12.07.2020

12.07.2020,श्रावणॖ (श्रावण) गटॖ पछॖ (कृष्ण पक्ष) सतम (देवादेव) (सप्तमी) आथवार (रविवार/एतवार), श्री सप्तर्षि सम्वत 5096, राश मीन (चलान) ऋतु ग्रीष्म (चलान) द्रठॖपऻन्च़ुक (पंचक) (चलान)...अज़ छि शीतला सतम ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

         महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

यि क्याह ॴसिथ यि क्युथ रंग गोम

बेरंग कऺरिथ गोम लगॖ कमि शाठय

तालव राज़दानि अबख छान प्योम

जान गोम ज़ान्यम पान पनुनुय

             **********

अर्थात:- मैं क्या थी और अब यह मेरा कैसा रंग हो गया। यह मेरा क्या हाल हो गया। उस ने (गुरु ने) मुझे बेरंग कर दिया। अब ज्ञात नहीं कि ऐसी दशा में किस किनारे लगूं। मैं अपने को चतुर समझती थी, किंतु मेरे अंदर को संभालने वाला अनुभव हीन बढई अथवा कारीगर (मन) मिल गया है। चलो अच्छा ही हुआ कि मैं अपने नासमझ मन को जान जाऊंगी। अपने मन को जानने का अब अवसर तो मिलेगा। मेरा अपना आप ही जानेगा (मन की नासमझी)

**************************

         मुहावरॖ (दऺपिथ कऻशुर)

1. मु: टरॖ मीरॖन्य राद

    अ: अपज़्येरि सॖन्द्य अपज़ी

          कॖसॖ

2. मु: टरलस टर फुटुन मोल

         मरनस बराबर

    अ: अपुज़िस नन्यर गछ़ुन छु 

         अपज़्यऻरिस सख़ मुश्किल

          गछ़ान

3. मु: टोडरमऺल्य हिसाब

    अ: प्यॆठ्य प्यॆठ्य अंदाज़ॖ

         लगावुन

**************************

पंचान्ग:-  पांछ़ अगस्त 2019 द्वह मनोव सारिवी लूकव बडॖ जोश खरोश सान ति क्याज़ि कऺशिरि मंज़ आयो धारा 370 तॖ 35-ए हटावनॖ। कऺशीरि मंज़ रूज़िथ मुसलमानन आव ॴस थॊप दिनॖ तॖ कऻशिर बटव तुजि व्वटॖ तॖ व्यॆच़ेयिनॖ कुनि। असि बास्यव ज़ि शायद मा आसि जलदॖय कऺशीरि गछ़ुन, दय दय करान मा आसिहे केंच़व बटव बारॖ बेगार ति बंद ह्यॊतमुत करुन यि सूंचिथ ज़ि व्वं छु कऺशीरि जलदॖय तरुन।सॗती गऺयि हऻरऻनी यि बूज़िथ ज़ि लद्दाख आव ब्यॊन कडनॖ जम्मू कशमीरॖ निशि। मगर अथ मंज़ ति मा आसि कॆंह जऻनी यि सूंचिथ ति गऺयि बटॖ ख्वश तॖ रूद्य प्रारान नऺविस ह्वकुम नामस ज़ि कर तॖ किथपऻठ्य तॖ कॖमन शर्तन प्यठ आसि व्वं असि गछ़ुन कशीरि। वऺरि ह्यॊतुन तथ कॖसस ति गछ़ुन तॖ अज़ ताम वोत असि प्रारान मगर ह्वकुमनावा आव नॖ नज़र कॆंह। अल्बतॖ नज़र आम अख खबरनामॖ राथ व्हाटसापस प्यठ उर्दू ज़बऻन्य मंज़ युस कऺशीरि मंज़ कमि ताम नवि मुसलमान जमऻच़ छु शाया कॊरमुत यथ मंज़ तिमव छु च़्यॆनवॖन्य दिच़मॖच़ तिमन लूकन यिम बी जे पी पार्टी सॗत्य अथॖ मिलऻविथ छि,तिमव छि तिम ख़बरदार कऺर्यमॖत्य ज़ि तिम कऺरॖन्य पनुन पान ब्यॊन बी जे पी पार्टी निशि, न तॖ रूज़िन्य तयार तमि हशरॖ बापथ युस हशर तिमव कॊर कॆंह द्वह ब्रोंह बंडॖपोरिकिस नफ़रस सॗत्य याने वुडोवुख गोल्यव सॗत्य तिक्याज़ि सु नफ़र मा ओस दपान बी जे पी पार्टी हुन्द अख सदस्य। व्हाटसापस प्यठ सूज़मुत यि ख़बरनामॖ पऺरिथ प्योस बॖ सोंचस ज़ि ॳस्य ॴस्य कथताम व्वमॆदवार, मगर तति ह्यॆतिन हालात गछ़ॖन्य ज़न बद ख्वतॖ बद-तर। ॳस्य छि सोंचान ज़ि कऺशीरि मंज़ मुसलमानस छु मनस मंज़ इरादॖ बटॖ तति गालुन, तॖ तिमन मुसलमानन छु यि सोंच ज़ि बी जे पी पार्टी हुन्द मुद्दा छु मुसलमान कऺशीरि मंज़ मारनु। व्वं कऺम्यसुन्द इरादॖ क्या छु तॖ क्वत ताम छु यि पॊज़ ति ज़ानि दय मगर सोन सु पॗंच़ॖमि अगस्तुक नच़ुन तॖ फ्यच़ुन, सु जॆशिन मनावुन गव फऺक्य तॖ ब्यकार तॖ सॗती दूरेयि कऺशीर ब्यॆयिहऻन कऻशिर्य बटस निशि। यिम हालात नज़रि तल थऺविथ ज़ोन असि मुनऻसिब ज़ि पनुन पान आवुर थवुन फेसबुकस प्यठ तॖ रोज़ुन हिसबि मामूल हालातन प्यठ तबसरॖ करान। मऺशरोव तामथ कऺशीरि गछ़नुक इरादॖ। वैसे ति त्रऻव्य ॳस्य कोरोनावयरसन च़ऺटिथ पऺत्यम्यव त्रॆयव ऱयतव प्यठॖ। न युन कुन तॖ न गछ़ुन कुन। पनॖनिस जानस तॖ पानस रऻछ करॖन्य दारि बर त्रॊपरिथ। यॆलि यॆमि ब्रकॖ न्यॆरव, तॆलि ब्यॆयि मा सोंचव ज़ि ॳस्य क्याह ॴस्य सोंचान तॖ सोंचान सोंचान क्वत वाच़ेयो सोन सु सोंच। प्रारब्ध व्वं तॊत ताम।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(koshursabak.blokspot.com ति वुछिव)