23.12.2020

23.12.2020 मॊंजॖहोर (मार्ग/ मगर) ज़ूनॖ पछॖ (शुक्ल पक्ष) नवम (नवमी) ब्वदवार (बुद्धवार) श्री सप्तर्षि सम्वत 5096, राश मेष (रऻच़ हॖन्ज़ॖ 4.28 बजि प्यठॖ) ऋतु हेमन्त (चलान), द्रठॖपऻन्च़ुक गछ़ि अज़ समाप्त

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

       (पराग पुस्तक-159)

च़्यदानंदस ज्ञानॖ प्रकाशस

यिमव च़्यून तिम ज़ीवऺत्य म्वखॖत्य

विशमिस समसारनिस पाशस

अबॊद्य गन्डाह शथ शीत्य दित्य

             अर्थात

सतचित आनंद परमेश्वर जो ज्ञान रूपी प्रकाश है, का जिन्होंने अनुभव किया, वे ही लोग जीते जी मुक्ति पाते हैं, अर्थात जीवन मुक्त हैं। इसके विप्रीत अबोध लोग विषयमय संसार रूपी फांसी को पहन कर, अर्थात अपना कर इसमें सैंकडों गान्ठे देते हैं, अर्थात अपने को संसार बंधन में बांधते हैं।

भावार्थ:- संसार रूपी फंदे से सतचिदानंद परमेश्वर की भक्ती ही बचा सकता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. गुलज़ार (Flower beds/Garden)

2. लालॖज़ार (Bed of tulips)

3. मरगुज़ार (Graveyard)

4. ज़ारॖपार (To beg/Request/Pardon/Entreaty/Supplication)

5. ज़ार गिन्दुन (To gamble)

                 मुहावरॖ

1. मु: गाव चऻव्यज़्यन वॊछ़ 

         रऺछज़्यन

    अ: कऻम करनॖ विज़ि गछ़ि नॖ 

         पनुनुय योत फऻयदॖ छ़ान्डुन

         बऺल्कि ब्यॆयिसुन्द ति ख़याल 

         थवुन

2. मु: गऻन्य बुडि तॖ यॆन्दॖर कति

    अ: युस वुम्बरि जखान रूद 

         तस छु नॖ बुडिथ ति आराम

         नसीबस

3. मु: गाड छि दऺर्यावस मंज़ त्रेशि

         बापथ मरान

    अ: यॆलि सोरुय दऺस्तियाब 

         ॴसिथ ति इन्सान ह्यॆकि

         नॖ तम्युक फऻयदॖ तुलिथ

      (पनॖन्य शुर्य ह्यॆछॖनऻव्यूख)

**************************

पंचान्ग:- म्योन माम ओस दिल्लि मंज़ नोकरी करान तॖ यि आव छुटी ह्यथ पनुन गरॖ युस कऺशीरि मंज़ श्रीनगरॖ शहरस मंज़ सॊथि प्यठॖ ओसुस। पनुन अयाल ओसुस सॗत्य। कथ छि 1959-60 -च हिश। म्यॆ छु याद ज़ि यिमनॖय दॊहन मंज़ आव म्योन वॊहरवोद ति तॖ म्यानि माजि कॊर पनॖन्यन बायन तॖ तिहॖन्द्यन अयालन साल अमि दोहन। सऻरी छि आमॖत्य व्वत्सव छु ज़ोरस प्यठ। ख्वश तॖ ख्वशहाल, असान गिन्दान छि सऻरी पनॖनि पनॖनि आयि। बतॖ ति छु ख्योमुत, शीर्य चाय छि चलान। कान्दरस निशि ॴस ॳन्यमॖत्य ताज़ॖ तेलवऺर्य, कत्लमॖ, ब्यॆयि ति क्याहताम क्याहताम। दिल्लि हॖन्ज़ खबरा अतरा छि चलान। तिमन दोहन यॊदवय कांह न्यॆबरॖ प्यठॖ याने टनलि अपारि प्यठॖ श्रीनगर या कऺशीरि यिवान ओस बासान ओस ज़ि कुस ताम छु व्यलायतॖ प्यठॖ कांह फरंगी आमुत। अलनॖ तॖ वलनॖ ॴसिस अंग ॴश्यनाव यिवान। पछ़ ॴस नॖ यिवान ज़ि ॳस्य छि करान ॳकिस न्यॆ्ब्रिमिस सॗत्य कथ बाथ।  न्यॆबरॖ प्यठॖ आमॖत्य वऻल्यसॖन्द्य शुर्य कऺट्य ति ॴस्य आसान न्यॆब्रकिसॖय हवाहस मंज़। गाह सु बानहालि प्यठॖ आसिहे या बम्बयी प्यठॖ आसिहे आमुत आसान। नज़ाकतस मंज़ ॴस्य आसान। कथि हुन्द तुलॖ त्राव ति ओस आसान हना ब्यॊनुय। ऒड अंग्रीज़ तॖ ऒड कऻशुर। खऻर वुनि छि ॳस्य चाय च्यवऻनी ज़ि ब्यॆयिस मामॖ सुन्द लऺडकॖ युस च़ाटॖहाल गोमुत ओस ति आव किताबॖ बस्तॖ ह्यथ च़ाटॖहाल वर्दी मंज़ॖय। माजि ॳम्यसॖन्ज़ि प्रुछ़ ॳमिस ज़ि च़ॖ क्याज़ि आख नॖ गरि यि किताबॖ बस्तॖ त्रऻविथ तॖ पलव बदलऻविथ। जवाबस मंज़ वॊन ॳम्य न्यॆचिव माजि ज़ि सु ओस गरॖ गोमुत मगर बर ओस बंद। अन्दॖर्य ॴसॖस हऻन्कल। दॊपुन ठुख ठुख करेयोम मगर बर मुच़ॖरोव नॖ कऻन्सी। अमा तति कुस सना छु तॆलि ति क्याज़ि सऻरी छि योर सालस आमॖत्य। मामलॖ बन्यऻव शकावर तॖ असवुन गिन्दवुन माहोल गव संजीदगी मंज़ तब्दील ब्रिंज़िस मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)