01.08.2020, श्रावणॖ (श्रावण) ज़ूनॖ पछॖ (शुक्ल पक्ष) त्रुवाह (त्रॆयॊदशी) बटॖवार (शनिवार/ शनिश्चरवार) श्री सप्तर्षि सम्वत 5096, राश धनु (चलान) ऋतु वऺहरात (वर्षा/बरसात) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव
**************************
महामारी नाश - मंत्र
जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते
**************************
लल वाक्
तनॖ मनॖ गऺयस बॖ तस कुनुय
बूज़ुम सतुक गंटॖ वज़न
तथ जायि धारनायि धारना दिच़ॖम
आकाश तॖ प्रकाश कॊरुम सरॖ
*************
अर्थात:- मैं तन मन धन से उस प्रभु में तत्लीन हो गई तो मैं ने सत्य का नाद बजते सुना। उसी स्थान पर धारना की तो आकाश तथा प्रकाश को पा लिया।
**************************
मुहावरॖ (दऺपिथ कऻशुर)
1. मु: ज़ामतुर गव पामतुर
अ: ज़ामतॖरिस यिथय ह्यॊर
ब्वन गछ़ि, तस छु रोज़ान
कानि तल तॖ ॴखरस छु
मंदॖछावान
2. मु: ज़ाम हय आसि गाम तति
प्यठॖ सोज़ि पाम
अ: ज़ाम यॊदवय दूर ति आसि
तोति छॆ नॖ थफ तुलान
3. मु: ज़ऻरिस वन्योख मऻज्य हा
म्वयी, दॊपनख यपऻर्यी
ॳन्यून
अ: बद-किरदार इन्सान छु
बिल्कुल लापरवाह आसान
या, नाकारॖ कामि मंज़
इन्सानस छु नॖ कुनि कथि
हुन्द परवाय आसान
**************************
पंचान्ग:- गव छ़्यनॖ असि निशि अख ब्याख ॳदीब, श्री अवतार कृष्ण माम 'रहबर' उतरॖ याने त्रॖह जुलाई 2020-मि द्वह। नामावार शखसियथ, लेखक, साहित्यकार ओस रहबर सऻब। सऻनिस समाजस फुट ब्यॆयि अख कून तॖ सऻनिस साहित्यस च़ाव ब्यॆयि ख्रॊप ह्यु। वैसे ति छु सोन साहित्य वुनक्यनस तरसान साहित्यकारन हॖन्दि बापथ ति क्याज़ि प्रऻन्य प्रऻन्य ह्यॆतिन असि निशि दूर गछ़ॖन्य तॖ नऺव्य कर यिन बारसस यि वनुन छु दुशवार ति क्याज़ि हालात छि गछ़ान द्वह पतॖ द्वह बद ख्वॊत बदतर। कॆंह द्वह ब्रोंठ गव श्री शादी लाल कौल स्वर्गॖवास। तऺम्य ति ओस पनॖनि कलाकऻरी सॗत्य पनॖन्य अख प्रज़नथ बनऻवमॖच़ तॖ ओस लूकन हॖन्द्यन दिलन मंज़ जाय बनावनस मंज़ काम्याब सपदुमुत। समाजस मंज़ पनुन रुत्बॖ बनावान बनावान छि अख वऻन्सा नेरान। दपान छि ज़िन्दगी छि पानस मंज़ अख सज़ा, मगर फिकिरी छु नॖ तरान ज़ि खत्ता क्याह छु। ज़िन्दगी हुन्द छु क्याह सार म्यॆ वनतम, कवॖ यि आदम छु बेक़रार म्यॆ वनतम। क्याह सोंचान स्वरान यिवान छु सु योर ज़न्मस, क्याह छु अमलान यॆति मा छय ख़बर तस। कस प्यठ छु तस यख्तियार म्यॆ वनतम। महामऻरी छु पनुन खॊख बरकरार थऺविथ। ॳस्य ति छि खूच़िथ बिहिथ प्रारान यि कर च़लि तॖ गलि। कलॖ फिरनस छु नॖ वार, नच़नस फेरनस छु नॖ व्यसतार। भगवान करि पनुन अनुग्रह, करोस ज़ारॖपार
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)
No comments:
Post a Comment