07.12.2020

07.12.2020 मॊंजॖहोर (मार्ग/ मगर) गटॖ पछॖ (कृष्ण पक्ष) सतम (सप्तमी) च़ऺन्दॖरवार (सोमवार) श्री सप्तर्षि सम्वत 5096, राश सिंह (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक-143)

कर्म ज़ॖ कारण त्रॆह कॊंबिथ

यवॖ लबख परिलूकस ॴन्ख

व्वथ खस सिर्यमण्डल छ़ॊमविथ

तवय च़लिय मरनॖन्य शेंख

           अर्थात

दो कर्म (सत या भगवत प्राप्ति के लिए कर्म और असत अर्थात भगवत प्राप्ति से परे कर्म) तथा ब्रह्मा विष्णु एवं शिव इन तीन कारणों से परे (ऊपर) होकर ध्यान कर तो तेरे परलोक का भला होगा। उठ सूर्य मण्डल को (तकनीक से) तय करके चढ अर्थात प्रकाश का साक्षात्कार कर तो तेरी मरने की शंका समाप्त हो जाएगी।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. ज़ाथ (Caste/Self/Person)

2. ज़ातस प्यठ (On one's own responsibility/Personally)

3. ज़ऻती (Personal/Innate/Private)

4. ज़ऻती तजरुबॖ (Personal experience)

5. ज़ऻती राय (Personal opinion)

               मुहावरॖ

1. मु: साहब छु बख्शनहार

    अ: दय छु बख्शन वोल

2. मु: सबॖर छु स्वनॖसुन्द टूर

    अ: सबॖर करुन छु स्यठाह

          फऻयदॖ वातॖनावान

3. मु: सॆहति बदन तॖ रऻहति जान

    अ: अख ॴही, या, सेहतॖ 

        ख्वतॖ बॊड आराम छु नॖ कांह

           (पनॖन्य शुर्य ह्यॆछॖनऻव्यूख)

**************************

पंचान्ग:- संतन मंज़ॖ छु अख संत रूदमुत क्रालॖ बब ति। असली नाव छु ओसमुत ॳमिस संतस भगवान दास मगर ज़ानॖनॖ ओस यिवान ऒमूमन भगॖलाल नावॖ सॗत्य। यि शखॖस छु ओसमुत हन्दॖवारि क्रालॖगॊंडुक बसकीन। दपान यि ओसमुत छु ज़मीनदऻरी करान तॖ ज़्यादॖ छु नॖ ओसमुत पॊरमुत ल्यूखमुत कॆंह। मगर वनॖनॖ छु यिवान ज़ि ॳमिस शखसस छु रूदमुत ल्वकचारॖ पानॖ प्यठय अध्यात्मुक शोख तॖ दपान यि ओस ग्वडॖ प्यठय धर्मस लोर याने धर्मात्मा। दपान भगलाल जी वोत हंदवारि प्यठॖ सोपोर तॖ ब्यूठ तति ॳकिस जज सॖन्दि गरि। ॳथ्य गरस मंज़ बिहिथ कऺर ॳम्य साधना तॖ दपान मीज्य भगॖलालस आध्यात्मिक सिद्धी। भगलाल छु रूदमुत पनॖनि माजि हॖन्ज़ पज़ि मनॖ सीवा करान तसहॖन्ज़ि अंतिम समयस ताम। माजि हॖन्दि स्वर्गॖवास गछ़नॖ पतॖ दपान सन्नॖ 1967 ईस्वी मंज़ वोत भगॖलाल टिक्कर तॖ बन्यऻव शिष्य तति स्वामी नन्दॖ लाल जियुन। अति दपान भगॖलाल जीयस ॴस्य लूख वनान क्रालॖ मॊत तॖ केंच़ॖ कऻल्य पतय ह्यॊतुख ॳमिस वनुन क्रालॖ बब ॳम्यसॖन्ज़ सिद्धि वुछिथ तॖ ॳम्यसॖन्द्य कॆंह करामऻच़ वुछिथ। टिक्कर आश्रमुक निज़ाम दपान ओस क्रालॖ ब़ॖबॖय सम्बऻलिथ वारिहास कालस। दपान क्रालॖ बबन त्रोव टिक्करुक आश्रम तॖ वोत घरीह(घडी), उधमपोर। ऒत वऻतिथ बनोव क्रालॖ बबन अख शिव मंदर तॖ ब्यॆयि ह्यच़ॖन कॆंह ज़मीन तॖ ब्यूठ घरी मंज़ॖय वारियाहास कालस। वननवऻल्य छि वनान ज़ि सन्नॖ 1979 ईस्वी मंज़ प्रुछ़ केंच़व भख्तव क्रालॖ बबस ज़ि घरीह मंज़  मंदर बनानवनुक मक्सद क्याह छु। दपान क्रालॖ बबुन जवाब ओस ज़ि कऻशिर्य बटन प्यॆयि कऺशीर त्रावॖन्य तॖ च़लान च़लान वातन तिम यथ जायि। यि रोज़ि त्युहुन्द ग्वडन्युक पडाव। 1990-तस मंज़ गऺयि क्रालॖ बबॖन्य भविष्यवऻणी पॊज़। भखॖ्त्य दपान गऺयि हऻरान क्रालॖ बबॖ सॖन्ज़ तमि वख्तॖच भविष्यवऻणी बूज़िथ। क्रालॖ बबनि निर्वानॖ पतॖ बनोव ॳम्यसॖन्द्यव भख्तव अख आश्रम ज्यॆमिस मंज़ बनतालाबॖ तॖ करान आयि रोज़ान तमि पाठ पूज़ा। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति

(koshursabak.blogspot.com ति वुछिव)