27.07.2020

27.07.2020 श्रावणॖ (श्रावण) ज़ूनॖ पछॖ (शुक्ल पक्ष) सतम (देवादेव) (सप्तमी) च़ऺन्दॖरवार (सोमवार) श्री सप्तर्षि सम्वत 5096, राश तुला (चलान), ऋतु वऺहरात (वर्षा/बरसात) (चलान)...चूंकि पगाह छि ॴठम रावान, पगहुक वॊहरवोद यी ॳज़्य याने सतम दुहुय। ॳज़्य यी ॴठम हुन्द ति फाकॖ। अज़ छु श्रावणॖ सोमवार वृत ति।

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

        महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

बबरि लंगस मुशुक नो मोरे

हूनि बस्ति कोफूर नेरि नॖ ज़ांह

मन यॊद गारॖहन फेरिय ज़ेरे

न तॖ शालटुंगे नेरिय क्याह

          **********

अर्थात:- रेहान (मरवाहे) की शाखा से सुगन्ध कभी नहीं जाती। कुत्ते के चमडे से कपूर की सुवास कभी नहीं आ सकती। यदि तू उस (परमपद अक्षर) का ध्यान मन से करे तो वह सहज ही (तेरी ओर) घूमेगा। नहीं तो गीदड की तरह चिल्लाने मात्र से कोई लाभ नहीं

**************************

          मुहावरॖ (दऺपिथ कऻशुर)

1. मु: साहब छु बखशनॖहार

    अ: दय छु बखशनवोल

2. म: सबॖर छु स्वनॖ सुन्द टूर

    अ: सबॗर करुन छु स्यठाह 

         फऻयदॖ वातॖनावान

3. मु: सॆहति बदन तॖ रऻहति जान

    अ: अख ॴही याने सेहतॖ 

         ख्वतॖ बॊड आराम छु नॖ 

         कांह

**************************

पंचान्ग:- राथ ओस व्वमेद कोरोटायन शो फ़ेस बुकॖ प्यठ यथ मंज़ श्री राजन नखासी सुन्द प्रोग्राम ओस। विषय ओस रिश्तन हॖन्ज़ तुलॖ त्राव, रिश्तन हुन्द वरताव, सामाजिक रिश्तॖ, ज़ऻती रिश्तॖ, धार्मिक रिश्तॖ, रिश्तन हुन्द म्वल। बडॖ जान कथ बाथ रूज़। प्रऻनिस तॖ नऺविस रिश्तस मंज़ कोताह बदलाव आव तॖ क्याज़ि आव तॖ ब्यॆयि कॗतिस कालस रोज़ि यि बदलाव चलान। म्यॆति वोत कॆंच़ॖ कालॖ प्यठॖ अथ विषयस प्यठ पनॖन्य व्यच़ार व्यक्त करान। असि सारिनी छि ख़बर छि यिमन त्रॖहन वऺरियन मंज़ ॳस्य कऻशिर्य बटॖ कमि थज़रॖ प्यठॖ ह्यॆतिन ब्वन ब्वन वातॖन्य। दपान पऺज़ कथ गऺयि माजि ल्यख, दपान यीतिस कालस पॊज़ पज़ि तीतिस कालस आलम दज़ि। पॊज़ बोज़ुन छु ट्यॊठ लगान। पॊज़ वनुन छु बहॊदरी। पॊज़ वातनावुन लूकन मंज़ छि जोदूगऺरि। जिगरॖ गछ़ि बॊड आसुन पॊज़ बोज़नॖ खऻतरॖ मगर वुछनस तल छु यिवान ज़ि पॊज़ बूज़िथ छु रिशतन मंज़ दरार पऻदॖ सप्दान हालांकि असर गॊछ़ फिरिथ आसुन मगर सु छु नॖ। बासान छु कल्युग छु ऒरूजस प्यठ। अपुज़िस तॖ अपज़्यऻरिस छु यिवान गऺज्यगाह तॖ मोरछलॖ करनॖ तॖ पज़रस तॖ पऺज़्यऻरिस छि पऻज़ार पतॖ पतॖ। ॳथ्य सायेबानस तल छु ॳज़्युख इन्सान पनुन पनुन द्वह कडान मगर पॊज़ गव पॊज़ुय तॖ अपुज़ छु अपुज़ुय। पज़र छु ॴखर रंग रटान तॖ अपुज़िस मूलय च़टान। मगर कुनि कुनि जायि छु स्यठाह च़ेर आसान गोमुत, वारियाह दोस्त छ़्यनॖ आसान गऻमॖत्य, वारियाह रिश्तॖ आसान दूरेमॖत्य। यिमन छ़्यनिमॖत्यन रिश्तन त्रॊप दिनस छि वऻन्स नेरान तॖ फ़ेरान ज़ि ग्वडय क्याज़ि मानेयोनॖ पज़र तॖ यि बदलावॖच तॖ पछतावॖच नोबथ वातिहेनॖ मगर बंदॖ छु बशर। गल्तियव सॗत्य छु यि इन्सान बऺरिथ। पज़र मानॖनस गछ़ि जिगरॖ थावुन, पज़र वनॖनस गछ़ि जिगरॖ आसुन। दय गछ़ि असि सारिनी महामऻरी हुन्द ख़ोफ़ कासुन।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)