18.07.2020 श्रावणॖ (श्रावण) गटॖ पछॖ (कृष्ण पक्ष) त्रुवाह (त्रॆयॊदशी) बटॖवार (शनिवार/ शनिश्चरवार) श्री सप्तर्षि सम्वत 5096, राश मिथुन (दुहॖचि 9.00 बजि प्यठॖ) ऋतु वऺहरात (वर्षा/बरसात) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
सिरियस ह्यु नॖ प्रकाश कुने
गंगि ह्यु नॖ तीर्थ कांह
बऻयिस ह्यु नॖ बांधव कुने
ज़नि ह्यु नॖ स्वख कांह
*********
अर्थात:- सूर्य के समान प्रकाशवान, गंगा जैसा तीर्थ, भाई जैसा बांधव और कोई नहीं इसी प्रकार पत्नी के समान और कोई सुख नहीं है।
**************************
मुहावरॖ (दऺपिथ कऻशुर)
1. मु: हाल मतॖ प्रॖछ़तम रॊयसॖय
वुछतम
अ: कऻन्सि हुन्द गुदरुन छु तस
सॖन्दि बुथि प्यठॖ ननान
2. मु: हऻज़्यरस बोग तॖ गऻर्
हऻज़्यरस चपाथ
अ: युस बरोंह कनि आसि तस
बनि सोरुय
3. मु: हर्फस गवाह तॖ म्यॆन्डिस
शऺरीक
अ: सॗत्य बोज आसुन या
नऺज़दीकी ज़ऻन्यकार आसुन
**************************
पंचान्ग:- कति तिम पांछ़ शे ॴठ नौ शुर्य, अज़ यिमन अख ज़ॖय तिमन ति खुर्य। फीस वीस बऺर्य बऺर्य पेरन्ट बरहम। अख नज़र यॊदवय ॳस्य पथकुन त्रावव कऺशीरि मंज़ ॴस्य अज़ त्रॖह पांच़ॖत्रॖह वऺरी ब्रोंठ सऻरी कऻशिर्य बटॖ गरॖ बऻच़व सॗत्य आसान बऺर्य बऺर्य याने प्रथ गरस मंज़ ॴस्य आसान पांछ़ पांछ़ शे शें शुर्य, मसलन त्रॆ बऻय तॖ ज़ॖ ब्यॆनि, च़ोर बऻय तॖ त्रॆ ब्यॆनि वगैरा वगैरा तॖ यॆलि यिम शुर्य बडान ॴस्य, फऻम्फलान ॴस्य, खान्दर-वान्दर करान ॴस्य तॖ यिमन ति शुर्य कऺट्य ज़्यवान ॴस्य, गरॖ ओस बासान ओरुत तॖ ब्वरुत। क्रख चिख ॴस आसान अहलस मऺहलस मंज़ तॖ यॊदवय कुनि विज़ि मुच़ुकरी ति गछ़िहे गरिक्यन बऻच़न पानॖवुन्य तॖ ॴस्य ब्यॊन नेरान मगर तऺथ्य मकानस मंज़ ॴस्य आसान हेरॖ तॖ ब्वनॖ। दान ॴस्य अलग गछ़ान मगर शोरोगुल ओस बराबर ग्रज़ान रोज़ान। ॳस्य छि आमॖत्य वुन्युखताम सुय माहोल वुछान मगर यिम त्रॖह पांच़ॖत्रॖह वऺरी गऺयि सऻन्य तिम बऺड्य गर श्रॊकान तॖ छ़्वकान, वजह बॊड छु यि ज़ि व्वं छि नॖ अकि या द्वयव शुर्यव ज़्यादॖ आसानॖय, अंतर-जाति खान्दरव ति रऺट तेज़ रफ्तार, ब्यॊन ति अगर पानवुन्य नेरान छि तॖ फ्लैट छि अलग यिवान ह्यनॖ तॖ दूर्यर ह्यवान लगुन। अख या ज़ॖ शुर्य बऺडिथ छिनॖ पनॖनिस मऻलिस माजि सॖत्य ह्यकान रूज़िथ तिक्याज़ि प्राईवेट नोकरी कऺर्य कऺर्य छिनॖ तिम ह्यकान यिकॖवटॖ रुज़िथ, कॆंह शुर्य छि वतनॖ न्यबर ज़ंग कऺडिथ आसान तॖ तति पनॖन्य कॖस्मतॖ आज़मऻयी करान। यॆति छि सऻन्य बऻय यकुत छ़ान्डान मगर सु नज़र यी कति यिथ्यन हालातन मंज़। यकीन कऺरिव तॊह्य ज़ि अज़कल छि मास या प्वफ छ़ान्डॖन्य ति दुशवार यिमन सानि संस्कृति मूजूब कॆंह ज़िम्वऻरी छि आसान पूरॖ करॖन्य खान्दरन व्वछ़बन प्यठ। रिशतन गऺयि तॖरॖ तॖरॖ। व्वंय छि सिरिफ ॳस्य याद करान ज़ि तॆलि ॴस्य हेरच़ प्यठ यिकवट सऻरी सऺमिथ हारन गिन्दान। सिरिफ छि याद करान। यि छि ख़बर ज़ि सु वख यी नॖ फीरिथ तोति वनान छि रोज़ान ज़ि असि पज़ि पनॖन्यन शुर्यन बोज़नावुन सोन पॊतकाल। मगर बोज़नावव कमि बापथ? तिमन करुन क्या छु बूज़िथ? बोज़नावव कस? तिम शुर्य छि कति? अख बऺंड विडम्बना छि यि यथ मंज़ ॳस्य पनॖनि ज़िन्दगी हुन्द सफर छि करान। थऺविव पनॖनि सेहतुक ख़याल तिक्याज़ि महामऻरी छि वुनि ॴस वऺहरिथ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment