09.12.2020

09.12.2020 मॊंजॖहोर (मार्ग/ मगर) गटॖ पछॖ (कृष्ण पक्ष) नवम (देवादेव) (नवमी) (देवादेव) ब्वदवार (बुद्धवार) श्री सप्तर्षि सम्वत 5096, राश कन्या (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक- 145)

ॳसी ॴस्य तय ॳसी आसव

असिय दोर कऺर्य पतयवथ

शिवस सोरि नॖ ज़यॊन तय मरुन

ऱवस सोरि नॖ अतॖ गत

          अर्थात

इस संसार में हम ही बहुत पहले से जीव के रूप में जन्म लेते और मरते आए हैं। नाम कमाने वाले कर्म करते रहे हैं। जिस प्रकार सूर्य का उदय अस्त तथा शिव का शरीर धारण करके पनु: त्याग करना निरन्तर है, और आगे भी रहेगा, इसी प्रकार जीव का जीना और मरना जारी रहेगा। कभी यही जीव राजा रहा है और कभी यही जीव दूसरे रूप में भिखारी बना। अर्थात हम ही एक चोला छोड कर दूसरा चोला धारण करते आए हैं

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. ज़ऻच़ल (Belonging to a particular cast)

2. ज़ऻल (An area)

3. ज़ाथ पाथ (Caste system)

4. ज़ाल (Net/Web/To put on fire)

5. ज़ार (Gambling)

                 मुहावरॖ

1. मु: अर्शि ॳज़ीम ख्वतॖ छु 

         ख्वल्कि ॳज़ीम बॊड

    अ: रुत वर्ताव छु सारिवी 

          ख्वतॖ थॊद

2. मु: अमलन जज़ा तॖ नीत्यन

         मुराद

    अ: यस यिछ़ अमल तॖ नियथ 

       आसि तिथी फल अथॖ लगान

3. मु: ग़रज़मन्द छु फॊटॖमुत 

         ह्वॊछिमच़ि क्वलि

     अ: ग़रज़मन्द इन्सान छु सख़

          न्वक्सान तुलान

       (शुर्य पनॖन्य ह्यॆछनऻव्यूख)

**************************

पंचान्ग :- ग्रॆन्दि रॊस साध, संत छि आमॖत्य कऺशीरि मंज़ ज़न्मस तॖ आयि वुन्युखताम पनॖन्यन भक्तन कल्याण करान कुनि न तॖ कुनि रऺन्ग्य। असि ति गऺयि यछ़ तॖ पछ़ बडान यिमन मंज़ विज़ि विज़ि। महिला वर्गस मंज़ ति छि कॆंह संत थदि पायदानस ताम वाच़मच़ॖ सऻनिस समाजस मंज़ यिमन मंज़ ललद्यद, ऱवॊपॖ भवऻनी, मथुरा दीवी तॖ करुणामायी मां नाव छि स्यठाह मशहूर ति क्याज़ि यिम छि आसमच़ॖ ग्वणवती। करुणामायी मां यसुन्द असली नाव छु ओसमुत विमला तॖ ॴस ज़न्मस आमॖच़ सन्नॖ 1917 ईस्वी मंज़ किचलू परिवारस मंज़ इन्दोरॖ। दपान अम्यसॖन्दि नावॖ आव अख आश्रम बनावनॖ गुडगांवॖ ज़िलॖकिस सोहना अलाकस मंज़ सन्नॖ 1988 ईस्वी मंज़। बडि पायिच संत छि ॴसमॖच़ कऻशिर मगर कऺशीरि न्यबरॖय रूज़मॖच़ ज़्यादॖकालस। सोहना आश्रमस मंज़ ॴस यि संत रूज़िथ पनॖन्य शिष्यन सॗत्य। सन्नॖ 2000 ईस्वी मंज़ सपुद करुणामायि मां हुन्द दॆहान्त। ल्वक्चारॖ पानॖ प्यठय ओसमुत ओस अमिस अध्यात्मिकातायि कुन रुजान तॖ आयि पनॖन्य साधना करान तॖ प्रऻवॖन दैव शक्ति ति।  दपान यॊदवय ॳमिस ॴस नॖ कांह यछ़ा खान्दर करनॖच मगर दपान पनॖन्य विद्या प्राप्त कऺरॖन सन्नॖ 1940 ईस्वी मंज़ याने स्नातक (ग्रेजवेशन) तॖ तमि पतय कॊर अमि सन्नॖ 1942 ईस्वी मंज़ खान्दर पंडित यू एन चन्ना सऻबस सॗत्य। खान्दर करनॖ पतॖ ति छि रूज़मॖच़ यि पनॖन्य साधना करान। वनॖनॖ छु यिवान ज़ि पंडित सिरीकऻन्ठ युस व्यजिब्रार्युक बसकीन ओसमुत ओस तॖ ॳम्यसॖन्द्यन वऻर्यव्यन याने चनन हुन्द क्वलॖ ब्रह्मण ति रूदमुत ओस तऺमिस आयि नज़रि करुणामयि मंज़ साधनायि हॖन्ज ललक तॖ लगन। तऺम्य द्युत ॳमिस ग्वरॖम्वख तॖ द्युतनस ब्रोंहकुन अध्यात्मिकुक ज्ञान परि पूर्ण तॖ बन्येयि करुणामाया मां अख प्रसिद्ध संत। रऻज्ञन्यायि हॖन्ज़ व्वपासक आसनॖ म्वखॖ दपान यि साधवी ॴस न्यथ तुलॖमुल गछ़ान रोज़ान। अमि दपान ॴस पनॖनिस आश्रमस मंज़ पनॖन्य प्रतिमा ति स्थापित कऺरमॖच़। दपान करुणामाया मां ॴस वैदिक शिक्षाय सॗत्य सॗत्य शिव शक्ति प्यठ ति प्रवचन दिवान रोज़ान। कऻशिर परंपरा छि आमॖच़ बरक़रार थऺविथ सारि वऻन्सि यि साधवी। पनॖनिस ग्वरॖ सॖन्दिस नावस प्यठ ॴस लीलायि ग्यवान रोज़ान तॖ पनॖन्यन भखत्यन हॖन्द्य ज़ार बोज़ान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)