11.12.2020

11.12.2020 मॊंजॖहोर (मार्ग/ मगर) गटॖ पछॖ (कृष्ण पक्ष) काह(देवादेव) (एकादशी)(देवादेव) शॊकुरवार (शुक्रवार/ जुम्मा),श्री सप्तर्षि सम्वत 5096, राश तुला (चलान) ऋतु हेमन्त (चलान)...चूंकि पगाह छि बाह रावान बऻश्य हुन्द वॊहरवोद यी ॳज़्य याने कऻश्य द्वह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

       (पराग पुस्तक- 147)

कलन कालॖ ज़ॊल्य यॊदवय च़ॖय गॊल

व्यंदिव गेह वा व्यंदिव वनवास

ज़ऻनिथ सर्व गथ प्रभू अमॊल

युथुय ज़ान्यख त्युथुय आस

             अर्थात

काल के फंदे अथवा दराड से तभी छूटेगा जब तुझ में "मैं" अर्थात "द्वैत भाव " मिटेगा। फिर वनवास या घर में रहने में कोई अंतर नहीं है। यह जानकर कि जो भी (गतिविध) संसार में हो रही हैं उसी प्रभू की ही निर्मल गतिविधि है। ऐसा ज्योंही जानेगा तो तू भी वही हो जाएगा अर्थात अपनी वास्तविकता को प्राप्त होगा।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           **********

1. ज़ख़म (Wound/Injury/Sore/Damage)

2. ज़ऺखीरॖ (Stock/Store/Treasure)

3. ज़रा ( A little/Little while)

4. ज़राय (Means/Sources/Medium/Influence)

5. ज़रानवऻज़ी (Kindness)

                 मुहावरॖ

1. मु: क़ऺबिलॖ छुम पनुन च़्यॆ क्याह

         ओर सनुन

    अ: पनॖनिस मामलस मंज़ नॖ

         ब्यॆयिसॖन्ज़ मुदाख़लत पसंद

         यिन्य

2. मु: क़तरॖ क़तरॖ छु दऺर्याव समान

    अ: रछ़ रछ़ कऺर्यथॖय छि कऻम

         अंद वातान

3. मु: कर्ज़न छु च्योमुत आबि 

         हयात

    अ: कर्ज़ छु नॖ वख्तस प्यठ 

          नखॖ वसान

       (शुर्य पनॖन्य ह्यॆछनऻव्यूख)

**************************

पंचान्ग:- तिमन दॊहन याने 1959-60 ईस्वी मंज़ यॊतान्य म्यॆ ज़्वन छु, रंगमंचस प्यठ आसॖ नॖ कऺशीरि मंज़ बटॖ कोरि एक्टिंग करान। मर्दन मंज़ॖय ॴस्य कॆंह गिने चुने नफ़र ज़नानि हुन्द किरदार निभावान। बाल कृष्ण कस्बॖ, कृष्ण जी लॊंगू तॖ बॖ ॴस्य च़ारनॖ आमॖत्य अमि कामि खऻतरॖ। यीत्य म्यॆ राथ नाव ह्यॆत्य पनॖनिस सबक़स मंज़, यिमन ॴस ड्रामाहस मंज़ अदाकऻरी करनॖच स्यठाह महऻरियत हऻसिल। तमि अलावॖ आसॖ यिमन मंचिचॖ छ़ॊम्बॖ ति तगान बॆहतरीन पऻठ्य। अख ड्रामा ओस चलान डॊडस द्वन गन्टन तॖ श्यन सतन कॖस्तन मंज़ याने श्यन सतन एक्टन मंज़। प्रथ कॖस्तॖ पतॖ ओस पर्दॖ यिवान तुलनॖ तॖ कॖस्तॖ म्वकलिथ ओस पर्दॖ यिवान त्रावनॖ। अकि कॖस्तॖ प्यठॖ ब्यॆयिस कॖस्तस ताम युस वकफॖ मेदान ओस तथ बकफस मंज़ ॴस अख या जॖ कलाकार मनोरंजन करान, मसखऺरी करान रोज़ान तॖ ड्रामा वुछन वाल्यन हुन्द मन ॴस्य बऺहलावान रोज़ान। ड्रामाहान मंज़ ओस मोज़ू  मूजूब सामानॖ यिवान ज़्यादॖतर अथॖ सॗत्य तयार करनॖ। मसलन जंगल अगर हावुन आसिहे आसान तॖ गऺन्य गऺन्य कुल्य, ज़न्ड पोश वगैरा ॴस्य यिवान बनावनॖ गतॖ पट्यव सॗत्य। पहाड़ ॴस्य यिवान बनावनॖ तॖ पहाड़न प्यठ शीन ताम ओस यिवान हावनॖ। यिमन काम्यन हॖन्ज़ महऻरियत ॴस श्री सूरज तिक्कू सऻबस निश ति क्याज़ि सु ओस ओसमुत चित्रकार, ड्राइंग मास्टर। यिथॖ पऻठ्य ॴस्य तिमन दॊहन ड्रामा यिवान करनॖ। खास पोशाक याने कास्ट्यूम ओस यिवान बनावनावनॖ यॆमिस युथ किरदार ओस आसान करुन, मेक-अप ति ओस तमीय अंदाज़ॖ कलाकारन यिवान करनॖ। यि फनकऻरी तॖ ज़ऻन्यकऻरी ति ॴस आसान ज़बर्दस्त। वारॖ वारॖ ह्यच़न पतॖ कॆंच़ॖकऻल्य कोरि ति फेरनि मंचस कुन ख़ास कऺरिथ तिमय यिम रेडियो कलाकार ति आसॖ। जयकिशोरी हन्डू, ब्रिजकिशोरी नखासी, कान्त्यानि गॊन्जू, भारती ज़ारु, आशा ज़ारु, कृष्णा वली, नबला बेगम वगैरा वगैरा बनेयि मंच कलाकार रेडियो कलाकऻरी अलाव। कऺशीरि मंज़ स्वान्ग एण्ड ड्रामा डिविजन खुलनॖ सॗत्य तॖ पतॖ 1970 ईस्वी मंज़ टी वी सैन्टर खुलनॖ सॗत्य लऺज्य लऻन कलाकारन तॖ अदाकारन हॖन्ज़। ड्रामाहन मंज़ ति गव वारॖ वारॖ बदलाव यिवान। पऻछ़ शे कॖस्तन हुन्द ड्रामा मॊच़्यव त्र्यॆन एक्टन ताम। स्यट डिज़ाईनस मंज़ ति आयि कति कोर तब्दीली। ड्रामाहूक सोच बदल्यव पूरॖ पऻठ्य। शयाम लाल धर "बहार", आर के ब्रारू, मोती लाल क्यॊमू ति छि रूद्यमॖत्य थदि पायिक ड्रामा निगार। हालांकि ग्वडॖ ग्वडॖ ॴस्य कऺशीरि मंज़ ड्रामाहस मंज़ कऻम करॖन्य यिवान बांडॖ पऻथॖर मानॖनॖ मगर पतॖ बन्यॆयि यिहऻय कऻम यज़तॖच कऻम। मुसलमान ॴस्य नॖ मंचस प्यठ अभिनय करान मगर पतॖ आयि नॖ तिम ति कुनि अथि। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)