15.12.2020

15.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष)ऒक्दॊह (प्रथमा) बॊम्वार (मंगलवार) श्री सप्तर्षि सम्वत 5096, राश धनु (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा ‌क्षमा शिवा धात्री स्वहा स्वधा नमोस्तुते

**********************"***

               लल वाक्

         (पराग पुस्तक- 151)

कॆंहनस प्यठॖय क्या छुय नच़ुन

म्वच़िय कॆंह नॖ तॖ नच़ुन त्राव

पॊत फीरिथ छुय तॊतुय अच़ुन

यिहोय  वच़ुन च़्यतस थाव

            अर्थात

इस असार संसार में क्यों अटखेलियां करता है। यहां कुछ प्राप्त नहीं होता है और न ही कुछ शेष रह जाता है। यह अटखेलियां करनी छोड दें और मेरे इस तथ्य को स्मरण रखो कि अपने अंतर में ही जाना फलदायक है। शेष सारा व्यवहार अस्थायी है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. रातस प्यठ (For the night)

2. राथ द्वह (Day and night)

3. राथक्युत (In the night/Night time/Very late)

4. राथ लगॖन्य (Have to spend a night)

5. रातॖ क्रॗल (Bat/s)

                 मुहावरॖ

1. मु: खित खित ग्वच़ॖर

    अ: स्व ज़नानॖ य्यॊस असुन तॖ

         असुन त्रावि, या, ज़्यादॖ

         असन वाज्यन

2. मु: खऺरिये पॊठये पऺतिम मॊठये

    अ: यॆलि कॖस्मत यावरी करान 

         छु प्रऻन्य बद्दी छि मशान

3. मु: खऺरिस राज डायन गर्यन

    अ:  नाकारॖ इन्सान सुन्द असर

         रॊसूख छु नॖ ज़्यादॖ कालस

         रोज़ान

        (पनॖन्य शुर्य ह्यॆछॖनऻव्यूख)

**************************

पंचान्ग :- ऋश्य वारि मंज़ॖ वुछव अज़ ॳकिस साधवी हॖन्ज़ जीवनी। ॳमिस छु नाव ओसमुत रूप भ‌वऻनी। दपान अख शख़स यस नाव ओस पंडित माधव धर, ओसमुत ओस माजि शारिकाय हुन्द ज़बर्दस्त व्वपासक। ॳम्यसॖय ओस कोरि हुन्द अमार। यि दपान ओस न्यथ हारी पर्वत गछ़ान तॖ तॊत वऻतिथ माजि हॖन्द्यन पादि कमलन तल बिहिथ माजि कूर आसनॖच यछ़ा बावान रोज़ान। दपान माधव जियिन मुराद गऺयि मनज़ूर माजि हॖन्दिस दरबारस मंज़ तॖ मऻज्य शारिका गऺयि प्रकट ॳकिस ल्वकचि कोरि हॖन्दिस रूपस मंज़ तॖ प्रुछ़ुन माधव जियस तऺम्यसॖन्ज़ यछ़ा। दपान माधव जी गव स्यठाह भावुक तॖ दॊपनस च़ॖ यितॖ म्यऻनिस गरस मंज़ म्यऻन्य कूर बऺनिथ। तथास्तु वऺनिथ दपान यि ल्वकॖट कूर गऺयि अदृश्य। अमि पतॖ कॆंच़ॖ कऻल्य दपान आयि माधव धर सॖन्दिस गरस मंज़ अख कूर ज़न्मस। ॳमिस कोरि दपान ॴस्य ज़्यनॖ पानॖ प्यठय कॆंह व्यॊख्तुय लक्ष्ण यिम अध्यात्मिकायि कुन ॴस्य इशारॖ करान। ॳमिस कोरि आव नाव दिनॖ रूपा। यॊदवय यि नाव छु ओसमुत अख आम नाव कऻशिर बटॖ ज़ऻच़ मंज़ ति क्याज़ि मानॖनॖ ओस यिवान ज़ि यॆलि तॆलि कुनि गरस मंज़ कूर यीहे ज़न्मस दपान ॴस्य लक्ष्मी हॖन्दिस रूपस मंज़ आयि ज़न्मस याने रूप नाव ओस यिवान मानॖनॖ हमेशि दीवी हुन्द रूप। कांह ति दीवी, लक्ष्मी, सरस्वती, दुर्गा, रऻज्ञन्या वगैरा वगैरा। ती मध्यनज़र थऺविथ आव ॳमिस कोरिहेनि हुन्द नाव ति थावनॖ रूपा। चूंकि पंडित माधव जी ओसमुत ओस माजि शारिकाय हुन्द भखॖत्य तऺम्य हऻव वथ पनॖनि कोरि ति माताय हॖन्ज़न रहस्यमय लीलायन कुन, योग शक्ति कुन, अध्यात्मिक ज्ञानस कुन शारिकायि हॖन्द्यन व्वपदेशन कुन। अमि अलावॖ ओस माधव जी ललेश्वरी हुन्द ति भखॖत तॖ पननि कोरि दिच़ॖन ज़ान पहचान लल वाकन हॖन्ज़ ति। रूप भवऻनी दपान आयि सम्पर्कस मंज़ कॆंच़न थदि पायक्यन संतन मंज़, मसलन शाह क़लंदर ह्यु तॖ सय्यद कमाल ह्यु। मऻली ॴस रूप भवऻनी संत शाह क़लंदरस सॗत्य रू ब रू कऺरनऻवमॖच़ तॖ सय्यद कमाल ओस दपान यिमन हमसायय रोज़ान तवॖ म्यखॖ आयि तऺम्यसॖन्दिस सम्पर्कस मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)