15.07.2020 श्रावणॖ (श्रावण) गटॖ पछॖ (कृष्ण पक्ष) दऺहम (दशमी) ब्वदवार (बुधवार) श्री सप्तर्षि सम्वत 5096, राश वृष (रऻच़ हॖन्ज़ॖ 11.18 बजि प्यठॖ) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
रोज़ॖनि आयस गछ़ुन गछ़्यम
पकुन गछ़्यम वावॖ लूकपाल
कॆंहनस प्यठॖय नच़ुन गछ़्यम
अच़ुन गछ़्यम सूक्षम प्रकऻर्य
**********
अर्थात:- जब आए हैं तो जाना ही चाहिए। सांस है तो यह भी चली जाएगी। येदि सूक्षम रास्ता न लेलूं तो शून्य पर नाचना जैसा होगा और यहां आना व्यर्थ हो जाएगा।अर्थात, यहां संसार में आकर परमार्थ प्राप्ति सर्वोपरि लक्ष्य होना चाहिए। इस के बिना कुछ साथ जाता नहीं है।
**************************
मुहावरॖ (दऺपिथ कऻशुर)
1. मु: ग्यॆलि ग्यॆलि छि कांह ग्यल
स्यॆज़ गछ़ान
अ: लगातार कूशिश करनॖ
सॗत्य छु स्यज़र गछ़ान
2. मु: ग्यव ख्यवानॖय छॆ नॖ गर्दन
म्वटान
अ: कांह कऻम कऺरिथ छु तम्युक
नतीजि नेरनस वख लगान
3. मु: गुह्य ऱयून्ज़
अ: सु शख़स युस बऺल्य व्वथ्य
व्वथ्य आसि गछ़ान याने
लॊत शख़स
**************************
प़चान्ग:- पलि छु नॖ प्यवान ॴखॖर असि करुन छु क्याह? कोरोनावयरसन होव व्यॊखतुय रूप। गरन मंज़ श्रऺपरऻविन लूख, बऺहरान छु नॖ इन्सान न्यबर नेरनस। फ्रठ छु ज़ि याम क़दम न्यबर कडव, हय रटि मा अतीय।अकि जायि प्यठॖ ब्यॆयिस जायि गछ़नस रूद बीम तिक्याज़ि कुनि जायि वातनॖ ब्रोंठुय छु कॆच़व ट्यस्टव तलॖ नेरुन ज़रूरी। यॊदवय ट्यस्टॖ ठीख आसन तॆलि छु तऺमिस मेलान इजाज़थ पनॖनिस मुकामस ताम वातनुक। यॊदय कुनि ट्यस्टस रछ़ खन्ड ति ह्यॊर-ब्वन आसि या शकावर मामलॖ बासि, तऺमिस छि थवान कोरोटायनस मंज़ कॆंच़न दॊहन, अड्यन छि थवान च़्वदहऻन दॊहन, अड्यन ॳकिस हफ्तस तॖ स्व मियाद पूरॖ गछ़नॖ पतॖय छु सु शख़स यिवान आज़ाद करनॖ बशर्ति तम्यसुन्द ट्यस्ट रिपोर्ट खॖराब आसि नॖ। वारियाह कामि छि रुकिथ गऻमच़ॖ, वारियाहन गरॖक्यन बऻच़न छि छलॖ छांगॖर गऻमॖच़। मेलुन-जेलुन गव बंद, कथ-बाथ छि करॖन्य परहेज़ सान अख ॳकिस सॗत्य। इन्सान आव पसरॖ पऺत्यम्यव पान्च़व शॆयव ऱयतव प्यठॖ। फेरुन-थोरुन ति गव बंद। शुर्यन हुन्द गिन्दुन-द्रॊकुन ति गव बंद। कॆंच़न दफतरन हॖन्ज़ कऻम छि पनॖन्यन पनॖन्यन गरव प्यठय यिवान करनॖ तिहॖन्द्यव मुलऻज़्यमव दऺस्य। बऺड्य बुज़र्ग ह्यॆतिन तंग गछ़ॖन्य गरन मंज़ॖय बिहिथ नॖ ज़्यादॖ हिलुन या डलुन। यि महामऻरी कॗतिस कालस रोज़ि ब्यॆयि चलवॖन्य, यि वनुन छु स्यठाह मुश्किल। अंदाज़ॖ लगावुन छु नॖ मुम्किन, ती छि वनान सऻरी दऺछिन्य खॊवॖर्य। यॆमि महामऻरी कऺर सानि वतनॖच आर्थिक दशा डांवाडोल। व्यवसायस प्यठ प्यव स्यठाह बुरॖ असर, ट्रेनन हुन्द आवागमन छु बंद, हवऻयी जहाज़न हुन्द वुडुन छु बंद। यि दऺप्यज़ि ति इन्सान छु त्रऻहर्योमुत ॳन्दॖर्य ॳन्दॖर्य। सोंचान छु इन्सान ज़ि बॖहऻय गछ़ॖ तॖ गछ़ॖ कॊत। करॖहऻय तॖ करॖ क्याह, वनहऻय तॖ वनॖ कऺमिस। कॆंह छु नॖ पलि प्यवान। बस व्वंय छु सिरिफ दय सुन्द नाव ह्यवान तॖ तसॖन्दिस ह्वकमस प्रारान।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment