28.12.2020

28.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) च़्वदह (चतुर्दशी) च़ऺन्दॖरवार (सोमवार), श्री सप्तर्षि सम्वत 5096, राश मिथुन (रऻच़ हॖन्ज़ॖ 4.38 बजि प्यठॖ) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक- 164)

पर तय पान यॆम्य सॊम मोन

यॆम्य ह्युवुय मोन द्यन क्यो रात

यॆम्यसॖय अद्वय मन सऻंपुन

तऺमिय ड्यूंठुय सुरग्वरनाथ

             अर्थात

दूसरे तथा अपने को, दिन और रात को जिसने समान माना। अद्वैत (समान, द्वैत के बिना) जिस का मन हो गया, उसी ने परमेश्वर (सत्गुरु) के दर्शन किए। सारांश यह कि मन की अद्वैत भावना से ही परमशिव के दर्शन होते हैं।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

                ********

1. च़ॖन्य (A piece of charcoal)

2. च़ॖनुन (Peach)

3. च़ॖनुन पोश (Peach flower)

4. च़ापुन (To chew/To munch)

5. च़ाफ द्युन (To chew/To munch)

                  मुहावरॖ

1. मु: लाम लगॖन्य

    अ: लऻन लगॖन्य, या, अख 

         ॳकिस पतय कुनि जायि

         दवुन प्यॊन

2. मु: लऻर्य किन्य लोहूर

    अ: ज़्येछर द्युन, या, वथ तॖ 

         कथ ज़्येठॖरावॖन्य

3. मु: लऻर कऺम्यू ख्यव? परद्यव

         म्यॆ दॊप पनॖन्यव मा

    अ: पनॖनिसुन्द जान्यर नॖ ज़रुन

        (पनॖन्य शुर्य ह्यॆछॖनऻव्यूख)

**************************

पंचान्ग:- राथ कऺड यिथॖ तिथॖ। सुबहस वऺछ़ म्यऻन मऻज्य हसबि मामूल प्रबातन। कऺशीरि मंज़ यॊत ताम म्यॆ ज़्वन छु, सानि ज़नानॖ आसॖ गाश फ्वलवुनुय न्यॆन्दरि वथित ग्वडॖ ब्रांदफश दिवान, वुज़स लिवान तॖ अथॖ बुथ छऺलिथ अदॖ चोकस ॳचान तॖ दानस प्यवान। यि ॴस प्रथ गरॖच रीथ बऺनिथ तति। स्वखस या ग़मस फिकिरि मंज़, ब्रांदफश ओस आसान द्युनुय द्युन। म्योन सारिवॖय ज़्युठ बोय ओस बादामबागॖ (मिलिट्री दफ़तरस मंज़) नोकरी करान तॖ ओस सुबहऻय शॆयि बजि बत्तॖ ख्यथ नेरान दफ़तर। अवॖ मूजूब ओस म्यऻनि माजि आसान बत्तॖ स्युन तयार शॆयि बजि ब्रोंठॖय। चूंकि अज़ ओस बऻयजान रातस मातामालॖ, माजि ॴस्य हना फरागतॖय ज़ि दफ़तर गछ़ि नॖ अज़ मगर आदतॖ मूजूब ॴस वऺछ़मॖच़ न्यॆन्दरि प्रबातनॖय। ख़बर ब्रिजनाथन तॖ सत्यवती तॖ बाकयव शूर्यव आस्या राथ कॆंह ख्योमुत ति, दय ज़ानि, वॊन म्यानि माजि पानस सॗत्य। ज़िछि न्वशि प्रुछ़ुन कर बऻग्य छु यि वुछन वोल मेलान।  ख़बर कर बऻग्य छु आसान, जवाब द्युतुन हशि। पताह ह्यकव करनऻविथ। म्यॆ कुन इशारॖ कऺरिथ वोन म्यानि माजि ज़ि च़ॖ गछ़ तॖ पताह कर यि कर बऻग्य छु आसान तॖ अपऻरी गछ़ख सत्यवती हुन्द माल्युन,काच़र्येन हुन्द ति यि खबर वनॖनॖ बापथ। गछ़ॖ ति सऺही, मगर वुछनवऻल्य सुन्द पय पताह कति नन्यम। म्यॆ प्रुछ़ माजि। यिथ्य नफ़र छि नॖ च़ूरि रोज़ान, माजि वॊन म्यॆ। च़ॖ गछ़ बाबापोर तथ कोचस मंज़ वऻतिथ प्रॖछ़ कऻन्सि गूरिस, कान्दरस, नऻव्यदस या बुहरिस वुहरिस। यिम  छि नॖ खऺटिथ आसान। कऻन्सि न तॖ कऻन्सि आसि पताह। मातामाल वाल्यन ति प्यॆयना वनुन, तिमन ति प्यॆयि युन। गछ़ॖ बलाय लगय पतॖ गछ़ि च़ेर। ओरय यि जल जल फीरिथ। अख रॊपय कऺडॖन पनॖनि बऺटवॖ मंज़ॖ तॖ दिच़ॖन म्यॆ। बाबापोरॖ यिथ गऺछ़िज़ि फतॆह क़ऺदल ताम टांगस तॖ तोरॖ ति यीज़ि टांगस प्यठॖय तॖ तपऻरी गछ़ख मातामाल।  ब्रॆयिकुज्यनि प्यठॖ खऺस्यज़ि रॗन्यवऻर्य टांगस तॖ जल जल वातख। अज़ करख स्कूलस छुटी। ति क्याज़ि यि छि ज़रूरी कऻम। रतॖछ्यॆपि लगय। वुछतॖबा तॊह्य ति कथ ॴयवॖ वलनॖ म्यानि  शापॖ। त्रठ प्यॆयि यिमन  च़ूरन।बॖति द्रास यिमन ॳकिस द्वन जायन गछ़नॖ बापथ। कमलावती आसि सूज़मॖच़ पनॖन्यन माल्यन्यन शॆछ।म्यॆ सूंच मनॖ मंज़्य। तिम ॴस्य नविसडकि रोज़ान तॖ म्यऻन्य मामतर्य बऻय ॴस्य अक्सर तोर यिवान गछ़ान रोज़ान। प्रानि वख्तॖ ओस सारिवॖय ॴश्यनाव गरव मंज़ॖ मातामालॖय ज़्यादॖ युन गछ़ुन आसान। म्यानि माजि तॖ बऺयकाकन्यव तुल पनुन अथॖ तेज़ॖय पाहन तॖ दॊपुख ख़बर कांह कांह मा यी पतॖ तॖ गरॖच कऻम थवव म्वकलऻविथ सुलि गरि। हुपऻर्य ॴस सॊथि प्यठॖ अपारि यपोर पितर्यन लऺज्यमॖच़ ख़बर ज़ि कमलावती हॖन्द्यन छि च़ूर च़ामॖत्य। तिम ति ॴस्य आमॖत्य तॖ हालातन साम ह्यॆच़मॖच़। व्वतॖ छ़ऻन्ठ ॴस्य करान ज़ि किथ पऻठ्य मेलि च़ूरन हुन्द सुराग। म्यऻन दॊश्यवय ज़िठ्य बऻय ॴस्य मातामालॖ प्यठॖ बानॖ वानॖ ह्यथ गरॖ आमॖत्य तॖ ओसुख माजि ततिच दऻद्य कान्गॖर वऺन्यमॖच़। व्वंय ॴस्य सऻरी गरि म्यऻनिस यिनस प्रारान तॖ बॖ ओसॖसन वुछनवोल छ़ारान। कथ छि जऻरी दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)