24.07.2020

24.07.2020 श्रावणॖ (श्रावण) ज़ूनॖ पछॖ (शुक्ल पक्ष) च़ोरम (देवादेव) (चतुर्थी) शॊकुरवार (शुक्रवार/जुम्मा) श्री सप्तर्षि सम्वत 5096, राश कन्या (रऻच़ हॖन्ज़ि 9.36 बजि प्यठॖ) ऋतु वऺहरात (वर्षा/बरसात) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

       महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

हा च़ॆता कवॖ छुय लॊगमुत परमस

कवॖ गॊय अपज़िस पज़्युक ब्रोंत

दुशि-बॊज़ वश कॊरनख पर-धर्मस

यिनॖ गछ़नॖ ज़्यनॖ-मरनस क्रोन्त

          ***************

अर्थात:- हे चित्त! तू औरों की ओर क्यों आसत्त हुआ है? क्यों झूठ में सच की भ्रांति हुई तुझे? तुम में बुद्धि की कमी है, जिस ने तुझे पर-धर्म के वश कर रखा है। जभी तो तू आवागमन और जन्म-मरन के जाल में उलझा हुआ है।

**************************

        मुहावरॖ (दऺपिथ कऻशुर)

1. मु: डबॖ डबॖ गव वडॖ रब

    अ: मशहूर स्यठाह तॖ ह्यॊन

         द्यॊन कमॖय

2. मु: डेन्जि तऺल्य पन तॖ पनॖ 

          तल्य डींज

    अ: ओरुक योरुक वऺनिथ 

          बराबऺरी अनॖन्य

3. मु:  डुम्बा जऺजीर, साहिबो

          तयार

    अ: वनॖनस तॖ करनस नॖ तऻरॖय 

         थवॖन्य

**************************

पंचान्ग:- बासान छुम ज़ि असि मंज़ छि ज़्यादॖतर लूख संस्कृत ज़बऻन्य निशॖ स्यठाह दूर तॖ नतीजस मंज़ छु वुछॖनॖ यिवान ज़ि तिम छि नॖ ह्यकान पनॖनि धर्मॖचि किताबॖ श्वद्ध तॖ सऺही पऻठ्य पऺरिथ, गाह स्व भगवद् गीता आसि या कांह ति मंत्र कुनि ति किताबि मंज़ॖ य्वस संस्कृत ज़बऻन्य मंज़ आसि। यि कऺमी नज़रि तल थऺविथ छु स्वभाविक ज़ि सऻन्य शुर्य छि वऺचित रोज़ान पनुन धर्म ज़ानॖनस मंज़ तॖ पनॖनि नित्य कर्म कान्डचि किताबन मंज़ संस्कृतस मंज़ मंत्र या श्वलूक परनस मंज़। यूतुय ज़बऻन्य याद छु यॆमिस त्यूतुय छु सु परान रोज़ान, सु ठीख परान छा या न, कांह छु नॖ ह्यकान वऺनिथ यॊत ताम नॖ कऻन्सि ज़ाननवऻल्य सॖन्द्यन कनन ताम तऺम्यसॖन्ज़ परनॖच आवाज़ वातान छि। मसलन, ॳर्थी तुलनॖ विज़ि छु मंत्र यिवान परनॖ "क्षन्तव्यो मेSपराध: शिव शिव शिव भो श्री महादेव शम्भो"। मगर बोज़नस तल छु यिवान ज़ि कॆंह अनज़ान छि "क्षन्तव्यो मेSपराध:" बदलॖ परान आसान "चिन्ता यूमी अनराधा या ॳड्य छि परान आसान च़्यनता भूमि अपराधा" माने तिमन छॆ नॖ पतहॗय ज़ि असली मंत्र छु क्याह तॖ न छि ज़ानॖनॖच यछ़ा थवान। चूंकि स्व विज़ तॖ तम्यसातॖच स्व स्थिति छि स्यठाह नाज़ुक तॖ भावुक आसान,ग़लत परनवऻलिस तमि सातॖ समजावुन छु नॖ मुनऻसिब तॖ वऻजिब बासान। यिथय पऻठ्य छि "इन्द्राक्षीस्तोत्रम" या विष्णु स्तुति या श्री रुद्राष्टकम्" परनॖ विज़ि ति कॆंह परनवऻलय कुनि कुनि जायि ग़लत उच्चारन करान रोज़ान तॖ ॳछ वऺटिथ पकान ब्रोंहकुन। यिमन चीज़न प्यठ पज़ि सानि समाजक्यन पठिथ तॖ ज़ऻन्यकार  लूकन ग़ोर करुन तॖ कॆंह हल छ़ान्डुन यॆमि सॗत्य यिम खऻमियि गछ़न दूर तॖ परन वाल्यन ति बडि धार्मिक किताबॖ परनस मंज़ दिलचस्पी।  महामऻरी छि हॊल गऺन्डिथ तॖ पनॖन्य रफ़तार तेज़ थऺविथ। ॳस्य छि नऺमिथ माजि शारिकायि ब्रोंहकनि तॖ प्रारान तसॖन्दिस अनुग्रहस बॆतऻबी तॖ बॆक़रऻरी सान।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)