29.07.2020

29.07.2020, श्रावणॖ (श्रावण) ज़ूनॖ पछॖ (शुक्ल पक्ष) दऺहम(दशमी) ब्वदवार (बुधवार) श्री सप्तर्षि सम्वत 5096, राश वृश्चिक (चलान),ऋतु वऺहरात (वर्षा/बरसात) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

       महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

ह्यथ कऺरिथ राज फेरिना

दिथ कऺरिथ त्रपति ना मन

लूभ व्यना ज़ीव मरि ना

ज़ीवंत मरि तऻय सुय छुय ज्ञान

         ***********

अर्थात:- यह मन राज को पाकर भी विषयों से मुडता नहीं, या राज देकर भी तृप्त नहीं होता। यह मन लोभ से पीछे नहीं हटता। लोभ न करने से मनुष्य मरता तो नहीं। इसलिए लोभवश नहीं होना ठीक है। सारांश यह कि ज़िन्दा मरना ही ज्ञान है। अर्थात मन को लालच देकर मोडा नहीं जा सकता है। अपितु ऐसा करने से मनुष्य अधिक विषयासक्त हो जाता है।

**************************

        मुहावरॖ (दऺपिथ कऻशुर)

1. मु: शेठॖ वुहुर काव तॖ शीतॖ वुहुर

         काव पूत

    अ: अक्लि निश छॆ नॖ वऻन्स 

         कांह कॗमत थवान, या

        बेवॖकूफ मोल तॖ दाना न्यॆचुव

2. मु: शेतानॖ सॖन्द्य कन ज़ऺर्य

    अ: शेतान छु नॖ कऻन्सि हुन्द 

         बोज़ान

3. मु: शीनॖ रॊयि शेतान

    अ: अंदॖर्य अख तॖ न्यॆबॖर्य ब्याख

          या, ज़्यॆवि प्यठ राम राम तॖ

          कछ़स मंज़ श्राख

**************************

पंचान्ग:- राथ आव नॖ म्यानि दऺस्य यि सबक़ सोज़नॖ। बॖ छुस मंगान माज़रथ। म्यान्यन कॆंच़न बायन ब्यॆन्यन ॴस रूज़मॖच़ स्यठा कल। म्यॆ गव मन ख्वश यि वुछिथ ज़ि तिम छि म्योन रुत कांछान तॖ सॗती च़्रॆंग्योस बॖ यि बूज़िथ ति ज़ि तिम छि म्योन यि सबक वातनस ताम प्रारान आसान तॖ म्योन यि सबक़ मनॖ सान परान तॖ परनावान पनॖन्यन शुर्यन कट्यन तॖ अंगन ॴश्यनावन। ती छु म्योन ति मुद्दा ज़ि यि कऻशिर ज़बान गऺछ़ वातॖन्य म्यऻनि समाजकिस प्रथ ज़रस ज़रस ताकि सोन यि साहित्य, संस्कार, संस्कृति, माजि ज़्यव रोज़िहे ज़िन्दॖ ता कयामऺच़ ताम। म्ये छु याद प्यवान ज़ि पथ कालॖ यॆलि नॖ मोबायल ओस आसान तॆलि यॊदवय कऻन्सि हॖन्ज़ ख़बर अतर ॴस आसान ह्यॆन्य, तमि सातॖ ॴस्य गछ़ान नज़दीकॖय कुनि डाकखानस प्यठ या टेलीफोन एक्सचेंजस ताम तॖ ॴस्य तार सोज़ान या तति प्यठॖ टेलीफोन करान रोज़ान। बेसबरी सान ॴस्य जवाबस प्रारान रोज़ान। यॊदवय कांह नाज़ुक या संजीदॖ  मसलहॖ ओस आसान, ज़ुव ओस आसान म्वछि मंज़ यॊत ताम नॖ जवाब वातिहे तॖ ॴस्य भगवानस मंगान ज़ि सऻरी गछ़न वारॖ वति आसॖन्य तॖ रॖच़ रॖच़ ख़बर गऺछ़ वातॖन्य। चिठ्यन हुन्द ति दोर ओस चलान सॗत्य सॗत्य मगर तथ ओस वख स्यठाह लगान योरॖ सोज़नस तॖ तोरॖ जवाब वातनस।मगर यनॖ प्यठॖ मोबायल बारसस आव सोरुय मनज़र बदल्यव यकमुश्त रातो रात। इन्कॖलाब आव च़्ववापऻर्य सूचनायि, व्यच़ारन तॖ भावनावन मंज़। प्रान्यन तोर तरीकन आव फ्युर दिनॖ तॖ नऺव्य नऺव्य आलॖ ह्यॆत्य अज़मावॖन तॖ पानॖनावॖन्य। पेंचॖ फटनय शुर्य छि अज़ मोबायलन प्यठ, कम्प्यूटरन प्यठ तिम तिम हऻरत अंगेज़ कामि करान रोज़ान यिम नॖ सान्यव ज़िठ्यव आसिहे सतन ज़न्मन मंज़ ति सू़चमुत। हालांकि वुछनस तल छु यिवान अज़कल यि ज़ि बेतऻबी छि प्रानि न्यस्बतॖ ज़्यादॖ बडेमॖच़,मगर बर्दाश्त छु प्रानि न्यस्बतॖ स्यठाह कम गोमुत, यॊदवय कामि हॖन्ज़ रफतार छि ज्यादॖ बडेमॖच़, मगर रिश्तॖन हुन्द रख रखाव छु स्यठाह बदल्यॊमुत तॖ रिश्तॖ रऺछ़रावनस सॊम्ब छु समय स्यठाह कम गोमुत। बुथि छॆ नॖ पताह वुनि ब्यॆयि क्याह क्याह आसि असि वुछुन। पकान छु समय तॖ दवान छि ॳस्य ति। महामऻरी हुन्द दॊयिम छोर तॖ अंद छुनॖ ज़न नज़री यिवान। द्वह पतॖ द्वह ह्यॆच़ॖन  परेशऻनी ज़न बडॖन्य हिश तिक्याज़ि पांछ़ ऱयथ वऻत्य असि दारि बर त्रोपरिथ बिहित तॖ हालातव ति ह्यॊत खुंखार ऱवॊख हावुन ह्यु, आवन-जावन रऺन्ग्य, ख्यनॖ-च्यनॖ रऺन्ग्य, पौंसॖ-टॗन्क्य रऺन्ग्य वगैरा। दय छु बॊड रऻछदर। सुय दी तार। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)