29.12.2020

29.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी) (देवादेव) बॊम्वार (मंगलवार) श्री सप्तर्षि सम्वत 5096, राश मिथुन (चलान) ऋतु हेमन्त (चलान)...चूंकि च़्वदह आसॖ ज़ॖ गछ़ान रातुक वॊहरवोद यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

         (पराग पुस्तक-165)

पवन पूरिथ युस अनि वगि

तस ब्वना स्पर्शि न ब्वछि तॖ त्रेश

ति यस करुन अनतिहि तगि

समसारस सुय ज़्ययि नेछ

            अर्थात

जो मनुष्य अपने प्राण अपान को पूर्ण रूप से वश में करेगा उस को भूख प्यास कभी स्पर्श नहीं करेगा। जो अंत तक ऐसा अनुशीलन करंगा, संसार में वही सफल होकर जियेगा

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. च़ाटॖहाल (School)

2. च़ाठ (Pupil/Disciple/Student/Scholar)

3. च़ाटॖबोज (Classmate)

4. च़ाटॖकॊठ (The sitting posture of twisted legs)

5. च़ाछर (Sourness)

                 मुहावरॖ

1. मु: लाफ़ गऺछ़्यनम माफ़

    अ: पनॖनि ताक़तुक बेजाह 

          इस्तिमाल करनुक एहसास 

          गछ़ुन

2. मु: लाल शिनऻही ज़ानिआलॖच

         क़दॖर

    अ: क़दॖर वोलुय ज़ानि लालॖच 

         या कामि हॖन्ज् क़दॖर

3. मु: लानतन टोक नऻल्य गछ़ुन

    अ: हंगॖ तॖ मंगॖ शाहमतस मंज़

         वलनॖ युन

       (पनॖन्य शुर्य ह्यॆछॖनऻव्यूख)

**************************

पंचान्ग:- बाबापोरॖ वुछन वऻल्यसुन्द पताह कऺरिथ वोतुस सत्यवऺती हुन्द माल्युन। सुबहऻय म्यॆ वुछिथ गाबरेयि तति सऻरी बऻच़ तॖ ख़बर बूज़िथ छ़ॖनिख दंदन तल ऒंगॖज्य। बॖ ठऺहर्यॊस नॖ ज़्यादॖ कालस तॖ प्वत खोरी द्रास तति तॖ वोतुस मातामाल।  वॊनुम तिमन ज़ि ज़ॖ डायि बजि ताम छु वातुन वुछन वऻलिस निश फलऻन्य जायि। अति ति द्रास जलदॖय गरॖ कुन वापस। मातामालस मंज़ तिहॖन्ज़ हालथ वुछिथ ज़न त्रऺहर्यॊस बॖति। ग़मज़द बुथ्य, बॆह्यमथ चाल, बॆवसीलॖगी ॴस साफ़ नज़र यिवान तॖ कुठ्यन हॖन्ज़  हालथ वुछिथ ओस बासान ज़ि लूठ छु गोमुत। अहलॖक्य मऺहलॖक्य कॆंह नफ़र ति गऺयम नज़रि। ज़िठ मामन्य वुछिम ॴस आवॖर शेरनस सम्बालनस मंज़ तॖ ल्वकॖट मामन्य ॴस बिहिथ दिल मलूल हिश। रऻछस दॊहा तॖ च़ूरस गऺराह मुहावरॖ ओस पूरॖ फिट बिहान अथ माहौलस मंज़। बॖ वोतुस पनुन गरॖ तॖ वॊनुम माजि सोरुय कॆंह यिमन काम्यन बापथ बॖ द्रामुत ओसुस। पुलसस करवा रिपोर्ट किनॖ न, यि ओस नॖ वुनि तय गोमुत। माम बूज़ुम दपान ओस ज़ि ब्रिजनाथ नेरि दिल्लि वापस ब्यॆयि पांच़ि दहि दॊह्य पतॖ तॖ यॊदवय पुलसस रिपोर्ट करव तॖ तिम करनावन ॳमिस लटॖ पौंज़ दिल्लि प्यठॖ श्रीनगर तॖ पतॖ छुस फेरुन अदालऺच़ वानन तॖ सामानॖ यि गव सु यी नॖ वापस कॆंह। बऺल्य लग्यस खखॖरय यऻच़। भगवान गछ़ि हऻक्यमस तॖ हऺकीमस निश रछुन। अकि फिरि यान्य कथ वऻच़ पुलसस निश यिम छि पूरॖ ड्रिल करनावान तॖ हऻसिल छु नॖ कॆंह यिवान खासकर च़ूर यॆलि प्यॆदेमुत आसि। च़ूरस यॊदवय रटन ति मगर न्यूमुत सामान तिमन निशि वापस अवुन छु नॖ मुम्किन। प्यठॖ नगॖद पौंसॖ न्यूमुत छु नॖ कतई वापस यिवान। वुछनवोल ति क्याह करि सिरिफ मेलि मनस तसलाह अगर कॆंह बोज़नॖ आव। गोमुत चीज़ कति यी वापस। यि गऺयि हून्य ख्यॆमॖच़ बस्तॖ खलर। सान्यव इतर्यव पितर्यव ति बूज़ यि हऻदिसॖ तॖ आयि म्यानि माजि निश अफसूस करनि। यिथ्यन मोकन प्यठ छि इन्सानस पनॖन्य व्वलहऺरिश वैसे ही आसान आमॖच़, ब्यॆयिसॖन्ज़ प्रॖछ़ॖगऻर करनॖ सॗत्य छि ज़ख्मन क्रऻली व्वथान तॖ मरहम सपदुन छु दूर। दॊयि बजि ओस वातुन वुछनवऻलिस निश। बॖ तॖ म्यऻन्य मऻज्य तॖ ब्यॆयि बऻयजान गऺयि तयार गछ़नॖ बापथ। वुछनवऻल्य सुन्द गरॖ ताम वऻत्य तॖ लऺग्य प्रारनि मातामालॖक्यन। प्यॆयि तिम ति वऻतिथ ब्रिजनाथस बगऻर। वख ओस डायि बजेमॖच़ तॖ कॊर ठुख ठुख पीर सऻबनिस बरस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

************************** 

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)