24.12.2020

24.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) दऺहम (दशमी) ब्रसवार (वीरवार/ बृहस्पतिवार/गुरुवार) श्री सप्तर्षि सम्वत 5096, राश मेष (चलान), ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक-160)

ज़ल थमवुन हुत वा तॗरनावुन

उर्द्ववा ग़मन पऻर्यव च़ऺरिथ

काठॖ दीनि द्वद शरमावुन

अनतिहि सकलॖ कपट च़ऺरिथ

             अर्थात

चलते जल को रोकना, आग को ठंडा बनाना, आकाश में पैरो से चढना, लकडी की नकली गाय से दूध प्राप्त करना, अंतत: यह सारे चमत्कार कपट के ही चरित्र अर्थात क्रियांए हैं।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *******

1. ज़ख (Harmless/Hurt/Damage/Injury/Grievance)

2. ज़ाफरान (Saffron)

3. ज़ाग (Watch)

4. ज़ागुन (To keep a watch/

Be watchful) 

5. ज़ाल (Net/Web/Snare/ Trap/Fraud)

              मुहावरॖ

1. मु: गऻव ज़ाव वॊछ़ सु म्यॆ गॊछ़

    अ: लालॖच करुन, ती मंगुन यी

         नॖ पज़ि

2. मु: गऻव छु वॊनमुत हटि किन्य

         दितम तॖ लटि किन्य दिमय

    अ: अगर कऻन्सि फऻयदॖ 

         वातॖनावव या तस सॗत्य

         नीकी करव सु दी तम्युक

         फऻयदॖ ज़रूर, या, गाव

         अगर जान ख्यॆयि द्वद ति 

         दी ज़्यादय

3. मु: गऻव मार बोज़ान सऻरी तॖ

         दांदॖ मार नॖ बोज़ान कांह

   अ: ज़नानि हुन्द न्याय छि सऻरी

        बोज़ान तॖ हमदर्दी करान

        मर्दॖ सुन्द ज़ुलुम छु नॖ

        बोज़ान कांह

      (शुर्य पनॖन्य ह्यॆछनऻव्यूख)

**************************

पंचान्ग :- शीर्य चाय नऺरिस प्यठ रूज़ यिथय पऻठ्य, गर्म गर्म कुल्चॖ, तेलवऺर्य, कत्लमॖ, टखटचि, बऻकिरखानि, ग्यव च़ॊचि रोज़ॖ डोलान। बुथ्यन हुन्द रंग गव फीरिथ। द्वनवय माम, मामनि तॖ तिहॖन्द्य शुर्य बऻच़ रूद्य पानवॖन्य ईशारन मंज़ॖय अख ॳकिस प्रछ़ान ज़ि अमा असि मंज़ छु नॖ कांह तति, तॆलि कुस छु ॳन्दॖर्य हऻन्कल दिथ बिहिथ। सारिवॖय कऺर सखर गरॖ वातनॖच। डलहसनयारॖ प्यठॖ ओस वातुन सॊथ अंदर। तिमन दॊहन ओस नॖ ट्रान्सपोर्टुक ति कांह खास सादन ति मॊय्यसर आसान। पैदलॖय ओस वातुन सॊथ ताम। मर्द मर्द द्रायि दऺस्ती। मामॖन्यन लॊग रछ खन्ड तयार गछ़नस तॖ द्रायि तिम ति यिमनॖय पतॖ। म्यऻन मऻज्य ति गऺयि परेशान। कॊरुमुत क्रोवमुत द्राव सोरुय पऺन्द्य। म्यानि माजि ति कति यीहे ताब। तमि ति वॊट वॊहुरमुत सामान जल्दबऻज़ी मंज़ तॖ बॖति तुलनस पानस सॗत्य तॖ त्रोव पडाव सॊथ कुन। मोबाइल ॴस्य नॖ। शॆछ ख़बर किथॖ पऻठ्य तॖ कऺमिस प्रछ़ॖहऻव। फ्रटॖ वऻन्लिजि मंज़ द्रायि सऻरी। तकरीबन म्यॆ बासान ऒड दून गन्टॖ लॊग सॊथ अंदर वातनस। म्यान्यन मातामालन ॴस्य त्रॆ मकानॖ ॳक्यसॖय लऻनि मंज़ सडकि उतरायि प्यठ यॊस वथ रॗन्यवोर कुन गछ़ान ॴस। टांगॖ ॴस्य नेरान रॗन्यवऻर बापथ ब्रॆयिकुजनि प्यठय योत। डलहसनयारॖ प्यठॖ यूताह ब्रॆयिकुजुन ताम ओस फऻसलॖ तमि ख्वतॖ कमॗय ओस पतॖ ब्रॆयिकुजनि प्यठॖ म्योन मातामाल ताम। सडकि वसवुनुय ग्वडनिकिसॖय मकानस मंज़ ॴस्य म्यऻन्य माम रोज़ान तॖ बकाया द्वन मकानन मंज़ ॴस्य म्यऻन तिहॖन्द्य पितॖर्य रोज़ान। खऻर यिथॖ तिथॖ वऻत्य ॳस्य ति तॖ तॊत वऻतिथ वुछ ज़ि यथ बरस ॳन्दॖर्य हऻन्कल ॴस, सु बर ओस रहि रास यलॖय यॆलि ॳस्य सऻरी तॊत  वऻत्य। चूंकि द्वनवय माम ॴस्य वऻत्यमॖत्य दऺह पंदाह मिनट ब्रोंठुय तॖ ॴस्य व्वंय प्रारान सऻनिस वातनस। अंदर ॳच़्यथॖय क्याह वुछ असि सारिवॖय सु वनोवॖ ब्रौंहकुन पगाह। कथ छि जऻरी।दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)