27.12.2020

27.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) त्रुवाह (त्रयोदशी) आथवार (रविवार/ऐतवार) श्री सप्तर्षि सम्वत 5096, राश वृष (चलान)ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक- 163)

द्यन छ्यज़ि तॖ रज़न आसे

भूतल गगनस कुन व्यकासे

च़ऺन्दॖर्य राह ग्रोस मावॖसे

शिव पूज़न गवाह च़्यत आत्मसे

            अर्थात

दिन की समाप्ति पर रात हो जाती 

है और अंधेरे में पृथ्वी व आकाश दृष्टि में एक जैसे दिखते हैं। चन्द्रमा के उदय होने पर प्रकाश होता है। मानो चन्द्रमा ने राहू को अमावस्या पर ग्रास कर लिया हो।अपने चिदात्मा में शिव पूजा यही होती है। 

भावार्थ:- दिन की समाप्ति पर रात्रि का आगमन होता है। जिस से आकाश एवंं धरती दोनों अंधेरे में ग्रस्त हो जाते हैं मानो अमावस के चन्द्रमा ने सूर्य को ढकने वाले राहू को भी ग्रास किया हो। अर्थात प्रत्येक वस्तु में परसपर अंतर करने का अभाव होता है। ऐसी काली रात मन की शून्य अवस्था का प्रतीक है जिस में द्वैत भाव नहीं रहता। मन की इस अद्वैत अवस्था में प्रमात्र, प्रमेय, प्रमाण तीनों का अभाव रहता है। इसी अद्वैत भाव का प्रगट होना अपने चिदात्मा में शिव की पूजा है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             **********

1. ज़ऻमी (Husband's sister's husband)

2. ज़ामन (Yawning)

3. ज़ान (Acquaintance)

4. ज़ानॖवुन (Knowledgeable)

5. ज़ानुन (To know/To understand)

               मुहावरॖ

1. मु: गरस गरॖ छा वाठ दिवान

    अ: गुज़ारॖवोल गरॖ छु नॖ ग़रीब 

         गरस फऻयदॖ वातनावान

2. मु: गरा द्युतमय हऻविथ लरा 

         ब्यूठुख त्रऻविथ

    अ: यॆलि कऻन्सि सॗत्य जान

         पहचान गछ़ि तॖ पतॖ तुल्यस

         नॖ थफॖय

3. मु: गरि ति हाख परि ति हाख

         नाहकय ज़ुवॖ गरीय द्राख

    अ: यॆलि नॖ ब्यॆयिसॖन्दिस गरस

         मंज़ खऻतिर वाति

      (पनॖन्य शुर्य ह्यॆछॖनऻव्यूख)

**************************

पंचान्ग:- कमलावती तॖ तऺम्यसॖन्द्य शुर्य लऺग्य पनॖन्य पनॖन्य चीज़ छ़ान्डनि। च़ाटॖहालॖ गछ़न वऻल्य शुर्य बीठ्य पनॖनि किताबॖ कापीयि सॊम्बरावनि यिम च़ूरव होरॖ योर छऺकॖरावमच़ि आसॖ। मोहन जियुन किताबॖ बस्तॖ ओस अलगॖय ति क्याज़ि सु ओस यि बस्तॖ ह्यथॖय पोफिहुन्द याने सोन आमुत। कमलावती तॊर नॖ फिकिरी ज़ि क्याह छुहोस न्यूमुत तॖ क्याह छुहोस त्रोवमुत। थपि थ्वसि वऺटिन वऺहर्यमॖत्य चीज़ तॖ सूंचुन ज़ि वारॖ वार वुछि बाकय फरागऺच़ सान पगाह।अल्बतॖ स्टील अलमारि अंदर अख सिक्रट ल्वाकर खूलुन तॖ सीनस प्यठ थोवुन अथॖ तॖ बडि बडि वॊनुन ज़ि तपालि लदन छख नॖ योर नज़र पिल्येमॖच़। स्वन गऺहनॖ ब्वकुस ओस तऺथ्य मंज़। ओड ओसुस लऻग्यथॖय तॖ बकाया ओसुन आलमारि हॖन्दिस ल्वाकरस मंज़ॖय थॊवमुत। कऻन्सि आव नॖ व्वंदॖ चाय च्यॆन या कॆंह ख्यॊन। म्यानि माजि वॊन म्यॆ ल्वति पऻठ्य ज़ि ॳस्य वसव गरॖ तॖ यिहॖन्दि बापथ खारव कॆंह ख्यन च्यन सामानॖ। म्यॆति कॊर आंकार तॖ ॳस्य माजि प्वथुर द्रायि मामन मामियन यि वऺनिथ ज़ि ॳस्य यिमव गरि नज़र दिथ। सॊथि प्यठॖ गरॖ ताम वातान वातान छॆ नॖ माजि म्यानि ज़्यव थऺचमॖच़ च़ूरन वॊहवोह करनॖ सॗत्य। म्यॆति ओस नॖ द्यमाग कऻम करान ज़ि क्याह करव ब्रोंहकुन। गरॖ वऻतिथ लऺज ख़बर सारिनीय म्यान्यन बायन तॖ ब्यॆनि। मोल ओस म्यॆ तॆली स्वर्गवास सप्दुमुत यॆलि बॖ त्रु-च़ु वुहुर ओसुस। अमि वॊहरवादि गोस बॖ पंदहऻन पूर तॖ शुरहऻयमिस वऺर्ययस मंज़ त्रोवुम क़दम। यि द्वह रूद वुमरि याद। म्यॆ ज़िठ्य ॴस्य ज़ॖ बऻय तॖ ब्यॆयि अख ब्यॆनि। बड्यन बायन तॖ म्यानि ब्यॆनि ओस खान्दर कोरमुत। सारिवी ज़िठिस बऻयिस ओस अख न्यॆचुव तॖ अख कूर। मंज्यमिस बऻयिस ॴस अख कूर तॖ म्यानि ब्यॆनि ओस नॖ कांह सन्तान। परेशान गऺयि गरस मंज़ सऻरी यि बुरॖ ख़बर बूज़िथ। सऻरी बीठ्य पनॖनि पनॖनि आयि सवाल प्रॖछ़नि तॖ म्यऻन मऻज्य ति गऺयि जवाब दिवान तॖ सॗत्य सॗत्य शूरुन बतॖ स्युन मातामाल वातॖनावनॖ बापथ। पुलसस कॊरा रिपोर्ट मामा जियन प्रुछ़ ज़िठ्य ही बऻय। ना वुनि कति। जवाब द्युत म्यानि माजि। वुछन वऻलिस गछ़व, वॊन म्यानि ज़िछि बऺयकाक्नि। वुछन वऻलिस? म्यानि माजि वुछ सवालिया नज़रि सॗत्य पनॖनि न्वशि कुन। पॊज़ छ्यसव वनान। हब्बॖकऺदलॖ अपारि बाबापोर कोचस मंज़ छु अख वुछन वोल। दपान तऺम्यसुन्द छु सोरुय पॊज़ ननान कुस च़ूर कपऻर्य च़ाव तॖ कुस कपऻर्य द्राव। ज़िठ्य बऻय तुज्य टूकॖर तॖ मंज़िम बऻय ति तुज्य दॊयिम टूकॖर तॖ द्रायि सॊथ कुन बतॖ स्युन ह्यथ।माजि दॊप यिमन म्यान्यन बायन ज़ि रातस रूज़िज़्यवॖ तऺत्य तॖ तिम ख्यऻवनऻव्यज़्योख ठीख पऻठ्य। सॗती वऺन्यज़्योख ज़ि पगाह गछ़व वुछन वऻलिस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)