16.07.2020

16.07.2020, श्रावणॖ (श्रावण) गटॖ पछॖ (कृष्ण पक्ष) काह (एकादशी) ब्रसवार (वीरवार/ बृहस्पतिवार/गुरुवार),श्री सप्तर्षि सम्वत 5096, राश वृष (चलान) ऋतु वऺहरात (वर्षा)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

       महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

हे ग्वरा परमीश्वरा 

बावतम च़्यय छुय अंतर व्यॊद

द्वशवय व्वपदन कंद पुरा

हू कवॖ तुरुन तॖ हाह कवॖ तॊत

        ***********

अर्थात :- ललीश्वरी अपने गुरु से प्रश्न करती है कि एक ही शरीर में नाभिस्थान से दोनों प्राण उत्पन्न होते हैं फिर सांस लेते समय ठंडा तथा छोडते समय गर्म क्यों होता है। आप ही बताएं क्योंकि आपको इनका अंतर विदित है।

**************************

         मुहावरॖ (दऺपिथ कऻशुर)

1. मु: चाह कुन राह चाह दरपेश

    अ: युस कऻन्सि बद यॆछ़ि तस 

          छु पानसॖय गुदरिथ यिवान

2. मु: चऻर्य पथॖर

    अ: हज़लॖ पऻठ्य छि तथ बऺस्ती

         वनान यॆति सऻरी बेकॖल

         आसन

3. मु: चऻनिस हाकस छु नॖ पाक

         दिनुक ज़रूरथ

    अ: कऻम करनवऻलिस तऻरीफ

         करॖन्य

**************************

पंचान्ग:- अकिस दज़ान दऻर ब्याख वुशनावान अथॖ। अकि तरफॖ फाटॖनऻव तॗर कोरोनावयरसन, लूख करान त्राहि त्राहि। दॊयिम तरफॖ ह्यॊत कॆंच़व लूकव यथ महामऻरी हॖन्दिस नावस प्यठ फऻशन दार मास्कॖ बनावॖन्य। मास्कन हीरॖ जवऻह्यरात जरॖन्य, स्वन जरुन। मास्क ब्यॊन ब्यॊन रंगॖक तमि आयि बनावॖन्य युथ तिम साड्यन सॗत्य मेल ख्यन। टी वी प्यठॖ होवुख यि दृश्य तॖ हऻरान गोस बॖ यि बूज़िथ ज़ि मास्कुक कॗमथ छु डॊड लछि प्यठॖ च़्वन लछन ताम। दपान ॴस्य ज़ि यि मास्क यी पनॖनि पसंद तॖ पनॖनि हिसाबॖ बनावनॖ, अथ प्यठ स्वन, हीर, जवऻह्यरात यिन छलनॖ, छ्वकनॖ यिन सुहील्यत सान वगैरा वगैरा। ब्यॆयि तरफॖ बूज़ुम दपान बाज़रस मंज़ आव कोरोना-ओवुन यथ मंज़ प्रथ कॆंह चीज़ यी सतन-ॴठन मिनटन थवनॖ तॖ यिमन चीज़न यी सैनिटायज़र लगावनॖ पानय, क्याहताम युथुय ह्यु त्वतमॖ युस त्र्यन साईज़न मंज़ आमुत छु बनावनॖ तॖ कॗमत छु शायद बाह सास रॊपियि प्यठॖ शुरु। दवा छु वुनि बाज़रस मंज़ यिनय मगर फऻशन आव ग्वडय। बासान छु यिथ्य हालाथ वुछिथ ज़ि असि मोन यि ज़ि यि महामऻरी छि ज़न असि सॗत्य रोज़नी आमॖच़ वारियाह कालस ताम तॖ तमि हिसाबॖ ह्यॊत लूकव पनुन कारबार चलावुन। मरन वाल्यन हॖन्ज़ संख्या छि बडान सऻनिस वतनस मंज़। रफ्तार छि तेज़। यिम वुन्युखताम मूद्य, तिम भवॖसागरस अपोर तरान रूद्य, यिम शाह ह्यवान छि वुनि, तिम छि नऺव्य नऺव्य तमाश वुछान द्वह पतॖ द्वह। कॊत गछ़ि अख ग़रीब इन्सान ॳज़्यकिस वख्तस मंज़। यि क्युथ न्याय छु, यि क्युथ राज छु, यि कथ दिशायि कुन छु ॳज़्युक इन्सान गछ़ान यि ख़बर ॴसिथ ति ज़ि सॗत्य छु नॖ अख देलॖ ति न्युन तॆलि क्याज़ि छु यि च़ॊच़ुन। राथ द्राव रिज़ल्ट दऺह्यमि जमऻच़ वाल्यन। मुबारक तिमन सारिनी म्योन यिम यॆमि तारॖ गऺयि तऺरिथ। हऻरऻनगी छि यि ज़ि प्रथ अख शुर छु नम्बर फीसऺदी पतॖ लॊगमुत। अख मानसिक तनाव छु पऻदॖ सप्दान, शुर्य सॖन्दि बापथ, शुर्य सॖन्दिस मऻलिस-माजि बापथ ज़ि शुर हय करि तॖ करि क्याह। अकि तरफॖ खय तॖ ब्यॆयि तरफॖ क्रूर। ज़ानि दय तस क्याह छु मनज़ूर

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)