04.12.2020

04.12.2020 मॊंजॖहोर (मार्ग/ मगर) च़ोरम (चतुर्थी) शॊकुरवार (शुक्रवार/जुम्मा) श्री सप्तर्षि सम्वत 5096, राश कर्कट (सुबहॖचि 7.21 बजि प्यठॖ) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक-140)

वाख मानस क्वल अक्वल ना अते

छ़्वपि मुदरि अति ना प्रवीश

रोजन शिव शक्ति ना अते

मॊतयय कोंह तॖ सुय व्वपदीश

           अर्थात

यहां परम शिव की अवाक् अवस्था का वर्णन हे, अर्थात वाणी, मन, कुल, अकुल (समस्त सृष्टि) इधर नहीं है। मोन मुद्रा द्वारा यहां प्रवेश नहीं होता। शिवशक्ति इधर नहीं रहते अब शेष जो कुछ रहता है उसी को पाने का उपदेश ले और उसे प्राप्त कर। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. दामॖ च्यॊन (To drink sip by sip)

2. दामन (Foot of the mountain/An edge of a dress)

3. दामन रटुन (To take refuge/To be a follower)

4. दामाद/ज़ामतुर (Son-in-law)

5. दान (Cooking oven/Hearth/Donation/Grant/Presentation

                    मुहावरॖ

1. मु: शुर कति शुर कति, माजि

          नखस प्यठ

    अ: चीज़ नखॖ ॴसिथ ओरॖ 

          योर छ़ान्डुन

2. मु: शुर गव ब्रोर् वलॖ वलॖ 

         कॊरुस तॖ यी

    अ: शुर छु वलॖ वलॖ करनस

          लोर आसान

3. मु: शरस शरहॗय क्या

    अ: क़ोनूनस निश छॆ नॖ कांह

         शर्म आसान

      (शुर्य पनॖन्य ह्यॆछनऻव्यूख)

**************************

पंचान्ग :- स्वामी जीवन शाह सऻबॖन्य कथ छि चलान। दपान रॗन्यवऻरिस मंज़ ॴस अख प्रथा बन्यॆमॖच़ ज़ि यस ति कोरि खान्दर ओस आसान, ग्वडन्युक बत्तॖ थाल दपान ओस यिवान वातनावनॖ जीवन सऻबस ॴशिर्वाद हऻसिल करनॖ बापथ। जीवन सऻब दपान ओस थवान यि वोतमुत बत्तॖ थाल यिथय पऻठ्य द्वह वादन तॖ ओस दिवान रोज़ान अमीय थालॖ मंज़ॖ नवीद या प्रसाद युस ति ॳमिस निश यिवान गछ़ान ओस।  गॊसऻन्य गॊन्ड, लूकॖ भवनॖ साधना करान करान दपान मीज्य जीवन शाह सऻबस सिद्धि तिछ़ ज़ि ॳम्य ह्यॆत्य कम कम चमत्कार करॖन्य तॖ वुछन वऻल्य ॴस्य हऻरान गछ़ान। आध्यात्मिक ज़ोर तॖ दैवि शक्ति सॗत्य दपान जीवन शाह सऻब ओस कुनि कुनि सातन रूद प्यवनावान तॖ लूकन राहत दिवान तॖ तिहॖन्ज़ यछ़ा पूरॖ करान। पेशनगोयी दपान यि जीवन सऻब ओस करान रोज़ान।  लॊदवि दपान बनोव ॳम्यसॖन्द्यव भख्तव आश्रम ति। मानॖनॖ छु यिवान ज़ि स्वामी जीवन शाहन छि कॆंह ऐतिहासिक चमत्कार कऺर्यमॖत्य यिमन मंज़ केंह छि यिथॖ पऻठ्य ज़ि दपान अफगान हकूमतस मंज़ ओस अख गवर्नर तारीक अली खान तम्यसुन्द दीवान बनोव जीवन सऻबन पनॖनि साधना शक्ति  सॗत्य अख पंडित दिला राम युस ज़्यादॖ पॊरमुत ल्यूखमुत ओस नॖ तॖ ओस अडॖ-ह्यॆछुल। यिथय पऻठ्य दपान द्युतुन जीवन दान ॳकिस पुलिस अफ़सरस तॖ बचोवुन सु सख सज़ा मेलनॖ निशि युस तस गवर्नर सॖन्दि दऺस्य मेलुन तय ओस आमुत करनॖ। तस पुलिस अफसरस दपान नाव ओसमुत ओस पंडित कृष्ण कौल। जीवन शाह सॖन्दि दऺस्य हऻव्यमॖत्य कऺरिशमॖ दपान रूद्यमॖत्य छि ग्रॆन्दि रोस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)