17.07.2020

17.07.2020, श्रावणॖ (श्रावण) गटॖ पछॖ (कृष्ण पक्ष) बाह (द्वादशी) शॊकुरवार (शुक्रवार/जुम्मा) श्री सप्तर्षि सम्वत 5096 राश वृष (चलान) ऋतु वऺहरात (वर्षा) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

      महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

         लल वाक्

नऻबिस्थानॖ छय प्रकरथ ज़लवॖनी

हिडिस ताम यॆति प्रान वतॖगॊत

ब्रह्मांडस प्यठॖ सॗत्य नदि वहवनी

हहॖ गव तुरुन तॖ हाह गव तॊत

          ************

अर्थात:- नाभि में जठरानल अग्नि है। कंठ तक सांस का आना जाना होता है। उससे सांस गर्म होकर बाहर निकलती है और ब्रह्मांड में प्राण वायु की शीतल नदी बसती है इसीलिए सांस लेते समय ठंडी होती है।

विशेष :- (शरीर में मेरु से तीन नाडियां उतर कर नाभि में मिल जाती हैं। इन तीनों नाडियों में इडा के ऊपरी सिरे पर चन्द्रमा तथा पिंगला के निचले छोर पर सूर्य है। अर्थात, सूर्य का स्थान नीचे के देश में तथा ब्रह्मांड में चन्द्रमा का स्थान है। सुषमना जिस के मध्य में चित्रा नाडी है, इन दोनों के बीच में चलती है। इडा नाडी का प्रभाव शीतल होता है और पिंगला का गर्म होता है।)

**************************

        मुहावरॖ (दऺपिथ कऻशुर)

1. मु: ख्यनॖ म्यूठ अमापॊज़ होरुन

         ट्यॊठ

    अ: सु मज़ॖदार चीज़ युस ख्वश

         करि, अमापॊज़ असर 

         नाकारॖ आस्यस

2. मु: ख्यनॖ ख्यवान तॖ व्यनॖ 

         डऻल्य डऻल्य

    अ: न्यॆबॖर्य बॆ-मऻल लागुन मगर

         ख्यॊन बॆवाय

3. मु: ख्यनॖ च्यनुक यार

    अ: मतलऺबी इन्सान

**************************

पंचान्ग:- रंगॖ रंगॖ रंगॖदार वुछमय म्यॆ इन्सान। च़ूर तय पऺहरदार वुछमय म्यॆ इन्सान। इन्सान कऻत्याह रूप छु दारान ज़िन्दगी हॖन्दिस सफ़रस मंज़ यि वुछिथ छु इन्सान हऻरान गछ़ान। ईमानदार आसनुक डोल वायान वायान किथपऻठ्य छु बे-ईमऻनी हॖन्दिस दल दलस मंज़ ॴडरनॖ यिवान, पतहॗय छॆ नॖ लगान। अगर शुर ॳकिस स्कूलस मंज़ पनॖन्य पडऻय करान छु तॖ अगर स्कूलस मंज़ मास्टर जी ॳमिस शुरिस सऺही तऻलीम दी, तॆलि क्याज़ि प्यॆयि ॳमिस शुरिस स्कूलॖ अलावॖ कोचिंग क्लासस मंज़ गऺछ़िथ सॊय तऻलीम ब्यॆयि दॊहरावॖन्य? स्कूलुक मास्टर जी क्याज़ि छु नॖ पनॖन्य ज़िम्वऻरी पूरॖ निभावान तॖ यि शुर छु मजबूर गछ़ान कोचिंग सैन्टरस मंज़ दऻखलॖ निनॖ बापथ तॖ सासॖबऺद्य रॊपियि खर्चावान रोज़ान। कोचिंग सैन्टर चलावनुक इजाज़थ क्याज़ि छु सरकार दिवान रोज़ान तॖ शुरिस दु-तरफानॖ ब्रख पावान, परनॖ रंग्य तॖ पौंस रऺन्ग्य ति। युस मोल मऻज्य छु नॖ ह्यकान पनुन  चन्दॖ यूत वाहरऻविथ सु छु मजबूर गछ़ान बे-ईमऻनी सॗत्य पौंसॖ कमावनस प्यठ या न तॖ  पनॖनिस शुरिस कोचिंग सैन्टर निशि दूर थवुन। यिथय पऻठ्य अगर वुछव तॖ लछॖ बॊदरॊपियि छु प्यवान खर्चावुन ॳकिस मऻलिस पनॖनिस शुरिस डाक्टर  या इन्जीनियर बनावनॖ बापथ, क्याज़ि? यॆमिस कऻन्सि स्यॊद पऻठ्य सीट मेलान छि यिमन ट्रेनिंगन मंज़, तिम छि कॖस्मतवऻलय आसानॖय मगर बकाया शुर्यन हुन्द कॖस्मथ क्याज़ि छु यिवान दावस  लागनॖ। क्याहताम ख़रऻबी छि सऻनिस परनावनॖकिस सिस्टमस मंज़। यि छु अख ख़ास वजह ति म्यॆ बासान युस ॳकिस इन्सानस मजबूर करान छु बे-ईमान बनावनस मंज़ ति क्याज़ि सु छु नॖ पूरॖ ह्यकान कऺरिथ यिथ्य ह्यी अखराजात पनॖनि माहानॖ तनखा सॗत्य तॖ दिवान रोज़ान छ़ऻन्ड बे-ईमऻनी हॖन्दिस पौंसस कुनि न तॖ कुनि रऺन्गय। म्यऻन राय छि ज़ि यिम कोचिंग सैन्टर गछ़न बंद गछ़ॖन्य तॖ शुरिस गछ़ि पूरॖ तऻलीम मेलॖन्य स्कूलस मंज़ॖय तॖ तमिस गछ़ि नॖ प्यॊन हटरि हटरि फ़ेरुन पनुन भविष्य छ़ान्डनॖ बापथ। तऻलीम गछ़ि प्रथ शुरिस यूत बॖ त्यूत मुफुत वातॖन्य या कम ख्वतॖ कम खर्चस मंज़। यि छि सरकारॖच ज़िम्वारी ज़ि किथॖपऻठ्य करि सु सिस्टम ठीख।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)