25.12.2020

25.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) काह (एकादशी) शॊकुरवार (शुक्रवार/ जुम्मा) श्री सप्तर्षि सम्वत 5096, राश मेष (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक- 161)

ज़लॖ प्यॆठ्य पकुन थ्यकुन लूकन

नारस अच़ुन मारस व्यद

आकाश गमनो वुफुन आसुन

कपट बासुन आसुन च़्यथ

           अर्थात

कुछ लोग अपनी बडाई दर्शाने के लिए जल पर चलने, जलती आग में घुसने, मरे हुए का उपचार करने, आकाश में उडने का चमत्कार दिखाते हैं। किंतु ऐसा समझना चाहिए कि यह सारे चमत्कार चित्त में कपट भावना रखकर किए जाते हैं।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               *********

1. ज़ालस मंज़ फसावुन (To entrap/To dupe)

2. ज़ाय (Little curd for making curd)

3. ज़ायि (To waste/Has taken birth)

4. ज़ालॖ (Heat allergy/Rashes around mouth)

5. ज़ालॖ खसॖन्य (To shiver/To feel cold)

                मुहावरॖ

1. मु: गऻन्ठ क्याह ज़ानि पऻज़ 

         सुन्द शिकार

    अ: क़दॖर न ज़ाननवोल क्याह

         ज़ानि कऻन्सिहुन्द म्वल

         क्याह छु

2. मु: गऻन्ठ नॖ कुनि तॖ गऻन्टॖ ओल

    अ: बे-वख्तॖच तयऻरी करॖन्य

3. मु: गऻज़ व्वदुर

    अ: सु शखॖस युस ब्यॆयिस थफ

          दिथ नी

     (पनॖन्य शुर्य ह्यॆछॖनऻव्यूख)

**************************

पंचान्ग:- यथ बरस ॳन्दॖर्य हऻन्कल ॴस, यि बर ओस खुलान सडकि तरफॖ। ज़ॖ किनॖ त्रॆ पऻव्य खसिथ ओस यि बर तॖ बरॖ ॳच़िथॖय ओस दऺछिन्य किन्य अख कुठ रवख ह्यु तॖ खॊवॖर्य किन्य ॴस हेर ब्वन वसनॖ बापथ तॖ बरस स्यदॖस्यॊद ॴस हेर ह्यॊर याने त्रॆयिमिस पोरस कुन गछ़ान। बर मुच़ॖरिथॖय य्यॊस ब्वन वसनॖ बापथ हेर ॴस स्व ॴस गछ़ान दऺछिन किन्य वॊटिस कुन तॖ खोवरि तरफॖ ओस बर खुलान आंगनस मंज़। आन्गुन ओस बॊड तॖ तम्युक गेट ओस ख़ुलान कोचस मंज़। हालांकि यि गेट ओस बोड मगर अमि गेटॖ ओस युन गछ़ुन हना कमॖय पाहन ति क्याज़ि यि पऺतिम कोचॖ ओस नॖ ज़्यादॖ साफ़ सुथरॖ रोज़ान। वजह ओस ज़ि अमि गेटॖ न्यबरय ॴस्य अख ज़ॖ मुसलमान मकानॖ युहुन्द व्यवसाय ओस पुज्य कार। मंज़्य मंज़्य ॴस्य यिम कठ वठ मारान रोज़ान पनॖनिस आंगनस मंज़ॖय। चुंकि अपऻर्य ॴस दुर्गन्द दुह्यकिस दॊहस यिवान रोज़ान अवॖ म्वखॖ ओस अमि गेटॖ युन गछ़ुन कमॖय पाहन। सडकि तरफुक बर ओस आकारस मंज़ ल्वकुट मगर यिनस गछ़नस ॴस्य आसऻयिश बासान। मतलब यि ज़ि यि बर ओस दॊयमिस पोरस प्यठ खुलान। युथुय असि बरॖ अंदर क़दम थॊव वुज़स मंज़ वुछ्य कॆंह नऺव्य तॖ ताज़ॖ नोठ छऺकरिथ, दु रॊपियुन, पांच़ॖ रॊपियुन, दऺह्युन नोठ तॖ यिम नोठ ॴस्य आमॖत्य छऺकरावनॖ अथ वुज़स मंज़ तॖ ह्यॊर खसवॖनि हेरॖ पाव्यन प्यठ। बासान ओस ज़ि युस ति च़ामुत छु, न्यॆरनॖ विज़ि छि तस या तिमन च़लॖ लार  प्येमॖच़। यिमन नोटन सॗत्य सॗत्य ॴस्य कॆंह पलव ति छऺकरावनॖ आमॖत्य यॆत्यन हुत्यन। यि गव तय ज़ि यिम नोठ ॴस्य दिल्लि प्यठॖ आमॖत्य वऻलिस मामा जियिन्य। अमिच तस्दीख कऺर द्वशवॖय मामव। बरॖ अच़वुनुय कुठिस मंज़ च़ायि ॳड्य तॖ ॳड्य गऺयि यिम छऺकरिथ आमॖत्य नोठ तॖ पलव तुलान तॖ वऻत्य त्रॆयमिस पोरॖकिस कुठिस ताम। बरॖ प्यठॖ त्रऻव कुठिस कुन नज़राह तॖ वुछ सऻर्यसॖय व्वथॖवार गोमुत, पलव लॖति छिति गऻमॖत्य, अटैची अजि हजि तॖ अजि कजि। बासान ओस ज़ि लूठ छु सऺही गोमुत। ब्वनॖ कुठि मंज़ॖ आयि आवाज़ ज़नानन हॖन्ज़ ज़ि त्रठ छि प्येमॖच़ च़ूर छि सऺही फऺर्यमॖत्य, सोरुय छि प्रऻटिथ गऻमॖत्य। यॆति ति छु युथुय हाल।आवाज़ दिच़ हॆरि प्यठॖ।  सत्यवऺती हॖन्दिस सार्यसॖय सामानस छि दून्य आमॖच़ दिनॖ तॖ सोरुय तहस नहस गोमुत। कऺम्य ताम वॊन ज़ि खाकस प्यठ माहरा छिख बॆहनऻव्यमॖत्य। अथ वथ डऺज्य सारिनीय। सऻरी छि पनुन पनुन सामानॖ छ़ान्डनस लऺग्यमॖत्य मगर कऻन्सि कॆंह अथि लॊग नॖ। ओंखरिस मंज़ जोंखुर ओस गोमुत। ॳक्यसॖन्द्य पलव ब्यॆयि सॖन्द्यन पलवन मंज़ तॖ ब्यॆयिसॖन्द्य पलव त्रॆयिमिस सॖन्द्यन मंज़। बऺनिमॖ कुठ्यचि अलमारि आसॖ आमच़ॖ प्राटन। ट्रंकन ॴस्य कुलुफ आमॖत्य फुटरऻवनॖ। पलि ओस नॖ प्यवान ज़ि करव हय तॖ करव क्याह, गछ़व हय तॖ गछ़व कॊत। लॆदरि छ़ठ फीर्य सारिनी बुथ्यन। सऻरी बीठ्य कलस थफ कऺरिथ ज़न प्यॆयि सऻरी हऺरिथ। च़ूर छि आमॖत्य तॖ द्रामॖत्य डुबॖडास कऺरिथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

******"*******************

  नऺविव तॖ फॊलिव

  भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)