20.07.2020, श्रावणॖ (श्रावण) गटॖ पछॖ (कृष्ण पक्ष) मावस (अमावस्या) च़ऺन्दॖरवार (सोमवार) श्री सप्तर्षि सम्वत 5096, राश कर्कट (दुहॖचि 3.28 बजि प्यठॖ) ऋतु वऺहरात (वर्षा/बरसात) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
मायि ह्युव नॖ प्रकाश कुने
लयि ह्युव नॖ तीर्थ कांह
दयस ह्युव नॖ बांधव कुने
भयस ह्युव नॖ स्वख कांह
***********
अर्थात:- प्रेम जैसा प्रकाश कोई प्रकाश नहीं क्योंकि प्रेम से सब जगह परमात्मा रूपी प्रकाश है। अपने अंतर में लीन होना ही तीर्थ है, अर्थात अपने आराध्य के साथ लय होने के कारण जिज्ञासु तुरंत अंदर झांक कर अपने प्रभु के पास पहुंच जाता है। इसलिए वही तीर्थ हुआ अर्थात लीन होना ही तीर्थ है। परमात्मा के समान कोई रिश्तेदार नहीं है, जिसको हम उस समय याद करते हैं, जब हमें सब छोड देते हैं। और भय (मृत्यु तथा संसार सागर में डूबने का डर) के समान और कोई सुख नहीं। क्योंकि जब बुरा काम करने के बदले सज़ा मिलेगी तो इस भय के कारण पाप नहीं होगा इसलिए भय ही सुख है। परमात्मा का डर रखना भी यहां अर्थ देता है।
**************************
मुहावरॖ (दऺपिथ कऻशुर)
1. मु: ख़ाम-तमाह तॖ अपज़्योर
अ: लालची छु बद-नियथ
आसान
2. मु: खान बड़ा खान बड़ा मंज़
बागॖ च़्वचि ॳडा
अ: यॆलि कऻन्सि नाव थॊद
आसि अमापॊज़ खरॖच
करि म्वखसरय
3. मु: खऻकी फूकी गर्दि
आसमऻनी
अ: यॆलि कांह सऻर्यसॖय फान
कऺरिथ पऺथरिस लारि
**************************
पंचान्ग:- अज़ छि सोमामावस्या। कऺशीरि मंज़ ओस ॳज़्यकि द्वह सुबहऻय सूमयार मंदरॖकिस यारबलस प्यठ बीरॖ आसान श्रान करनवाल्यन हॖन्ज़। ज़नानॖ क्यो मर्द ॴस्य प्रभातन प्यठय वातान ओर तॖ ॴस्य श्रान करान रोज़ान। सूमयार मंदर प्रबंधक कऺमीटी वाल्यन तरफॖ ओस तऺजीरॖ गन्डनॖ यिवान यारबलॖ तॖ ज़नानन हॖन्दि श्रानॖ बापथ ओस यिवान अलग इन्तिज़ाम करनॖ। म्यॆ छु वारपऻठ्य याद प्यवान ज़ि हब्बॖकऺदल बीनि प्यठ ओस पुलिस गश्त रोज़ान करान अमि म्वखॖ ज़ि कांह गॊछ़ नॖ हॆरि बीनि प्यठॖ खड़ा रोज़ुन तीतिस कालस यीतिस कालस ज़नानॖ म्वकलॖहऻन श्रान कऺरिथ। अख मेलॖ ह्युव ओस लगान ॳज़्यकि द्वह तथ सूमयार मंदरॖकिस यारबलस प्यठ। यिमय यार गऺयि असि निशि दूर, स्यठाह दूर। सूमयार, प्वरुषयार, गणपथयार, बऺड्ययार, क्रालॖयार, वगैरा वगैरा। नम गछ़ान ॳछ यॆलि फ्युर लगान ख़यालस। यि कथा कऺमिस बोज़नावव तॖ कुस बोज़ि तॖ बूज़िथ ति करि क्याह। व्यथि मंज़ स्व ग्वतॖ ग्वथ पऻनिस मंज़ करनस ओस पनुनुय अख अलग मज़ॖ। हब्बॖकऺदलॖ ओस आसान मॊत मत्यॊमुत, अकि तरफॖ कऻशिर्य बटन हुन्द आव गव, दॊयिमि तरफॖ हाकॖवाजिन्यन हुन्द शोर, गाडॖ कॖनन वाल्यन हॖन्ज़ क्रख चिख,स्यठाह खूबसूरत नज़ारॖ तॖ लूबवुन मोसॖम। महामऻरी छि हॊल गऺन्डिथ पतॖ लऺगिथ, ॳस्य ति कूशिश करान ज़ि सऻरी रोज़व अमि महामऻरी निशॖ डऺलिथ। बिहिथ छि पनुन पान माजि दुर्गायि पुशॖरिथ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment