान, दॊयिम कर्मॖ फल त्यागनस त्याग वनान।
वॊन भगवानन गीता ज्ञान
**************************
बाज़रॖ ओस राथ मॊत मत्यॊमुत। मिठाय वानन प्यठ, ड्यकोरेशन वानन प्यठ,बानॖ वानन प्यठ, यि दऺप्यज़ि ति प्रथ वानस प्यठ ॴस्य लूख मशगूल धन ख़र्चावनस मंज़ ति क्याज़ि दीवऻली छि यिनॖ वाज्यन। ख़ास कथ आयि म्यॆ वुछनस म़ंज़ ज़ि ॳज़्यकि द्वह छि लूख नॊव लछ़ुल मऺल्य ह्यथ गर अनान।  लछ़लिस तॖ धनतेरस क्याह वाठ छु यि रूद म्यॆ वुछनय। मगर म्यॆ प्यव ज़्वन ज़ि कऺशीरि मंज़ यॆलि दशहार ओस आसान तॖ यॆलि रावनस मेघनादस तॖ कॊम्बकरनस ॴस्य च़ॖख दिवान तॖ तिहन्दि दज़नॖ पतॖ ॴस्य कऻशिर बटॖ  गरॖ अनान अडॖ  दज़ॖ बऻन्सवि लोरि तॖ दपान ॴस्य अथ छु न दुशमन पोरान यि गछ़ि गरस मंज़ थवॖन्य। मगर कऻशिर्य बटस कति ॴस ख़बर ज़ि तऺमिस बनन तिमय दुशमन यिमन सु रछान आव, परनावान आव, लेखनावान आव, वथ हावान आव तऺम्यसुन्दॖय हमसायि मुसलमान। असि कऻशिर्य बटन नवेयि ततिकी मुसलमान यिमव दुशमनुत होव।अड दऺज़ लोर्यव होव नॖ का्ंह कऺरिशमा। ॳस्य ॴस्य अनान नयीशकर दशहारुक द्वह तॖ दपान ॴस्य ज़ि नयिशकर दशहारुक द्वह अनुन छु फ्रूच़आसान। यिथय पऻठ्य छु ॳज़्यकि द्वह लछ़लिस ति बोश आसान। मानॖनॖ छु यिवान ज़ि लछ़ुल गरॖ ॳज़्यकि द्वह अनॖनॖ सॗत्य छु कुबेर लक्ष्मी सॗत्य गरॖ यिवान। तवय छि शायद लछ़ुल नॊव ॳनिथ नवि लछ़लि सॗत्य पनुन आशयानॖ साफ़ सुथरॖ करान तॖ लक्ष्मी तॖ कुबेरस दीवऻली द्वह स्वागतॖच तयऻरी करान। कथ छि जऻरी
************************
"दीशि आयस दश दीशि तीलिथ
च़ऺलिथ च़ॊटुम शुन्य अदॖ वाव
शिवॖय ड्यून्ठुम जायि जायि मीलिथ
शॆह तॖ त्रॆह त्रॊपिमस तॖ शिवॖय द्राव"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(koshursabak.blogspot.com ति वुछिव)

25.10.2019

25.10.2019, कार्तिक (कतक) गटॖ पछॖ (कृष्ण पक्ष) बाह (द्वादऺशी) शॊकुरवार (शुक्रवार/ जुम्मा) श्री सप्तर्षी सम्वत 5095, राश कन्या (दुहचि 4.22 बजि प्यठॖ) ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कायर नार तॖ पर द्यार यिम
         द्वशवय छि नॖ व्वफादार
    अ: यिनॖ ज़्यादॖ कालस पोशि
2. मु: कथि क्वछ़ वति पकवॖन्य
    अ: तॆलि वनान यॆलि मोमूली
         कथन प्यठ ति रिशवत या
         बाज छु प्यवान द्युन
3. मु: किजि प्यठ काजवठ
         विलिंजि प्यठ व्वखुल
    अ: तॆलि वनान यॆलि बद-
          इन्तिज़ऻमी आसि
4. मु: कजि हॖन्ज़ॖ कॊरि सथ
    अ: यॆलि कांह ॴब खऺटिथ
          रोज़िनॖ
5. मु: कर दालि हुन्द वर
    अ: सु न्वकुस युस नॖ सऺहल
          पऻठ्य नेरि/ हंगॖ तॖ मंगुक
          मलालॖ
**************************
1. अंग....A part of anything
2. अंगोचॖ...Towel
3. अंग खसुन....To be cured/
                        Healed
4. अंग द्युन.....To wear new
              dress for the first
              time
5. अनज़ान..... Stranger/Un-
               known/Innocent
6. अनदाज़ॖ.....Guess/Style/
              Estimate/Method
7. अंदर......Inside/Within/
                  Inward
8. अंदॖ वंदॖ.....All over/Every
                    where
9. ॳमीर......Rich person/
                Commander/
                Ruler
10. अमुन अमान... Peaceful/
                Peace and order
**************************
      गीता ज्ञान  :अध्याय 18
         अर्ज़न दीव वनान   
अर्ज़न छु वनान ही भगवान, यि
सन्यास तॖ ब्यॆयि त्याग तत्वॖ सान
ब्यॊन ब्यॊन ज़ानुन छुस बॖ यछ़ान
वॊन भगवानन गीता ज्ञान
**************************
अज़ कल छु दीवऻली हुन्द चम खम च़्ववापऻर्य तॖ ब्यॆयि तरफ़ॖ छि खांदॖरन हुन्ज़ त्रफ त्रफ। धनतेरस
द्वह छु अज़। शॊगनॖ खऻत्रॖ छि अज़ गरॖ बापथ कॆंह बानॖ यिवान मऺल्य ह्यनॖ। पगाह छि पतॖ ल्वकॖट दीवऻली। अथ क्याज़ि छि वनान ल्वकॖट दीवऻली यि ज़ानॖनॖ बापथ द्युत म्यॆ कॆंच़न किताबन फ्युर तॖ नन्योम ज़ि दीवऻली छि दर-असल
पांच़न दॊहन हुन्द त्योहार, यानि धनतेरस,ल्वकॖट दीवऻली, बऺड- दीवऻली, परेवा तॖ भाई-दूज। दीवऻली प्यठ चोकॖस मंज़ नॊव बानॖ थवनॖच छि प्रथा हॆन्द्यन मंज़ तॖ धनतेरस द्वह छु अमि बापथ शुभ यिवान मानॖनॖ। अमि पगाह छि  ल्वकॖट दीवऻली यिवान मनावनॖ, अमि द्वह छि दर-असल गरस मंज़ सम्यॆयमुत कूडॖ यानि प्रोन फुट-फ्राट यिवान न्यबर त्रावॖनॖ या यिवान दिनॖ कऻन्सि ज़रूरतमंदस कॆंह कॆंह लायक्कार चीज़ तॖ नऺव्य नऺव्य चीज़ यिवान अनॖनॖ गरस मंज़। ब्यॆयि छि गरॖच साफ-सफऻयी यिवान करनॖ ल्वकचि दीवऻली द्वह।हालांकि गरॖच साफ़ सफऻयी छि व्वंय यिवान करनॖ ब्रौंठॖय मगर ल्वकॖट दीवऻली द्वह छु अमीय नावॖ यिवान मानॖनॖ। यिथ पऻठ्य कऻशिर्य बटन कऺशीरि मंज़ हुर्य ऒक्दॊह छु यिवान मनावनॖ साफ़ सफऻयी हुन्द द्वह बिल्कुल तिथय पऻठ्य छि कऺशीरि न्यबर सऻरी हॆन्द्य ल्वकचि दीवऻली द्वह साफ़ सफ़ऻयी हुन्द द्वह मनावान। यॊत यिथ छि कॆंह कऻशिर्य बटॖ ति पनॖन्यन फ्लैटन रंग-वंग करनावान ॳज़्यकि द्वह। बजि दीवऻली द्वह छि यिवान दीवऻली मनावनॖ, पाठ पूज़ा यिवान करनॖ, ज़ूल यिवान करनॖ सऻर्यसॖय गऺर्य-गरस, लक्ष्मी हॖन्ज़ पूज़ा यिवान करनॖ। ॳस्य ॴस्य अमि द्वह सत्य-दीव यानि पूर्य बनावान तॖ पूर्यन पूज़ा करान कऺशीरि मंज़। ज़ानि दय योर लऺगिथ छा कांह यि प्रथा बरक़रार थविथ। पतॖ गव परेवा यानि दीवऻली पगाह। अमि द्वह छि गोबर्दन पूज़ा यिवान करनॖ।  पऺत्यमॖ द्वह छु यिवान मनावनॖ भाईदूज। अमि द्वह छि ब्यॆनि पनॖनिस बऻयिस बजाह रोज़नॖ कामना करान तॖ बऻयसॖन्दिस ड्यकस ट्योक करान नऻर्यवन गन्डान तॖ लोल तॖ माय  बरान।यि द्वह छु क़रीबन रक्षा बन्धनॖ दुहॖक्य पऻठ्य यिवान मनावनॖ। कऻशिर्य बटन मंज़ छे नॖ यि रीथ। मगर चूंकि ॳस्य छि नकल करनस मंज़ ज़्यादॖ विश्वास थवान व्वंय छि असि मंज़ ति कॆंह गरॖ यि द्वह मनावान तिथय पऻठ्य यिथ पऻठ्य  कऺरवा चौथ मनावान छि।यिथॖ पऻठ्य छि  दीवऻली महोत्सव पूरॖ गछ़ान।
**************************
"दऺमी डीठॖम गऺज दज़वॖनी
दऺमी ड्यृंठुम दॖह न तॖ नार
दऺमी डीठॖम पांडवन हॖन्ज़ मऻजी
दऺमी डींठॖम क्रांजी मास"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

24.10.2019

24.10.2019, कार्तिक (कतक) गटॖ पछॖ (कृष्ण पक्ष) काह (एकादशी) ब्रसवार (वीरवार/ ब्रहस्पथवार/गुरुवार),श्री सप्तर्षी सम्वत 5095, राश सिंह (चलान)ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कथ छि ॴसस मंज़ लाल
         न्यबर द्रायि तॖ गऺयि थ्वख
   अ: कथ करनॖ ब्रौंठ गछ़ि सोंचुन
2. मु: कथि कॊछ़ तॖ वति मॊज़ूर्य
    अ: पौंसॖ वरऻय छॆ नॖ कांह कऻम
         अन्दान
3. मु: कथि कथि छय कथ बनान
   अ: कांह कथ विज़ि विज़ि दॊह-
          रावनॖ सॗत्य छि स्व वारॖ वारॖ
          बा-अस़र बनान
4. मु: कुर कुर करुन पनॖनि गरि
         तॖ ठूल त्रावॖन्य लूकॖ गरि
    अ: युस गरि बे-मतलब कथ
         करि तॖ लूकॖ गरन फ़ऻयदॖ
         वातॖनावि
5. मु: कथ त्रावतम सथ मतॖ
         त्रावतम
    अ: मोमूली लडायव किन्य
         गछ़ि नॖ इन्सऻनी रिश्यतॖ
         ख़तम गछ़ुन
**************************
1. ऒसूल..... Principles/
              Manners/Causes
              Dogmas/Funda-
              mentals
2. ऒक ऒक वारि....One by
                                 one
3. ऒक पोर....Single storey
                       To that side
4. दु-पोर...... Double storey
5. अनमान.....Guess
6. अंजाम......Result/Conse-
                quence/Conclu-
                 sion/Issue
7. अंतर......Next/Distance/
                  Difference
8. अनाशुन....Hunger strike
9. अनासीर....Instinct/
                 Nature/Natural
                 sense
10. अनार दानॖ.... Dried
                     pomegranate
                     seeds
**************************
          गीता ज्ञान  :अध्याय 17
हे अर्ज़न श्रदायि रॊस कर्म करुन
तप ज़प करुन तॖ ब्यॆयि दान द्युन
यि सोरुय असत तॖ लाबॖ रॊस ज़ान
वॊन भगवानन गीता ज्ञान
**************************
यॆलि स्वन तॆलि नॖ कन यॆलि कन तॆलि नॖ स्वन। असि कऻशिर्य बटन छि सॊय वनन गऻमॖच़। अज़कल आव पौंसॖ वॊफूर मगर ख़र्चावनस सॊम्ब छु नॖ वखॖत। यॆलि वख़त ओस तेलि ओस नॖ पौंसॖ। टास या पटाखॖ ॴस्य ॳस्य त्रावान कऺशीरि मंज़ यारबल चांदन प्यठ ति क्याज़ि गरन मंज़ ॴस न तिछ़ व्यवस्था। यॊतान्य म्यॆ याद छु या ज़ऻन्यकऻरी छि ज़ि ॳस्य ॴस्य नॖ पनॖन्यन शुर्यन दिवान बऺड्य बऺड्य आवाज़ि दार पटाखॖ चलावनॖ। ख़ोच़ान ॴस्य ज़ि नार युथ नॖ लगि। छ़्यॆयि पश दार मकानॖ ॴस्य आसान कऺशीरि मंज़, डबि दार मकानॖ ॴस्य आसान, ब्यॆयि ॴस्य दऺछिन्य खोवॖर्य मुसलमान मकान ति आसान। अमि मूजूब ॴस्य सऻन्य शुर्य हदस मंज़ रूज़िथॖय दीवऻली प्यठ टास वास चलावान। अल्बतॖ कॆंह लूख ॴस्य यारबलॖ बठ्यन प्यठ खुलॖ डुलॖ पऻठ्य पटाख चलावान। हालांकि तिमन जायन ति ॴस आसान ह्वदॖहऺर ति क्याज़ि दऺर्यावॖ किनारन सॗत्य सॗत्य आसॖ आसान बहच़ लऺगिथ। कुनि कुनि सातॖ ओस पटाखन बहच़न कुन ति आयि गछ़ान तॖ तिम हऻन्ज़बायि ॴसॖ न्येरान बहच़व मंज़ॖ ल्यकॖ-थ्वकॖ करनि। या कुनि कुनि सातॖ ॴस्य हऻन्ज़ यिवान लडऻय करनि या ल्यकॖ च़ारिनि। कऻशिर्य बटसॖन्ज़ दीवऻली ॴस आसान छ़ॊटरऻविथॖय। मिठाय दुकान ति ॴस्य आसान कमॖय पाहन तॖ तिमन कमन दुकानन मंज़ ति ॴस्य जान मिठऻय थवन वऻल्य  दुकान स्यठहॗय कम। कमनॖय दुकानन प्य़ठ ॴस लायकॖ कार मिठऻय मेलान तॖ तिमन दुकानन ॴस आसन ज़बर्दस्त बीरॖ।
बटॖ छु मिठऻय ख्यनस मंज़ ति कॊंजूसी करान आमुत। मिठऻय ख्यनस मंज़ छु बटॖ रूदमुत कमॖय लगहार तॖ अज़कल ति छु बटॖ सूंचथॖय पकान मिठऻय ख्यनकिस मामलस मंज़। कथ छि जऻरी।
**************************
"दमादमॖ कॊरमस दमन हाले
प्रज़ल्योम दॗफ तॖ ननेयम ज़ात
ॳन्द्रिम प्रकाश न्यबर छ़ॊटुम
गटि रॊटुम तॖ कऺरमस थफ"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

23.10.2019

23.10.2019, कार्तिक (कतक) गटॖ पछॖ (कृष्ण पक्ष) दऺहम (दशमी) ब्वदवार (बुधवार),श्री सप्तर्षी सम्वत 5095, राश सिंह (दुहचि 3.12 बजि प्यठॖ), ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कावन ह्यॆछेयो ककवि सुन्द
         पकुन पनुनॖय पकुन मॊठुस
    अ: बऺल्य कऻन्सि नकॖल करनॖ
       सॗत्य छि पनॖन्यहेन ति रावान
2. मु:काहन दीगच्यन सय ॳकिस
        नॖ छ़ॖनान वय
    अ: यॆलि वारियाहन वऻदॖ करव
         अमापॊज़ करान नॖ कऻन्सि
         पूरॖ
3. मु: काहन गाव रऻवमॖच़
    अ: कुनी कथ नॖ आसॖन्य/
         अकुय बद इन्सान छु
         सारिनॖय परेशान करान
4. मु: काहन काह वतॖ
    अ: यकुत नॖ आसुन
5. मु: काहन मऻल्य-पॊथरन कुनुय
         श्रानॖपठ
    अ: यॆलि स्यठाह गुरबऺच़ किन्य
         मुश्किलन गुज़ारॖ आसि
**************************
1. ऒडुय....Only half
2. ऒड......One half
3. ऒर दॊर....Healthy
4. ऒरज़ुव.....Good health
5. ऒर......Fit/Accurate/
                 Right/Proper/
            Exact/True/Actual
           Complete
6. ऒछ़.......Thin
7. ऒश अनुन.....To bring
                    tears in eyes
8. ऒश त्रावुन.....To shed
                tears/To weep
9. ऒश युन.....To have eyes
                      full of tears
10. ऒश........Tears
**************************
        गीता ज्ञान  :अध्याय 17
यऺगॖन्य तप दानॖच प्रवर्त सत आसुन, परमात्मा सॖन्दि नऻव्य कर्म तॖ सत आसुन, विश्वास थावुन सत  मानॖनॖ यिवान
वॊन भगवानन गीता ज्ञान
**************************
त्रफॖ त्रफ छि व्वंय धन तेरस हॖन्ज़, ल्वकॖट दीवऻली तॖ बऺड दीवऻली हॖन्ज़। लूख छि करान व्यच़ार ज़ि युहसॖच दीवऻली किथ पऻठय यी मनावनॖ। वजह छु अकि तरफ़ दपान पटाखन प्यठ लऺज्य पाबंदी शायद, दॊयिमि तरफॖ छु बाज़र हना सुस्त पाहन दपान। स्वनुक भाव छु आसमानस ताम वोतमुत। इन्सान हय करि तॖ क्याह करि। लूकन छु पौंसॖ गुतुल अथ मंज़ शक़ कांह छु नॖ मगर बाज़र वुछिथ छु मन त्रऺहरान ह्यु। धन तेरस प्यठ छि बानॖ अनॖनॖच प्रथा इस्लिये छु ज़रूरी कॆंह न तॖ कॆंह अनुन। चमचय सऺही। अनुन छु कॆंह न तॖ कॆंह। परम्परा गछ़ि रोज़ॖन्य चलवॖन्य। यॊत ताम म्यॆ याद छु, कऺशीरि मंज़ ॳस्य बटॖ दीवऻली कमॖय पाहन मनावान। धन तेरस ल्वकॖट दीवऻली ति ॴस्य कॆंच़नॖय ख़बर। दीवऻली द्वह ॴस्य च़ऻन्ग्य ज़ालान, मोमबति ॴस्य ज़ालान पनॖन्यन गरन मंज़। बिजली बत्यन हॖन्ज् लऺडी ॴस्य फऻलावान पनॖन्यन गरन मंज़। यि चीनुक बिजली सामानॖ ओस नॖ बाज़रस मंज कॖनॖन-यिवान। कऺशीरि मंज़ ओस नॖ बटॖ ज़्यादॖ व्वलसनस यिवान। सादगी पऻठ्य ओस मिठाय किलो ज़ॖ किलो अनान तॖ च़ऻन्गय ज़ालान। लक्ष्मी हॖन्ज़ पूज़ा ॴस्य करान तॖ पटाख चलावान। कथ छि जऻरी
**************************
"दऺछिनिस ऒबरस ज़ायुन ज़ानहा
समंदरस ज़ानहा कऺडिथ अठ
मंदिस रूगियस वैद्युत ज़ानहा
मूडस ज़ऻनिम नॖ प्रॖनिथ कथ"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

22.10.2019

22.10.2019 कार्तिक (कतक) गटॖ पछॖ (कृष्ण पक्ष) नवम (नवमी) बॊम्वार (मंगलवार),श्री सप्तर्षी सम्वत 5095, राश कन्या (चलान), ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: काहन पौंसन ग्वरदऻल्य
         पाव
    अ: कांह चीज़ द्रॊग प्यॊन
2. मु: काह नऻव्य चाय
    अ: कांह कऻम अंदनस प्यठ
         दस्गीर सऻबनि नावॖ नियाज़
         करुन
3. मु: काव काव कावॖ हथ
    अ: यॆलि वुछान वुछान लूख छि
         समान
4. मु: कऻन्सि छा बुथिस प्यठ
         कान्यो दपान
    अ: यस यि ॴब आसि तस
         गछ़ि नॖ सु वनुन
5. मु: कऻहिलो च़ऻन्गिस दि फ्वख
         दॊपनख ॳछ टुविव च़ोंग
         गछ़ि पानय बंद
  अ: कऻहिल तॖ आलॖच़्य छि बहानॖ
         कऺर्य कऺर्य कामि निशॖ बचुन
          यछ़ान
*************************
1. अनॖहूर..... Bachelor
2. अनुभव.... Experience/
             Perception/Obser-
             vation/Practical
3. अनहार....Image/Shape/
                    Figure/Form
4. अन्युट..... Earthen lid for
                      lidding a pot
5. ऒबुज्य.....A green vege-
                    table
6. ऒबुर .... Clouds
7. ऒदुर......Moist/Damp/
                   Wet
8. ऒड ऒड करुन.....To cut
                      into pieces
9. आफ़ताब....Sun
10. ऒबरॖ तलुक आफ़ताब...
                The sun under
                clouds
**************************
         गीता ज्ञान  :अध्याय 17
सत रूपॖ परमात्मा सुन्द नाव ज़ान
स्रेष्ठ तॖ सत कर्मन कुन लागान
उत्म क्रॆया सॗत्य नाव वरतावान
वॊन भगवानन गीता ज्ञान
**************************
राथ पूरॖ दॊहस वुछ म्यॆ व्हाटसापॖस प्यठ ज़ि गुरु ग्रामॖस मंज़ रोज़न वऻलिस अजय जी पंडिता सऻबस आयि तऻरीफन प्यठॖ तऻरीफ़ करनॖ तऺम्यसॖन्दिस सबरस तॖ ताबस। तम्यसॖन्दिस ख़यालस तॖ व्वदबवस। कश्मीर प्रीम्यर लीग यानि के पी एल छु अख बहानॖ मगर अमि बहानॖ दऺस्य कोताह फ़ऻयदॖ छु वातान सऻनिस समाजस तम्युक छु नॖ हिसाबॖय। कशमीर मॆडकॖल एमर्जैन्सी चेरि- टेबॖल ट्रस्ट यानि के एम ई सी टी छि अख स्व संस्था यॊस तिमन ब्यमारन यलाज छि करनावान यिमन पौंसॖच व्यछ़य प्यवान छि। अथ संस्थायि मंज़ छु यिवान पौंसॖ सॊम्बरावनॖ ताकि सु पौंसॖ लगि ब्यमारस ठीख गछ़नॖ बापथ। के पी एल छु गिन्दनॖकि बहानॖ कॆंह पौंसॖ जमाह कऺरिथ के एम ई सी टी-यस मदद करान तॖ यि संस्था छि ब्यमारन ताम वातान। के पी एलॖक्य खिलऻर्य यिम रोज़ान छि छऺकॖरऻविथ ब्यॊन ब्यॊन जायन तिमन छु अख मॊकॖ मेलान  पानॖवुन्य मेलनुक ।अख ॳक्य- सॖन्द्यन ख़यालन ज़ानॖनुक छु तिमन मॊकॖ मेलान। पनॖन्य परम्परा ज़िन्दॖ थावनॖच अख सऺही कूशिश यिवान छि करनॖ। दिल बऺहलऻयी ति छु अख मुद्दा। के पी एल-किस अथ प्रोग्राम्स छु प्रथ वऺरियि हुर्रॆर सपदान। ज़नानॖ टीम आव बनावनॖ, शुर्यॆन कऺट्यन हॖन्ज़ टीमॖ आयि बनावनॖ,  बड्यन तॖ बुज़ुर्ग यानि सीनियर  सिटिज़नन हॖन्ज़ टीम आयि बनावॖन। त्युहुन्द बोल बऻश आव व्वलसनस। बॊड मेलाह ह्यु छु बासान यॆलि यिम सऻरी छि समान ॳकिस जायि।यथ मंज़ छु माय महोब्बत यिवान पानॖवुन्य बऻगरावनॖ तॖ मऺश्यरावान छि दॊहस खन्डस पनॖन्य ग़म तॖ दऻद्य यिम व्वतलिथ आयि  असि टनलि यपोर तऺरिथ कुनवुहशथ तॖ नमतॖ प्यठॖ। म्वखसरॖ वोत के पी एल ॴठस अंद तॖ ह्यन व्वंय नवि प्रोज्यक्टुक व्यस्तार छ़ान्डुन।
**************************
"दमॖ दमॖ मन ओमकार परनोवुम
पानय परन पानय बोज़न
सूहम पदस अहम गोलुम
त्यॆलॖ लल बॖ वऻच़ॖस प्रकाशस्थान"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.10.2019

21.10.2019, कार्तिक (कतक) गटॖ पछॖ (कृष्ण पक्ष) सतम (देवादेव) (सप्तमी) च़ऺन्दॖरवार (सोमवार) श्री सप्तर्षी सम्वत 5095, राश कन्या(दुहचि 11.39 बजि प्यठॖ), ऋतु हरुद (शरद)(चलान)...चूंकि पगाह छि ॴठम रावान, पगहुक वॊहरवोद यी ॳज़्य यानि सतम दुहुय
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: काल छुनॖ कडान प्रॖछ़्य
         प्रॖछ़्य प्राण
   अ: मोत छु पनॖनि वख्तॖ पानय
        यिवान
2. मु: कऻम गऺयि हून्य दॖरॖह कॊरुस
         तॖ गऺयि
    अ: कऻम छि ल्वतान यकदम
          सिरिफ गछ़ि शुरु करनॖ
          यिन्य।
3. मु: कऻन्य ॳछ वुज़ि क्याह
         न्यॆनदॖर
    अ: यथ नॖ यलाज आसि तथ
         मुतलक सोंचनुय छु ग़लत
4. मु: कामि टोठ व्यपान प्रथ
         जायि तॖ माजि टोठ माजि
         निशीय
    अ: कऻम करनवोल छु प्रथ
         कऻन्सि टोठ गछ़ान।
5. मु: कानि बनेयो रून तॖ शोंगुन
         क्युथ बन्योस नॖ कुठ
    अ: यॆलि कांह कऻम मुश्किल
       अंद वाति तोति प्यॆयस पुशि/
        अख मसलॖ हल गछ़ान तॖ
        ब्याख पऻदॖ
**************************
1. अवसत....Mean/Medium
                  Average/Middl-
                  ing/Middle
2. ओर.....On that direction
3. ओरुक योरुक....From here
             and there/From
            right and left/From
            kiths and kins
4. अवराद.....Daily round of
                 practice/Recital
5. ओट.........Flour
6. ओप च़ोप करुन....To give
              something to eat
              to an infant
7. ओबरय......Respect/
              Dignity/Honour/
              Esteem
8. ओह.........Oh
9.  ऒन.......Blind
10. अवतार.... Incarnation/
              Descent/A cross-
              ing over/Exhibi-
              tion into human
              form
**************************
         गीता ज्ञान  :अध्याय 17
तत नावॖ दय सुन्द यि सोरुय ज़ान
फल नॖ यऺछ़िथ कर तप यऺगॖन्य दान
यि क्रॆया कऺरिथ मनुश यछ़ान कल्यान
वॊन भगवानन गीता ज्ञान
**************************
आखॖर वोत के पी एल ॴठस अंद गुरु ग्रामॖ तेरी-ग्रौंडस मंज़ राथ शामन। फाईनल क्रिक्यट मैच आव गिन्दनॖ रूटस आफ कशमीर  टीमस तॖ मिलच़ार क्रिक्यट टीमस दर्मियान तॖ रूटॖस आफ कशमीरन ज़्यून यि मैच। शामन आव यनामॖ बऻगरावॖनॖ ब्यॊन ब्यॊन खिलार्यन। ल्वकट्यन बच्चन, ज़नानॖ टीमन,
बड्यन त बुज़र्गन, नवजवानन। रविन्द्र रऺवि जी ओस आमुत चलवुन्य कोम्यंट्रीय बोज़नावनि  माहोल ओस बन्योमुत शानदार तॖ दिलचस्प। ब्यॊन ब्यॊन जायव प्यठॖ खिलऻर्य ह्यॆतिन्य पनॖन्यन पनॖन्यन गरन कुन वापस फेरॖन्य।कॆंह ज़ीनिथ तॖ कॆंह हऻरिथ। कॆंह असान गिन्दान तॖ कॆंह दिल मलूल पऻठ्य। रातुक यि प्रोग्राम ओस अख बॊड बारॖ प्रोग्राम युस ॴखरस अजय जी पंडिता तॖ तऺम्यसॖन्द्यव यारव दोसतव, संस्थायक्यव सदस्यव दऺस्य सरांजाम वातनोव। म्योन मुबारक छु सारिनी तिमन यिमव अथ कार्यक्रमस मंज़ शिरकथ कऺर गिन्दनॖ रऺन्गय तॖ गिन्दॖनावनॖ रऺन्ग्य। यथ के पी एल ॴठस मंज़ यिमव क्रिक्यट टीमव हिस्सॖ न्यू युहुस तिम टीम ॳकसॖय मालायि मंज़ पऻरिथ छु म्यॆ अख बऻथ ति बनोवमुत। यि बऻथ आव बोज़नावनॖ म्यानि दऺस्य ऊतरॖ अपैरल हाऊसस मंज़ यॆति अख कल्चरल प्रोग्राम ओस आमुत थावनॖ। यथ सबकस सॗतीय छुस बॖ सु बऻथ तुहन्दि मनोरंजनॖ बापथ  अलग पऻठ्य सोज़ान व्वमेद छम ज़ि त्वहि यी पसंद
**************************
"तन्थॖर गलि तॖ मन्थॖर म्वच़े
मन्थॖर गॊल तय मॊतुय च़्यथ
च़्यथ गॊल तय कॆंह तिना कुने
शुन्यस शुन्या मीलिथ गव"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.10.2019

कश्यप कश्मीर सभा गुरु ग्राम
ह्यॆतुन वातुन व्वंय शहरो गाम
बनॖन्य ह्यॆतिन स्वन क्रिक्यट खिलऻर्य
यिम राथ ताम ॴस्य ख़ाम तय त्राम

आल इज़ व्यल इन के पी एल
इट इज़ स्लोगन दैट पीपुल ट्यल

गिन्दान गिन्दान वऻत्य अज़ ताम योर
के पी एल ॴठन रॊट ज़ोर
के के एस-न ति छक्कॖ अज़ मोर
के पी एल ॴठन रॊट ज़ोर

माजि कऺशीरि मंज़ सतीसर
व्यतस्ता पकान छि तति सरसर
कश्यप टीमन नाव रथि खोर
के पी एल ॴठन रॊट ज़ोर

थवव पानवॖन्य यॆलि मिलच़ार
सम्भव बनव ॳस्य रायज़िंग स्टार
काम्यऻबी प्यठ छुय सोन टोर
के पी एल ॴठन रॊट ज़ोर

वऻत्य कौंसर नाग तय नागॖबल ॳस्य
व्यनॖ पोश पम्पोश ह्यथ प्रारान ॳस्य
पारस कैल-ट्यकन कऺर्य सख़ बोर
के पी एल ॴठन रॊट ज़ोर

चिनार तय रूटॖस आफ चिनार
छ़ालॖ मारान वऻत्यमॖत्य शालीमार
इण्डिया फ्वार कशिरि तुल शोर
के पी एल ॴठन रॊट ज़ोर

सन-रायज़िंग वोत शिप्रा ताम
बिग ब्वायिज़ ब्यूठ ह्यॆनि ज़न साम
कोंग पोश ह्यथ अथस मंज़ करान ओरॖ योर
के पी एल ॴठन रॊट ज़ोर

बडेमॖच़ टीमन मंज़ शक्ती
शारिका शारदा रॊप भवऻनी
भद्रकऻली नॊव रूपाह दोर
के पी एल ॴठन रॊट ज़ोर

एलकोब्रॖव अख मॊयखानय
वुचाप वोत तॊत पऻन्य पानय
मस प्यालन तऺम्य अथॖ तति दोर
के पी एल ॴठन रॊट ज़ोर

ल्वकट्यन शुर्यन छु आमुत जोश बऺडिथॖय बड्यन खॊतुमुत छु बोश
मनकिस बरस च़ॖ मॖच़राव तोर
के पी एल ॴठन रॊट ज़ोर

बारसस आव एम जी एस्टेट
आच़ार व्यच़ार छि अमिकी ग्रेट  मो कड़ थख ब्रौंहकुन त्राव दोर
के पी एल ॴठन रॊट ज़ोर

श्री गणेश ललिताद्वित्य सॗत्य
विश्वॖकर्मा तय मार्तण्डॖ सॗत्य
अभिनवन मेलॖ आकाशस खोर
के पी एल ॴठन रॊट ज़ोर

"दीप" दपान कऺरिव अथवास
यकजहति मंज़ थऺविव विश्वास
रॖत्य कर्म कऺरिथ तऺरिव अपोर
के पी एल ॴठन रॊट ज़ोर

All is well in KPL
A slogan that now people tell
           भूषण कौल "दीप"

20.10.2019

20.10.2019, कार्तिक (कतक) गटॖ पछॖ (कृष्ण पक्ष) शॆयम(देवादेव)(षष्टी) आथवार (रविवार/एतवार)श्री सप्तर्षी सम्वत 5095, राश मिथुन (चलान),ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कारि ख़वदा ज़ानि ख़वदा
    अ: क्वदर्यतक्यन सिरन छु नॖ
          सनॖनुक ज़रूरथ
2. मु: कालीदासस तालि च़्यल
    अ: गाटॖलिस छि मुसीबथ
         तुलॖन्य प्यवान
3. मु: काकुन हापुथ
    अ: यॆलि कांह कऻम अगादि
         गछ़ि तॖ म्वकॖजार मेलि नॖ
4. म: कारि नजार बदस्ति गिल-
         कार
    अ: यस नॖ यॆमुक तजरुबॖ आसि
          तस ती प्यतरुन
5. मु: काकॖ साल तॖ च़्यॆ क्याह
          काकॖ बेगार तॖ म्यॆ क्याह
    अ: यॆलि कांह ख्यनॖ विज़ि
          ब्रौंठ तॖ कामि विज़ि पथ
          रोज़ि
**************************
1. ह्वॊंगन्य......Chin
2. नकॖवोर...... Nostrils
3. दऻर ........... Beard
4. मस.............Hair
5. ॳछरवाल.... Eyelashes
6. ज़्यव......... Tongue
7. अथॖ...........Hand/s
8. मंज़ अथॖ.....Palm
9. ऒंगॖज.......Finger
10. न्यॊठ.......Thumb
**************************
       गीता ज्ञान  :अध्याय 17
वीद ज़ाननवऻल्य स्रेष्ठ इन्सान शास्त्र व्यज़ करान तप यऺगॖन्य तॖ दान, यि ऒम नावॖ सॗत्य शुरु सपदान
वॊन भगवानन गीता ज्ञान
**************************
राथ ओस अपैरल हाऊसॖ, स्यक्टर 44, गुरुग्रामस मंज़ बॊड बारॖ कल्चॖर्ल प्रोग्राम आमुत कश्यप कश्मीर सभा, गुरुग्रामॖ दऺस्य करनॖ युस शॆयि बजि शामन शुरु गऺछ़िथ रऻच़ हॖन्जि काहन बज्यन ताम रूद चलवुन। अथ प्रोग्रामस मंज़ आयि कॆंह बऻथ ग्यवनॖ, ओपेरा हावनॖ, मस्खरी बोज़नावनॖ तॖ सामूहिक गीता पाठ करननॖ। दपान श्रीनगर कऺशीरि प्यठॖ ॴस्य क़रीबन वुंह पॖन्च़ॖह बच्चॖ शु वऺहॖर्यॖ वऻन्सि प्यठॖ वुंह वॖहॖर्य वऻन्सि ताम अमॖत्य यिमव गीता जीयिक श्वलूक बोज़नऻव्य पऺरिथ, तिमन श्वलूकन हुन्द कऺशिर्य तॖ अंग्रीज़ ज़बऻन्य मंज़ॖ तरजमॖ ज़बऻन्य बोज़नावॖनॖ। यि हिस्सॖ प्रोग्रामुक रूद स्यठॖहॗय असरदार तॖ शूबिदार। आडिटोरियमस मंज़ आमॖत्य लूकव कॊर थोद वऺथित च़रिपॊप तॖ बॊरुख लोल तॖ माय यिमन सारिनॖय बच्चन तॖ यिमन ह्यॆछनावन वाल्यन। लूकव दित्य नगॖद यनामॖ यिमन बच्चन तॖ कऺरॖख यछ़ा ज़ि यिथ्य प्रैग्राम गछ़न ब्यॆयन जायन ति करनॖ। दीप्ती तिकू जी ॴस एंकर बन्यॆमॖच़ तॖ पनॖनि बोल-चालि दऺस्य खोरुन सोरॖय प्रोग्राम रथि बेहद जान पऻठ्य। आडिटोरियम ओस ख़चाखच बऺरिथ यथ मंज़ ब्यॊन ब्यॊन जायव प्यठॖ आमॖत्य के पी एल-क्य खिलऻर्य ति शऻमिल ॴस्य। ख्यन-च्यनॖच व्यवस्था ति ॴस आमॖच़ करनॖ। यि प्रोग्राम रूद अख शानदार तॖ जानदार प्रोग्राम। अख यादगार प्रोग्राम आव हावनॖ राथ यॆम्युक सोरुय श्रेह छु गछ़ान अजय पंडिता जियस तॖ तऺम्यसॖन्द्यन सारिनी बऻच़न यिमव यि प्रोग्राम काम्याब बनोव तॖ सजोव।
**************************
"त्रेशि ब्वछि मो क्रेशनावुन
यान्य छ़्ययिह तान्य संदारुन दीह
फ्रठ चोन दारुन तॖ पारुन
कर व्वपकारुन सय छय क्रय"
 पऺरिव यि लल वाख ति
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

19.10.2019

19.10.2019 कार्तिक (कतक) गटॖ पछॖ (कृष्ण पक्ष) पऻन्च़म (देवादेव) (पंचमी) बटॖवार (शनिवार/शनिश्चरवार) श्री सप्तार्षि सम्वत 5095, राश मिथुन (सुबहॖचि 5.22 बजि प्यठॖ) ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: अमलन जज़ा तॖ नीतियन
         मुराद
    अ: यस यिछ़ अमल तॖ नियथ
         आसि तस छि तिथी फल
         अथि लगान
2. मु: अर्ज़ि ॳज़ीमॖ ख्वतॖ छु
         खलकि ॳज़ीम बॊड
    अ: रुत वरताव छु सारिवॖय
         ख्वतॖ बॊड
3. मु: ॴबो प्यॆयियो बलाय
         मंदछि पतॖ छय ख़जालथ
    अ: अख ॴब छु वारिहान
         ॴबन ज़न्म दिवान तॖ
         ब्यॆयि ख़ऺजॖल करनावान
4. मु: क़ऺबिलॖ छुम पनुन च़्यॆ क्याह
         ओर सनुन
    अ: पनॖनिस मामलस मंज़ नॖ
         ब्यॆयिसॖन्ज़ मुदाख़लत
         पसंद यिन्य
5. मु: क़तरॖ क़तरॖ छु दऺर्याव
         समान
    अ: रछ़ रछ़ कऺर्यथॖय छि कऻम
         अंद वादान
**************************
1. गलॖ.....cheeks
2. गलुन...To melt
3. हॊट.....Throat
4. हठ......Rigid
5. गर्दन....Neck
6. गरॖद.....Dust
7. शानॖ..... Shoulder
8. शान.....Dignity
9. शाम.... Evening
10. शाल...Shwal/Jackal
**************************
         गीता ज्ञान  :अध्याय 17
ओम तत सत त्रॆयि प्रकऻर्य ज़ान
सत चित आनन्द गन ब्रह्म नाव
आसान, यिमवॖय वीद ब्रह्मन  यऺगॖन्य प्रखटान।
वॊन भगवानन गीता ज्ञान
**************************
कश्यप कश्मीर सभा, गुरु ग्राम छु अज़कल समाज्यक्यन ब्यॊन ब्यॊन जायन तॖ ब्यॊन ब्यॊन कूनन मंज़ रोज़न वाल्यन युवा पीडी पानवॖन्य अख ॳकिस सॗत्य क्रिक्यट गिन्दनॖ दऺसय म्युल करनावनॖच अख बॆहतरीन मुहिम चलावनस मंज़ मसरूफ। अथ
मिलच़ारस लॊग ॷठिम वऺरी युहुस तॖ प्रथ वऺरियि छु अथ प्रोग्रामस रसॖ रसॖ हुर्यॆर सपदान रोज़ान। कऺशीरि प्यठॖ नीरिथ 1990-तकिस दक्कॖ पतॖ यॆलि कऻशिर्य बटॖ रऻव्य हि, बिखरेयि हि, बे-वऺसीलॖ बन्यॆयि, क्वस ताम स्व बुद्धि आयि कसताम ॴकॖलस तॖ कॆंह तिथ्य क़दम तुलिन यॆमि कि वजह सॗत्य बटॖ आयि लबनॖ पानॖवुन्य मसलन हवन या सामूहिक हवन करनॖ सॗत्य मील्य बटॖ पानवुन्य, गाशतारुख छ़ान्डान छ़ान्डान ह्यॆच़ पनॖनिस समाजिक्यन छऺकरऻव्यमॖत्यन बच्चन मोसीकी हॖन्ज़ लय तॖ त्राय हावॖन्य, महोत्सव महाशिवरात्री द्वह मनावान मनावान पनॖनि माजि ज़्यॆवि ह्यॆच़ रऻछ करॖन्य, पनॖनिस कल्चरस ह्यॆच़ रऺछ़रावनॖच कूशिश करॖन्य। यिथय पऻठ्य कॊर क्रिक्यट गिन्दनॖ दऺस्य कॆंच़न दाद्यन दवा छ़ान्डनॖच अख कूशिश तॖ ब्यॆयि पनुन मिलच़ार बऺडरावुन  अख मुहिम ह्यॊत चलावुन। यिमव कॆंच़व जान जान काम्यव सॗत्य लॊग कऻशुर बटॖ कुनि ठऺठिस तॖ ह्यॊतुन कलॖ थॊद थऺवित ब्यॆयि पकुन। कथ जि जऻरी
**************************
"त्रॆयि न्यंगि सरा सरॖय सरस
अकि न्यंगि सरस अरशस जाय
हरम्वखॖ कवसरॖ अख सुम सरस
सति न्यंगि सरस शिन्याकार"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप" 
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot ति वुछिव)

18.10.2019

18.10.2019, कार्तिक (कतक) गटॖ पछॖ (कृष्ण पक्ष) च़ोरम(देवादेव) (चतुर्थी) शॊकुरवार (शुक्रवार/ जुम्मा),श्री सप्तर्षी सम्वत 5095, राश वृष(चलान), ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: फरहाद बॖड
    अ: स्व बॖड यस खॊडॖफॆचि
         आसन
2. मु: फ़कीर च़ाव आंगुन होन्यन
         वॊथ लचि दोद
    अ: हंगॖ तॖ मंगॖ कऻन्सि हुन्द
         अज़रवुन युन
3. मु: ग़र्ज़मन्द दीवानॖ
    अ: ग़र्ज़मन्द छु नॗ पनुन हाजथ
         कडनॖ विज़ि अक्लि हॖन्ज़
         कथ या कऻम करान
4. मु: ग़र्ज़मन्द छु फॊटुमुत हॊछि-
         मच़ि क्वलि
    अ: ग़र्ज़मन्द इन्सान छु सख़
         न्वकसान तुलान
5. मु: तमाह छु तावन
    अ: लालॖच करनॖ सॗत्य छु
         ॴख़रस न्वकसान गछ़ान
**************************
1. कलॖ.....Head
2. बुथ..... Face
3. ड्यकॖ.....Forehead
4. नस.......Nose
5. ॳछ......Eye/Eyes
6. कन......Ear
7. बुमॖ....... Eyebrows
8. वुठ...... Lips
9. दंद........Tooth/Teeth
10. ज़्यव.... Tongue
**************************
        गीता ज्ञान  :अध्याय 17
युस दान ज़ोरॖ ज़्यादॖती बॆयज़ती सान, क्व समय क्व पात्रस दिनॖ छु यिवान, सु दान छु तमोग्वन रूप ज़ान
वॊन भगवानन गीता ज्ञान
**************************
कऺशीरि मंज़ ॴस्य शॆंकराचारॖ पहाडॖ प्यठ साफ़ म्यॆच़ वालान तॖ गरि पार्थीश्वर बनावान तॖ पूज़ा पाठ करान रोज़ान। यि प्रथा ति ॴस्य कऺशीरि मंज़ॖय फॖटॖमॖच़। यि पार्थीश्वर बापथ म्यॆच़ ॴस्य अनान हुर्य शेयम द्वह। स्यठाह शोर गुल ओस रोज़ान गरन मंज़। गरॖ ॴस्य बऺरिथ आसान शुर्यव सॗत्य, बड्यव सॗत्य, बुज़र्गव सॗत्य, सऺमिथ गरॖ आसनॖ सॗत्य। यिकॖवटॖ रूज़िथ कम से कम ॴस्य प्रथ गरस मंज़ सऻरी बऻच़ मीलिथ आसान पंदाह वुह बऻच़ यथ मंज़ बऻय तिहॖन्ज़ि ज़नानॖ, शुर्य कऺट्य, नान्य बुडबब, दॖरकाकिनि, हश ह्युर वगैरा वगैरा। दपान कति तिम पांछ़ शॆॴठ नव शुर्य अज़ यिमन अख ज़ॖय तिमन ति खुर्य, फीस वीस बऺर्य बऺर्य पेरन्ट बरहम। दम करुं दम। दमॖ काका दम। दपान ज़ि पनॖनिस ख़यालस द्यू वन्य च़ॖ फ्युर, कुस कडान अज़कल त्वमलस छु स्युर। रऺडीमेड च़ऻरिथ मेलान ब्यॆयि कनॖ कम, दम करू दम, दमॖ काका दम। दर असल द्युत वखतन फ्युर व्वंय छि नॖ गरन मंज़ अकि दॊयव शुर्यव अलाव नज़री यिवान। पान्यो पान्यो छु गोमुत तॖ पानस पानस सॗत्य ल्वकट्यन म्वकट्यन गरन मंज़ छि ॳस्य कऻशिर्य बटॖ द्वह द्वह कडान तॖ ज़िन्दगी हॖन्ज़ नाव पकनावान। सु प्रोन दोर ओस अख स्वपनाह।
**************************
"छ़ान्डान लूछ़ॖस पऻनी पानस
छ़्यपिथ ज्ञानस वोतुम न कोंछ़
लय कऺरमस तॖ वऻच़ॖस अलथानस
बऺर्य बऺर्य बानॖ तॖ चवान नॖ कोंछ़"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

17.10.2019

17.10.2019 कार्तिक (कतक) गटॖ पछॖ (कृष्ण पक्ष) त्रय (दॊयिम) (देवादेव) (तृतिया) ब्रसवार (वीरवार/ब्रहस्पथवार/गुरुवार) श्री सप्तर्षी सम्वत 5095, राश वृष (चलान), ऋतु हरुद (शरद) (चलान), रातुक वॊहरवोद यी ॳज़्य, अज़ छि संकट च़ॊरम (संकट निवार्ण चतुर्थी), अज़ छु करवा चौथ फाकॖ ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: सराफ़ गऺन्ज़रावान द्यार
         अतराफ़ रावरावान द्वह
    अ: वख फ़ऺज़ूल ज़ायि करुन/
         तमाशॖगीर
2. मु: सॆहति बदन तॖ रऺहति जान
    अ: सॆहतॖ ख्वतॖ बॊड आराम
          छु नॖ कांह/अख ॴही
3. मु: साहब छु बख्शनहार
    अ: दय छु बख्शन वोल
4. मु: स़बॖर छु स्वनॖसुन्द टूर
    अ: स़बॖर करुन छु स्यठाह
          फ़ऻयदॖ वातनावान
5. मु: सुबहॖच माहर्यॆन्य दिगरिच
         लोसॖ तोति गोस गोसॖ च़ीर्य
         प्यालस
    अ: बे-सबरी सान वखतॖ ब्रौंठ
         कांह नतीजि छ़ान्डुन
**************************
1. ऒकच़ोर.....A small oven
               with one opening
2. ऒगुर थॊगुर....Haphazard
               Obliquity/Uneven
            Tortuous/Irregular
3. ऒगुन...A fire in fireplace
                Single
4. दॊगुन....Double/Two fold
5. त्रॊगुन...Tribal/Three fold
6. च़ॊगुन... Four fold
6. ऒंगॖज....Finger
7. ऒंगॖज करॖन्य....To excite/
                          To provoke
8. ऒंगॖज गछ़ॖन्य.....To be
                             deceived
9. ऒंगजि ट्यॊंड....Finger tip
10. ऒंगुल.....Finger length
**************************
         गीता ज्ञान  :अध्याय 17
युस दान सत्कारॖ रॊस सख्ती सान
फल तॖ मतलब मदिनज़र थावान
त्युथ दान करुन राजस ज़ान
वॊन भगवानन गीता ज्ञान
**************************
हुर्य च़ोरम छि मानॖनॖ यिवान सिद्धिदाता महागणीश सुन्द द्वह।अमि द्वह ॴस्य  दपान प्रथा ॴस वख्तॖ अकि ज़ि गणपत सुन्द बजन कीर्तन कऺरिथ लऺड्य यिवान बनावनॖ तॖ ॳहलस मऺहलस ॴस्य यिवान बऻगरावनॖ। पतॖ ऒस हुर्य पऻन्च़म द्वह यिवान मानॖनॖ मऻलिस माजि हुन्द द्वह। अमि द्वह ॴस्य बजन कीर्तन कऺरिथ मऻलिस माजि प्रसाद ख्यावनावान तॖ त्युहुन्द ॴशिरवाद रटान। हारन गिन्दनुक सिल्सिलॖ ओस चलान रोज़ान। दपान अमि दुहुक ज़िक्र छु आमुत करनॖ नीलमत पुरानस मंज़ ति।
मऻलिस मऻजि प्रसाद दिथ ॴस यिवान उमा दीवी हॖन्ज़ आराधना करनॖ। हेरऺच़ हुन्द दब दबॖ ओस रोज़ान कऺशीरि मंज़ वख्तॖ अकि ज़बर्दस्त। मगर यि प्रथा ति म्वकलॆयि वारॖ वारॖ वख्तस सॗत्य सॗत्य। हालांकि कऺशीरि मंज़ॖय ॴस यि प्रथा ख़तम गऻमॖच़ कर ताम तिक्याज़ि मानॖनॖ छु यिवान ज़ि वारॖ वारॖ बडॆयि मसरुफ्यात वारियाह, शुर्यन हॖन्द्य इम्तिहान यिम ग्वडॖ ग्वडॖ हेरथ कऺरिथ ॴस्य आसान आयि हेरच़ॖक्यन दॊहन मंज़ॖय यॆमिकि वजह सॗत्य तिहन्दिस असनस गिन्दनस ति बन्दिश आयि या समय कम म्यूल।बाकय व्यस्थतायि बडॆयि तॖ कॆंह रसूमात आयि नज़र अन्दाज़ करनॖ। कथ छि जऻरी
**************************
" च़्यथ नॊवुय च़ऺन्दरमॖ नॊवुय
ज़लमय ड्यून्ठुम नवम नॊवुय
यनॖ प्यठॖ ललि म्यॆ तन मन नऻवॖय
तनॖ लल बॊह नवम नवॖय छस"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.10.2019

16.10.2019,कार्तिक (कतक) गटॖ पछॖ (कृष्ण पक्ष) त्रय (तृतीय) ब्वदवार (बुधवार) श्री सप्तर्षी सम्वत 5095, राश वृष (रऻच़ हॖन्ज़ॖ 8.45 बजि प्यठॖ) ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शेंकरॖन्य मकॖज़ न फालन तॖ
          न गालन
    अ: ॳकसॖय कथि प्यठ डऺठिथ
          रोज़ुन
2. मु: शेठॖ वुहुर काव तॖ शीतॖ वुहुर
          काव पूत
    अ: अकलि निश छॆ नॖ वऻन्स
          कांह कॗमथ थवान
3. मु: शेतानॖ सॖन्द्य कन ज़ऺर्य
    अ: शेतान छु नॖ कऻन्सि हुन्द
          बोज़ान
4. मु: श्रंग तॖ ब्रंग
    अ: शऻल्य तारख हावुन्य/
         फंद वनॖन्य
5. मु: शतायो तॖ गतायू
    अ: आसुन बासुन बऺनिथ छ़ोह
          द्युन पोंसन
**************************
1. ऒश.....Tears
2. अवकात रावॖरावुन....To
                  lose reputation
3. अवक़ात......Status/Time
                  Schedule/Posi-
                  tion/Standing
4. ओल येरुन.....To make a
               nest/To prepare
               a house
5. औलाद.....Child/Kid/
               Descendent/Off
               spring
6. ओलुव....... Potato
7. ओलु बुखार .....Plum
8. अवकाफ..... Endowment
              Charitable/Trust/
              Properties held
              by a Trust
9. ओश.......Upper part of
                   Chappel
10. ओस .....Was
**************************
        गीता ज्ञान  :अध्याय 17
दान द्युन छु कर्तव्य आसान, देश काल तॖ पात्र वुछिथ द्युन जान,
सु दान छु सात्विक मानॖनॖ यिवान
वॊन भगवानन गीता ज्ञान
**************************
दॊयिमि द्वह यथ वनान छि हुर्य द्वय, अमि द्वह छि ठोकुर कुठिस मंज़ पाठ पूज़ा यिवान करनॖ तॖ आवाहन यिवान करनॖ भैरवन मंत्रव दऺस्य। दपान कशीरि मंज़ ॴस्य च़ूहऻठ भैरव यिम कऻशिर्य पंडितन रक्षा आमॖत्य ॴस्य करान। मगर वखतस सॗत्य सॗत्य आव बदलाव तॖ आस्था छ़ॊकेयि। हालांकि कॆंच़न भैरवन छि वुनि ति पूज़ान ब्यॊन ब्यॊन जायन। मिसालन रॗन्यवार्युक विताल भैरव, म्वन्गलुन भैरव, थऺजवोर, व्यथॖ वॊतुर वगैरा वगैरा। कशीरि न्यबर यिथ न रूद सु लिवुन डुवुन तॖ न रूज़ स्व भैरव पूज़ा। यिथय पऻठ्य छु हुर्य त्रॆयि द्वह ग्वरु शिष्य सम्बंध यिवान मनावनॖ। शिष्यस दपान दिवान ओस ॳज़्यकि द्वह ग्वर दीक्षा। ग्वर ओस पनॖनिस यज़मनस ॳज़्यकि द्वह अध्यात्मॖक्य प्रवचन दिवान, संस्कारन हॖन्ज़ ज़ऻन्यकऻरी दिवान, शास्त्रातॖच वखनय करान। मगर यि प्रथा ति म्वकलॆयि कर ताम। न रूद सु क्वलॖ-ब्रह्मुन तॖ न रूद सु यज़मन। यिम चीज़ ॴस कऺशीरि मंज़ॖय गऻब गऻमॖत्य वारॖ वारॖ ति क्याज़ि दपान कऻशिर्य बटन द्युत नॖ पनॖनिस क्वल-ब्रह्मनस सु आदर तॖ सत्कार यॆमुक सु ओस हक़दार। ब्रह्मनन ति बास्यव यि पनुन कार ज़न बेकार तॖ तिमव ह्यॊत मऺशरावुन पनुन यि कार तॖ द्युतुख पनॖनिस शुरिस कऺटिस बदलॖ बदलॖ कार। यि छु अख ख़ास कारण ज़ि सऻनिस समाजस मंज़ प्यॆयि वखतस सॗत्य सॗत्य ब्रह्मनन हॖन्ज़ व्यछ़य। हुर्य च़ोरम वुछव पगाह।
**************************
"च़्यतॖ त्वरुग वगि ह्यथ रॊटुम
च़्यॆलिथ मिलविथ दशि नऻड्य वाव
तवय शशकल व्यगलिथ वऺछ़ॖम
शुन्यस शुन्या मीलिथ गव"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

15.10.2019

15.10.2019 कार्तिक (कतक) गटॖ पछॖ (कृष्ण पक्ष) द्वय (द्विती) बॊम्वार(मंगलवार) श्री सप्तर्षी सम्वत 5095, राश मेष (चलान),ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शेठ गव तॖ ब्रेठ गव
    अ: बऺडिथ छि अकॖल डलान
2. मु: शॆयव पीरव ख्वतॖ छु बे-
         पीरॖय जान
    अ: दऺहन पीर मानॖनॖ बदलॖ छु
         बॆ-पीर आसुनुय जान
3. मु: शिर्यकातॖच ल्यॆज छि
         ख्येमॖच़ होन्यव
    अ: शिरकातस मंज़ छि सऻरी
         ग़ऻर ज़िम्मदऻरी हावान
4. मु: शॆ तॖ त्रॆ नव तॖ काह
    अ: कुनि पऻठ्य बराबरी अनॖन्य
          टाल मटोल करुन
5. मु: शीनॖ शर्त
    अ: न रोज़वुन शर्त
**************************
1. ॳहलि क़लम....Men of
                           letters
2. ॳहलि ज़बान...People
              whose mother
           tongue is same/A
           particular language
3. ॳहलि दिल.......Saints/
                     Pious people
4. ऊर्यकुन.......On that side/
                     To that side
5. यूर्यकुन......On this side/
                     To this side
6. ऊतरॖ......Day before yes-
                  ter day
7. कऻल्यक्यथ....Day after
                         tomorrow
8. अवय......Therefore/
                   Hence
9. अवल...... Premier/Main/
                    Original/Old/
                    Ancient
10. ओल.....Nest/Home
**************************
         गीता ज्ञान  :अध्याय 17
युस तप मूर्ख करान हठॖ सान, मन
वऻनी शरीरॖच पीडा ज़रान, ब्यॆयन
कष्ट द्युन तामस तप ज़ान
वॊन भगवानन गीता ज्ञान
**************************
हेरथ यानि शिवरात्री हॖन्द्यन अक्वुहन दोहन हुन्द कार्यक्रम विधि हिसाबॖ छु यिथॖपऻठ्य करनॖ यिवान। ग्वडन्युक द्वह हेरच़ हुन्द आसान छु हुर्य ऒक्द्वह। अमि द्वह ॴस्य कऺशीरि मंज़ सऻरी कऻशिर्य बटॖ पनॖन्यन पनॖन्यन मकानन हॖन्ज़ साफ-सफऻयी करान। गरिक्यन सारिनी कुठ्यन, लबन मोन्यन, हेरन, वुज़स, द्वारस, ब्रांदस  लिवान तॖ डुवान। कऺशीरि ओस  प्रऻन्यन मकानॖन म्यॆच़्यिव बोर कऺरिथ लबॖ आसान तॖ गुरॖट्य म्यॆच़ि सॗत्य ओस लिवनॖ यिवान। हालांकि सानि माजि ब्यॆनि आसॖ पानय लिवनॖच कऻम करान मगर कॆंच़न मकानन ओस हॆरिमि पॗन्च़मि या च़ूर्यमि पोरॖ प्यठॖ बऺन्यमिस पोरस ताम लिवुन करनावनॖ यिवान मुसलमान मॊहनिविस दऺस्य। अथ लिवनस ॴस्य वनान गरॖनावय ति।नव्यन गरन यिम सीमटॖ सॗत्य बनावनॖ आमॖत्य ॴस्य तिमन गरन ॴस्य सफेदी या रंग करान या करनावान। यॊदवय गरॖच सफ़ऻयी ॴस्य यिवान करनॖ यि ज़ऻनिथ ज़ि शॊम्बू-पार्वती छु गरॖ ॳच़ुन तॖ सोरुय गर्युक गरॖ गछ़ि आसुन शॊद तॖ श्रूच़। गर्युक श्रोच़र गयो अकि तरफ़ॖ तॖ बॆयि तरफ़ॖ दपान अख संकल्प ओस यिवान करनॖ ज़ि पनॖनिस अंदरॖमिस मनॖच थवव  शुद्धि । पनॖनिस शरीर रूपी गरस मंज़ गछ़ि नॖ द्युन क्रूद यिनॖ, कऻन्सि हॖन्ज़ न्यंद्या गछ़ि नॖ यिन्य करॖनॖ, सारनी बुरॖ काम्यन तॖ बुरॖ ख़यालन निशि गछ़ि दूर रोज़ुन तॖ मनॖच एकाग्रॖता वशस मंज़ थऺविथ शंकर-पार्वती हॖन्ज़ आरधना करॖन्य, अमि द्वह प्यठॖ गछ़ि ह्यॊन बजन कीर्तन करुनॖ।
ठोकुर कुठिस मंज़ सारिनी मूर्तियन साफ़ सफऻयी करॖन्य।
अमि द्वह प्यठॖ ॴस्य हारन ह्यवान गिन्दुन। बासान ओस ज़ि बॊड द्वह छु यिनॖवोल।
**************************
"कॆंह छि न्यॆन्दरि हती व्वदी
कॆंच़न व्वद्यन न्यॆन्दॖर प्यॆयिय
कॆंह छिय स्नान कऺरिथ अपूती
कॆंह छिय गॆह बऺज़िथ ति अक्रयी"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप" 
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

14.10.2019

14.10.2019 कार्तिक(कतक) गटॖ पछॖ (कृष्ण पक्ष)ऒक्दॊह (प्रथम)च़ऺन्दॖरवार (सोमवार),श्री सप्तर्षी सम्वत 5095, राश मेष(दुहचि 10.19 बजि प्यठॖ), ऋतु हरुद (शरद)(चलान)..द्रठॖपऻन्च़ुक (पंचक) समाप्त अज़
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
*************************"
1. मु: शीयस सॗत्य शी तॖ मीयस
         सॗत्य मी
   अ: ज़ुव बचावनॖ खऻतरॖ प्रथ
       कऻन्सि सॗत्य पानियार लागुन
2. मु: शोदन च्यव चरॖस क्वन्डलि
         खॊत कऻन्फ
    अ: हऻकिम शऺरीफ़ अमापॊज़
         नोकरस चम
3. मु: शमशीर ज़ख़म बलि तॖ
         ज़्यॆवि ज़ख़म छु नॖ बलान
    अ: कऻन्सि हॖन्ज़ ज़्यॆवि कांह
         वुटुकुर कथ बूज़िथ युस
         छौख लगान छु सु छु नॖ
         सऺहल सऺहल बलान
4. मु: शॊंगिथ बांग दिन्य
    अ: आलॖच़ी इन्सान/कऻहिल
         आसुन
5. मु:शॊंगुन गछ़ि च़ान्गि तॖ व्वथुन
          गछ़ि बान्गि
    अ: सुलि शॊंगुन तॖ सुलि व्वथुन
          छु जान
**************************
1. आबशार.....Water fall
2. आबरेज़......Urine
3. आबस मंज़ क्रऺन्ड...Liveli-
          hood/Maintenance/
          Subsistence
4. आबॖ बुज़्य गछ़ुन....To be
           drowned/Sink/
           Dipped
5. आबॖ हवा....Water and air
                      Climate
6. आबिहयात.....Water of
             immortality/Name
          of a famous spring/
          Water of life
7. ईमानदऻरी.....Honesty/
             Faithfulness/
             Integrity
8. ईमान.......Faith/Belief
9. यकुत......Unity
10. अहंकार.....Affection/
               Boast/Haughti-
               ness/Arrogance/
               Conceit
**************************
          गीता ज्ञान  :अध्याय 17
युस तप यज़त तॖ मान प्रावनॖ बापथ, पाखंड सान करान कॆंह
मतलबॖ ह्यथ, नाशिवान फलॖवोल तप राजस ज़ान
वॊन भगवानन गीता ज्ञान
**************************
शायद छे नॖ सान्यन शुर्यन पताह ख़ास कर यिम 1990-तॖ प्यठॖ ज़न्मस आयि तॖ बडेयि पलेयि कऺशीरि न्यबर ब्यॊन ब्यॊन जायन मंज़ ज़ि शिवरात्री यानि हेरथ महोत्सव छु कऻशिर्य बटन रोज़ान आमुत अक्वुहन दॊहन हुन्द त्यौहार। तिमन छि शायद ख़बर ज़ि शिवरात्री छि ॳकिस या द्वन दोहन हुन्द बॊड दॊह तॖ बस मगर हक़ीकथ छि बदलय। दपान छि ज़ि अगर ॳस्य शास्त्र विधिकि हिसाबॖ यि त्यौहार पूरॖ अक्वुहन दॊहन द्वहवऻर्य हिसाबॖ करव नॖ, हेरऺच़ हुन्द महत्व छु पनॖनि मतलबॖ निशि दूर गछ़ान या खऺन्ड्य-फुट्य गछ़ान तॖ इन्सानस छु नॖ सु फल मेलान युस तऺमिस मेलुन गॊछ़। अथ मंज़ कांह शक़ छु नॖ ज़ि ॳस्य छि शिवरात्री बडॖ श्रद्धायि सान करान रोज़ान मगर कॆंच़न विधियन छि ॳस्य नज़र अन्दाज़ कऺरिथ पकान ति क्याज़ि कामि हॖन्ज़ त्रफ त्रफ छि अकि तरफ़ॖ, वखतॖच कमी छि दॊयिमि तरफ़ॖ तॖ त्रॆयिम तॖ असली वजह छु सारिनी कथन हुन्द पूरॖ ज्ञान न आसुन।
वऺलिव ॳस्य वुछव ज़ि हेरच़ॖक्यन यिमन अक्वुहन दॊहन क्याह आयि सऻन्य ज़िठ्य करान तॖ असि कत्यन छ़ॊटॖरोव तॖ क्याज़ि छ़ॊटॖरोव या कमन चीज़न प्यठ कॊर नॖ असि गोर या कमन चीज़न निशि रूद्यमॖत्य छि ॳस्य बेख़बर। कथ ज़ि जऻरी
**************************
"कुस हो मालि लूसुय नॖ पकन पकन
कुस हो मालि लूसुय नॖ व्वलगन समीरू
कुस हो मालि लूसुय नॖ मरन तॖ ज़्यवन
कुस हो मालि लूसुय नॖ करन न्यंद्या"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

13.10.2019

13.10.2019, ॴशिद (आश्विन) ज़ूनॖ पछॖ (शुक्ल पक्ष) पुनिम (पूर्णिमा) आथवार (रविवार/एतवार) श्री सप्तर्षी सम्वत 5095, राश मीन (चलान) ऋतु हरुद (शरद) (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शिकसॖनि वावॖ छु व्वखुल
         फुटान
    अ: बद द्वह यॆलि यिवान छि तॖ
         मुसीबथ ति छु व्वतलिथ
         यिवान
2. मु: शुकुर ज़ाति पाक न आयम
         यड तॖ न लॊगुम फ़ाकॖ
  अ: सफेदपूशी मंज़ द्वह गुज़ारॖन्य
           सन्तोष करुन
3. मु: शिकस लदस हून पतय
    अ: बदनसीबस छु तक्लीफस
        प्यठ तक्लीफ़ पतय आसान
4. मु: शकॖलदस पनुन शक़
   अ: शऺक़ी इन्सान छु प्रथ कऻन्सि
        प्यठ शख करान
5. मु: शिकस लदस शिकस डऺन्ड
   अ: कमज़ाथ छु नॖ ज़ांह बदलान
**************************
1. आब अच़ुन.....Defect/Find
                         fault with
2. आब ताब..... Patience/
                        Luster
3. आब दानॖ....Fortune/Food
               for one's lot/Job/
              Destiny/Means of
              subsistence/Lot
4. आबकऻरी....Excise/Water
                      tax/Revenue
5. आबॖगोश ...Mutton soup
6. आब मंदुन....Useless talk/
              Silly talk/Babbling
7. आब नॖ तरुन...Water proof
             To remain in same
             condition
8. आबऻयी.... Hereditary/
                     Ancestral
9. आबाद..Well established
                 Prosperous/
                 Rich/Wealthy
10. आबादॖ अजदाद....Family
                 lineage/Ances-
                 tors
**************************
         गीता ज्ञान :अध्याय 17
फल न यछ़नवऻल्य यूगी जन, श्रदायि सान अथ प्यठ दऺरिथ
रोज़न, यि त्रॆयि प्रकऻर्य तप सात्विक ज़ान
वॊन भगवानन गीता ज्ञान
**************************
ब्वकॖ छि फोलान येलि कुनि खान्दरस व्वछ़बस प्यठ कांह प्रोन ॴश्यनाव छु नज़रि यिवान यॆमिस यॆच़काल आसि गोमुत वुछनसॖय।
तऺमिस वुछतॖय छि तिम सऻरी द्वह ॳछन तल यिवान यॆलि तऺमिस सॗत्य आसान कॆंह द्वह असान तॖ गिन्दान कऺड्यमॖत्य तॖ मन छु करान ज़ि तऺमिस सॗत्य बिहिथ दिमहऻव फ्युर तिमन कथन ब्यॆयि अकि फिरि। राथ ओस म्यऻनिस पॆतरस वॊहरवोद। तऺमिस ओस यि वारॖकारॖ हऺतिम वॊहरवोद। नाव छुस श्री राम च़न्द्र कौल तॖ क़लमी नाव छुस पम्पोष। ॳम्यसुन्द यि वॊहरवोद आव मनावनॖ समावार होटलॖ, पम्पोश एनक्लेवॖ, दिल्लि मंज़ तऺम्यसॖन्दि न्यॆचवॖसॖन्दि दऺस्य।  मनावनॖ आव यि द्वह बडॖ चावॖ सान, मायि तॖ मोहब्बतॖ सान। सालस ॴस्य आमॖत्य ॳम्यसॖन्द्य कोरि ज़ामतॖर्य, तिहिन्द्य शुर्य तॖ शुर्यन हॖन्द्य शुर्य। बॖति ओसुस सालरव मंज़ अखा। पोज़ हय बूज़िव बॖ गोस परेशान यि वुछिथ ज़ि यिमन ब्यॆन्यन तॖ बायन सॗत्य ओसुस बॖ अज़ त्रॖह वऺरी पथ कऺशीरि मंज़ वॊथान बॆहान तिहन्द्य शुर्य तॖ तिहॖन्द्य ज़ुर्य तऺग्य नॖ म्यॆ परज़नावनय। तिमन बिचार्यन ति ॴस नॖ पताह ज़ि यि कुस छु यि क्याह वाति कऺमिस। हालातव द्युत युथ फ्युर ज़ि पनुन पान छु पनॖन्यनॖय अंगन ॴश्यनावन मंज़ परुद बासान। मॊदुर कथ छि यि ज़ि ईश्वर सॖन्दि कृपायि सॗत्य छु ॳमिस म्यऻनिस पॆतरस हथ वुहुर वऻतिथ ति यादाश्त बरपूर। नज़र बराबर। हऻरऻनी हॖन्ज़ कथ ॴस यि ज़ि हथ वऺरी ब्रूंठमि कथॖ आसस याद मगर नऺवि पुयि मुतलक छुस कमॖय पाहन ज़्वन। यॆलि म्यॆ अम्युक वजह प्रुछ़मस राथ तॖ असनऻनाह कऺरॖन तॖ दॊपुन ॳज़्यकिस शुरिस छॆ नॖ पतहॗय बॖ ख्यवान क्याह छुस, बॖ च्यवान क्याह छुस, म्यॊन मामतॖर कुस छु, म्यॊन प्वफतुर कुस छु। हद ख्वदॖ हद छि ॳज़्यकिस शुरिस छॆ नॖ पननिस गरस मंज़ मऻलिस माजि अलावॖ ब्यॆयि कऻन्सि हॖन्ज़ स्वद-ब्वदॖय। सु छु पनॖन्यनॖय द्वलाबन मंज़ गीर तऺमिस छे नॖ पताह ज़ि कुस छु पीर तॖ कुस छु फ़कीर
**************************
"कुस डिंगि तॖ कुस ज़ागि
कुस सर वऺत्रि तेलि
कुस हरस पूज़ि लागि
कुस परम पद मेलि"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

12.10.2019

12.10.2019 ॴशिद (आश्विन) ज़ूनॖ पछॖ (शुक्ल पक्ष) च़्वदह (चतुर्दशी) बटवार(शनिवार/ शनिश्चरवार), श्री सप्तर्षी सम्वत 5095, राश मीन (चलान) ऋतु हरुद (शरद) (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शकलि छा ल्यॆविन दिन्य
         अकॖल गछ़ि आसॖन्य
   अ: दानऻयी छि ख़ूबसूरती ख्वतॖ
        ज़्यादॖ कॗमती
2. मु: शिशस ति पुशि
    अ: कम आमदनी/ना-कऻफ़ी
         आसुन
3. मु:शॆशतॖरस छु शॆशतॖरॖय च़टान
    अ: पनॖनिस छि पनॖनी ददार
          वातनावान
4. मु: शुर्यन सॗत्य गरॖ करुन गव
         गुर्यन सॗत्य दब करुन
    अ: शुर्य रछिन्य छि स्यठाह
         मुश्किल कऻम
5. मु: श्राकि तॖ माज़स छा वाठ
    अ: अख ॳकिस दुशमन/
          पानवुन्य दुशमनुत
**************************
1. आबि ज़म ज़म...Water of
            sacred Macon well
2. आबि ज़ुलाल....Clean
             water/Pure water
3. आब........Water
4. आपरि थापरि..... Quickly/
              Swiftly/At once
5. आप्रुन.....To feed
6. आपदा..... Trouble/Dis-
               tress/Calamity/
               Venture/Misfor-
               tune
7. आपॖ गॊबुर.....Coward
                timed/Chicken
                hearted person
8. आपॖ.......Mother/Aunt
9. आतॖ तऻय..... Thievish/
               Murderous/A
           tyrant/A desparado
           A ruffian
10. आछुर.....Raw/Crude/
                Immature/Virgin
                (Horse)
**************************
          गीता ज्ञान  :अध्याय 17
मन ख्वश थवुन शांत बाव रोज़ुन
शुद अंत:कर्न मन वश थावुन
भगवत ध्यान करुन मनुक तप ज़ान
वॊन भगवानन गीता ज्ञान
**************************
कऺशीरि न्यबर नीरिथ केंच़स कालस छ़्रट छ़्रट कऺरिथ, नरि हॖन्ज़ि जायि ज़ंग तॖ ज़ंगि हॖन्ज़ि जायि नऺर दिथ सम्बोल पनुन पान। पनॖन्यन शुर्यन कट्यन पथ पनॖन्य सऻरी अरमान लबि ताकस थऺविथ  परॖनऻव्य तिम, ल्येखनऻव्य तिम तॖ ह्यॊत फ्रख ह्यु त्रावुन याम तिम गऺयि बडान तॖ पनुन पोतकाल ह्यॊत मऺशरावुन। सेरॖ वावस सॗत्य सॗत्य द्युत डेरॖ वावस प्यठ ति ध्यान तॖ बीठ्य फ्लैटन मंज़, ल्वकट्यन म्वकट्यन मकानन मंज़ तॖ रूद्य जीवन यात्रायि मंज़ क़दम क़दम ब्रौंह कुन कडान। मगर  कऺशीरि न्यबर यथ ज़िन्दगी हॖन्दिस सफरस मंज़ आव बॊड बारॖ बदलाव नज़रन मंज़। वारिहाव कथव रऺन्ग्य। वारियाहव रिश्तव रन्ग्य तॖ वारियाहव संस्कारव रऺन्ग्य। दूर्यर लॊग वारियाह अख ॳकिस निश। ज़ऻती तोर पऻठ्य छि नॖ ह्यकान  अख ॳकिस निश वऻतिथ, युन गछ़ुन गव स्यठाह कम। ख़बर अतर छि व्वंय मोबाइलॖ दऺस्य ह्यवान रोज़ान। शुर्य कऺट्य वऻत्य पऺरिथ लीखित व्यलायत तॖ त्युहुन्द दीदार ति छु व्वंय मोबायलॖ या लैपटापकि व्यब-कैमि दऺस्य ह्यकान मंज़्य मंज़्य कऺरिथ मगर कुनि बऺडिस लूकिस दॊहस प्यठ त्युहुन्द आसुन ज़ऻती तोर पऻठ्य छु द्वर्लब। कॆंच़न सान्यन शुर्यन गऺयि वऻन्स पज़नॖ प्यॆठ नीरिथ तॖ तिम छि वुन्युख ताम अनहॖहरी। तान छु नॖ सऺही मेलान अख ॳकिस। प्राईवेट नोकरीयन मंज़ छि सऻन्य शुर्य कऺट्य लऺगिथ। मोल मऻज्य छु लाचार तॖ यिति छु अख ख़ास वजह म्यॆ बासान ज़ि तिहिन्द्य शुर्य छि ज़ऻच़ न्यबर खान्दर करनस प्यठ आमादॖ गछ़ान। च़ॊक मॊदुर ख्यनस छु नॖ कऻन्सि वार। कम ज़्यादॖ आमदनी आसॖन्य छु नॖ मनज़ूर वारिहान। मसलॖ छि ग्रॆन्दि रॊस। व्हाटसापस प्यठ छु कॆंच़न ग्रुपन मंज़ होखॖय बऺहस तॖ हॊछी सियासत ॴठ पऺहर चलान रोज़ान मगर असली दाद्यन छु नॖ दवाह कांह छ़ान्डान ज़ि कथ कथि दिमव कमि सॗत्य वाठ। सऻरी बनेयि ग्वर ता लीडर नॊन छु नॖ कांह वतॖहावक। कथ छि जऻरी।
**************************
"कुस पुश तय क्वसॖ पुशानी
कम कुसुम लऻग्यज़्यस पूज़े
कवॖ गॊड दिज़्यस ज़लचि दऻनी
कवॖ सनॖ मंत्रॖ शंकर - स्वात्मॖ वुज़े"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

10.10.2019

10.10.2019, ॴशिद (आश्विन) ज़ूनॖ पछॖ (शुक्ल पक्ष) बाह (द्वादऺशी) ब्रसवार (वीरवार/ ब्रहस्पथवार/गुरुवार),श्री सप्तर्षी सम्वत 5095,राश कुम्भ (चलान), ऋतु हरुद (शरद) (चलान), द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शाहस पथ छि गऻबथ
    अ: पतॖकनि छि प्रथ कऻन्सि
         गऻबथ यिवान करनॖ
2. मु: शालस लॊट ज़्यूठ पानस
         वुरुन वलुन
    अ: प्रथ कऻन्सि छु पनुन पनुन
         चीज़ पनॖनि आसऻयशि
         बापथ तॖ ब्यॆयिस क्याह
3. मु: शाला बॊड कुस दॊपनख
         यॆलि युस आव
    अ: यसॖय बऺड जाया अथि आय
          तऺस्य वॊनुख बॊड
4. मु: शालॖ ह्यंग च़रि द्वद तॖ मऺह्य
         ॳडिज
    अ: ना मुम्किन तॖ नायाब चीज़
5. मु: शुप्य कानि वछस ज़री
         नऻल्य
    अ: युस नॖ यथ लायक़ आसि सु
         ति छ़ारान
**************************
1. आरऻयश..... Decoration/
           Adornment/ Bede-
           cking
2. आरॖकऺच़.... Helpless/Dis-
            graceful/Pitiable/
          Inelegant/Destitute
3. आरुम....One who grows
                  vegetables
4. आर...... Compassion/
                Pity/Sympathy
5. आच़ार..... Etiquette/
            Established rule of
            conduct
6. आछ़नावुन....To bring a
                        pot in use
7. आज़मऻयिश....Test/Proof
             Trial/Examination/
             Experiment
8. आराम.....Relax/Rest/
             Comfort/Relief/
             Pleasure/Ease
9. आराम तलब....Lazy/Idle/
            Slothful/Delicate/
            Inactive/Ease lov-
            ing
10. आर्ट......Art
**************************
         गीता ज्ञान  :अध्याय 17
दीवन ब्रह्मनन गुरु जिन्यन सीवा
स्यज़र पज़र ब्रह्मचार्य तॖ अहंसा
यिम सऻरी शऺरीर तप ज़ान
वॊन भगवानन गीता ज्ञान
**************************
अख लार अख दार कति ॳस्य छि मेलान जेलान जुदऻय हुन्द दोर। अज़ मील्य अख ॳकिस ज़ानव ग़नीयथ क्याह पताह कल हो न हो। कथ बाथ कऺर्यतव खुलॖ डुलॖ पानवुन्य क्याह पताह कल हो न हो। ॳस्यतव गिन्द्यतव हिक्टाह कऺर्यतव क्याह पताह कल हो न हो। ॴश्यनाव रॖश्यनाव छि समान खान्दरन व्वछ़बन प्यठॖय या कऻन्सि हॖन्दिस मरनस प्यठ। यिम ॴश्यनाव ॳछव निशि दूर्येमॖत्य छि आसान तिम याम कुनि बऺडिस लूकिस दॊहस प्यठ नज़रि गछ़ान छु इन्सानस छि ब्वकॖ फॊलान। असि कऻशिर्य बटन गव पज़नॖ प्यॆठीय। यॆलि कऺशीरि प्यठॖ च़ऺलिथ आयि वारिहास कालस लऺज्य नॖ पतहॗय ज़ि कुस कथ बालस या छम्बस लॊग। सऻरी लऺग्य पनुन पनुन पान सम्बालनस। ॴश्यनावस रोव ॴश्यनाव। पनिनिस रोव पनुन।गटॖकार वॊथ। क़हर वॊथ। 1990-तुक सु अनिगॊट यॆलि ॳछन तल छु यिवान, तॗर छि फटान। पतॖ आयि यॊत यिथ हवन करनॖ। यि अकॖल यॆमिस ति पिज्य तऺमिस छु म्यॊन नमन ति क्याज़ि रऻव्यमॖत्य ह्यॆतिन लबनॖ यिन्य तॖ नन्यव वारॖ वारॖ ज़ि कऺम्य कथ जायि कुस कून छु रॊटॖमुत। खान्दरन व्वछ़बन मंज़ ति ह्यॆतिन्य अंग ॴश्यनाव नज़रि यिन्य। यॆकीन मऻनिव ज़ि अज़ गऺयि व्वंय त्रॖह वऺरी असि कऺशीरि न्यबर आमॖतिस, वुनि ति छॆ नॖ कॆंच़न अंगन ॴश्यनावन हॖन्ज़ ब्वयी ज़ि तिम छि कति। कथ छि जऻरी
**************************
"मन पुश तय यछ़ पुशानी
बावॖक्य कुसुम लऻग्यज़्यस पूज़े
श्यशि रसॖ गॊड दिज़्यस ज़लॖच दऻनी
छ़्वपि मंत्र स्वात्मॖ शंकर वुज़े"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.10.2019

11.10.2019, ॴशिद (आश्विन) ज़ूनॖ पछॖ (शुक्ल पक्ष) त्रुवाह (त्रॆयॊदशी) शॊकुरवार (शुक्रवार/ जुम्मा),श्री सप्तर्षी सम्वत 5095, राश मीन (रऻच़ हॖन्ज़ि 10.26 बजि प्यठॖ), ऋतु हरुद (शरद)(चलान), द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शुर गव गुर न लग्यस तॗर
         तॖ न यियस यड
    अ: शुरिस छि तॗर कम पोरान
         तॖ ख्यथ-च्यथ छु ब्यॆयि
         मंगान
2. मु: शुर्य वोल ख्यॆया हिर वोल
         पनुन
    अ: ज़िम्मॖदार शख़्स छु हमेशॖ
         पर ह्यॊत आसान
3. मु: शरहऻस तॖ शर्मॖय क्याह
    अ: क़ोनूनस निशॖ छॆ नॖ कांह
         शर्म आसान
4. मु: शुर गव ब्रोर व्वलॖ व्वलॖ
         कॊरुस तॖ यी
    अ: शुर छु व्वलॖ व्वलॖ करनस
         लोर आसान
5. मु: शुर कति शुर कति माजि
         नखस प्यठ
    अ: चीज़ नखॖ ॴसिथ ओरॖ
          योर छ़ान्डुन
**************************
1. आरॖ...... Mountain river/
                  River lead
2. आरॖ पलन पान छावुन...To
              protest violently/
              An argument/Dis-
              cord/Objection
3. आदन....Start/Beginning
                  First
4. आदम.....The first man
                 created on earth
5. आदर....Honour/Respect
                 Dignity/Esteem
                 Reputation
6. आदत.....Habit
7. आदाब...... Greeting/
                Compliments/
                Obeisance
8. आदम खोर.... Cannibal/
                      Man eater
9. आदमज़ाद..Human being
10. आरॖवल.....Rosa webbi-
                     anna/A flower
**************************
       गीता ज्ञान  :अध्याय 17
वऻर नॖ थवुन, प्रॆयिवुन बोलुन वीद शास्त्र परुन तॖ दय नाव स्वरुन
अथ वऻनी समबंद तप छि वनान
वॊन भगवानन गीता ज्ञान
**************************
रसॖ रसॖ रिशतन छ़्यनान गऺयि तॖर
कति रूद मामतॖर तॖ प्वफतॖर। मगर तॖरि सॗत्य मीज्य तॖर अज़ ज़ानव ग़नीमथ, क्याह पताह कल हो न हो। अयाल छ़ॊकॆयि। रिशतॖ च़्वकॆयि। दूर्यॆर लॊग। समयन द्युत व्वलॖगॊतुन युथ ज़ि पनुन परज़ॖनावुन गव व्वंय मुश्किल। पनॖन्य शुर्य यिम नगरॖ नीरिथ पांद्रठन लऺग्य, तिहन्द्य शुर्य यॆलि तॆलि व्यलायतॖ प्यठॖ पछस रयतस पनॖनिस वतनस कुन फेरान छि, तिमन छि प्यवान ज़ान पहचान करॖनावॖन्य ज़ि कुस क्याह कऺमिस वाति।वुनि छु नॖ सु पूर पऺद्य त्रावऻनी कुनि ज़ि वापस व्यलायथ गछ़नॖच त्रफॖ त्रफ छि शॊरु गछ़ान। शुरुस छु सु रिशतॖ तीत्यसॖय कालस याद रोज़ान यीतिस कालस सु पनॖनिस वतनस मंज़ रूज़िथ छु। पतॖ छुय ब्यॊयि ॳल्लाह ॳल्लाह ज़ि खऻर सलाह। च़ॖ कुस तॖ बॖ कुस। दोयिमि वऺरी यॆलि ब्यॆयि यी वतनस मंज़ तऺमिस छु नवि सरॖ प्यवान तोरुफ़ करनावुनॖ  तॖ नवि सरॖ याद प्यवान पावॖनावुन ज़ि यि वुछॆयोतन ना च़्यॆ पऺतिमि वऺरियि। तऺमिस शुरिस छु पनॖनिस ज़ॆहनस प्यठ प्यवान ज़ोर त्रावुन तॖ करान पज़ि अपुज़ि परज़ॖनावनॖच कूशिश। यिम रिशतॖ छि व्वंय कचॖ पनस मंज़ तॖ छ़्यनॖनुक ख़तरॖ छु नज़र यिवान।
शुर्य पालान ॳस्य कमि लोलॖ सान
अख वोत चीन तॖ ब्याख जापान, ॳड्य छि च़्रंगान तॖ ॳड्य लाचार। कर्मॖ लीखाये कर नमस्कार। अज़कल छि व्वंय सऻरीय अंग ॴश्यनाव असि दिलस मंज़ कम तॖ कनन मंज़ ज़्यादॖ। यॊदवय व्वनॖज़ांह तॖ तिनॖज़ांह या ख्वदा नखास्ता मोबाइल रावि कुनि सातॖ मानुन गछ़ि ज़ि सु रिशतॖदारॖय रोव् ति क्याज़ि तिम नम्बर दुबारॖ मेलॖन्य छु मुहाल। कथ छि जऻरी
**************************
"च़ॖह ना ब्वह ना ध्येय ना ध्यान
गव पानय सर्व क्रय मऺशिथ
अन्यव ड्यूंठुख केंछ़ ना अनवय
गय सथ लयि पर पऺशिथ"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

09.10.2019

09.10.2019, ॴशिद (आश्विन) ज़ूनॖ पछॖ (शुक्ल पक्ष) काह (देवादेव) (एकादऺशी) ब्वदवार (बुधवार) श्री सप्तर्षी सम्वत 5095, राश कुम्भ (दुहॖचि 9.40 बजि प्यठॖ), ऋतु हरुद (शरद) (चलान).. ॳज़्यकि प्यठॖ छु द्रठपऻन्च़ुक (पंचक) ति शुरु
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शऻल्य तारख हावॖन्य
    अ: अपुज़ दऺलील बोज़नऻविथ
          दॊखॖ द्युन/अपुज़ व्वमेद
          पऻदॖ करॖन्य
2. मु: शाल गव क्वलि ज़ि आलम
         गव क्वलि
    अ: युस मरि तसॖन्द्य किन्य छु
          दुनिया मरान
3. मु: शाल शाल ब्यॊन ब्यॊन टुंगि
         विज़ि कुनी
    अ: ज़ऻती दुशमनी ॴसिथ ति
         इतिफ़ाक आसुन
4. मु: शालॖ सॖन्ज़ टुन्ग
    अ: यथ मंज़ सऻरी पनॖन्य
         आवाज़ रलावान छि
5. मु: शाल च़ऺलिथ बठ्यन
         लोरि
    अ: ख़तरॖ टऺलिथ रोब हावुन/
         बऺल्य क्रकॖ नाद
**************************
1. आसुन बासुन...Real estate
              Livelihood/Estate
              Property
2. आसन वोल.....Wealthy
                           person
3. आसन......A small carpet
              A seat/A posture/
              A resting place
4. आसुन......To be/To have
              wealth, riches, etc
5. असुन......To smile/To
                   laugh
6. आसमानॖ प्यॊन....To be
             astonished/Wond-
             er/Fall from the
             sky/Come as a
             windfall
7. आसमान हावुन.....Make
             false promises/
              Boast
8. आसमान नखस तुलुन...To
             make a noise/To
          create disturbance/
          To make agitation
9. आसमान खारुन....To raise
           to sky/To praise a
           lot/Flatter/Wheedle
10. आसमऻनी ॳन्ज़...A bird/
           Flying birds moving
           in the sky
**************************
         गीता ज्ञान  :अध्याय 17
शास्त्रॖ व्यज़ॖ रॊस तॖ श्रदाय सिवऻय
मंत्रव रॊस तॖ दक्षनाय वरऻय, यि
करुन छु तामस यऺग्न्य आसान
वॊन भगवानन गीता ज्ञान
**************************
राथ ओस दशहार। ब्यॊन ब्यॊन जायन आव रावनॖ सुन्द आकार बनावनॖ तॖ तऺमिस दऺछिन्य तॖ खॊवॖर्य तम्यसॖन्दी ब्यॆयि द्वन बायन हुन्द आकार बनऻविथ तिमन च़ॖख दिनॖ। यि च़ॖख दिनॖच प्रथा छि आमॖच़ वार्याह कालॖ प्यठॖ चलान।अथ पऺत्यकिन्य छि ब्यॊन ब्यॊन कथॖ आमॖच़ वनॖनॖ यिम वुन्युख ताम छि चलान। रावनॖ सॖन्दि दऺहन कलन प्यठ छि कॆंच़व महाप्वर्षव पनॖन्य पनॖन्य आयि कथॖ बनाव्यमऺच़ॖ। दपान छि ॳज़्युक दॊह छु ह्यॆछनावान ज़ि किथॖ पऻठ्य छु पोज़ अपज़िस गालान।
अवग्वनन ज़ालान। यिम अवग्न छि ॳकिस शब्दस मंज़ आमॖत्य पारनॖ। सु शब्द छु "अमॖकलस"।
"अ" सॗत्य आव अन्याय, अहंकार तॖ अमानवता, "म" सॗत्य मॊह, मद तॖ मत्सर, "क" सॗत्य छु काम वासना तॖ क्रोध, "ल" सॗत्य छु लोभ तॖ "स" सॗत्य छु स्वार्थ।यिथ पऻठ्य छु यि शब्द बनान *अमकलस*। संक्लप छि करान प्रथ वऺरियि ॳज़्यकि दॊह ज़ि ॳस्य रोज़व यिमव दऺहव ब्यमार्यव निशि दूर तिक्याज़ि यिम ब्यमारि रूपी अवग्वन छि इन्सानस हनि हनि अंदॖर्य अंदरियि गालान रोज़ान तॖ इन्सान छु अथ मॊहमायायि ज़ालस मंज़ फसान तॖ अति न्यॆरुन मुहाल बासान। कऺशीरि मंज़ ओस ॳज़्यकि द्वह बोड बारॖ जॊलूस न्यॆरान तॖ श्रीनगरॖकिस कॆंच़न अलाकव मंज़ॖ फीरिथ ओस यि जॊलूस वातान हॊज़ूरी बाग यॆति रावनॖ तॖ ॳम्यसॖन्द्यन बायन हॖन्द्य प्वतलॖ ॴस्य आसान बनावॖ आमॖत्य तॖ ओस रथॖ प्यठॖ ब्वन वऺसिथ राम तीर चलऻविथ यिमन त्र्यन बायन भस्म करान। कथ छि जऻरीय
**************************
"क्रिया कर्म धर्म कॊरुम
तीर्थन नऻवॖम पनॖन्य काय
पापन सॊम्बरिथ भस्म कॊरुम
तति कुस ओस तॖ यॊत कॖम आय"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.10.2019

08.10.2019, ॴशिद (आश्विन) ज़ूनॖ पछ (शुक्ल पक्ष) दऺहम(देवादेव)(दशमी) बॊम्वार (मंगलवार)श्री सप्तर्षी सम्वत 5095,राश मकर(चलान)
ऋतु हरुद (शरद)(चलान)..अज़ छु दशहार (विजय दशमी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: स्वनस बोश कनस तल
    अ: प्रथ कुनि चीज़स छु पनॖनि
         जायि बजर
2. मु: स्वनॖ रॊपॖ कनि छुय तारा-
         चन्द
    अ: छऺलिथ तॖ छॊकिथ/ह्यनॖ
         दिनॖ वरऻयि
3. मु: सिवन ल्यॆजि द्रायि तॖ बुज़नॖ
        ल्यॆजि च़ायि
    अ: अकि बलायि म्वकलिथ
          ब्यॆयिस बलायि लगुन
4. मु: स्वन्दरि हॖन्दि शान्दय
    अ: मस लगन आसुन/कुनिच
         नॖ ख़बरॖय आसॖन्य
5. मु: सूर मऺथिथ च़ूरॖ जमाथ
    अ: स्व बदमाश जमात यथ नॖ
         नन्यर गोमुत आसि
**************************
1. आफ़ताब....Sun
2. आग़ॖ..... Venerable/Res-
                  pect/Master
3. आग़ॖबाय.... Mistress/
                       Land lady
4. आफ़ताब बालस प्यठ
     वातुन.......Sun set/To
              become very old
5. आफ़त..... Calamity/
              Catastrophe/
           Disaster/Evil/Hard-
           ship/Misfortune/
           Mishap/Difficulty/
           Wretchedness
6. आफ़रीन..Ovation/Praise
             Well done/Accala-
             mation
7. आकाश वाणी....Voice of
              heaven/All India
              Radio/A divine
             communication/A
            revelation/Oracle
8. आख.......A sign/Mark/
                   Trace/Came
9. आकाश....Sky
10. आकार.....Shape/Form/
               Structure/Semb-
             lance/Appearance
**************************
         गीता ज्ञान  :अध्याय 17
 मगर युस यऺगॖन्य पाखंड सान, फल मदि नज़र थऺविथ करनॖ यिवान, अथ यऺगन्यस राजस यऺगॖन्य वनान
वॊन भगवानन गीता ज्ञान
**************************
नाग छु हॆन्दी शब्द यॆम्युक माने छु सांप तॖ कऻशिर्य पऻठ्य वनान छिस
स्वरुफ। मगर कऺशीरि मंज़ छि वनान नाग च्यॆशमस। च्यॆशमॖ यथ पोन्य वुज़ान छु ज़मीनि तलॖ प्यठॖ।
कऺशीरि मंज़ छि नागन हॖन्ज़ संख्या स्यठाह। यिमन नागन छि ब्यॊन ब्यॊन नाव ति आमॖत्य दिनॖ।
यिमन नागन हॖन्द्य नाव छि दपान वारियाह पॊतकालॖ प्यठ आमॖत्य दिनॖ तॖ वुन्युख ताम छि तिमवॖय नावव सॗत्य यिम नाग यिवान  परज़नावनॖ।कॆंह नाव छि.. वेरी नाग, अनंत नाग, शेष नाग, कारकूठ नाग, व्यच़ार नाग, गौतम नाग, कुठयेर नाग, पापहरन नाग, वगैरा वगैरा। कहावत छि ज़ि यॆति यॆति यिम नाग कऺशीरि मंज़ छि यिमन जायन छि सान्यव पूर्वजव तपस्या कऺरमॖच़ तॖ पज़र पॊज़रोवमुत। ज्ञान हऻसिल कॊरमुत। यिमन नागन ताम वऻतिथ ॴस अति पूज़ा पाठ करनॖच अख प्रथा चलान सऺदियव प्यठ। कऻशिर बटॖ समाजिच़ छि यिम नाग पनॖनि सभ्यतायि सॗत्य आमॖत्य जुडिथ तॖ यिमन जायन हॖन्ज़ यात्रा ॴस बन्यॆमॖच़ अख अभिन्न अंग। व्यच़ार नागॖ ओस वखतॖ अकि ज़बर्दस्त मेलॖ लगान।मेलॖ ओस लगान वेरनागॖ तॖ अनन्त नागॖ नागबलॖ तॖ बाकयन जायन ति विज़ि विज़ि। अमि अलाव ॴस्य कॆंह चमत्कऻरी नाग, क्षीर भवऻनी तुलमुल्युक नाग, तता पानी नाग वगैरा वगैरा। यिमन हुन्द महत्व छु वुन्युख ताम ति जऻरी। यिति छु अख वजह ज़ि   कऺशीर छु अख नाव ऋश्य वऻर ति। चॆशमे शऻही, चॆशमॆ साहबी छि तिम नाग ज़ि यिमन नागन हुन्द पोन्य चनॖ सॗत्य ओस हऻज़्यमॖ दुरुस्त रोज़ान। यिमन सारिनॖय नागन छु क्याहताम रिश्तॖ रूदमुत कऺशीरि मंज़ रोज़वऻल्य नाग क़बीलस सॗत्य ति। मान्यता छि ज़ि नाग, पिशाच तॖ यक्ष छि त्रे ज़ऻच़ आसमच़ॖ कऺशीरि मंज़ रोज़ान ज़मानॖ अकि कश्यप ऋशि निस वखतस मंज़। यिमन कबीलन हॖन्ज़ि कथायि छि स्यठाह मॊहशूर। नाग पंचमी , यक्ष अमावस्या यानि ख्यॆच़ि मावस, गाडॖ बतॖ यिम सऻन्य रसम छि यिमन त्र्यॆन कबीलक्यन रसमन सॗत्य वाठ ख्यवान। तिमन प्यठ करव ब्यॆयि कुनि द्वह कथबाथ।
**************************
"गगन च़ॖय बूतल च़ॖय
च़ॖय छुख द्यन पवन तॖ राथ
अर्ग च़ंदन पोश पोन्य च़ॖय
च़ॖय छुख सोरुय तॖ लऻगिज़ि क्या"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)