06.07.2020, श्रावण (श्रावण) गटॖ पछॖ (कृष्ण पक्ष) ऒक्दॊह (देवादेव) (प्रथम) च़ऺन्दॖरवार (सोमवार),श्री सप्तर्षि सम्वत 5096, राश मकर (सुबहॖचि 5.00 बजि प्यठॖ), ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
आंचार हऻन्ज़न हुन्द गोम कनन
नदुर छुवॖ तॖ ह्यॆयिव मा
ति बूज़ त्रुक्यव तिम रूद्य वनन
च़्यॆनुन छुवॖ तॖ च़ीनिव मा
**********
अर्थात:- आंचार झील निवासी नाविकों के बोल सुनाई दिए कि नदरु अर्थात कमलडंडी (जो टिकने वाला एवं दृढ नहीं है, अर्थात संसार) ले लो। बुद्धिमानों ने यह सुनकर ('मा' का अर्थ 'मत लेलो' समझकर) वनों की राह ली, या विरागी हो गए।
भावार्थ :-(भाव यह कि वह जो कह गए उस चेतावनी को समझना है तो समझो)
(कमलडंडी अर्थात नदुर का शाब्दिक अर्थ है 'न टिकने वाला'।लाक्षणिक अर्थ के रूप में इसकी उपमा नश्वर संसार के साथ दी जाती है। नदुर शब्द की उत्पति भी न+दॊर याने 'नहीं दृढ है जो' के कारण हुई हो सकती है। नदुर अत्यन्त कोमल होता है।
**************************
मुहावरॖ (दऺपिथ कऻशुर)
1. मु: पौंसॖ गव पारुद तॖ म्यक्राज़
अ: पौंसस छु हदॖ ख्वतॖ ज़्यादॖ
ताक़त
2. मु: पौंसस निश छु पौंसॖ वातान
अ: पौंसॖवऻलिस निश छु पौंसॖ
वातान
3. मु: पौंसॖ थऺव्यज़ि म्वर्दस प्यठ
सु ति गछ़ि ज़िन्दॖ
अ: पौंसस छु स्यठाह ज़ोर
**************************
पंचान्ग:- राथ ॴस गुरु पूर्णिमा। ब्यॊन ब्यॊन आश्रमन मंज़ कऺर बख्तव पनॖन्यन पनॖन्यन ग्वरन हॖन्ज़ स्तुति पनॖनि पनॖनि आयि तॖ पनॖनि पनॖनिअंदाज़ॖ। ग्वर माने छु सु शखॖस युस अज्ञानुक अनिगॊट बख्तस निशि दूर करि तॖ सतचॖय वथ रोज़्यस हावान विज़ि विज़ि।
वुछनस तल छु यिवान ज़ि सिख समाजस मंज़ यीत्य ति गुरुद्वार छि सऻनिस वतनस मंज़, यिमन गुरुद्वारन मंज़ छु सुबॖ प्यठॖ शाम ताम लंगर चलान रोज़ान तॖ लछॖ बद्यन ब्वछिह्यत्यन छि प्रथ द्वह ख्यावान तॖ च्यावान रोज़ान। कुनि ति धर्मॖक्य हाजतमंद या ब्वछिहॊत छु वातान गुरुद्वारकिस भण्डारस प्यठ तॖ च़ऺलरावान पनॖन्य प्यपास या यड ब्वछि। यिमन गुरुद्वारक्यन प्रबंधक कऺम्मीटी तॖ सीवादारन छु म्योन नमन अमि कॖस्मॖच व्यवस्था चलावॖनॖ बापथ। हालांकि सान्यन कॆंच़न संस्थायन मंज़ ति छु भण्डारा यिवान करनॖ मगर सु भण्डारा छु महदूद फाकॖ बत्तस ताम युस यिवान छु बऻगरावनॖ प्रथ ऱयतकि ज़ूनॖ पछ ॴठम द्वह या यॆलि यॆलि संस्थायन मंज़ हवनुक कार्यक्रम आसान छु। बॖ छुस सोंचान ज़ि क्याह सऻनिस समाजस मंज़ छु ना यि मुम्किन ज़ि सानि संस्थायि ति चलावहऻन च़्ववुह गन्टॖ लंगर गुरुद्वारकिस तोर तऺरीकस प्यठ तॖ ख्यावहऻन च्यावहऻन ज़रूरतमंदन, ग़रीबन गुर्बातन तॖ यस प्रारब्ध आसिहे तॖ तस बिल्कुल तिथय पऻठ्य यिथ पऻठ्य गुरुद्वारन मंज़ छु सुबॖ प्यठॖ शाम ताम रोज़ान लंगर चलवुन। कॆंच़न मुसलमान अस्थानन मंज़ ति छु यि व्यवस्था नज़र यिवान। शारदा शऺरीफ, राजोरी, ज्यॆमिस मंज़ छि मिसालन। सानि संस्थायि कयाज़ि छि अथ कामि मंज़ पथ। अथ कथि प्यठ ह्यकव ना ॳस्य पानॖवुन्य विचार विमर्श कऺरिथ तॖ अख प्रथा शुरु कऺरिथ तॖ लूकॖ-सीवायि मंज़ जुडिथ? महामऻरी छि वुनि ति ज़ागि रूज़िथ तॖ निवान गिलविथ इन्सानन यॆतिनस यॆमिस थफ यियस। ॳस्य छि च़म्यॆमॖत्य तॖ प्रारान ज़ि कर गलि तॖ च़लि सानि गरॖ-बरॖ दूर यि महामऻरी। मंगान महावीरस ज़ि थव सानि गरॖ-बरॖ तॖ असि निशि दूर स्यठाह दूर यि नागहॖच बलाय।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment