09.07.2020, श्रावणॖ (श्रावण) गटॖ पछॖ (कृष्ण पक्ष) च़ोरम (देवादेव) (चतुर्थी) ब्रसवार (वीरवार/ बृहस्पतिवार/गुरुवार) श्री सप्तर्षि सम्वत 5096, राश कुम्भ (चलान) ऋतु ग्रीष्म (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
ग्वरॖय मोल तय ग्वरॖय मऻजी
ग्वरॖय दिवान न्यत्रन गाश
यॆम्य छ़ऺरिस मऺरिस वस्त्र लऻगी
छुय पुन्यस भऻगी पापस नाश
***********
अर्थात:- अपना गुरु ही माता व पिता है जो आंखों को (स्वात्म) प्रकाश देता है। एवं ज्ञान चक्षु प्रदान करता है। जिसने वासना शून्य शरीर को गुरु वाक्य रूपी वस्त्र पहनाए, उसी का पुण्य अर्जित होकर उसके पापों का नाश होता है।
**************************
मुहावरॖ (दऺपिथ कऻशुर)
1. मु: नेको नेक कर बदली
पानय
अ: नेकी छु नॖ कांह ज़वाल
2. मु: नेक-नऻमी छि बऺड दौलत
अ: नेक-नऻमी छु बजर
3. मु: नेक-नऻमी छि गछ़ान
यॆच़कऻल्य। बदनऻमी जलॖद
अ: नाव कमावनस छु वखॖत
लगान। बदनऻमी नॖ
**************************
पंचान्ग:- अगर अख नज़र पथ कुन त्रावव, 1990-तस मंज़ यॆलि सऻरी कऻशिर्य बट्टॖ कऺशीरि प्यठॖ च़ऺलिथ आयि पनुन ज़ुव जान बचावान बचावान, पनॖन्यन शूर्यन हुन्द यज़थ तॖ आबरू बचावान बचावान कऺशीरि मंज़ दहशतगर्दन निशि, ग्वडन्युक नऺज़दीकी ठिकानॖ ओस असि कऻशर्यन ज्यॊम अलाकॖ तॖ ह्यॊत सम्बालुन पनुन पान ज्यॆमिस मंज़ रूज़िथ। कॆंच़व त्रोव पनुन क़दम ब्रोंहकुन तॖ आयि वाहरावनॖ वतनॖक्यन ब्यॊन ब्यॊन जायन मंज़। ज्यॆमिस मंज़ ब्रोंठय बसकीन डूगरन खुल्यव कॖस्मथ तॖ तिमव तुल जान फऻयदॖ यिमन च़ऺलिथ आमॖत्य कऻशर्यन निशि अलग अलग तरीकॖ। मसलन तिमव दित्य पनॖन्य मकानॖ किरायस प्यठ,तिम जायि ति दिच़ तिमव किरायस प्यठ यॆति तिम पनॖन्य माल मवेशी थवान ॴस्य, पनॖन्य ज़मीन कॖनिख बटन द्वगनॖ द्वगनॖ कॗमतस मकान बनावनॖ बापथ, सानि ज़रूरतॖ मूजूब ख्यनुक-च्यनुक सामान ह्यॊत तिमव कुनुन तॖ ह्यॊतुख पनुन कारॖबार बऺडरावुन च़्वपऻर्य। डूगरव बनऻव्य रातो-रात जंजगर यॆति असि आयि पनॖन्यन शुर्यन कट्यन खान्दर व्वछ़ब करनॖ। सारांशस मंज़ वनुन म्योन छु ज़ि ज्यॆम्युक डूगरॖ बन्याव लखपति तॖ करोरपति तॖ तुलुख कऻशिर बटन हॖन्ज़ि मजबूरी हुन्द जान फऻयदॖ। त्रॖह वऺरी गऺयि असि कऺशीरि प्यठॖ द्रामतिस। पनुन पान सम्बालानस लऺग्य असि कॆंह वऺरी, सॗत्य सॗत्य बनऻव्य असि कॆंह आश्रम तॖ ह्यॆत्य हवन करॖन्य। यि करुन ति ओस ज़रूरी। मगर म्यॆ बासान ज़ि असि सूंच नॖ अमि ब्रोंहकुन तिमन चीज़न मुतलक यिमन चीज़न डूगरव व्वदबव द्युत। मसलन पनॖनि समाजि खऻतरॖ कॆंह जंजगर बनावॖन्य, शुर्यन हन्दि बापथ तऻलीमी अदारॖ बनावॖन्य, ट्रान्सपोर्टस मंज़ ज़ंग छ़ॖनॖन्य, वगेरा वगैरा। आर्थिक व्यवस्था बऺडरावनॖ बापथ, म्यॆ बासान, कऺर नॖ असि कांह खास यादगार कऻमाह। ॳस्य ॴस्य कऺशीरि मंज़ मुसलमानस तलॖ लऺगिथॖय लऺगिथ, ॳस्य रूद्य ज्यॆमिस मंज़ ति डूगरन तलॖ लऺगिथ, पनुन कॊर नॖ कॆंह हऻसिल, सिरिफ बनऻव्य आश्रम तॖ आश्रमन मंज़ हवन तॖ हवनन प्यठ हवन, यॆति हवन, हुति हवन, प्रथ जाय हवनॖय हवन तॖ ब्यॆयि नॖ कॆंह। हां, अख ख्वश यिवॖन्य कथ छि वाज़े्ह करॖन्य लायक़ स्व गऺयि यि ज़ि शुर्य कऺट्य गऺयि बजाह। सु छु अख बॊड तसलाह। यिमन त्रॖहन वऺरियन मंज़ बदलोव नॖ असि पनुन सोंच तॖ न ह्यॊक डूगरन सॗत्य क़दम मिलनऻविथ कारोबारकिस मामलस मंज़। ज़ॖ च़ोर सऻन्य बऻय मा आसन करान कॆंह मगर सु गव न आसनस बराबरॖय। ॳस्य छि नॖ हवनव अपोर ह्यकान कॆंह सूंचथॖय म्यॆ बासान। असि छु पानस मंज़ बदलाव अनॖनुक सख ज़रूरत। अथ सवालस प्यठ सोंच विचार करुन स्यठा ज़रूरी। दपान कोरोनावयरसुक वैक्सीन ह्यॊतुन तयार सपदुन। कॆंच़न ऱयतन हॖन्ज़ कथ छि व्वं। तॆलि तोश यॆलि न्वश गरॖ वाती। भगवानस छु रोज़ुन शरण।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment