22.07.2020 श्रावणॖ (श्रावण) ज़ूनॖ पछॖ (शुक्ल पक्ष) द्वय (देवादेव) (द्विती) ब्वदवार (बुधवार) श्री सप्तर्षि सम्वत 5096, राश सिंह (शाम 7.5 बजि प्यठॖ) ऋतु वऺहरात (वर्षा/ बरसात)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
अव्यसतऻर्य पोथ्यन छिय हो मालि परन
यिथॖ तोतॖ परन राम पंजरस
गीता परन हीथा लबन
परम गीता परन छस
**********
अर्थात:- अविचारी और अविस्तारी पंडित अर्थ जाने बिना ही पोथियां पढते हैं। और रट ऐसी लगाते हैं जैसे तोता रामनाम को अर्थ जाने बिना ही रटता है, जिसका उसे कोई लाभ नहीं होता । गीता पढकर ऐसे लोगों को दिखावा करने का एक बहाना मिल जाता है। वास्तविकता का उन्हें कोई ज्ञान नहीं होता है। मै (लल) ने तो ऐसा नहीं किया, अपितु मैं ने परम गीता अर्थात ओंमकार का अर्थ जानकर इसे आत्मसात कर लिया है।
**************************
मुहावरॖ (दऺपिथ कऻशुर)
1. मु: दऺह गज़ ह्यॊर क्याह दऺह
गज़ ब्वन क्याह
अ: हिशी कथा बोज़ॖन्य
2. मु: दऺह गज़ सऺन्य क्याह दऺह
गज़ वऺगॖन्य क्याह
अ: यॆलि नॖ ज़्यादॖ या कमॖ सॗत्य
कांह फरॖख प्यॆयि
3. मु: दऺह चन्दस दऺह व्वंदस दऺह
शांदस
अ: यॆलि नॖ कथ साफ़ पऻठ्य
वनॖनॖ यी। या
प्रथ कुनि चीज़ुक बराबर
ख़याल रोज़ुन
**************************
पंचान्ग:- ललेश्वरी हॖन्ज़ कथ छि चलान। दपान ललद्यदि ॴस नॖ वऻरिव गरस मंज़ हश बत्तॖ ति पूरॖ दिवान। स्व ॴस ललि हॖन्दिस थालस मंज़ निलॖ वठ थवान तॖ प्यठॖ ॴसॖस बत्तॖ शेरान। लल दपान ॴस बत्तॖ ख्यथ यि निलॖ वठ छऺलिथ छॊकिथ ब्यॆयि वापस चोकस मंज़ थवान। ब्याख यिछ़ॖय कथ दपान अकि लटि गव ललद्यदि च़ेर पाहन यारबलॖ प्यठॖ पां नॊट अनॖनस तॖ रॗन्य त्रोव शरारतस मंज़ पां नऺटिस लोरि दब मगर हऻरऻनी हॖन्ज़ कथ छि दपान नॊट फुट मगर पोन्य रुद फ्यॆकिसॖय प्यठ तीतिस कालस यीतिसकालस ललि चोकस मंज़ सारिनी बानन पोन्य बॊर तॖ बच्योमुत बाकय पोन्य द्युतुन दऻरिथ। वनॖनॖ छु यिवान ज़ि यॆतिनस सु पोन्य प्यव ततिनस दपान बन्यऻव अख नाग युस ललॖ त्रागॖ नावॖ सॗत्य ज़ानॖनॖ छु यिवान। कॆंच़ॖकऻल्य पतॖ दपान ललि कॊर फऻसलॖ मनस मंज़ तॖ त्रोवुन गरॖ बार तॖ गऺयि लीन दय नावस सॗत्य मुकमल पऻठ्य। ॳम्य सॖन्ज़ॖ कॆंह करामऻच़ वुछिथ दपान लूख ह्यॆतिन्य दूर दूर जायव प्यठॖ यिन्य ललद्यदिहुन्द दर्शुन करनॖ खऻतरॖ। कथ छि जऻरी। महामऻरी छयी छि चलान, ब्याख व्वदरुग आव व्वतलिथ सऺहलाबॖकिस सूरतस मंज़ सऻनिस वतनॖकिस कॆंच़न प्रदेशन मंज़ यॆति सासॖ-बऺद्य लूख आयि वलनॖ तॖ गऺयि पनॖन्यव गरन निशॖ बॆ-गरॖ। जानवर गऺयि यीरॖ, गुर्य गुपन मूद्य, त्रासदी मचेयि यिमन प्रदेशन मंज़ जायि जायि। आसामॖ, बिहारॖ, दिल्लि, यू पी, वगैरा वगैरा जायन। आसामस मंज़ छि लूकन हॖन्ज़ हालथ ज़्यादय पाहन ख़राब गऻमॖच़ दपान। रातुख सु शानि रूद, लूकन यादि पदन रूद। लूख करान छि त्राहि त्राहि। सोंचान ज़ि कमताम पाफ छि कऺर्यमॖत्य तॖ यथ व्वलाबस मंज़ आयि नाहक ह्यनॖ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment