12.12.2020

12.12.2020 मॊंजॖहोर (मार्ग/ मगर) गटॖ पछॖ (कृष्ण पक्ष) त्रुवाह (देवादेव) (त्रयोदशी) (देवादेव) बटॖवार (शनिवार/शनिश्चरवार) श्री सप्तर्षि सम्वत 5096, राश वृश्चिक (रऻच़ हॖन्ज़ॖ 10.40 बजि प्यठॖ) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ।  वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

       (पराग पुस्तकॖ - 148)

कायस बल छुय मायस ज़ागुन

प्राणस बल छुय शब्दॖ सॊरूफ

आयस बल छुय तत्वॖ व्यद्ध ज़ानुन

ज्ञानस बल छुय आदि अंत तान्य

               अर्थात

काया का बल तरलता है। प्राणों का बल शब्द स्वरूप है। आयु का बल तत्व विज्ञान को जानने से है। यह सभी बल अस्थाई हैं परन्तु ज्ञान का बल स्थाई है।

भावार्थ :- तरलता से काया को बल मिलता है। शरीर में तरलता कम हुई तो काया निर्बल हो जाती है। वायु द्वारा ही शब़्द उत्पन्न 

हौकर सुना जा सकता है।  तत्वों के ज्ञान से आयु को बल मिलता है। शरीर में तरलता, शब्द, तत्व यह क्षीण हो जाते हैं किन्तु ज्ञान का बल आदि से अंत तक रहता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. ज़रद (Yellow)

2. ज़ऺरियि पऻदॖ करॖन्य (Find means/Have recourse/Intervention)

3. ज़ुरियाथ (Living being)

4. ज़िकिर (Mention/Remembrance/Reference)

5. ज़िकिर व्वथॖन्य (To be mentioned)

              मुहावरॖ

1. मु: कारि ख्वदा ज़ानि ख्वदा

    अ: क्वदर्यतक्यन सिरन छु नॖ

         सनॖनुक ज़रूरथ

2. मु: कारि नजार बदस्ति 

          गिलकार

    अ: यस नॖ यम्युक तजरुबॖ 

         आसि तस ती प्यतॖरुन

3. मु: काकुन हापुथ

    अ: यॆलि कांह कऻम अगादि 

         गछ़ि तॖ म्वकजार मेलनॖ

      (पनॖन्य शुर्य ह्यॆछॖनऻव्यूख)

**************************

प़चान्ग:- रातकिस सबक़स मंज़ यिमन कलाकारन हुन्द्य नाव ह्यॆत्य म्यॆ पनॖनि यादाश्तॖ मुतऻबिक तिमन मंज़ ओस रूदमुत पंडित सूमनाथ सुम्बली जियुन नाव ह्यनय। हालांकि बॖ ओसुस ॳकिस द्वन ड्रामाहन मंज़ सुमनाथ जियुन आश्यन्य बन्यॊमुत। ॳम्यसुन्दुय नाव गयो वख्तॖ विज़ि मऺशिथ। ओम् प्रकाश थर ति ओस यिमन कलाकारन मंज़ अखा। म्यॆ छु याद यिवान सु वख तॖ मथ छु गछ़ान ज़ि यि ल्वकचार गॊछ़ ब्यॆयि अकि फिरि फीरिथ युन। छु्ट्टी द्वह या आथवारि द्वह या यैलि ति ड्रामा ओस आसान करुन तिमन दॊहन ॴस्य दोहस आसान शिवाला मंदरॖकिस अहातस मंज़ रंग मंचॖच कऻम करान रोज़ान। सूरज जी, मास्टर कऻशी नाथ जी तॖ ओम् प्रकाश धर जी ॴस दिवान रोज़ान यिमन गत्तॖपट्यन शकॖल कुल्यन हॖन्ज़, पहाड़न हॖन्ज़, शीनॖ पहाडॖ, ज़न्ड याने झाडी, कुटिया, आसन, वगैरा वगैरा।यिमन ॴस्य वनान विंगॖ। खास पोशाक याने कास्ट्यूम ॴस्य शेरान सम्बालान। द्वह ओस न्यॆरान असान गिन्दान। ॳड्य कलाकार ॴस्य रिहर्सल करान, अख नफ़र ओस आसान प्रोम्प्ट करान याने डायलाग परान रोज़ान तॖ कलाकार ओस तमी आयि याद करान रोज़ान। ड्रामा हालॖक्यन लबन प्यठ ॴस सूरज जियन स्टैनसलिंग कऺरमॖच़ तॖ तिमन लबन प्यठ आसॖ मूर्तियन हॖन्द्य आकार नज़र यिवान। कुनि कुनि सातन ॴस्य ॳस्य सऻरी कलाकार ड्रामा खतम गछ़ॖनॖ पतॖ डूंगस मंज़ डल सऻरस ति गछ़ान।  ड्रामा ओस यिवान हावनॖ त्र्यन त्र्यन च़्वन च़्वन दॊहन लगातार। दपान स्वथि प्यठ शीतल नाथॖनि ति ओस यिवान ड्रामा करनॖ। ब्रारू सऻब, नऻदिम सऻब, सऻयल सऻब साकी सऻब दपान तिम ॴस्य शीतल नाथय ड्रामा करान रोज़ान। मगर म्यानि शिवाला गछ़नॖ ब्रोंठ मा आसिहे आसान, बॖ ह्यकॖ नॖ अथ प्यठ कांह ज़िकिर कऺरिथ। ड्रामाहान आव थख दिनॖ शिवाला मंदर किस अथ ड्रामा हालस मंज़ ति क्याज़ि यिम सऻरी कलाकार लऺग्य ब्यॊन ब्यॊन कारस याने ॳड्य गऺयि टी वीहस मंज़ तॖ ॳड्य वऻत्य स्वांग एण्ड ड्रामा डिवॖजनस मंज़। ॳड्य ॴस्य ग्वडय नोकरी करान तॖ तिमन ति बडेयि पनॖनि ज़िम्मॖवऻरी। प्रऻन्य ह्यॆतिन्य प्रानॖन्य तॖ नऺव्य कलाकार ह्यॆतिन्य यिन्य बारसस ब्यॊन ब्यॊन जायन। प्रान्यव मंज़ॖ रूद्य कॆंह नव्यन सॗत्य सॗत्य क़दम ताल बराबर थऻविथ तॖ रूद्य ड्रामाहन नॊव आयाम दिवान वख्तस सॗत्य सॗत्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)