03.07.2020, हारॖ (आषाढ) ज़ूनॖ पछॖ (शुक्ल पक्ष) त्रुवाह (देवादेव) (त्रॆयॊदशी) शॊकुरवार (शुक्रवार/जुम्मा) श्री सप्तर्षि सम्वत 5096, राश धनु (रऻच़ हॖन्ज़ॖ 12.7 बजि प्यठॖ), ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
लऺलिथ लऺलिथ वदय बॊदऻय
च़्यता मुहुच प्ययिय माय
रोज़िय नो पतॖ लोह लंगरॖच छ़ाय
निज़ स्वरूफ क्या मॊठुय हाय
************
अर्थात :- अरी मेरी बुद्धि! मैं तेरी दासी हो गई हूं। इस लिए तेरे को बिलख बिलख कर मैं रोऊंगी। अरे मेरे चित्त! तूझे मोह के साथ प्रेम हो गया है। यह संसार अंत में तेरे साथ नहीं रहेगा, ऐसा जान कर भी अपना स्वरूप भूल गई, यही तो शोक़ की बात है।
**************************
मुहावरॖ (कऻशुर दऺपिथ)
1. मु: यि म्यॆ करुन ति बॖ करॖ च़ॖ
वनतम बॖ क्या करॖ
अ: यि पानस ख्वश करि ती
करुन
2. मु: यि ज़्यॆवि ज़्यॆवि कऺर्यज़ि ति
कऺर्यज़ि ज़ंगि ज़ंगि
अ: बेकार कथॖ करनि ख्वतॖ छि
कांह कऻम करॖन्य जान
या
बेकार रोज़नॖ ख्वतॖ छु कॆंह
न तॖ कॆंह करुन जान
3. मु: यि ज़ाल वुछान छु ति छु नॖ
हऻन्ज़ वुछान
अ: ॳक्यसुन्द च़ालुन छु नॖ
ब्यॆयिस फिकिरी तरान
**************************
पंचान्ग :- राथ आव स्वामी गोपी नाथ जियुन वॊहरवोद मनावनॖ बडॖ चावॖ सान, भक्ति भावॖ सान प्रथ ॳकिस जायि यॆति यॆति स्वामी जियुन आश्रम बन्योमुत छु। कॆंच़व भक्तव ॴस पनॖन्यन पनॖन्यन गरन मंज़ॖय तऺहर वगैरा बनऻवमॖच़। हालांकि आश्रमन मंज़ ॴस बीरॖ कमॖय यॆमि महामऻरी यानि कोरोनावयरस ब्यमारि मूजूब तोति ॴस्य अन्द्य पऺख्य भक्त वऻत्यमॖ्त्य यिमव हवन कॊर तॖ पूज़ा अर्चना कऺर। कॆंच़व संस्थायव ॴस ॴन-लायन व्यवस्था ति कऺरमॖच़ तॖ हवनुक दृश्य वुछ लूकव पनॖन्यन पनॖन्यन गरन मंज़ बिहथॖय। गुरु आस्था गछ़ि आसॖन्य। प्रथ ज़ऻच़ मंज़ छि संत महात्मा नज़रि यिवान यिम अध्यात्मॖकिस शिखरस प्यठ छि आसान वऻत्मॖत्य तॖ कॆंह लुख छि यिहॖन्द्य शिष्य बऺनिथ युहुन्द नाव स्वरान रोज़ान। हालांकि यिम संत महात्मा यॆलि यॆलि निर्वान सपदान छि यिमव मंज़ॖ छि कॆंह पनॖनिस क़ऺरीबी शिष्यस ताज पूशी करनावान तॖ कॆंह छि नॖ ति करुन मुनऻसिब ज़ानान तॖ भक्त छि तिहॖन्ज़ॖय मूर्त बनऻविथ तिमन पूज़ान रोज़ान। मसलन अद्वैतमतस मंज़ छि गुरुहॖन्ज़ परम्परा रूज़मॖच़, ॳकिस पतॖ ब्याख गुरु। मगर सऻनिस धर्मस मंज़ छॆ नॖ म्यॆ बासान यि परम्परा रूज़मॖच़। मसलन ऱयॆष्यपीरसॖन्दि पतॖ छि तऺम्यसॖन्ज़ ख्राव आमॖच़ तख्तस प्यठ थावनॖ, स्वामी गोपी नाथ जियस ति छि ॳम्यसॖन्ज़ मूर्च़ॖय यिवान पूज़नॖ, स्वामी क्रालॖ बब,स्वामी नन्दॖ बब,स्वामी पोशॖ बब, स्वामी कशॖकाक,स्वामी विद्या धर, स्वामी लक्ष्मण ज़ू, वगैरा वगैरा। यिमव छु नॖ पानस पतॖ कांह जान्नशीन् थॊवमुत। लूख छि यिहॖन्द्यन फोटुवन या यिहॖन्ज़न मूर्तियन पूज़ा करान तॖ पनॖन्य यछ़ तॖ पछ़ बरान। कथ छि जऻरी। दिल्लि मंज़ दपान आव बनावनॖ प्लाज़मा बैंक यॆति प्यठॖ कोरोनावयरसक्यन मऺरीज़न यी प्लाज़मा सॗत्य यलाज करनॖ। दपान यि करनॖ सॗत्य ति छि कॆंह ब्यमार ठीख गछ़ान। जंग छु अथ महामऻरी सॗत्य जऻरी। दय कऺरिन्य पनॖन्य यऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment