14.04.2020, श्रावणॖ (श्रावण) गटॖ पछॖ (कृष्ण पक्ष) नवम (देवादेव) (नवमी) बॊम्वार (मंगलवार) श्री सप्तर्षि सम्वत 5096, राश मेष (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
रुत तय क्रुत सोरुय पज़्यम
कनन नॖ बोज़ुन ॳछन नॖ बाव
ओरुक दपुन यॆलि व्वंदॖ वुज़्यम
रत्नदीफ प्रज़ल्यम वरज़ॖन्य वावॖ
***********
अर्थात:- अच्छे बुरे का सामना तो मुझे करना ही है। ऐसा होने पर मैं ने इन बातों का अनसुना करके मेरी आंखों में प्रतिक्रिया वश कोई विकार नहीं आया। जब प्रभु की ओर से ही शब्द एवं अनाहत शब्द प्रगट होगा तो भयानक जंजावात में भी मेरा दीप प्रज्वलित होगा, अर्थात, मेरे अंदर का प्रकाश प्रगट होगा तो कोई भी कठिनाई मेरा कुछ बिगाड नहीं सकती।
भावार्थ:- (निरंतर अभ्यास से परमेश्वर की कृपा से अपने अंदर शब्द तथा प्रकाश उत्पन्न होता है। किसी ज़ोर ज़बरदस्ती से ऐसा कभी नहीं हो सकता है।)
**************************
मुहावरॖ (दऺपिथ कऻशुर)
1. मु: जान ऒर तॖ जहान् ऒर
अ: अरिज़ुवॖ छु सोरुय जान
आसान
2. मु: जान छु पनुनॖय पान
अ: ब्याख ह्यॆकि तॆलि जान
ॴसिथ यॆलि पानॖ जान
आसि
3. मु: जान गव सुय युस जान
वरतावि
अ: जान्यर छु नॖ सिरिफ वनॖनॖ
सॗत्यी आसान बऺल्कि
हऻविथ द्युन प्यवान
**************************
पंचान्ग:- राथ द्राव नतीजि बऺहमि जमऻच़ वाल्यन शुर्यन यिम बेसब्री सान अमि बापथ प्रारान ॴस्य। बोज़नस तल आम ज़ि लखनवचि अकि लऺडकी छु ग्वडन्युक मुकाम हऻसिल कॊरमुत यॆमिस शॆयव हतव नम्बरव मंज़ शॆ हथ नम्बर हऻसिल कऺर्यमॖत्य। विश्वास छु नॖ यिवान यि बूज़िथ मगर हक़ीकत छि यी। पऺत्यम्यव वारियाहव वऺरियवॖ प्यठॖ वोत यी वुछान ज़ि कोरि छि लऺडकन हॖन्दि न्यसॖबतॖ ज़्यादॖ थज़र थवान आमॖच़ॗ मगर शॆयव हतव मंज़ॖ पूरॖ शॆ हथ नम्बर यिन्य छि हना हऻरऻनी तॖ अख तऻज्यबॖच कथ। ताहम म्यानि तरफॖ छु पास गऻमॖत्य शुर्यन हथ हथ मुबारकॖ। बहमि जमऻच़ पास कऺरिथ कऺरिथ छि शुर्य ह्यवान ब्यॊन ब्यॊन क्षेत्रन मंज़ पनुन मुक्क़दर आज़मावनॖच कूशिश करॖन्य याने इन्जीनियर, डाक्टर, वगैरा वगैरा। तनाव छु बडान रोज़ान। शुर्यन हॖन्द्यन मऻलिस माजि ख़ास तोर पऻठ्य। यॆति प्यठॖ छि व्वं पौंसॖच खेल शुरु गछ़ान। यॆमिस यूताह चन्दॖ बॊरुत आसि सु छु तीच़ ज़ीठ व्वठ ह्यकान त्रऻविथ। अथ तमाशस मंज़ छु ग़रीब शुर पिसनॖ यिवान तॖ छु पनॖनिस गुर्बतस कोसान रोज़ान तॖ पौंसॖवोल शुर छु बे-खोफ पऻठ्य तोषान तॖ ख्वश रोज़ान। कॆंह छि यछ़ान क्याहताम तॖ छुख मेलान क्याहताम या मेलान छुख नॖ पनॖनि आयि तॖ लाचऻरी मंज़ हलम दारान तऺथ्य यी ब्रूंठ्य यियख। परुन तॖ लेखुन छु अख बोड तिजारत बन्यॊमुत सऻनिस वतनस मंज़ ग्वडॖ प्यठॖ अंदस ताम। लछॖ बद्यन रॊपियन मंज़ छु यि कारबार आमुत चलान तॖ यि छु म्यानि हिसाबॖ भ्रष्टाचारुक ग्वडन्युक वजह तऻलीमी अदारस मंज़। स्कूलन सॗत्य सॗत्य कोचिंग सैन्टर, सरकऻर्य स्कूल तॖ प्राईवेट स्कूल हॖन्ज़ माम मान, काल्यजन मंज़ सयासतुक दब दबॖ, वगैरा वगैरा।।खऻर यि छु अख ज़्यूठ मसलॖ तॖ यॆतिनस करव नॖ अमिच कथ वुन्यक्यनस। म्यऻन्य ॴही छि सारिनी शुर्यन ज़ि तिम गऺछ़िन काम्याब पनॖनिस पनॖनिस मुरादस मंज़। महामऻरी छि ॴस वहरऻविथ तॖ निवान न्यंगलिथ अख अख जान। वुनि छु नॖ कांह व्वपाय नज़र यिवान यॆमि सॗत्य यि महामऻरी गछ़ि गऺलिथ मूलॖम्वंजे। जंग छु जऻरी। दय करि पनॖन्य यऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment