10.07.2020,श्रावणॖ (श्रावण) गटॖ पछॖ (कृष्ण पक्ष) पऻन्च़म (देवादेव) (पन्चमी) शॊकुरवार (शुक्रवार/जुम्मा), श्री सप्तर्षि सम्वत 5096, राश मीन (रऻच़ हॖन्ज़ॖ 10.54 बजि प्यठॖ) ऋतु ग्रीष्म (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
केंच़न दितिथम गुलालॖ यऺच़ॖय
केंच़न ज़ोनुथ नॖ दिनस वार
केंच़न छ़ॖनिथ नऻल्य ब्रह्महऺच़ॖय
भगवानॖ चानि गऺच़ नमस्कार
*********
अर्थात:- हे भगवान तुम ने कितने लोगों को पुत्र दिए तथा कईयों को कुछ भी न दिया। कितनों को केवल पुत्रियां प्रदान कीं, आप की इस इच्छा या लीला को हमारा नमस्कार।
भावार्थ :- (ललेश्वरी का भाव यह है उसकी अभिलाषा पूर्ति प्रभु इच्छा पर निर्भर है।)
**************************
मुहावरॖ (दऺपिथ कऻशुर)
1. मु: थ्वकन अथॖ दारॖन्य
अ: ताब्यॆदऻरी करॖन्य
या
नाज़ बर्दऻरी करॖन्य
2. मु: थ्वकि प्यठ रिकिन्य
अ: मोमूली चीज़ॖ सॗत्य या
ग़लती सॗत्य न्वकसान
वातुन
3. मु: थ्वकॖ जोद
अ: अपुज़ वाठ
**************************
पंचान्ग:- बॖ ओसुस अकि लटि गोमुत क्षीर भवानी याने तुल मुल युस ज्यॆमि जानीपुर आमुत छु बनावनॖ। अतिचि प्रबन्धक कऺम्मीटी ओस अख ल्वकुट वान ह्यु थॊवमुत यथ मंज़ कॆंह सी डी, कॆंह संतन हॖन्द्य फोटू, कॆंह धार्मिक किताबॖ आसख थविमच़ॖ कॖनॖनॖ बापथ तॖ ख़रीदार ति ॴस्य तिमय यिम ओर आमॖत्य ॴस्य सामूहिक मेखला करनावनि पनॖन्यन शुर्यन। बॖति गोस अथ वानस प्यठ तॖ ह्यच़म मऺल्य ज़ॖ त्रॆ किताबॖ। मगर वुछनस तल आव म्यॆ ज़ि यीत्य अति लूख ॴस्य, सु गव यिम आमॖत्य ॴस्य मेखलि माहराज़न हॖन्द्य ॴश्यनाव रॖशनाव ॳबीद त्रावनि, तिमव मंज़ पऺक्य ज़ॖ च़ोर नफ़र अमि वानॖ किन्य, दिच़ॖख नज़रा गुज़राह तॖ द्रायि वापस नवीदा ख्यथ कॆंह ख़रीदऻरी करनॖ रॊसतुय। युस शखॖस अथ वानस प्यठ बिहिथ ओस यिम किताबॖ या सी डी बेतरि कॖनॖनॖ बापथ, तऺम्य वॊन म्यॆ ज़ि यॆलि यॆलि यिथ्य प्रोग्राम छि यॆति आसान, ॳस्य छि यि वान थवान यलॖ खरीदारन हॖन्दि बापथ। तऺम्यसुन्द वनुन ओस ज़ि स्यठाह कम लूख छि निवान पाठॖ किताब तिक्याज़ि यिम किताबॖ छि संस्कृतस मंज़ तॖ तिमन छु नॖ संस्कृत तगान परुनुय। सी डी ति दॊप तऺम्य ज़ि निवान छि कमॖय लूख तिक्याज़ि बजन बोज़न वाल्यन हॖन्ज़ कऺमी ति छि। म्यानि वनॖनुक मतलब छु ज़ि असि पज़ि यिमन मसलन हुन्द हल छ़ान्डुन ज़ि किथॖ पऻठ्य ह्यॆकि सोन शुर यिमन चीज़न मंज़ दिलचस्पी हऻविथ। अगर किताब-गर आसि, लूकन हुन्द युन गछ़ुन रोज़ि, संतन हॖन्ज़ कथायि तॖ करामऻच़ आसन परनॖ बानथ, दिलचस्पी ति बडि वारॖ वारॖ पानय। ज़रूरथ छु ज़ि पनॖन्य प्रज़नथ बनावनॖच, पनॖन्य संस्कृति पनॖन्यन ल्वकट्यन क्यो बड्यन ताम वातनावनॖच पनॖन्यव लेछमच़व किताबव दऺस्य। यि ह्यॆकि तॆली मुम्किन सपदिथ यॆलि कुनि ॳकिस जायि यि लिट्रेचर (अदबी मसोदॖ) सॊम्बिरिथ आसि तॖ परनॖच व्यवस्था आसि। बोज़ान ओसुस यि लाक-डोवुन रोज़ि वुनि चलवुन ब्यॆयि कॆंच़स कालस तॖ केंच़न जायन यि सख़ती सान अमिच निगरऻनी करनॖ। दय ज़ानि कॗतिस कालस छि ब्यॆयि असि बूगुन्य यि महामऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment