19.12.2020

19.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) पऻन्च़म (देवादेव) (पऺचमी) (देवादेव) बटॖवार (शनिवार/शनिश्चरवार) श्री सप्तर्षि सम्वत 5096, राश कुम्भ (सुबहॖचि 7.15 बजि प्यठॖ) ऋतु हेमन्त (चलान) द्रठॖपऻन्च़ुक (पंचक) ॳज़्यकि प्यठॖ शुरु....अज़ छि कुमार शॆयम (कुमार षष्ठी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव।

**************************

             लल वाक्

        (पराग पुस्तक-155)

ज्ञानॖ मार्ग छय हाक वऻर्य

दिज़्यस शमॖदम क्रय पऺन्य

लामा-च़क्र-पॊश प्रऻन्य क्रय दऻर्य

ख्यनॖ ख्यनॖ म्वच़ी वऻरॖय छॆन्य

             अर्थात

ज्ञानमार्ग एक सांग सब्ज़ी की खेत की तरह है। इस के गिर्द शम दम रूपी मज़बूत खूंटे गाड दो ताकि एक के पीछे एक होकर इस के गिर्द चक्कर लगाने वाले वासना युक्त क्रिया रूपी आवारा पशु प्राणी खेत में नॖ घुस सकें। नहीं तो वह सारी सब्ज़ी (ज्ञान) खा जाएं गें। और शेष खाली खेत अर्थात अज्ञान ही रहेगा।

भावार्थ:- ज्ञानमार्ग अर्थात आत्मज्ञान को दृढ रखने के लिए शम (इन्द्रियों को काबू करना) दम (श्वासोश्वास को काबू करना) क्रिया को दृढता प्रदान करना आवश्यक है नहीं तो मार्ग से भटक जाने का भय है। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. राद (Length)

2. राज़ (Secret)

3. राज़ॖ (King/Lord/Monarch)

4. राज़ॖ हॊन्ज़ (Swan/Goose/A duck)

5. राज़ॖ प्वथुर (Prince/A beautiful boy)

                  मुहावरॖ

1. मु: ख्वश दानि रटुन तॖ वुकिर्य

         वानि ख्यॊन

    अ: हरामुक माल बॆवऺतीरॖ 

         पऻठ्य वरतावुन

2. मु: खॊवरि अथॖच कऻम

    अ: सहल कऻम, या, यथ नॖ 

         कांह मुश्किल यी

3. मु: खॊडॖ गुपुन

    अ: युस शखॖस पनॖन्य कथ 

          ॳन्दरी रटिँ   

       (पनॖन्य शुर्य ह्यॆछॖनऻव्यूख)

**************************

पंचान्ग:- साधु, संत, पंडित, पीर फऺकीर ह्यॆन्द्य क्योह मुसलमान यिम ति कऺशीरि मंज़ पऻदॖ सप्देयि, कऺशीर ॴस बासान महफूज़ तिहॖन्दिस सायस तल। तिहॖन्ज़ि नज़रि सऻनी तल ॴस्य कऺशीरि मंज़ लूख द्वह द्वह कड़ान। यिहॖन्ज़ि ग्रॆन्दि मंज़ यनॖ फरॖख ह्यॆच़ॖन यिन्य याने यिमन मंज़ कऺमी ह्यॆच़ॖन यिन्य, लूकन हुन्द रंग डंग ति ह्यॊतुन बदलुन। प्रऻन्य गऺयि निर्वाण सप्दान तिहॖन्ज़ॖ मूरच़ॖ रोज़ॖ तॖ ॳस्य ति आयि तिमनॖय मंज़ पनॖन्य आस्था थवान। तिम नय तॖ तिहॖन्ज़ॖ मूर्तीय सऺही। मगर युस ज्ञान प्रकाश असि मेलान रूद तिहॖन्दिस ज़िन्दॖ ज़ुवस मंज़, तमि ज्ञानॖच रूज़ असि व्यछ़य तिहॖन्दि मरनॖ पतॖ। नऺव्य ति नवेयि नॖ कॆंह कऺशीरि मंज़ तॖ ॳस्य ति रूद्य ब्यॆपीरॖय। असि निशि छि तिहॖन्ज़ स्मरण व्वंय यिमन ॳस्य फ्युर रोज़ान छि दिवान तॖ पनुन द्वह द्वह कड़ान रोज़ान। अज़ करोन याद ॳस्य ऋषि पीर। ऋष्यपीर ओस ज़ानॖनॖ यिवान पीर पंडित पादशाह नावॖ सॗत्य ति। ॳम्यसॖन्दिस मऻलिस ओस नाव पंडित गोबिन्द कौल तॖ यि ओस रोज़ान श्रीनगरॖ ॴल्यकऺदलॖकिस बटॖयार मऺहल्लस मंज़। दपान ऋष्यपीरस गऺयि मऻज्य मऺरिथ यॆलि यि पानॖ ल्वकुट ओस याने दपान सतॖ वुहुर शुर। ॳम्यसॖन्द्य मऻल्य कॊर दॊयिम खान्दर तस कोरि सॗत्य यससॖन्ज़ वऻन्स ॴस गॊबिन्द कौलॖ न्यस्बतॖ स्य़ठाह कम। ऋष्यपीर ओस ल्वकटुय यॆलि अमिस आत्मज्ञान ज़ानॖनॖच यछ़ा बडेयि। साधना क्याह गऺयि, किथॖपऻठ्य छि यिवान करनॖ यि रहस्यमय ज्ञान हऻसिल करनॖ बापथ द्राव ऋष्यपीर पनुन ग्वर छ़ान्डनि। ग्वर याने पनुन शिक्षक, पनुन व्वसताद, पनुन वतॖहावुक छ़ान्डनि द्राव युस ॳम्यसॖन्दिस अद्यात्मकिस ज्ञानस वुसत दिनस मंज़ मद्दतगार सऻबित ह्यॆकि सपदिथ। छ़ान्डान छ़ान्डान वोत ऋष्यपीर ॳकिस ग्वरस निश यस नाव ओसमुत ओस पंडित कृष्ण कार। सु दपान बन्यऻव ॳम्यसुन्द असली वतॖहावुक। सु दपान ओस तमोक च्यवान रोज़ान चिल्मि सॗत्य न कि जऺजीरि सॗत्य। तंम्य दपान च्यावनोव ऋष्यपीर ति तम्यऻक्य चिलिम। मानॖनॖ छु यिवान ज़ि तमि तमऻक्य दामॖ सॗत्य खुलेयि ऋष्यपीरॖन्य नज़र तॖ ॳमिस आयि नज़र त्रिकालदृष्टि तॖ ॳमिस बास्यव पनॖनिस पानस मंज़ आत्मॖज्ञान तॖ अख नॊव बदलाव। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)