02.07.2020, हारॖ (आषाढ) ज़ूनॖ पछॖ (शुक्ल पक्ष) बाह (देवादेव) (द्वादऺशी) ब्रसवार (वीरवार/बृहस्पतिवार/गुरुवार) श्री सप्तर्षि सम्वत 5096, राश वृश्चिक (चलान) ऋतु ग्रीष्म (चलान)...अज़ छु स्वामी गोपी नाथ जियस वॊहरवोद ति
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
शिलायि हॖन्ज़ॖय व्वतमा बऺज़ॖम
सॊम्बरिथ ट्यॊक पोन्य आसन पठ
मनस अंदर व्यच़ार कॊरुम
वुछुम तॖ ड्यूंठुम शिल कनि वठ
************
अर्थात :- पत्थर की मूर्ति की पूजा का महत्व मेरी बुद्धि में आया, और तिलक, पानी, आसन आदि पूजा सामग्री जुटाई। अपने मन के अंदर गहन विचार करने पर देखा वह केवल पत्थर ही था इसके अतिरिक्त कुछ भी नहीं।
(भावार्थ:- शिला पूजन कृत्रिम पूजा है। इस का कोई प्रयोग नहीं, न ही कोई लाभ है।)
**************************
कऻशुर दपिथ (मुहावरॖ)
1. मु: अबक़ छानस सबक़ रूद
अ: अडॖ-ह्यॆछलिस छु वख्तॖ
विज़ि सबक़ मशान
2. मु: अबक छानस तबक यड
अ: बेवकूफस छु ब्वछर
आसान।
3. मु: अपुज़ छु तुलॖकतुर तॖ पॊज़
छु आफ़ताब
अ: अपुज़ छु नॖ दऺरिथ ह्यकान
पऺज़िस निश
**************************
पंचान्ग:- हऻर्यॆय च़ॖ गछ़तय कऺशीरि ताम, तॊत वऻतिथ हालातन ह्यतॖ साम। वुछतय च़ ठीक-ठाख छा म्यॊन गाम, बॖहऻय गछ़हऻ गरॖ करॖ हऻ आराम। लऺतिये च़ॖ प्रॖछ़तय ग्वलाबसॖय, क्याह यलाज तति छुय व्वलाबसॖय, क्याज़ि रोज़ान तनाव तति सुबॖ शाम। राथ वुछुम व्हाटसापस प्यठ अख द्वदॖ शुर मंज़ सडकि ॳकिस मूद्यमॖतिस शख़स सॖन्दिस सीनस प्यठ ऒश हारान। अबारत पऺरॖम तॖ नन्योम ज़ि कऺशीरि मंज़ छु नॖ थख आमुत आतंकवादस मुक्कमल पऻठ्य वुनि ति। सोपोरॖ मा ओस कुस ताम मुसलमान बुज़ुर्ग पनॖनिस त्रॆ वुहुर शुरिस खॊनि मंज़ ह्यथ सुबहऻय द्रामुत द्वद अनॖनि तॖ न्यबर नेरानॖय आव कस ताम आतंकवऻद्यसॖन्ज़न गोल्यन मंज़ ह्यनॖ तॖ त्रऻविण प्राण तॖ ॳमिस सॗत्य यि द्वदॖ शुर्य बच्यव ज़िन्दॖ तॖ ब्यूठ ॳमिस बुज़र्गसॖन्दिस सीनस प्यठ वऺदान वऺदान आलम तुलनि। दपान ॳमिस शुरिस ओस यि मातामालुक बुड्यबब युसॖ वुछान वुछान लाश बन्याव तॖ प्यव मंज़ सडकि। दहशतॖच हद गऺयि यि। बेरहमॖच इन्तिहा गऺयि यि। आतंकवादुक क़हर गव यि। व्वंय छु नॖ तति इन्सानस क़दॖर म्यॆ बासान, गाह सु ह्यॊन्द छु या मुसलमान। ननिवानॖ छु ननान ज़ि तिमन मारॖवातलन छु नॖ रूदमुत कांह दीनो ईमान। तिम छि बन्येमॖत्य पूरॖ वहशी तॖ शैतान। कति यी कऻशिर्य बटस तोर गऺछ़िथ सकून् तॖ आराम यिथ्यन हालातन मंज़। महामऻरी छि दवान तॖ अनान लूकन पनॖनिस शिकंजस मंज़। ग्रन्द छि हुर्रान मरनवाल्यन हॖन्ज़ द्वह पतॖ द्वह। ॳस्य छि माजि शारिकायि,माजि दुर्गायि, माजि रऻज्ञन्यायि पनुन पान पुशरऻविथ प्रारान तिहॖन्दिस अनुग्रहस अथरॖटिस।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment