26.07.2020 श्रावणॖ (श्रावण) ज़ूनॖ पछॖ (शुक्ल पक्ष) शॆयम (देवादेव) (षष्ठी) आथवार (रविवार/एतवार) श्री सप्तर्षि सम्वत 5096, राश तुला (रऻच़ हॖन्ज़ॖ 11.48 बजि प्यठॖ) ऋतु वऺहरात (वर्षा/बरसात)...अज़ छि विजय सतम (विजय सप्तमी)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
दिलकिस बाग़स दूर कर गऻसिल
अदॖ द्यवॖ फ्वलि यॆम्बॖर्ज़्वलॖ बाग़
मऺरिथ मंगनय वुम्रि हॖन्ज़ हऻसिल
मोत छुय पतॖ पतॖ तऺहसीलदार
***********
अर्थात:- मन-रूपी उद्यान से सब खरपतवार (कूडा-कचरा) हटा दे तब कहीं नऺर्गिस के सुमनों का उपवन पुष्पित होगा। मृत्यु के उपरान्त तुझसे उम्र भर की उपलब्धि की मांग होगी, मानो मौत तहसीलदार की तरह तेरे पीछे पडी है।
**************************
मुहावरॖ (दऺपिथ कऻशुर)
1. मु: अर्शि ॳज़ीम ख्वतॖ छु
ख्वलकि ॳज़ीम बॊड
अ: रुत वरताव छु सारिवी ख्वतॖ
थॊद
2. मु: ॴबो पॆयियो बलाय
मंदछि पतॖ छय ख़जालथ
अ: अख ॴब छु वारिहान
ॴबन ज़न्म दिवान तॖ
ब्यॆयि खऺजिल करनावान
3. मु: सराफ़ गऺन्ज़रावान द्यार तॖ
अतराफ़ रावरावान द्वह
अ: वख फॊज़ूल ज़ायि करुन,
या, तमाशॖगीर
**************************
पंचान्ग:- असि कऻशिर्य बटन हॖन्ज़ संस्कृति छि रूज़मॖच़ सऺदियव प्यठॖ कऻफी पायदार, संगीन, यज़थदार तॖ शानदार। सानि ज़ऻच़ मंज़ यिम सऻरी ग्वन छि अख बॊड सबूत अमि कथि हुन्द ज़ि अज़ताम आयि असि रंगॖ रंगॖक्य ब्रख कऺशीरि मंज़ तॖ ॳस्य आयि प्यॆहनॖ ज़ुलमॖकिस ग्रटस मंज़ विज़ि विज़ि गाह सु 1931-हुक बटॖ लूठ ओस, या 1967-हुक पर्मेश्वरी कांड ओस या सु 1990-तुक आतंकवाद तॖ क़त्लॖगारत ओस या ब्यॆयि ति कांह ज़ुलमो सितम पतॖ ब्रोंठ ओस, ॳस्य आयि हर हमेशॖ सीनॖ दिवान रूज़िथ तॖ आयि बूगान मगर आन बान तॖ शान थऺव बरक़रार तॖ ह्यमथ थऺव दऺर तॖ पनॖन्य सभ्यता, पनॖन्य संस्कृति, पनॖन्य प्रज़नथ रूद्य बचावान तॖ गऺयि फीर्य फीर्य इस्तादॖ रोज़ान तॖ रूद्य ब्रोंह कुन क़दम त्रावान। अथ कशमॖकशस पऺत्यकिन्य छु रूदमुत डखॖ असि पनॖन्यन ज़िठ्यन हुन्द, पनॖन्यन पूर्वजन हुन्द ॴशिर्वाद तॖ सतॖच वथ, सरस्वती हुन्द अनुग्रह, धर्मॖच आस्था तॖ पनॖन्य मॆहनत, रॖत्य कर्म तॖ मॊदुर वरताव। मगर यिमन सारिनॖय खॊसूसियतन सान्यन ह्यॆच़ॖन्य व्वं व्वं दरार हिश पऻदॖ सपदॖन्य, ईमान ह्यु ह्यॊतुन डलुन, रसमव रिवाजन निशि ह्यॆतिन ॳस्य दूरॖन्य, माजि-ज़्यव ह्यॆच़ॖन्य मऺशिथ गछ़ॖन्य। कॊटम्ब ह्यॆतिन छ़ॊटॖन्य, शुर्य नॖ थवनॖच रिवायथ ह्यॆच़ पानॖनावॖन्य, पर-ज़ऻच़ मंज़ रिशतॖ ह्यॆत्य बऺडरावॖन्य,सान्यव शुर्यव ह्यॆच़ व्यलायथ कुन लथ लदॖन्य, पनॖन्यन माल्यन माज्यन वृद्ध आश्रमन मंज़ जाय छ़ान्डॖन्य, खान्दरॖ पतॖ तलाक वगैरा वगैरा। यि तेज़ बदलाव सानि ज़ऻच़ मंज़ यिनॖ सॗत्य ह्यॆतिन ॳस्य पस पायि ह्यि गछ़ॖन्य। संत महात्मा यिम कऺशीरि मंज़ ॴस्य तिहॖन्द्य आश्रम आयि ॳस्य बनावान यॆत्यन यॆत्यन असि पनुन डेरॖ ह्यॊत जमावुन कऺशीरि प्यठॖ च़लनॖ पतॖ। ॳस्य गऺयि आश्रमॖय बनावान मगर असली दीवी दीवता गऺयि ॳस्य नज़र-अंदाज़ करान। हवनन प्यठ द्युत ज़ॊर स्यठाह मगर किताबगर बनावनस मंज़ रूद्य पथ येति सोन इतिहास तॖ अदब ह्यॆकिहे रूज़िथ।ॳस्य रूद्य पथ पाठशाला बनावनस मंज़ यॆति धर्मुक ज्ञान ह्यकहऻव पनॖन्यन शुर्यन दिथ, ॳस्य रूद्य पथ विद्यालय, अस्पताल, जंजगर बनावनस मंज़ यॆमि सॗत्य सऻनिस समाजस फऻयदॖ वातिहे। हालांकि शुर्य कऺट्य गऺयि असि बजाह यिथॖ तिथॖ दय सॖन्ज़ि दयगऺच़ सॗत्य मगर ॳस्य डऺल्य पनॖनि असली मुद्दा निशि। संस्थायि बनेयि ग्रेन्दि रॊस मगर संस्थायन कुनी अथ वथ रूज़ नॖ। लीडर बनेयि सऻरी मगर असली वतॖ हावुक गव नॖ नज़रि कांह। पनॖन्य पनॖन्य आस्था, पनुन पनुन यॆकीन, पनॖन्य पनॖन्य यछ़ तॖ पछ़ यॆमिस यथ मंज़ रूज़ तऺम्य रऺट सॊय वथ। अथ दपान कऺबलि छुम पनुन, च़्यॆ क्याह ओर सनुन। खऻर बजाह रूज़िन सऻरी युस यॆतिनस छु। ईश्वरस करव ज़ारॖ पारॖ ज़ि दूर करि यि महामऻरी तॖ सऻनिस समाजस तॖ कुल कायनातस करि यऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment