08.12.2020

08.12.2020 मॊंजॖहोर (मार्ग/ मगर) गटॖ पछॖ (कृष्ण पक्ष)ॴठम(देवादेव) (अष्टमी)(देवादेव) बॊम्वार (मंगलवार),श्री सप्तर्षि सम्वत 5096, राश कन्या (शामन 7.31 बजि प्यठॖ), ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक-144)

असे प्वंदे ज़्वसे ज़ामे

न्यथॖय स्नान करे तीर्थन

वुहॖर्य वऺरियस नॊनुय आसे

निश छुय तॖ प्रज़नावतन

           अर्थात

मनुष्य के अंतर में बैठी शक्ति के बल पर ही प्राणी हंसता हे, छींकता है, खांसता हे, जमाई लेता है, तीर्थों पर जाकर स्नान की कांक्षा करता हे, सारा वर्ष यही करते हुऐ दिखाई देता हे, ललेश्वरी का कहना है कि वास्तव में प्रभु नित्य ही ये सारे काम करते रहते हैं, और वही प्रभु तो तेरे पास ही है। ज़रा उसे पहचानो  तो।

भावार्थ:- मनुष्य के अंदर ही भगवान बैठे हैं

**************************

पांछ़ कऻशिर लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

          *************

1. ज़ऻती मामलॖ (Personal affair)

2. ज़ऻती तोलूकात (Personal relation/Personal contacts)

3. ज़ातिपाक (God)

4. ज़ऻती हऺसियत (Personal status)

5. ज़ऻतियाथ (Personal)

             मुहावरॖ

1. मु: सराफ गंज़रावान द्यार

         अतराफ रावरावान द्वह

    अ: वख फऺज़ूल ज़ायि करुन,

         या, तमाशॖगीर

2. मु: तमाह छु तावन

    अ: लालॖच करनॖ सॗत्य छु

         ॴखरस न्वक्सान गछ़ान

3. मु: ॴबो प्यॆयियो बलाय 

          मन्दछि पतॖ छय खजालथ

    अ: अख ॴब छु वारिहान 

         ॴबन ज़न्म दिवान तॖ पतॖ

          खजिल करनावान

      (शुर्य पनॖन्य ह्यॆछनऻव्यूख)

*************************

पंचान्ग:-  कऺशीर छि वारियाहव नावव सॗत्य प्रज़नावनॖ यिवान। सती सर, कश्यप वऻर, कास मीर, कऻशमीर, कश्मीर, कऺशीर या ऋश्यवऻर। ॳथ्य ऋश्यवारि मंज़ छु ओसमुत अख थदि पायुक संत यस नाव ओस कशॖ काक।  कशॖ काक छु ओसमुत वुहमि सऺदी हुन्द अख मोनमुत तॖ ज़ोनमुत संत, स्यॊद सादॖ, गृहस्ती, गामुक ग्रूस तॖ दपान ॳम्य ॴस हऻसिल कऺरमॖच सिद्धी योगासनॖ सॗत्य। कऺशीरि श्रीनगर प्यठॖ कऺरीबन् पॖंच़ॖह किलोमीटर दूर मनिगामस मंज़ दपान आमुत ओस यि ज़न्मस ॳकिस ग़रीब गरस मंज़। यि ओसमुत ओस ज़मीन पानॖ लागान, दांद पानॖ वायान, काशत्कऻरी करान तॖ ग्रॗस्य सॖन्द्य पऻठ्य कऻम करान याने गऻमी ज़िन्दगी बसर करान तॖ पनॖन्य यड पालान। अख आम गृहस्ती शख़स बऺनिथ ओस कशॖ काक मगर पनॖन्य साधना ति करान रोज़ान यीच़ मनॖ सान तॖ आध्यात्मिकतायि सान ज़ि ॳम्य प्रऻव दैव शक्ति तॖ योगशक्ति ल्वकचारस म़ज़ॖय। ॳमिस ओसमुत छु दपान ग्वर पंडित नारायण भान। करामऻच़ कऺर्य कऺर्य तॖ प्रऻवमॖच़ सिद्धी कि ज़ोरॖ म्वखॖ ओस कशॖ काक भविष्यवऻणी ति करान रोज़ान तॖ अम्यसॖन्द्य चर्चॖ सपदेयि शहरो गाम तॖ दूरि दूरि प्यठॖ ह्यॆतिन लूख यिन्य ॳम्यसुन्द दर्शनॖ करनॖ बापथ तॖ पनॖन्यन दऻद्य बावनॖ बापथ तॖ पनॖन्यन मसलन हल छ़ान्डनि बापथ। दपान स्वामी कशॖ काक ओस पनॖनि योग शक्ति सॗत्य ब्यमारन शफा दिवान रोज़ान। वनॖनॖ छु यिवान ज़ि स्वामी कशॖ काक ओस नॖ कऻन्सि हुन्द ऒनमुत कांह तोफॖ या कांह चीज़ रटान बऺल्कि युस ति कांह अमिस निश वातान ओस कशॖ काक दपान ओस तऺमिस ख्यावान,च्यावान, रोज़नॖ बापथ जाय दिवान तॖ आज़रथ तॖ माज़रथ ओस पूरॖ पऻठ्य करान। दपान स्वामी कशॖ काकुन दर्शन करनि ॴस्य गऻमॖत्य मनिगाम पानॖ स्वामी लक्ष्मण जु, स्वामी नन्द लाल तॖ स्वामी मॆहर बाबा वगैरा। यूत तीज़ ओस स्वामी कशॖकाकस मंज़। स्वामी कशॖ काक सपुद निर्वान 1961 ईस्वी मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)