08.07.2020

08.07.2020, श्रावणॖ (श्रावण) गटॖ पछॖ (कृष्ण पक्ष) त्रय (देवादेव) (तृतीय) ब्वदवार (बुधवार),श्री सप्तर्षि सम्वत 5096, राश कुम्भ (दुहचि 12.30 बजि प्यठॖ), ऋतु ग्रीष्म (चलान)...ॳज़्यकि प्यठॖ छु द्रठॖपऻन्च़ुक (पंचक) शुरु...अज़ छि संकट च़ॊरम (संकट चतुर्थी निवार्ण) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

    महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

लाचऻर्य बिचऻर्य प्रवाद कॊरुम

नदुर छुव तॖ ह्ययिव मा

फीरिथ दुबारॖ जान क्या वॊनुम

प्रान तॖ रुहुन ह्ययिव मा

         ***********

अर्थात:- नदुर वाले ने पुकारा कि नदुर 'न+दॊर' - जो मज़बूत न हो, लेलो। मैं ने भी उत्तर दिया कि प्रान रुहन अर्थात आत्मभाव लेलो। अर्थात आप न टिकने वाला संसार (नदुर) बेचते हो और हम अध्यात्म भाव (रुह एवं प्रान) ग्रहण करने के लिए आपको पुकार रहे हैं, इसे लेलो।

(ह्ययिव मा (खरीदोगे क्या) का दूसरा अर्थ भी है - मत खरीदो अर्थात प्रान तथा रुहुन (लहसुन) जो कामोत्तेजिक पदार्थ हैं, इनका प्रयोग नहीं करो।)

**************************

         मुहावरॖ (दऺपिथ कऻशुर)

1. मु: ताबस छु लाब

    अ: ताब करनस छु फऻयदॖ 

         मेलान

2. मु: तऻज़्य बटॖन्य कान

    अ: मोमूली छ़ॊम्ब वरतऻविथ

         कांह बचाव करुन

3. मु: ताह करतम शाह करथ

    अ: चीज़स वातनॖ सॗत्य छु 

          चीज़स दार न्यॆरान

**************************

पंचान्ग:- राथ ओस म्यॆ वॊनमुत ज़ि सऻनिस कऻशिर्य बटॖ समाजस मंज़ यीच़ॖ ति संस्थायि बन्यॆमॖच़ॖ छि बालॖ यपोर यिथ, तिमन मंज़ छि तनातनी बासान कुर्सी हॖन्ज़ कॆंच़न संस्थायन मंज़, कॆंच़न छि लऺज्यमॖच़ मान-मान पानवुनी तॖ कॆंह छि महदूद कुनि हदस तामॖय। बॖ ओसुस अंदाज़ लगावान ज़ि क़रीबन छि वुन्यक्यनस सऻनिस कऻशिर्य समाजस मंज़ दिल्लि तॖ दिल्लि ॳन्द्य पऺख्य नऺज़दीकन त्रॖह संस्थायि कऻम करान तॖ यिम छि हवन करान रोज़ान ब्यॊन ब्यॊन जायन प्रथ वऺरियि, कॆंच़न जायन प्रथ ज़ूनॖ पछॖ ॴठम द्वह, कुनि जायि आथवारि द्वह होमा किस रूपस मंज़, कॆंच़न जन्मोत्सवन प्यठ तॖ कॆंच़न श्राद्धन प्यठ। यिम सारी हवन छि यिवान करनॖ असि कऻशिर्य बटन हॖन्दि कल्यान बापथ, सारी समाजॖ बापथ, संसारॖ कि कल्यान बापथ। मगर यिमन हवनन ब्यॊन ब्यॊन जायन करनस मंज़ छु क़रीबन च़ोर या पांछ़ करोर रौपियि खॖर्च यिवान हालांकि मक़सद छु कुनुय वारिइहान हवनन हुन्द। छु ना यि मुम्किन ज़ि त्रॖहव पान्च़त्रॖहव हवनव बदलॖ करहऻव च़ोर या पांछ़ सामूहिक हवन तॖ बच्यॊमुत पौंसॖ लागव कुनि तऻलीमी अदारॖ बनावन, कांह शफाखानॖ बनावनस, कांह सैन्ट्रल लयब्रऻरी खोलनस यथ मंज़ सोन वाहरऻविथ तॖ छऺकरऻविथ अदबुक माल यी रऺछ़रावनॖ, कॆंह पाठशालाय चलावनस यथ मंज़ ॳस्य पनॖन्यन नव्यन फ्वलवॖन्य शुर्यन धर्मुक हवा यी च्यावनावनॖ, लगातार भण्डारॖच व्यवस्था करनॖ यिथ पऻठ्य सिख-गुरुद्वारन मंज़ यि व्यवस्था बन्यॆमॖच़ छि, धर्मशाला बनावनस,  सामाजिक जंजगर बनावनस। हवनन मंज़ कऺमी कऺरिथ म्यॆ बासान छु ज़्यादॖ ज़रूरी हऻवमॖत्य तॖ दऺप्यमॖत्य अदारन प्यठ सोंचुन यथ मंज़ सऻनि समाजस फऻयदय फऻयदॖ वाति सॖत्य सपदि सीवा कुल जहानस ति। वखतॖच मंग छि यि। असि पज़ि पनॖन्य व्यच़ार बदलॖन्य। करान छि पनॖन्य कऻम यि महामऻरी, बचावॖक इन्तिज़ामात ति छि जऻरी, कुनि जायि छि महामऻरी ब्रोंठ तॖ कुनि जायि छि यि पथ मगर ॳस्य सऻरी छि छ़ान्डान अथ महामऻरी च़लनॖच वथ।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)