25.07.2020, श्रावणॖ (श्रावण) ज़ूनॖ पछॖ (शुक्ल पक्ष) पऻन्च़म (देवादेव) (पन्चमी) बटॖवार (शनिवार/शनिश्चरवार), श्री सप्तर्षि सम्वत 5096, राश कन्या (चलान) ऋतु वऺहरात (वर्षा/ बरसात) (चलान)...अज़ छि नाग पंचमी तॖ कुमार शॆयम (कुमार षष्ठी)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
त्यम्बॖर पॆयस कवॖ नो च़ऻजिन
मस-रस कवॖ अह नऻजिन गव
शान्त्यन हॖन्ज़ क्रय तोलॖ म्वलॖ वऻजिन
अन्दॖर्य गाह यॆलि न्यबर प्योस
***********
अर्थात:- एक चिंगी भर उस पर पडी, पर अफसोस, वह सह न पाया। मधुरस क्यों उसकी नाडियां (वातनलिका) में गया, जिसका उसे कोई लाभ नहीं हुआ अर्थात उसकी क्षुधा ज्यों की त्यों बनी रही।
(पाठ भेद) मन्सूर को अध्यात्म-बोध की तनिक-सी आभा मिली, पर वह उसे सहन न कर पाया।
(ऐसे मनुष्य ने)संतों (संत जनों) की क्रिया का आदर-मान ही घटा दिया, क्योंकि भीतर का प्रकाश उसके अंतर से बाहर निकल आया।
**************************
मुहावरॖ (दऺपिथ कऻशुर)
1. मु: ग़रज़मंद दीवानॖ
अ: ग़रज़मंद छु नॖ (पनुन
हाजथ कडनॖ विज़ि)
अक्लिहॖन्ज़ कथ या कऻम
करान
2. मु: ग़रज़मंद छु फॊटमुत
ह्वछिमच़ि क्वलि
अ: ग़रज़मंद इन्सान छु सख़
न्वक्सान तुलान
3. मु: अमलन जज़ा तॖ नीत्यन
मुराद
अ: यस यिछ़ अमल तॖ नियथ
आसि त्युथुय फल अथॖ
लगान
**************************
पंचान्ग:- ॳस्य याने कऻशिर्य बटॖ आयि ह्यनॖ वॊखॖ पऻठ्य ख़ास कर यिमन त्रॖहन वऺरियन मंज़। मुसलमानव कऺर अख बऺड कऻम ज़ि बटॖ च़ऺलरऻविख कऺशीरि प्यठॖ तॖ ललनावुन थॊवुख असि दोद रन्गॖ रन्गॖ। यॆतिनस सोरुय वनुन छु नॖ मुम्किन मगर प्यठॖ प्यठॖ यॊदवय नज़र दिमव तॖ मन छु परेशान गछ़ान तॖ समाधान छु नॖ पलि प्यवान। पलि यॊदवय प्यवान ति छु, शुतुरमुर्गसॖन्द्य पऻठ्य छि ॳछ बंद कऺरिथ पनॖन्य ज़ड कडान तॖ पकान ब्रोंहकुन। मसलॖ गऺयि व्वतलिथ बे-शुमार तॖ ग्रॆन्दि रॊस यिमन प्यठ नज़रिसऻनी करॖन्य छि बे-हद ज़रूरी यॊदवय असि पनॖन्य प्रज़नथ बचऻविथ थावॖन्य छि। समस्यायन तुलॖ बॖ पर्दॖ यिथॖ पऻठ्य - बालॖ यपोर यिथ मऺशरऻव असि पनॖन्य माजि ज़्यव। मोल मऻज्य छि नॖ ज़ऻनिथ मऻनिथ पनॖन्यन शुर्यन कऻशिर ज़बान वनॖनावान, बहानॖ छि वारियाह, तरक छि पनॖन्य पनॖन्य सऻरी दिवान। अगर म्योन अन्दाज़ॖ सऺही छु सानि ज़ऻच़ हॖन्द्य अर्नमथ फीसऺद (98%) शुर्य छि प्राइवेट कम्पनीयन मंज़ कऻम करान तॖ युहुन्द स्थानान्तरन अकि जायि प्यठॖ ब्यॆयिस जायि छु नॖ मुम्किन, अम्युक फलस्वरूप छु यि ज़ि सऻन्य शुर्य छि त्रॖह-पाच़ॖत्रॖह वऺरियस ताम अनहॖर्य रोज़ान तॖ ॳन्तर-ज़ऻच़ खान्दरन छि बडान रफ़तार यॆलि नॖ तिमन अन्द्य पऺख्य कांह कूर या लऺडकॖ पनॖनि मनॖ मुवऻफिक मेलान छु। असि वोत दिवान स्यठाह ज़ोर तॖ ध्यान हवनन प्यठॖय योत। ॳस्य रूद्य स्यठाह पथ पनॖन्यन शुर्यन असली तॖ ज़रूरी संस्कारन सॗत्य ज़ऻन्यकऻरी करनावनस मंज़। सानि ज़ऻच़ मंज़ छि व्वं अख या ज़ॖ शुर्य थावनॖच प्रथा बनेमॖच़ या शुर्य न आसुनुकुय सोंच ज़ॆहनस मंज़ बॊरमुत। नतीजि तम्युक द्राव यि ज़ि ॳस्य छ़ॊकेयि संख्यायि मंज़ ति वारॖ वारॖ। शुर्य ह्यॆतिन वातॖन्य व्यलायत तॖ मोल मऻज्य छि लबन सॗत्य कथॖ करान पनॖन्यन फ्लैटन मंज़ बिहिथ तॖ द्वह द्वह कडान। कथ छि जऻरी। महामऻरी कर तुलि थफ यि वनुन छु मुश्किल। लूख ह्यॆतिन वारॖ वारॖ व्यसरॖन्य तॖ ह्यॊतुख यॆमि सम्सऻर्य रॊखसथ ति ह्यॊन वारॖ वारॖ। असि रूद नॖ ज़्युठ व्वं ज़िन्दॖ कांह, ॳस्य ह्यॆतिन पानय ज़िठ्य बनॖन्य तॖ वतॖहावुकाह रूद नॖ कांह। महावीर गछ़ि पनुन अनुग्रह करुन पानय।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment