07.07.2020, श्रावणॖ(श्रावण) गटॖ पछॖ (कृष्ण पक्ष) द्वय (द्विती) (देवादेव) बॊम्वार (मंगलवार),श्री सप्तर्षि सम्वत 5096, राश मकर (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
आंचऻर्य बिचऻर्य व्यच़ार वॊनुन
प्रान तॖ रुहुन ह्ययिव मा
प्रानस बऺज़िथ मज़ा च़ॖहुन
नदुर छुवॖ तॖ ह्ययिव मा
***************
अर्थात:- ललेश्वरी कह रही है कि आंचार वासी ने पते की बात कही कि लहसुन अर्थात (प्राणों और आत्मा का) स्वाद पाने के लिए तडका मत लगाकर खाओ। अर्थात संसारिक भोग के मज़े में अपनी आत्मा को 'नदुर' (कमल डंडी), रूपी 'नश्वर संसार' से हटा कर प्राणों को परमात्मा की ओर लगाव।
(प्रान तथा लहसुन दो वनस्पतियां हैं जिनका तामसिक प्रभाव माना गया है)
**************************
मुहावरॖ (दऺपिथ कऻशुर)
1. मु: वॖहरिस रऺछिथ वालनॖ विज़ि
दब
अ: कॊरमुत क्रोवमुत रावरिथ
छ़ुनुन
2. मु: व्यॆथि नाबद फॊल
अ: कम आमदनी तॖ खर्च
ज़्यादॖ
3. मु: व्यॆथी किथॖ छख ग्रज़ान?
आग्रय
अ: पतॖ बजर छु थ्यकुन लायक़
बनावान
**************************
पऺचान्ग:- म्यॆ छु बासान ज़ि असि कऻशिर्य बटन छि पानॖवुन्य मान मान हिश लऺज्यमॖच़। न्यॆबॖर्य यॊदवय छिनॖ हऻविथ दिवान मगर ॳन्दॖर्य ॳन्दॖर्य छि क्याहताम ख्यच़ॖर यिवान बनावॖनॖ। अख खास वजह छु म्यॆ बासान ज़ि ॳस्य छि नॖ कऻन्सि ति पनुन लीडर मानान, असि छु नॖ कांह ति पनॖनि टारि खसान। ॳस्य छि सऻरी पऺर्यमॖत्य लीख्यमॖत्य तवय छु नॖ शायद असि कऻन्ह ति पानस ख्वतॖ बॊड बासान। कऻन्सि हॖन्ज़ राय, कऻन्सि हुन्द मशवरॖ छु नॖ हटि वसान या रोच़ान। हालांकि बोज़ान छि सऻरी सारिनी हुन्द मगर बूज़िथ छि सऻरी अकि कनॖ बोज़ान तॖ दॊयिमि कनॖ त्रावान। अख ॳकिस प्यठ वुछान छुस छि कॆंह सऻन्य बऻय ऒंगजि तुलान रोज़ान, अख ॳकिस कॖठ कडान रोज़ान बुथि कन्य नय तॖ मोबायलॖ दऺस्य। प्रथ इन्सानसुन्द मोबायल छु व्वंय गवाह यॆमि कथि हुन्द ज़ि व्हाटसापस प्यठ छु वारिहान ग्रुपन मंज़ आसान ह्वछी सियासत चलान, हवऻयी मशवरॖ दिवान रोज़ान। दुहिल्य ख्वाब वुछान रोज़ान तॖ प्रान्यन बुज़र्गन हॖन्ज़न काम्यन न्वखतॖचीनी करान रोज़ान तॖ तिहन्ज़न ग़ल्तियन शुमार करान रोज़ान। कुनि कुनि ग्रुपस मंज़ छुम नज़र यिवान कॆंह कॆंह कथॖ जान ति, कॆंह कॆंह कथॖ छि ज्ञानॖच तॖ ध्यानॖच ति आसान अथ मंज़ कांह शक छु नॖ मगर ज़्यादॖतर यॊदवय वुछव, मतलबॖच कथा छॆ नॖ परनस तल यिवान। ॳस्य कथ दिशायि कुन छि पकान अज़कल, दय ज़ानि। मगर असि पज़ि पनॖनिस समाजस मंज़ सकारात्मक बदलाव अनुन। मान मान न करॖन्य बऺल्कि अथॖवास कऺरिथ पकनॖच कूशिश करॖन्य। असि पज़ि नॖ ह्यडुन तॖ गेलुन कऻन्सि ति बऺल्कि पज़ि पनॖनिस ब्यॆबिस मुशॖक ह्यॆनॖ तॖ पनॖन्य ॴब गालॖन। दपान इन्सानस छु नॖ पनुन गर्दन्य मल यिवान बोज़नॖ मगर पनुन पान ह्यकि पनॖनिस ॴनस मंज़ वुछिथ तॖ पनुन पान परज़ॖनऻविथ। अहम् छु त्रावुन तॖ मंज़िल छु प्रावुन। ईश्वर गछ़ि असि रॖच़ वथ हर हमेशॖ हावुन। महामऻरी छि पनुन ज़ाल वाहरऻविथ, असि पज़ि पनुन पान बचऻविथ पकुन। भगवानस पर्ण प्यॊन तॖ शर्ण गछ़ुन। सुय छु सोन असली रऻछदर।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment