01.12.2018

01.12.2018, मॊन्जॖहोर (मार्ग/ मगर),गटॖ पछॖ (कृष्ण पक्ष) नवम (नवमी) बटॖवार (शनिवार/ शनिश्चरवार),श्री सप्तर्षि सम्वत 5094, राश कन्या (दुहचि 10.3 बजि प्यठॖ) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: जन्दॖगऺर्य बापारॖ
    अ: बे-तरतीब/खुर्यदार
2. मु: जन्तुक माज़ॖ-द्वगुल
    अ: स्यॊद-सादॖ इन्सान
3. मु: जमाथ गऺयि करामात
    अ: इतिहादस छु ताक़त/अख
         तॖ अख गव काह
4. मु: जगॖ यॆज़मन
    अ: कुनि व्वसि-द्रॊसि मंज़ हंगॖ
          तॖ मंगॖ होर-योर करनवोल
5. मु: जऺच़ रॊस हून
    अ: स्यठाह ग़रीब/शिकस-लद
**************************
1. म्यॆ.....To me
2. मे......May (Fifth month)
3. मेख....Nail/Peg
4. मेखल......Sacred Thread
                    Ceremony of
                    Hindus
5. मॊय..... Liquor/Wine
6. मेमार....Mason/Builder
7. मेज़......Table
8. मेज़बान....Host
9. मेज़पोश.....Table cloth
10. मॆच़ि-तील.. Kerosene oil
**************************
       गीता ज्ञान  : अध्याय-8 :
यस ब्रह्मस मंज़ सऻरी ज़ीव आसान
ब्यॆयि यि सोरुय ज़गत परिपूर्न
सु भक्तॖ भावॖ सॗत्य छु प्राप्त सपदान
वॊन भगवानन गीता ज्ञान
**************************
बॖ छुस पनॖनि जायि सौंचान ज़ि अमा पॊज़ यॆमि मोबायलॖ दऺस्य यि कॆंछ़ा बॖ कऻशिर्य ज़बऻन्य मंज़ लीखित ब्यॊन ब्यॊन ग्रुपन मंज़ सोज़ान रोज़ान छुस। अथ छा कुनि जायि कॆंह मतलबा ति नेरान, कॆंह तर नेरान। यि सौंचान सौंचान प्रुछ़ म्यॆ पनॖन्यन कॆंच़न मित्रन ति मन गव ख्वश यि बूज़िथ ज़ि तिम छि आसान प्रारान
म्यऻनिस लीख्यमॖतिस मसौदस। मगर तिमन छि अख व्यछ़य ज़ि तिमन छु नॖ पनॖन्यन पनॖन्यन मोबायलन प्यठ कऻशुर की-बोर्ड अनुन तगान तॖ अवॖ किन्य छि नॖ तिम यछ़ा ॴसिथ ति कऻशुर ह्यकान मोबायलस प्यठ लीखित। म्यॊन सलाह छु ज़ि तिमन पज़ि कऻन्सि ज़ऻन्यकारस मशवरॖ ह्यॊन तॖ पनॖन यछ़ा पूरॖ करॖन्य। वारिहाव बायव-ब्यॆन्यव वॊन म्यॆ ज़ि म्यानि यॆमि कामि सॗत्य ह्यॊत तिमव पनॖन्यन शुर्यन परनावनॖच मुहिम शुरु करॖन्य। पॊज़ क्याह तॖ अपुज़ क्याह यि ज़ानन तिमय मगर म्यॆ बडेयि पछ़। बॖ छुस यछ़ान ज़ि असि पज़ि बटॖवारि-आथवारि प्रथ हफ़्तॖ पनॖन्यन पनॖन्यन संस्थायन प्यठ शुर्य-बऺडय नाद दिथ अनॖन तॖ अख कार्यशाला यानि वऺर्कशाप चलावुन गन्टस-द्वन-गन्टन यथ मंज़ पनॖन कऻशिर्य-ज़बऻन्य हुन्द क्लास रटिथ तिमन लेखनॖच/परनॖच/ज़बऻनी बोज़नावनॖच तजरुबॖ यी दिनॖ। केंच़न वालनटेरन हॖन्ज़ छि ज़रूरथ। यिथ पऻठ्य असि ह्यॊत शारदा ज़बऻन्य प्यठ पनुन मुहिम चलावुन, तिथय पऻठ्य छु करुन कऻशिर्य-ज़बऻन्य हुन्द ति बन्दोबस्त। म्यॆ छि व्वमेद ज़ि यि कऻम करनॗ बापथ पकन म्यऻन्य बऻय ब्रौंठ-ब्रौंठ।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

30.11.2018

30.11.2018, मॊन्जॖहोर (मार्ग/ मगर),गटॖ पछॖ (कृष्ण पक्ष) ॴठम (अष्टमी) शॊकुरवार (शुक्रवार/ जुम्मा), श्री सप्तर्षि सम्वत 5094, राश सिंह (चलान), ऋतु हेमन्त (चलान)...अज़ छि महाकाल भैरव ॴठम
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: जिगरॖय छु करान कार
    अ: ह्यमथ छि बऺड
2. मु: जिगर पारचॖ
    अ: स्यठाह टोठ
3. मु: जऻन्य यार तॖ नऻन्य यार
    अ: असली तॖ मत्लबी यार/
        द्वन दोस्तन मंज़ फ़र्ख करॖन्य
4. मु: जन्दस पऻर्य व्वंदस कऺर्यज़ि
         राहत
    अ: मोमूली चीज़ ति ह्यॆकि
         वख्ति ज़रूरथ फ़ऻयदॖ दिथ
5. मु: जन्दनॖय छि ज़्वॊवॖ आसान
    अ: आसन वऻल्यसॖय छि
          परेशऻनी आसान
**************************
1. मॆहनत... Hard-work/Toil
                  Labour
2. मॆहनत करॖन्य.....To work
                             hard
3. मॆहनॖतानॖ....Wages/Fees/
                  Remuneration/
                  Honorarium
4. मॆहनती..... Hardworking/
                  Industrious/
                  Energetic
5. मिठऻय....Sweets
6. मॆठुन......To be sweet
7. मॆछर......Sweetness
8. मेनुन......To measure
9. मेननबानॖ...Measuring pot
10. मेननवोल....One who
                        measures
**************************
      गीता ज्ञान  : अध्याय-8 :
यस अव्यख्तॖ अक्षर वननॖ यिवान
सु अव्यख्तॖ बावॖ म्यॊन परमधाम ज़ान
सु प्रऻविथ मनुष्य छु नॖ पॊत फेरान
वॊन भगवानन गीता ज्ञान
**************************
वुछान वुछान गऺयि असि व्वंय पऺज़्यपऻठ्य अठोवुह वऺरी कऺशीरि द्रामतिस। बासान ज़न छि राथची कथ। अख कथ तॖ कऺशीर, ब्याख कथ तॖ कऺशीर। सऺनिथ छि गऻमॖच़ असि कऺशीर। क्याज़ि नॖ? मूल छु ना ततिकुय। असि मशि नॖ। ब्यॆयि छि ॳस्य द्रामॖत्य कमव कमव ब्रकव तलॖ। पौंसॖ ओस नॖ वऺफूर। अखराजात ॴस्य कम। हाखा-बता ॴस्य ख्यवान तॖ सुय ओस ज़न पऺह्य-पनॖ लगान। रयतॖकऻलिस ओस नॖ पंखुक ज़रूरथ प्यवान, फ्रिजिच कऻम ओस तत्युक आबोहवा पूरॖ करान। यॆतिच हिश तापॖ-क्राय ॴस नॖ। व्वंदस ॴस सख्ती रोज़ान मगर स्व ति असान असान च़ालान। गरिच्यन काम्यन तलॖय ॴस्य नॖ म्वकलान। कसरत ॴस हेरन ह्यॊर-ब्वन द्वहस दहि फिरि करनॖ सॗतीय गछ़ान। ब्यमार्यन ति ज़न च़ाव ज़ुव यनॖ बालॖ-योर लऺग्य। दाय तॖ मॊहनिव ओस ॴही मंज़ॖय योत आसान, कऻम ॴस्य सऻरीय पऻन्य-पानय करान। दाय ववतस या जीरॖ-बाय गऺयि नज़रि बालॖ यपऻर्यी योत। बॆहमॊंड च़ायि यॆति। योरकुन वुछ नॊवुय आलमा। नॊवुय हवा। बदलय आबोहवा। सान्यन शुर्यन क्याह छि ख़़बर। तिमव क्याह वुछ ज़ि कऺशीरि क्याज़ि ॴस्य ॳस्य वनान मऻज्य-कऺशीर। बिल्कुल छि म्यॆ बासान राथची कथ। म्यॆ आव बुजर यिमन त्रॖहन वऺरियन मंज़। त्रॖह वऺरी ति छि अख वऻन्सा। अज़ छि त्रॖह वुहिर्य अनॖहॖहर्य। तॆलि ॴस्य त्रॖह वुहरिस आसान त्रॆ च़ोर शुर्य ज़ामॖत्य। दपान ॴस्य त्रॖह गव सॖह, च़तजी गव पतजी तॖ शेठ गव ब्रेठ। यॆमि मुहावरुक मत्लबॖय गव व्वंय फऺक्य।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

29.11.2018

29.11.2018, मॊन्जॖहोर (मार्ग/ मगर)गटॖ पछॖ (कृष्ण पक्ष), सतम (सप्तमी) ब्रसवार (वीरवार/ ब्रहस्पतवार),श्री सप्तर्षि सम्वत 5094, राश सिंह (सुबहॖचि 6.37 बजि प्यठॖ)ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: जंगस मंज़ छि ठील्य ति
         गूल्य ति
    अ: यॆति जान फ़ऻयदॖ छ़ान्डव
         तति छु न्वख्सानॖ खऻतरॖ ति
         तयार रोज़ुन
2. मु: जऻहिल बटन छु ठोकुर ति
         च़लॖनोवमुत
    अ: जाहलत छि न्वख्सान वातॖ
         नावान
3. मु: जान गव सु युस जान वर-
         तावि
   अ: जऻनियर छु नॖ सिरिफ़ वनॖनॖ
       सॗत्यी आसान, बल्कि बऻविथ
        द्युन प्यवान
4. मु: जान छु पनुनुय पान
    अ: ब्याख ह्यॆकि तॆली जान
         आसिथ यॆलि पानॖ जान
         आसि
5. मु: जान ऒर तॖ जहान् ऒर
    अ: ऒरज़ुव छु सोरुय जान
         आसान
**************************
1. म्युल... Meeting/Connec-
            tion/Alliance/Unity
2. म्युल गछ़ुन....To be united
                To be connected
3. म्यूठ......Sweet/Kiss
4. मॊन्य.....Kiss
5. म्यॊन्ड.... Morsel/Mouth-
                   full of
6. म्यॊन्द.....Leprosy
7. म्यॊंद प्यॊन...To be afflict-
                  ed with leprosy
8. मॆथॖर......Friend
9. म्यॆतराचऻरी....Friendship/
                     Friendliness
10. म्यॆतॖरुत.....Friendship
**************************
        गीता ज्ञान : अध्याय-8 :
हे पारथ तिथय पऻठ्य यि च़ऺक्रॖ चलान
दॊहस ज़ीव ज़ात पऻदॖ सपदान
प्रकृच़ वश रऻच़ सॗत्य लय सपदान
वॊन भगवानन गीता ज्ञान
**************************
कति वुछव कऺशीरि मंज़ॖक्य तिम खांदर। ॳकिस गरस ओस खांदर आसान मऺहलुक मऺहलॖ ओस वॊलसनस यिवान। अख द्वह गऺयो वॖरॖ लागॖन्य। अख द्वह गऺयो क्रालस सॗत्य लागुन। ल्यॆजि, टऻक्य, प्यालॖ, ल्यॆजन कॊंड करुन, वॖरिबलि छप्पर करुन। अहलॖक्य-मऺहलॖक्य ॴस्य यिवान तॖ इकॖवटॖ मीलिथ वॖरॖबल तयार करान। वॖरि बापथ ज़्युन अनुन। पतॖ गऺयो अख द्वह तॊमुल छ़टुन, तॊमुल च़ारुन, अंग-ॴश्यनाव ति ॴस्य मंन्ज़्य-मंन्ज़्य नज़रा दिवान तॖ साम ह्यवान अमा पॊज़ क्वत वऻच़ खांदरॖच तयऻरी। पतॖ गऺये बानॖ सौंबॖरॖन्य, बिस्तरॖ सौंबॖरुन, कमरन हॖन्ज़ सजावठ तॖ बासान ओस ज़ि खांदर छु। कमज़कम ॴस मऺहलॖक्य पांछ़ सथ गरॖ आवॖर्य रोज़ान। तथ बजायि छु ॳज़्यक खांदर युस पतहॗय छु नॖ लगान आव कर तॖ गव कर। पौंसा छकुन तॖ तमाशा वुछुन। कुनि कॖस्मॖच नि मॆहनत करॖन्य।सोरुय छु रडी-मेड। ख्यन-च्यन, बानॖ-बठॖ, बिस्तरॖ-विस्तरॖ यि दऺपिज़ि ति माहराज़ॖ सॖन्दि दस्तारॖ प्यठॖ पऻज़ारस ताम छु सोरुय रऺडी-मेड या माहरिनि हॖन्दि लैंहगॖ प्यठॖ हय-हील सैंडलि ताम सोरुय रऺडी-मेड। न साडि फ्वाल लागुन, न दोति तिलॖ छावुन। न वॖरॖ लागॖन्य तॖ न क्राल छ़ान्डुन। ओरॖ आयि योरॖ द्रायि सऻरीय वऻत्य पनॖनि-पनॖनि जायि। म्वकल्यव खांदर।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

28.11.2018

28.11.2018,मॊन्जॖहोर (मार्ग/ मगर),गटॖ पछॖ (कृष्ण पक्ष) शॆयम (षष्ठी), ब्वदवार (बुधवार), श्री सप्तर्षि सम्वत 5094, राश कर्कट (चलान),ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************'
1. मु: ठूलॖ च़ूरि प्यठय छु मूलॖ च़ूर
         बनान
    अ: ल्वकचि च़ूरि प्यठय छु
         अथॖ दरान
2. मु: टॆंड खाव
    अ: य्यॊस लिखऻय परनॖ यी नॖ
3. मु: टोठ छु नेक
    अ: पनुन चीज़ छु रुत बासान
4. मु: टोडरमऺल्य हिसाब
    अ: पॆठ्य पॆठ्य अंदाज़ॖ लगावुन
5. मु: टरॖ मीरॖन्य राद
    अ: अपज़्यॆरि सॖन्द्य अपुज़ुय
         क़ॖसॖ
**************************
1. मीर....Leader/Title used
             for Syeds
2. मीर कारवां....Carvan lead-
                        er
3. मीर मुशऻहिर....President
            of the meeting of
            poets
4. मीरास....... Heritage/
            Ancestral property
5. मीटर.....Meter
6. मीय......Khestri/Kash-
           miri Rajput/A caste
           in Kashmiri Pandits
7. मीथ्य..... Fenugreek/A
           kind of vegetables
8. म्यॆच़.....Clay/Dust
9. म्यॆच़ि फॊल....Small quanti
                   ty of clay/dust
10. म्यॆच़ि म्वल....Having low
                cost/Very cheap
**************************
        गीता ज्ञान  :  अध्याय-8 :
ब्रह्मा सुन्द द्वह यॆलि शॊरु गछ़ान
च़राच़र ज़ीव सऻरी पऻदॖ सपदान
रात यिनस सॗत्य यॆलि लय सपदान
वॊन भगवानन गीता ज्ञान
**************************
खांदरन हॖन्ज़ त्रफ-त्रफि मंज़ छि ॳस्य कऻशिर बटॖ हना ज़्यादय पाहन गीर गछ़ान। वजह छु यि ज़ि कुनि न तॖ कुनि रऺंग्य छि सानि लंग-लंजि कऺशीरि न्यबर व्वंय जॆमिस सॗत्य जुडिथ। पानॖ छि आमॖत्य छऺकॖरनॖ हॊर-योर यि दऺपज़ि ति सऻर्यसॖय हॆन्दुस्तान किस प्रथ कूनस ताम। मगर जॆमिस सॗत्य छि तारॖ-कानॖज बराबर चलान। जंजगरॖ हालांकि छि यसलॖ जॆमिस मंज़ मगर खांदरन हॖन्ज़ रफ़्तार नज़रि तल थऻविथ छि जंजगरन हॖन्ज़ बुकिंग प्यवान रयतबद्यन ब्रुंहॖय करॖन्य। दौरॖ-दौर छि प्यवान करॖन्य ॳकिस सान ब्वकिस। ति गव ज़ि कोरिवाल्यन, न्यॆचिव-वाल्यन, सालॖरन, अंगन-ॴश्यनावन, यारन-दोस्तन, इस्तर्यन-पिस्तर्यन।
पॊत कल छि रोज़ान ज़ि गरस गछ़ि कांह रऻछ आसुन। ज़मानॖ छु ख़राब। च़ूरस गऺराह तॖ रऻछिस द्वहा। बॊड-बुज़र्ग बनॖनि कुन-ज़ॊन गरस मंज़ बॆहनावुन। तऺम्यसुन्द सबीलॖ सौंचुन। कुस करि तस सीवा कुनिरस मंज़। च़लॖ-लार छि रोज़ान। शुर्यन छॆ नॖ छुट्टी ज़्यादॖ कालस। अज़कल छु व्वंय खांदरन हुन्द मतलबॖय बदल्यॊमुत। तिम गोरि गऺयि द्वद कॖनिथ यॆलि कऺशीरि मंज़ खांदर ओस आसान। कथ छि जऻरि
**************************
 कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.11.2018

27.11.2018, मॊन्जॖहोर (मार्ग/ मगर), गटॖ पछॖ (कृष्ण पक्ष) पऻन्च़म (पन्चमी), बॊम्वार (मंगलवार),श्री सप्तर्षि सम्वत 5094, राश कर्कट (चलान), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: तेल-फॊल छु ख्योमुत सतव
         बारन्यव
    अ: इन्सानस पज़ि बऻगरिथ
         ख्यॊन
2. मु: तॆलि तोश यॆलि न्वश गरॖ
         वाति
   अ: कऻम अंद वातनॖ ब्रुहॗयिं पज़ि
        नॖ इत्यमीनान करुन
3. मु: थरि पोश वरि गोम
    अ: कांह खऺयऻश्य मुश्किलन
          पूरॖ गछ़ॖन्य
4. मु: थ्वकॖ न्यॆचुव म्वकदम
    अ: नाकऻबिल इन्सान ज़्युठ
          बनावुन
5. मु: तऺहर कमव ख्यॆयि? परद्यव,
         म्यॆ दॊप पनॖन्यव मा
    अ: पनॖनिस कुन फिरिथ रोज़ुन
          तॖ  व्वपरस कुन ध्यान द्युन
**************************
1. नामॖ निगार....Correspond-
            ent of periodical or
            newspaper
2. नामॖ अमल....Record of
            someone's deeds
3. नामॖ....Letter/Record of
4. नामो-निशान....Trace/
                        Particulars
5. नाव नॖ ह्यॊन....Forget all/
                  Be disgusted
6. नाम निहाद....So called/
      Self styled/Professed
7. नाव लगुन...To be blamed
             To be accused of
8. नावस दबॖ लगुन....To earn
              a bad name for
              oneself
9. नाव ज़िन्दॖ करुन..To revive
                            the name
10. नामज़दगी...... Nomina-
                             tion
**************************
        गीता ज्ञान : अध्याय-8 :
ब्रह्मा सुन्द द्वह रात कूत आसान
अख अख सास यॊग द्वनवय ज़ान
यमिच अस्लियथ यूगी ज़ानान
वॊन भगवानन गीता ज्ञान
**************************
यनॖ लूकन मोबायल म्यूल वारियाह कामि करनि गऺयि कम। सारिनि काम्यन हुन्द नाव ह्यॊन छु मुश्किल। पॆठ-पॆठ वुछव तॖ चिठि अख ॳकिस लेखनि गऺयि यि दऺपज़ि ति बंद। अख ॳकिस निश युन गछ़ुन गव स्यठाह कम। मोबायलॖ दऺस्य छि यिवान अख ॳकिस पऻगाम सोज़नॖ। पॊज़ हय बोज़व तॖ अख इन्कलाबाह ऒन मोबायलॖन। दावत-नामॖ या निमन्त्रन छि व्वंय दिवान मोबायलॖ दऺस्य। मगर म्यॆ तॊर नॖ फिकिरी ज़ि वुनि क्याज़ि छि सालॖ-कार्ड छापान रोज़ान। अथ छपायि प्यठ यिनॖवोल ख़रॖच ह्यकव ॳस्य ब्यॆयि कुनि कारस लऻगिथ। अज़कल छि ॳस्य द्वनवय कामि करान ति गव ज़ि मोबायलस प्यठ छि न्यमंत्रनॖच अबारत लेखानॖय लेखान पतॖ छि कार्ड ति छापान तॖ बऻगरावान पनॖन्यन अंगन ॴशनावन मंज़। यि द्वगनॖ कऻम ह्यॆकिहे कम गऺछ़िथ मगर वख़त लग्यस। दपन-बतॖ प्रथा छि म्यॆ बासान ख़तम गऻमॖच़। कुनि-कुनि जायि मा आसि बॖ ह्यकनॖ वऺनिथ मगर अज़कलॖक हालात वुछिथ छुम बासान ज़ि दपन-बतॖ रिवाज ह्यॊतुन म्वकलुन। चूंकि रून-ज़नान छि द्वनवय न्यबरॖय आसान दफ्तरन मंज़ तॖ गरस छु दरवाज़ॖ बंदॖय रोज़ान सालॖ-कार्ड वातनावुन ति छु अख मसलॖ बन्योमुत। छ़ान्डान छि अम्युक ति हल। मगर वुछुन छु यि ज़ि अज़कल छु खांदरन मंज़ वातुन स्यठाह मुश्किल बासान। शुर्यकऺट्य छि व्यस्त पनॖनिस परनस सॗत्य तिमन छॆ नॖ ब्रॖन्ज़िस ति फ़रागथ। खांदरवाल्यन ति छि जायहॖन्ज़ व्यछ़य। जंजगरन फीर्य-फीर्य ति छि लगान अज़ खखॖर। मऻन्ज़िराथ छि ॳकिस जायि, दीवॖगोन छु ब्यॆयिस जायि, बरात छि त्रॆयिमि जायि, मेखला छि च़ूर्यमि जायि, रिस्यपशन छु ब्यॆयिस जायि। हॊदॖहऺर छि खसान अज़कल खांदरवाल्यन। सालर ति छि नच़ान अकि जायि प्यठॖ ब्यॆयिस जायि। यिम दॊयिम्यव जायव प्यठॖ सालर छि आसान आमॖत्य तिमन ति छु मच़र व्वथान। अंदॖर्य अंदॖर्य छि परेशान सऻरी। न खर ख्वश तॖ न खरवोल। क्याह करि अज़कल मऻज्य तय मोल। तवय दिवान सालर ति छि कनॖ-डोल। नच़ान रोज़ान छि यथ मॊकस प्यठ सऻरीय  गोल-गोल
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

26.11.2018

26.11.2018, मॊन्जॖहोर (मार्ग/मगर), गटॖ पछॖ (कृष्ण पक्ष),च़ोरम (चतुर्थी), च़ऺन्दॖरवार (सोमवार),श्री सप्तर्षि सम्वत 5094, राश कर्कट (रऻच़हॖन्ज़ॖ 4.15 बजि प्यठॖ), ऋतु हेमन्त (चलान).....अज़ छि संकटॖ-च़ोरम (संकट निवारण चतुर्थी)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: त्यॊंगल हऻकिम
    अ: हऻकिम त्रॊश आसुन/
        हऻक्यमॖसुन्द त्रॊशर वरतावुन
2. मु: त्यॊंगलन प्यठ
    अ: बेक़रार आसुन/कन्ड्यन
         प्यठ आसुन
3. मु: तॊन्दॖरस नखॖ क्वन्डुल
    अ: ल्वकॖटिस मॊहनिविसुन्द
         बऺडिस सॗत्य द्रसॖ द्युन
4. मु: तेशल गऺयखय पशेमान
    अ: किबरस छु ज़वाल
5. मु: तेलॖ अन्दरय छु तील नेरान
    अ: ल्वकुट चीज़ ति छु म्वलुल
         आसान तॖ बकार यिवान
**************************
1.  नावऻकॖफ़.... Ignorant/
                        Unacqainted
2. नाकाम.... Unsuccessful/
                    Disappointed
3. नासाज़.......Indisposed/
                    Not of sorts
4. नाज़ेब.......Unsuitable/
                     Unbecoming
5. नादार.......Poor/Pauper/
            Indigent/Penniless
6. नाखान्दॖ.... Illiterate
7. नाख्वश..... Displeased/
                     Unhappy
8. नाख्वशगुवार...Unpleasant
                         Undesirable
9. नाचीज़.....Good for noth-
                   ing/Not permi-
           ssible/Insignificant
10. नाजऻयिज़.... Unlawful/
           Contraband/Illegal/
           Improper/Unjust
**************************
        गीता ज्ञान : अध्याय-8 :
यिम सऻरी लूख ब्रह्म लूकस ताम
छुख युन गछ़ुन मूजूद रोज़ान
युस म्यॆ प्राप्त गव छु नॖ ज़न्म प्रावान
वॊन भगवानन गीता ज्ञान
**************************
छ़ान्डॖनि द्रायि ॳस्य पनॖनि ज़बऻन्य हुन्द मूल यानि शारदा ज़बान। यि छि अख रॖच़ कऻम। असि पज़ि यिछ़न काम्यन अख ॳकिस थफ़ कऺरिथ अथ कामि अ़द वातॖनावुन। अख-ॳकिस मदद करुन तॖ यॆमिस निश यूताह
 ख़ज़ानॖ छु शारदा ज़बऻन्य मुतलक सु ॳकिस जाय वातनऻविथ तॖ पतॖ वऺतीरॖ सान बऻगरानॖच कूशिश करॖन्य। सान्यन ज़िठ्यन छु अम्युक ज्ञान वारियाह मूजूद युस गालखातस गोमुत छु यि ज़ऻनिथ ज़ि यि छि त्रऻवमॖच़ थ्वख। मगर मूल छ़ान्डुन छु स्यठाह ज़रूरी। अथ सॗत्य सॗत्य छि असि पनॖन्य ज़बान कऻशिर्य ति पानस सॗत्य पकनावॖन। युथ गछ़ि नॖ गछ़ुन ज़ि अख ज़बान छ़ान्डान छ़ान्डान रावॖरावव ॳस्य पनॖन बोल-चालिहॖन्ज़ ज़बान। राथ ओस शारिका-बवॖन, फ़रीदाबादॖ शारदा-ज़बऻन्य प्यठ अख वऺर्कशापुक प्रोग्राम करनॖ युस स्यठाह जान पऻठ्य आव वरतावनॖ। ह्यॆछनावनवऻल्य ति ॴस्य स्यठाह जान। मन गव ख्वश यि वुछिथ ज़ि असि ह्यॆच़ छ़ऻन्ड दिन्य तॖ मॊठॖरोवमुत चीज़ ब्यॆयि याद पावुन हालांकि कऻम छि चलान अथ विषयस प्यठ वारियाह कालॖ प्यठॖ। रातकि प्रोग्रामॖ सॗत्य मेलि हुर्यॆर तिमन यिम अथ मंज़ ग्वडय ख्वर त्रऻविथ छि।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

24.11.2018

24.11.2018, मॊन्जहोर (मार्ग/मगर), गटॖ पछॖ (कृष्ण पक्ष) ऒकॖद्वह (प्रथमा/प्रति),बटॖवार (शनिवार/ शनिश्चरवार),श्री सप्तर्षि सम्वत 5094, राश मिथुन (रऻच़ हॖन्ज़ॖ 2.18 बजि प्यठॖ), ऋतु हेमन्त (चलान)...चूंकि पगाह छि द्वय रावान, पगहुक वॊहरवोद यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: तॊम्लॖ सेरस यॆलि शिक्मस
         अंदर बतॖ श्रॆपि, कथ श्रॆपि
          ना
    अ: कथ व्यॆपरावॖन्य छॆ नॖ
          मुश्किल
2. मु: तनि नॖ ज़ऺट, ॴसस नॖ म्यॆट
         बिहिन नॖ जाय
    अ: न्यथॖनॊन तॖ अथॖ छॊन
3. मु: तिम गोरि गऺयि द्वद कॖनिथ
    अ: तिम द्वह गऺयि/बदलुन/
         हालात बदलॖन्य
4. मु: तॊमलस मंज़ कनॖ
    अ: स्यठाह कम तेदाद
5. मु: तलॖ तलॖ पलॖ बाह शथ
    अ: अंदॖर्य-अंदॖर्य वारियाह
         ख्वडॖफॆचॖ वोल
**************************
1. नाकिस....... Worthless/
                       Mean
2. नागुज़ीर......Inevitable/
                    Indispensable
3. नागवार....Unplatable/Un-
           pleasant/Offensive
4. नालायक़..... Inefficient/
           Incapable/Unquali
           fied/Unintelligent
5. नामोकूल....Unreasonable
            Improper/Indecent
            Absurd/Silly
6. नामोलूम....Unknown
7. नामुम्किन.... Impossible
8. नामुनऻसिब....Improper/
             Unbecoming/
             Unfit/Unworthy
9. नामंज़ूर...... Rejected/
             Refused/Turned
             down/Disallowed
             Disapproved
10. नावऻजिब.....Improper
**************************
        गीता ज्ञान : अध्याय-8 :
हे अर्ज़न युस पज़ि मनॖ लगातार
म्यॆ परम ब्रह्मस स्वरान बराबर
सु यूगी सऺहल पऻठ्य म्यॆ प्रावान
वॊन भगवानन गीता ज्ञान
**************************
व्वंय ह्यॆच़ॖख कस्मॖ-कस्मय करॖन्य हवनन प्यठ ज़ि यॆमि ब्रौंहकुन करन कऻशिर्य बटॖ खांदरन प्यठ गरॖ अच़ुन या गरॖ च़ानुन रसॖम बंद।
अज़ प्यव सतीसर फौंवडेशन वाल्यन ति याद ज़ि यि रसॖम छु नॖ कांह अहमियत थवान मगर अफ़सूस छु ज़ि असि कऻशिर्य बटन छु नॖ शायद फिकिरी तरान ज़ि ॳकिस हवनस ति छु सुय तऻसीर युस दऺहन जायन दऺहन हवनन तऻसीर छु ति क्याज़ि यिमय बख़त ॳकिस हवनस वातान छि तिमय बख्त छि कमज़कम प्रथ हवनस प्यठ नज़र यिवान। ॳस्य छि नॖ ह्यकान यिमन अलग नवन हवनन हुन्द ख़र्चि कुनि ब्यॆयि कामि लागुन। करेलाहस मंज़ बूज़ म्यॆ ज़ि तिमव कॊर दऺहन हवनन बजाय कुनुय हवन तॖ बचोवख तक़रीबन पांछ़ क़रोर रोपियि तॖ लोगुख सु पौंसॖ पनॖनिस गामस नव्यर दिनॖ बापथ। यिमन त्रॖहन वऺरियन मंज़ आसॖहऻन असि त्रॖह नय तॖ दऺह जंजगर गऻमॖत्य खड़ा तॖ अज़ प्यॆहॆनॖ असि क़स्मॖ-क़स्मॖय करॖन्य या च़ेतावनी दिन्य ज़ि के के रिज़्वाटस मंज़ खांदर करुन कऺरिव बंद। कसम पज़ि असि करुन ज़ि ज़ऻच़ न्यबर वर न  छ़ान्डनस, क़सम पज़ि असि करुन ज़ऻच़ न्यॆबरिम रस्म नॖ अपनावनस। मगर तथ दिन कऻशिर्य बटॖ कनॖ-डोल। क़सम पज़ि असि करुन पनॖन माजि-ज़्यव रऺछ़रावनॖ बापथ। पनॖन्यन गरन मंज़ पनॖन्यन शुर्यन पनुन अतीत हावनस तॖ बावनस। कऻशुर लेखुन ह्यॆछनावुन, कऻशुर परुन ह्यॆछनावुन। यिमव काम्यव सॗत्य यी सऻनिस समाजस व्वदबव। मेलि प्रज़नथ। बचन सऻन्य संस्कार यिम सान्य ज़िठ्य असि पुशॖरऻविथ गऺयि
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

22.11.2018

22.11.2018, कार्तिक (कतक) ज़ूनॖ पछॖ (शुक्लॖ पक्ष), च़्वदह (चतुर्दशी), ब्रसवार (वीरवार/ ब्रहस्पतवार),श्री सप्तर्षि सम्वत 5094, राश वृष (रऻच़हॖन्ज़ि 11.35 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: तछान तछान नशान कोह
    अ: लगातार कूशिश करनॖ
         सॗत्य छि मुश्किल कऻम ति
         अंद वातान
2. मु: तापस मंज़ दऻर छऺच़रऻवमॖच़
    अ: वख ज़ायि कऺरिथ ति कॆंह
         हऻसिल नॖ सपदॖमुत
3. मु: ताह करतम शाह बनावथ
    अ: चीज़स वातनॖ सॗत्य छु
         चीज़स दार नेरान
4. मु: तालवस लोरि काह जंगॗ
         विज़ि नॖ अख ति
    अ: वख्तॖ विज़ि नॖ चीज़ अथि
          युन
5. मु: ताबस छु लाब
    अ: ताब करनॖ सॗत्य छु फ़ऻयदॖ
         मेलान
**************************
1. नान.....Bread
2. नान्य...Grand mother
3. बुड्यबब....Grand father
4. नावल.....Novel/Fiction
5. नावल निगार.... Novelist
6. नऻविद.....Barbar
7. नऻयिज़....Lady barbar/
                   Barbar's wife
8. नावॖ बॊड.... Having great
                       prestige
9. नाव प्यॊन......To get a
             name/To become
             famous
10. नान गार......Landless
**************************
        गीता ज्ञान : अध्याय-8 :
यऺन्द्रयन हॖन्दि दरवाज़ॖ रूकिथ
मन हृदयस मंज़ डंजि थऺविथ
ज़ेनॖमॖत्य मनॖ मसतकस प्रान दारान
वॊन भगवानन गीता ज्ञान
**************************
लोल छु आमुत शीना छावॖहऻव। शीनॖ भगवाना बनाहऻव। थ्वसि थ्वसि शीना वुछहऻव प्यवान। शिशरगऻन्टॖ फॖटॖरऻव्य फॖटॖरऻव्य ख्यमहऻव। शीनस तल दॊबरावहऻव द्वदॖ-गडॖ मलऻय त्रऻविथ, मऺदरेर  मिलनऻविथ तॖ शीना मंज़ त्रऻविथ।  गन्टॖ दॊयि गन्टॖ पतॖ कडहऻव यि गऺडवॖ तॖ ख्यमहऻव मलाय-कुल्फी। लोल छु आमुत वन्दॖ वुछनुक सु ति कऺशीरि हुन्द वन्दॖ। वऺट्य-दारि प्यठ बिहित वनुन शीना प्यतो-प्यतो। म्वगॖल्य चाय तॖ छ़िरॖ-च़ॊट ख्यॆन्य या त्वमलॖ च़ॊट बऺदरऻविथ ख्यॆन्य न तॖ मकाय-च़ॊट माछ मऺथित तॖ म्वगॖल्य चाय च्यॆन्य, फ्यरनाह छ़ॖनिथ तॖ कांगरा हत्बॖ-नार या पन्नॖ-च़नि हुन्द नार बऺरिथ तपॖन्य। लोल छु आमुत शीनॖ-जंग करनुक। लोल छु आमुत तुलॖकतरिस प्यठ पकान पकान रिकिन गछ़नॖच। लोल छु आमुत यि नज़ारा अकि फिरि ब्यॆयि वुछनुक। यॆतिक्यव तापॖ-च़ंज्यव निशि राहत मेलनुक लोल छु आमुत। मगर क्याह करव। हालातव कऺर्य गीर। कस खारव तख्सीर। शायद ओस खॊट सोनुय तक्दीर ज़ि च़लुन प्यव त्रऻविथ सोरुय सु जायदादॖ तॖ जऻगीर। याद प्यवान रोज़ान स्व मऻज-कऺशीर
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.11.2018

21.11.2018, कार्तिक (कतक) ज़ूनॖ पछॖ (शुक्लॖ पक्ष) त्रुवाह (त्रयोदशी), ब्वदवार (बुधवार),श्री सप्तर्षि सम्वत 5094, राश मेष (चलान),ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पीर व्वसताद
    अ: ग्वर गव स्यठाह थॊद
2. मु: पीरव मोर दांद, बॖ क्याज़ि
         वनॖ कऻन्सि
   अ: लूकहॗन्दिस मामलस मंज़
         ज़ंग छ़ॖनॖन्य
3. मु: पॊतरॖ बॊछि यॊछ क्वछि
    अ: नॆ-पॊतुर ॴसिथ लूकन
        हॖन्द्यन शुर्यन वलॖ-वलॖ करुन
4. मु: पूत स्वपूत तॖ कॊपूत
    अ: शुर्यॆन हॖन्द्य कॖस्म
5. मु: पऺहर गव ज़ि वऺहर गव, द्वह
         गव ज़ि कॊह गव, पछ गव
         ज़ि वछ गव रयथ गव ज़ि
         ख्यथ गव
    अ: यॆलि व्वज़ुम द्युतमुत पऻन्सॖ
          वापस यिनुक व्वमेद आसि
          नॖ
**************************
1. नास.....Snuff
2. नास्ति मुश्क.....A pinch of
                          snuff
3. नाज़िर... Beholder/Spec-
            tator/Supervisor/
            Inspector/A court
            official
4. नाज़नीन....Lovely/Beauti
            ful/Charming
5. नारजील.... Coconut
6. नायाब..... Unprocurable/
                    Rare/Scarce
7. नादिर...... Curious/
            Wonderful/Strange
8. नादिम...... Regretful/
             Ashamed/Repent-
             ing
9. नाज़.....Coquetry/Play-
            fulness/Whims/
            Elegance
10. नाज़ करॖन्य....Be full of
                           pride
**************************
        गीता ज्ञान : अध्याय-8 :
वीदन ज़ानन वऻल्य यिम व्यदवान
सत चित आनन्द पद अविनऻशी वनान
सुय परम पद वनय छ़ॊचरॖ सान
वॊन भगवानन गीता ज्ञान
**************************
कऻशिर्य बटॖन हॖन्द्य शुर्य छि परनस लऻर्य। वारॖकारॖ गऺयि बजाह पऺरिथ लीखिथ। मगर लऺगय होर-योर। सरकऻर्य नोकरी छि स्यठाह कम मेलान। प्राइवेट नोकरियन छि तफ कऺरिथ ज़ि पताह छु नॖ कर करनस जवाब। ज़्यादॖ छुटी ह्यनस नॖ वार। पऻन्सॖ आव कऻफी तॖ अथ सॗत्य सॗत्य बडेयि अख़राजात ति कऻफ़ी। रिश्तन हॖन्ज़ अहमियत ति ह्यॆच़ॖन्य कम गछ़ॖन्य वारॖ वारॖ। अज़कल छु ॴश्यनाव व्वंय कनन मंज़ यानि मोबायलस मंज़। दिलस मंज़ छु कमॖय पाहन। अख ॳकिस निश वातुन छु मुहाल। फ़ोनस प्यठॖय छु चलान व्यवहार। खान्दर करुन ति छु अज़कल त्रकरि मंज़ तोलॖ-बार कऺरिथ यिवान करनॖ। पॊतकालि दपान ॴस्य दाज-दहेज।मगर अज़कल छु नॖ दाज-दहेज बऺल्कि नाप-तोल। पऻन्सुक नाप-तोल। लऺडकॖ कॊताह छु कमावान तॖ लऺडकी कोताह छि कमावान। लऺडकॖ अगर इन्जीनियर छु तॖ लऺडकी क्याह छि। कदुक नाप-तोल। थॊद कोताह छु।छ़ॊट कऻच़ाह छि। व्यॆठ छा किनॖ निच छि। अज़कल छु फ़ीतॖ सॗत्य सॗत्य पकान। पतॖ गव ज़ि शुर्यन हुन्द हिसाब यानि कुस रछि, कति रोज़ि, कऺमिस निश रोज़ि, यि परेशऻनी यॊदवय दूर थावॖन्य छि तॆलि छु कुनुय हल ज़ि शुर नॖ ज़्यॆवरावुनुय। म्यंगॖदगॖय छे नॖ। रोज़ पानस च़ॖ तॖ बॖ या बॖ तॖ च़ॖ। बाकय नाव पकि पानय। यीरॖ गछ़ि या बऺठिस लगि। वख्त करि फ़ऻस्लॗ पऻन्य-पानय।बॖ नो व्वंय ब्यॆयि कॆंह ज़ानय।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

20.11.2018

20.11.2018, कार्तिक (कतक) ज़ूनॖ पछॖ (शुक्लॖ पक्ष), बाह (द्वादशी), बॊम्वार (मंगलवार),श्री सप्तर्षि सम्वत 5094, राश मेष (शामन 6.33 बजि प्यठॖ), ऋतु हेमन्त (चलान), द्रठॖपऻन्च़ुक (पंचक) ति म्वकलि अज़ शामन 6.33 बजि प्यठॖ......
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पीरॖ सुन्द यज़थ च़ूरॖ सॖन्ज़
         रऻछ
   अ: बॆ-पछ़ इन्सानस प्यठ
        बरोसॖ
2. मु: पीर नॖ बॊड यॆकीन बॊड
    अ: यछ़ तॖ पछ़ गऺयि सारिवॖय
         ख्वतॖ बऺड
3. मु: फ्वति-फ्वति फिरिथ छ़ॖनुन
    अ: वुछान वछान बजर युन
4. मु: पूत्य गऺन्ज़रावॖन्य ठूलन
         फ़ाह दिनॖ ब्रौंठॖय
    अ: ख़यऻली प्वलाव
5.मु:पऺछ़िस पॊछ़ खरान,खांदारस
       द्वशवय, खांदारिनि त्रॆशवय
   अ: प्यतॖरनवऻलिस छि सारिनॖय
       हॖन्ज़ फॊशान/प्यतॖरनॖवऻलिस
       छि सऻरीय ग्वबान
**************************
1. ना....No/Not
2. नाल..Collar/Horse-shoe
3. नऻल्य....Put on/Wear/
                Drain
4. नऻली-नाल...Very close
5. नाग.... Spring/Snake
6. नागॖराद...A small stream
               flowing from a
               spring
7. नाफ़लक.... Disobedient
8. नास्तिक....An atheist/
                    Non-believer
9. नबॖ-दॊर...Clear sky
10. नबॖज़....Pulse
**************************
       गीता ज्ञान  : अध्याय-8 :
युस भक्त अंत समयस दारि ध्यान
यूग बलॖ ब्रुकुटी दरमियान थवि प्रान
एकाग्र मन स्वरिथ ब्रह्म प्रावान
वॊन भगवानन गीता ज्ञान
**************************
बॖ छुस मोबायलॖ दऺस्य "वर माला चलावान। यि ग्रुप कॊर म्यॆ खडा पनॖनि समाजि बापथ यथ मंज़ लडकॖ तॖ लडकी पनॖनि बापथ जीवन-सऻथी ह्यकन छ़ऻन्डिथ। बूज़ितव यि वर-माला छु मंज़िमयऻर्यसॖन्ज़ कऻम करान। कऺशीरि मंज़ ॴस्य वख्तॖ अकि मंज़िमयऻर्य आसान फेरान गरॖ-गरॖ ट्यॆकिनि ह्यथ। ट्यॆकिनि मिलनावान, कोरिवाल्यन तॖ लऺडकॖवाल्यन पानॖवॖन्य म्युल करनावान तॖ पनॖन्य रोटी-रोज़ी कमावान। मंज़िमयऻर्य कार ॴस्य तति कऺशीरि मंज़ वारियाह लूख करान, गुरु जी, नऻविद, सॖच़, तॖ अख अलग तबकॖ युस सिरिफ यिहऻय कऻम ओस करान। मुसलमान मंज़िमयऻर्य ॴस यस्लॖ नज़र यिवान। असि ॴस यिमन प्यठ स्यठाह यछ़-पछ़ ति। कऺशीरि न्यबर रऻव्य यिम मंज़िमयऻर्य ति। व्वंय छि ॳस्य वर छ़ान्डनॖ बापथ मैगज़ीनन हुन्द मदद  ह्यवान। यिम मैगज़ीन ॴस्य तमि सातन ति यमि दऺस्य सऻन्य यि ज़रूरथ ॴस या ज़रूथ छि पूरॖ गछ़ान। म्यॆ वोत वुछान ज़ि सऻन्य लऺडकॖ तॖ कोरि छि वऻत्यमॖत्य च़ॊयत्रॖह-पऻन्च़त्रॖह वुहर्य ति तॖ छि वुनि अनॖहॖहर्य। क्याह वजह छु यॆमि किन नॖ यिम खान्दर ह्यकान छि कऺरिथ अथ प्यठ छु ना असि ग़ोर करुन। पथ कालि ॴस्य च़ॊयत्रॖह वुहरिस लडकस या लऺडकी त्रॆ-च़ोर शुर्य आसान ज़ामॖत्य। मगर अज़कल तिहुन्द अनहुर आसुन छु हऻरऻनीहॖन्ज़ कथ। हेठ क्याह छि यिवान ज़ि तनख्वाह ॳकिस छु ज़यादॖ तॖ ॳकिस छु कम, क़द। अख छु थ्वद तॖ अख छु छ़ॊट, नोकरी, अख छु ॳकिस जायि तॖ अख छु ब्यॆयिस जायि। पनॖन जाय त्रावुन्य छिनॖ यछ़ान। शायद छु यि अख वजह ज़ि सऻन्य लऺडकॖ या कोरि छि ज़ऻच़ न्यबर पनुन सऻथी छ़ान्डान युस ॳकसॖय जायि कऻम करान छु। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

19.11.2018

19.11.2018, कार्तिक (कतक) ज़ूनॖ पछॖ (शुक्लॖ पक्ष) काह (एकादशी), च़ऺन्दॖरवार (सोमवार)श्री सप्तर्षि सम्वत 5094, राश मीन (चलान), ऋतु हेमन्त (चलान) द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पॊरमुत छु गॊरमुत स्वन
    अ: गाटॖजारस छु प्रथ कुनि
         जायि म्वल
2. मु: पॊत्रॖ खर हा च़ॊल, बबा
         पानॖ रटुन तॖ खऺसिथ अनुन
    अ: नाफ़रमादऻरी हॖन्ज़ अख
          मिसाल
3. मु: पॊज़ वनख पानॖ ज़न नटख
         अपुज़ वनान लगी रस
    अ: पॊज़ वनुन छु स्यठाह क्रूठ
4. मु:पूशुख ति नय च़ॊलुख ति ना
    अ: यस नॖ पोशन पाय आसि
          तऺमिस पज़ि च़लुन
5. मु: पॊट मऺन्डिथ, नॊट खसिथ,
         गाव प्रऺसिथ, कॊट पऺरिथ तॖ
         ह्यन्दॖव्यन्दॖ च़ऺटिथ
   अ: कॆंच़न चीज़न हुन्द म्वल छु
        अज़मऻयिथ ननान
**************************
1. नदुर.....Lotus root
2. नदारथ....Nil/Not present
            Disappearing from
            the view
3. नदामथ.... Humility/
                    Repentance
4. नजात.... Salvation/Free-
            dom/Liberation/
            Escape
5. नजासत.....Filthy/Impure
                     Unclean
6. नजूम........ Astrology
7. नजूमी........ Astrologer
8. नाहक़....Unjustly/Falsely
9. नाहकस प्यठ....In vain
10. नहुसत..... Misfortune/
                 Lethargy/Evil
                 influence
**************************
        गीता ज्ञान  :अध्याय-8 :
युस लगातार अब्यास रूप यूगवान
ओरॖ योर नॖ गछ़न वालि चितॖ सान
ध्यान कऺरिथ ब्रह्मस स्वरान
वॊन भगवानन गीता ज्ञान
**************************
कऺशीरि मंज़ सपुद अख संगीत प्रोग्राम राथ/ऊतरय यथ नाव ओस श्यशरंग। म्यॆ वॖछ्य अमिच अख झलक फैसबुकस प्यठ। बॖ गोस हऻरान यि वुछिथ ज़ि अथ प्रोग्रामस मंज़ छु ल्वकट्यव ल्वकट्यव बच्चव ब्यॊन ब्यॊन साज़ वऻयमॖत्य, बऻथ ग्यॆवमॖत्य।
अथ मंज़ हिसॖ निनॖवऻल्य बासेयम सऻरि कऺशीरि मंज़ बसकीन लूकन हुन्द्य शुर्य। बडॖ बॆहतरीन पऻठ्य बऺड्य मोसीकार दिवान तरबियत ल्वकट्यन शुर्यन साज़ ह्यॆछनस मंज़, बऻथ ग्यवनस मंज़। फेसबुकस प्यठ वुछिथ बास्योम ज़ि पनॖन संस्कृति बचावनॖ बापथ कऻच़ाह मॆहनत छि करान कऺशीरि मंज़ रूज़िथ मुसलमान बऻय। पुशतऻनी साज़-संगीत रऺछ़रावनॖच अख जान मुहिम आयि म्यॆ नज़र फॆसबुकस प्यठ। यि वुछिथ छु म्यॆति मन करान ज़ि असि ति पज़ि कऻशिर्य बटॖ-शुर्यन हुन्द अख बॊड प्रोग्राम करुन यथ मंज़ ॳस्य पनॖन्यन संस्कारन रऺछ़रावनॖ बापथ कॆंह क़दम ह्यकव तुलिथ। हालांकि जे के विचार मंच छु गाशॖ तारुख प्रोग्राम करान मगर अख सामूहिक प्रोग्राम करनॖच छि ज़रूरथ यथ मंज़ सऻरी शुर्य सॊम्बरिथ कऻशिर्य ज़बऻन्य मंज़ ह्यकन वनिथ, साज़ वऻयिथ, डानस कऺरिथ, गीता पऺरिथ, संस्कारन, रीति-रिवाजन प्यठ  पनॖन व्यच़ार वनिथ। ज़िठ्यन हॖन्ज़ राय त्राय थऺविथ। अमि कॖस्मुक अख सामूहिक प्रोग्राम करनुक ह्यकव सूंचिथ। युथ प्रोग्राम करुन छु म्यॆ बासान सतन हवनन बराबर। यि करनॖ सॗत्य मॆलि सऻनिस समाजस अख थोद मुक़ाम ति म्यॆ छु यॆकीन।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

18.11.2018

18.11.2018, कार्तिक (कतक) ज़ूनॖ पछॖ (शुक्लॖ पक्ष) दऺहम (दशमी) आथवार (रविवार/ एतवार), श्री सप्तर्षि सम्वत 5094, राश मीन (दुहचि 10.2 बजि प्यठॖ), ऋतु हेमन्त (चलान) द्रठॖपऻन्च़ुक (पंचक)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1.मु: पूरस छु पूर्यॆर छॊनिस अन्यर
   अ: पूरॖ कॖनॖनस छु पूर्यॆर तॖ छॊन
         कॖनॖनस गाटॖ
2. मु: पनुन हय मारि शिहलिस
         त्रावि
   अ: आबॖ ख्वतॖ छु रथ म्वट
         आसान
3. मु: पनुन यज़थ छु पनॖनिस
         अथस मंज़
    अ: पानस यज़थ थवुन छु
          पानस ताम/गाटॖजारस छु
          म्वल
4. मु: पनॖन पऻज़ारॖ ब्यॆयि सॖन्दिस
         कलस
    अ: ग़ल्ती करॖन्य पानॖ मटि
         खारॖन्य ब्यॆयिस
5. मु: पनुन रथ पानस मथ
    अ: पनॖनी बापथ कऻम करॖन्य
**************************
1. नऺर....Arm
2. नर....Male
3. नार...Fire
4. नरम..Soft/Flexible/Slow
5. नरमी...Softness/Mild-
              ness/Gentleness/
              Tenderness
6. नरमावुन....To make soft/
           To pacify/To soften
7. नरम दिल...Kind hearted/
                     Gentle
8. नदीम....One who offers
                 wine
9. निडर.....Fearless/Daunt-
                 less
10. नऺर्गिस...Narcissus
                   flower
**************************
        गीता ज्ञान  :  अध्याय-8 :
हे अर्ज़न च़ॖ कर हमेशि म्यऻन्य सुमरन
यॊद कर्म तॖ य्वद कर म्यॆ अर्पन
म्यॆ प्रावख कर लगातार म्योन ध्यान
वॊन भगवानन गीता ज्ञान
**************************
रातक्यन म्यान्यन कॆंच़न लऻनन जोडॖ बॖ ब्यॆयि कॆंह मिस्रॖ यिम म्यॆ लीख्यमॖत्य छि तॖ अदॖ यी म्यॆ तसला ज़ि म्यॆ वातनऻव पनॖन कथ पनॖनिस समाजस ताम।
कनफ्यूज़ शुर गव छ़ान्डान मदर-टंग
ॴरिम मोल पऻरिम माजि रऺगॖ-डंग
अख वनान सनडे दॊयिम आथवार
कर्मॖलीखाये कर नमस्कार

खरस नर नरस खर मेलान म्यॆ बूज़मुत
कस यी कुस लानि दयन छु सूंचमुत
लुख गछ़ान नाहक नारोनार
कर्मॖलीखाये कर नमस्कार

पालान शुर्य ॳस्य कमि लोलॖ सान
अख वोत अम्रीका तॖ अख जापान
ॳड्य छि च़्रंगान तय ॳड्य लाचार
कर्मॖलीखाये कर नमस्कार

जऻरी अगर रूद यिहोय दॊस्तूर
पऻरिम लडकॖ तय कऻशिर्य कूर
कति रोज़ि बटॖ तय बटॖ परिवार
कर्मॖलीखाये कर नमस्कार

रॊख बदलोव व्वंय हालातव
रोवमुत चीज़ व्वंय कति छ़ान्डव
गऻमॖत्य प्रथ रंगॖ ॳस्य तार तार
कर्मॖलीखाये कर नमस्कार

यिमन लऻनन परान परान छु म्यॆ बासान ज़ि म्यॆ थऻव्य पनॖन व्यच़ार त्वहि सारिनीय ब्रौंहकनि। फऻस्लॖ करुन छु ज़रूरी ज़ि ज़ाच़ न्यबर वर छ़ान्डुन छा वऻजिब किनॖ न।
यथ कथि दिमव यॆती थख
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
   नऺविव तॖ फॊलिव
     भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

17.11.2018

17.11.2018, कार्तिक (कतक) ज़ूनॖ पछॖ (शुक्लॖ पक्ष), नवम (नवमी), बटॖवार (शनिवार/ शनिश्चरवार), श्री सप्तर्षि सम्वत
5094, राश कुम्भ (चलान),ऋतु हेमन्त (चलान),द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पनुनॖय पॊन छु दारस
         फाटॖनावान
    अ: इन्सान सॖन्द्यन ॴबन छि
         पनॖनी नंगॖ करान
2. मु: पनॖनॖय ज़ागान कुल्फस तॖ
         तऻरिस, पनुनुय कुस ताम
         सन ह्यथ द्राम
   अ: पनॖनिस प्यठ ति छि पछ़
         करॖन्य मुश्किल
3.मु:  पनॖनि बछि अगर अनिमॖ
         आसि कऻछ़ा मछि गछ़न
         पऻदॖ
   अ:  मायि हत्यन छि नॖ छ़ायि
         गित्य गछ़ान
4. मु: पनॖन्य वदनावॖन्य तॖ परॖद्य
         असनावॖन्य
   अ: पनॖन्यन द्वख वातॖनावुन तॖ
         परद्यन स्वख
5. मु: पनॖन्य नम छि पनॖन्य थर
         कशान
    अ: पनॖनी छि यिवान अकार-
          बकार
**************************
1. नच़ुन....To dance
2. नच़नावुन......To make
                someone dance/
                Cause to dance/
                Harass
3. नच़नगॊर.....Dancer
4. नऺज़दीक.....Near/Close/
               In the vicinity of/
               About
5. नऺज़दीकी....Nearness/
                     Proximity
6. नऺज़ॖल.......Bad cold
7. निर्दोष...... Innocent/Not
              guilty/Taintless/
              Faultless
8. निर्धन....... Poor/Money-
              less/Penniless
9. निर्बल.......Weak/Power-
              less/Without
              strength
10. निरा.......Without/Un-
              alloyed/Pure/
              Mere/Single/
              Entire/Only
**************************
         गीता ज्ञान : अध्याय-8 :
हे अर्ज़न युस प्वरुश अंत समयस
यि सौंचान सौंचान त्यागान शरीर
सु ती प्रावि युस तस ख़याल आसान
वॊन भगवानन गीता ज्ञान
**************************
पऺत्यम्यव त्र्यन च़्वन द्वहन प्यठॖ वोत म्यॆ वनान ज़ि ज़ऻच़ न्यबर खांदर करनॖ सॗत्य कोताह ज़ख छु वातान असि, सऻनिस गरस, सऻनिस समाजस वारियाहि रऺन्ग्य।यि छु व्वंय असि सौंचुन ज़ि किथ पऻठ्य ह्यकव ॳस्य अथ चीज़स रोक लगऻविथ।
कर्मॖलीखायि प्यठ छि म्यॆ कॆंह पद लीख्यमॖत्य यिथ पऻठ्य:
तोतस सॗत्य नॖ तोतस वार
गव तोतस कावस सॗत्य प्यार
तोंति हॊल ब्रग वुछान लाचार
कर्मॖलीखाये कर नमस्कार

काकन थवि व्वंय ट्यॆकिने ताकस
सूंचुन क्याह नेरि वुछितॖय ज़ातकस
इन्टरन्यटस प्यठॖय चलान कारॖबार
कर्मॖलीखाये कर नमस्कार

सोपोरस सॗत्य म्यूल बंगॖलोर
मलॖपोरस सॗत्य म्यूल मयसोर
इन्टरकास्ट खांदरव रऺट रफ़्तार
कर्मॖलीखाये कर नमस्कार

कऻशिर कूर वऻच़ कर्नाटक
नारस नरि दी पेरैंट नाहक
क्या फ़र्ख व्वंय सु स्वनुर छा या खार
कर्मॖलीखाये कर नमस्कार

तीज़मालि तरजमॖ कुस करि कन्नडस
तेलगो फिकिरी कर तरि व्वंय सरस
ब्यॊन ब्यॊन ज़बानव तुल व्वथवार
कर्मॖलीखाये कर नमस्कार....
      (बऻथ छु जऻरी)
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.11.2018

16.11.2018 कार्तिक (कतक), ज़ूनॖ पछॖ (शुक्लॖ पक्ष), ॴठम (अष्टमी), शॊकुरवार (शुक्रवार/ जुम्मा), श्री सप्तर्षि सम्वत 5094, राश कुम्भ (चलान), ऋतु हेमन्त, द्रठॖपऻन्च़ुक (पंचक) चलान
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पनॖन क्वकॖर नय बद
         आसि ब्यॆयि सॖन्दि गरि
         क्याज़ि त्रावि ठूल
   अ: अगर नॖ पनॖन बऻच़ ख़राब
        आसन व्वपरन क्याज़ि
        तारन फ़ऻयदॖ
2. मु: पन्ज़ि हुन्द पूत
    अ: युस ज़्यादॖ टोठ छु आसान
         सुय छु तक्लीफ़ तुलान
3. मु: पनुन मुहिम छु पानय वथ
         हावान
   अ: मुश्किलन मुक़ाबलॖ कऺरिथ
         छु इन्सान वति लगान
4. मु: पनुन पऻज़ारॖ तॖ ब्यॆयि सुन्द
          दुसॖ
    अ: पनॖन कमऻय छि ब्यॆयि
          सॖन्ज़ि कमायि ख्वतॖ जान
5. मु: पनॖन्यव ख्वतॖ छि परदी
         जान
   अ: कुनि विज़ि छु व्वपर जऻनिर
         करान
**************************
1. नसतालीक.... Script of
                  Urdu/Kashmiri
2. नॊसखॖ ..... Prescription
3. निशात......Delight/Nishat
                     Garden
4. निशान.....Mark/Sign/
                 Trace/Flag/Spot
5. निशान दिही....Identifica-
                          tion
6. निशस्त......Seat/Posture/
          The pedestal of an
           idol, an assembly/A
        meeting/Association
7. निश.........Near
8. नशॖ....Intoxication/Pride
9. नशॖ वसुन...To come to
                      one's senses
10. नशॖ खसुन....To become
                          Intoxicated
**************************
      गीता ज्ञान  : अध्याय-8 :
अंत समयस युस म्यॆ स्वरान
नाशवान शरीर त्यऻगिथ छु गछ़ान
म्यऻनिस स्वरूपस छु प्राप्त सपदान
वॊन भगवानन गीता ज्ञान
**************************
ज़ऻच़ न्यबर वर छ़ान्डुन छु नॖ सानि समाजि बापथ कुनि ति तरीकॖ फ़ऻयदॖमंद अल्बतॖ सऻनिस समाजस मंज़ दरार पऻदॖ करनुक अख ज़रियि, म्यॆ बासान। कुनि न तॖ कुनि रंग्य छु रिश्तन छ़्यनरावान तॖ गरिक्यन बऻच़न अख ॳकिस निश ब्यॊन थावनुक औवज़ार बनान। कऺशीरि ॴस्य ॳस्य वनान ज़ि यि गयि कर्मॖलीखा युस यॆमिस ज़न्म-सऻथी बन्यव। तमि सातॖ तॖ तति कऺशीरि मंज़ ओस नॖ ज़ऻच़ न्यबर वर छ़ान्डनुक रिवाज। यॊदवय कुनि विज़ि कांह ओस करान खांदर ज़ऻच़ न्यबर तमिस ॴस्य दपान ज़ि यि छु गोमुत यलॖ। ॳमिस छु नॖ वथ हावनस कांह। मगर कऺशीरि न्यबर नीरिथ बदलेयि कर्मॖलीखायि हॖन्ज़ त्राय तॖ कर्म भूमि बदलनस सॗत्य सॗत्य बदल्यऻव कर्मलीखायि हुन्द मतलब ति। म्यॆ छु प्यवान याद ज़ि "ए महोब्बत ज़िन्दाबाद,
ईश्वर लीला अपरम्पार
मंत्र ज़पान ॳस्य बारम्बार
कर्मॖलीखाये कर नमस्कार"
व्वंय छि सऻरी यलॖ गऻमॖत्य। यॆमिस युस टारि ख्वत, सु वातान वोत तॊत, क्याह फ़र्ख छि व्वंय सु स्वनुर छा या ख़ार, कर्मॖलीखाये कर नमस्कार।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

15.11.2018

15.11.2018, कार्तिक (कतक) ज़ूनॖ पछॖ (शुक्लॖ पक्ष), सतम (सप्तमी), ब्रसवार (वीरवार/ ब्रहस्पतवार),श्री सप्तर्षि सम्वत 5094, राश कुम्भ (रऻच़हॖन्ज़ि 10.16 बजि प्यठॖ),ऋतु हरुद (शरद) (चलान)..द्रठॖपऻन्च़ुक (पंचक) ति छु शुरु..सतम हुन्द वॊहरवोद छु अज़
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पनॖनि वॊडि छु नॖ कऻन्सि
         मस कोस्मुत
    अ: कॆंह मसलॖ छि तिथ्य यिमन
        ब्यॆयि सॖन्दि मदतुक ज़रूरथ
        छु प्यवान
2. मु: पननि हांच़ि म्वकलव पर
         हांच़ि नॖ कॆंह
    अ: व्वपरॖसॖन्ज़ि बलायि तलॖ छु
         नॖ इन्सान म्वकलान
3. मु: पनॖनि पनॖनि जायि छि
         सऻरी ख्वजॖ
    अ: कांह छु नॖ पानस ल्वकुट
         या वऺसिथ आसान
4. मु: पनॖनि गरि हाख-वुगरॖ ब्यॆयि
         सॖन्दि गरि प्वलावॖ
    अ: ब्यॆयिसॖन्दि गर्युक प्वलाव
          छु नॖ गरिकिस हाकस
          बराबर
5. मु: पनॖनि अथॖ रावरुन तॖ ब्यॆयि
        सन्दि अथॖ रऺछ़रुन छु बराबर
    अ: पनॖन्य कऻम पानॖ करॖन्य छि
         बॆहतर/ब्यॆयिस प्यठ गछ़ि नॖ
         कऻम त्रावॖन्य
**************************
1. नज़र....Sight/Look/View
           Observation/Vision
           Care/Supervision
2. नज़र-बंद....Detained/
           Under arrest/Strict-
           ly watched
3. नज़र अंदाज़ करुन....To dis
                                 regard
4. नज़र बद....Evil eye
5. नज़र पोरॖन्य....To come
          under influence of
          evil eye
6. नज़र प्यॆन्य....To come in
         to view/To be seen/
         To be visible
7. नज़र त्रावॖन्य....To cast a
          look at/To keep an
          eye on
8. नज़र दिन्य....To look
                        around
9. नज़र करॖन्य....To look up
               on/To glance at
10. नज़र गछ़ॖन्य....To come
             under an influence
             of evil eye
**************************
        गीता ज्ञान :  अध्याय-8 :
पऻदॖ तॖ नाश सपदन वोल आदि बूत मान
ब्रह्म रूप प्वरुशस आदि दीव वनान
शरीरस मंज़ वासुदीव आदि यगॗन्य ज़ान
वॊन भगवानन गीता ज्ञान
**************************
सऻन्य शुर्य छि पऺर्यमॖत्य लीख्यमॖत्य। जानस त नाकारॖस मंज़ फ़र्ख ज़ाननवऻल्य। तिम ह्यकन समजिथ तॖ सूंचिथ ज़ि यथ गरस मंज़ पनॖनि ज़ऻच़ न्यबर आमॖच़ कूर या पनॖनि गरॖच कूर ज़ऻच़ न्यबर गरस वातनावॖन्य कोताह फऻयदॖ मंद ह्यकान छि रूज़िथ। ख़यालन मंज़ छि फ़र्ख यिवान, ज़बानि प्यठॖ छु असर प्यवान, रसमस-रिवाजस छु ख्रॊप अच़ान, वहथनस-बॆहनस मंज़ छु बदलाव यिवान, माय-मॊहब्बतस मंज़ छि दरार यिवान, तिहन्दिस शुरिस छि पनॖन प्रज़नथ रावान। पनॖनि ज़ऻच़ हॖन्ज़ ग्रन्द छि वारॖ-वारॖ छ़्वकान गछ़ान। ति क्याज़ि कऻशिर्य गरस मंज़ व्वपर ज़ऻच़ हॖन्ज़ि कोरि हुन्द शुर छु नॖ कऻशिर-ज़्यव ज़ानान तॖ न छु पनॖनि कोरि हुन्द शुर व्वपर ज़ऻच़ हुन्दि गरि कऻशुर ह्यकान वऺनिथ। माने कऻशिर ज़ाथ छि दु-तरफानॖ न्वख्सानस मंज़। पानय गछ़ान छि पनॖनि ज़ऻच़ हॖन्ज़ संख्या कम तॖ अगर यिहऻय दॊस्तूर तॖ रफ्तार जऻरी रूज़ सु द्वह छु नॖ दूर यॆलि कऻशुर बटॖ परज़नावनय मी नॖ।
कऻशिर ज़बान मूलॖ-म्वंजी रऻविथ गछ़ि। सौंचुन छु ज़ि असि छा पनॖन ज़बान रऺछ़रावॖन्य किनॖ रावरावॖन्य।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

13.11.2018

13.11.2018, कार्तिक (कतक) ज़ूनॖ पछॖ (शुक्लॖ पक्ष), शॆयम (षष्ठी), बॊम्वार (मंगलवार), श्री सप्तर्षि सम्वत 5094, राश मकर (दुहचि 9.20 बजि प्यठॖ), ऋतु हरुद (शरद) (चलान)...अज़ छि कुमार-शॆयम (कुमार षष्ठी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पनुन ॴब माशोक़
    अ: पनॖन्य ग़लती छॆ नॖ ग़लती
         बासान
2. मु: पनॖन्यन पनॖनी वाज़ॖ
    अ: ख्यावनस-च्यावनस कऻन्सि
          पनुन आसुन
3. मु: पलस प्यठ मॖथॖर
    अ: स्व हालथ य्यॊस नॖ ज़्यादॖ
          कालस पोशि
4. मु: फलॖ कुल छु नमिथ आसान
    अ: बऺडिस इन्सानस छि नर्मी
         आसान
5. मु: फऺलिस ह्यॊल तॖ ह्यॆलिस
          खार
    अ: क़तरॖ-क़तरॖ छि बानॖ यिवान
          बरनॖ
**************************
1. नख.....Shoulder
2. नखॖ.....Near/Close to
3. नखॖ वालुन...To clear debt
4. नखस खारुन....To spoil by
               over indiligence
5. नखस प्यठ...On the
                       shoulder
6. नकॖल.......... Copying
7. नकॖल करुन....To copy
8. निकल........Nickel
9. निकाह....... Matrimony/
                       Marriage
10. निकाह करुन....To per-
                     form marriage
**************************
      गीता ज्ञान  : अध्याय-8 :
ही कृष्ण आदि यऺगन्य कुस आसान
शरीरस मंज़ किथपऻठ्य रोज़ान
अंत समयस प्यठ च़्यॆ किथपऻठ्य ज़ानान
वॊन भगवानन गीता ज्ञान
**************************
पथ कालि यानि यिमय त्रॖह पाच़ॖत्रॖह वऺरी ब्रौंठ कऺशीरि मंज़ यॆलि कऻशिर्य बटस पनॖनिस न्यॆचविस या कोरि खांदर ओस आसान करुन। मंज़िमयऻरिस निश ओस लटॖ-पौंज़ करान रोज़ान। ट्यॆकिनि मंगनावान, ट्यॆकिनि गऺरु जियस निश गऺछ़िथ मिलनावान। यॆलि मेलिहेस तॖ ब्वकॖ आसस फॊलान। गरॖ वऻतिथ गये पृछ़गऻर शुरु करॖन्य। लडकस मुतलक। क्युथ छु, कॊहुन्द छु, कत्युक छु।मऻलिस क्याह छुस नाव, बऺड्यबबस क्याह छुस नाव। गरॖ क्युथ छु, खानदऻन्य छा। मकान छुखा। पनुनुय छुखा। कऺच़ ताख छुख। कऺच़ पोर छुख।लडकॖ छा पॊरमुत-ल्यूखमुत जान। नोकरी छा करान। प्राइवेट छा किनॖ सरकऻरी। बैंकस मंज़ छा किनॖ स्यकट्रेटस मंज़ छा। दरबार मूअस सॗत्य छा। क़द क्युथ छुस, रंग क्युथ छुस। कऺमिस ह्यु छु बासान। सिगरेठ छा चवान। वगैरा वगैरा। यिथय पऻठ्य ओस कोरि मुतलक पृछ़गऻर लगान। हश-ह्युहुर छुसा। द्रुय-ज़ामा छसा। मातामाल कम छिस। कति छिस। वगैरा वगैरा। वख्तन ख्यव व्वलग्वतुन। पऺतिम गव पथकुन तॖ नॊव आव बारसस। अथ नऺविस मंज़ क्याह आव, क्याह द्राव अथ प्यठ करव पगाह कथबाथ।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

12.11.2018

12.11.2018, कार्तिक (कतक) ज़ूनॖ पछॖ (शुक्लॖ पक्ष) पऻन्च़म (पन्चमी), च़ऺन्दॖरवार (सोमवार), श्री सप्तर्षि सम्वत 5094, राश धनु (चलान), ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पऺज़ कथ गऺयि माजि ल्यख
    अ: पॊज़ छु ट्यॊठ आसान
2. मु: पऺछ़्य ख्यव क्वकुर पनॖनि
         ख्योन मुर्युक
    अ: यॆलि कांह दी कॆंह तॆली
         ख्यॆयि/कऻन्सि ख्यावनस-
         च्यावनस मंज़ छि ख्वद-
         गर्ज़ी आसान
3. मु: पकनॖ पऻज़, गन्डनॖ ग्वसऻन्य
         ख्यनॖ बुलबुल
    अ: युस ॴव्युल तॖ नोज़ुक
         आसि/सादगी हॖन्द्य तऻरीफ़
4. मु: पकनस गछ़ि टकुन आसि
    अ: मॆहनत करनॖ खऻतरॖ गछ़ि
         आसुन ख्यन-च्यन रुत
 5. मु: पिशव कऺर्य ग्वनाह
          पतज्यन चौब
    अ: ॳक्यसुन्द ग्वनाह ब्यॆयिस
         खारुन
**************************
1. नऺल्यचि....Pipe of hubble
                   bubble
2. नलकॖ.....Water tap
3. निगरऻनी... Supervision/
               Care/Custody
4. निगाह.....Sight/Look/
             Glance/Attention
5. निलॖवठ...Blue stone
6. नगारॖ......Drum
7. नगर......City
8. नग........Precious stone/
             Gem/Jewel/Item/
             object
9. निकॖ.....Small boy/Baby
10. निकरावुन...To cut into
                pieces/To divide
**************************
     गीता ज्ञान  : अध्याय-8
          अर्ज़न दीव वनान
अर्ज़न वनान ही परशोतम, ब्रह्म
क्या कर्म क्या, क्या छु अध्यात्मॖ
आदि बूत आदि दीव कस छि वनान
वॊन भगवानन गीता ज्ञान
**************************
ज़ऻच़ न्यबर खांदर करुन छु अज़कल म्यॆ बासान व्वंय अख फऻशन बन्योमुत। चावॖ सान छि सऻन्य शुर्य यि रिश्तॖ बनावान। मोल मऻज्य ति छु ॳछ वऺटिथ आंकार करान। असि कऻशिर्य बटन छि वैसे ति शुर्य स्यठाह कम अज़कल। अख ज़ॖ छि मसाह।तिम ति नॖ पानस सॗत्य। शायद छु मोल मऻज्य ख्वश अमिकिन ज़ि तिहॖन्द्यन शुर्यन मेलि दूर दूर जायन वातनुक फ़ऻयदॖ। ह्यॊत-द्यॊत दिनुक मसलॖ गछ़ि ख्तम। मगर न्वखसान कोताह छु अम्युक अंदाज़ॖ छु नॖ असि नज़रि यिवान। रिश्तन लॊग द्रोत, ज़बान गऺयि बदल, संख्या गऺयि कम। कऻशिर्य बटॖ गऺयि छ़्वकान वारॖ वारॖ। प्रज़नथ ह्यॆच़न रावॖन्य रसॖ रसॖ। गरन मंज़ छि बोल-चाल बदलय, व्वथुन-बिहुन बदल्यव, ख्यन-च्यन अलग, गरिक्यन बऻच़न मंज़ पानॖवुन्य अख-ॳकिस सॗत्य मिलच़ारस मंज़ आयि दरार। संस्कृति मंज़ ह्यॊतुन ड्वख अच़ुन। कॆंह रसॖम आयि नऺव्य कॆंह रसॖम द्रायि ज़ंगि तऺल्य। अगर असि यिमन बदलावन हॖन्ज़ फर्ख बासान छॆ नॖ पानस प्यठ तॆलि कथ प्यठ छि ॳस्य बऺहस करान। तॆलि योरकुन नाव पकान छि दिमव पकनॖ तूर्यकुन। वुछव कत्यन लबव बॊठ।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.11.2018

11.11.2018, कार्तिक (कतक) ज़ूनॖ पछॖ,(शुक्लॖ पक्ष), च़ोरम (चतुर्थी), आथवार (रविवार/ एतवार), श्री सप्तर्षि सम्वत 5094, राश धनु (चलान), ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: फरि कांगॖर
    अ: कांह चीज़ न हावुन लायक़
          रोज़ुन
2. मु: फिरिथ फ्यरन छ़ुनुन
    अ: पनुन दोष ब्यॆयिस खारुन
3. मु: फरि-हऻन्ज़न खॆयि मुज
         बुज़िथ,लूकव व्वनुस गाडॖ
         छु बुज़ान
   अ: पेशिच हांछ़ छॆ नॖ च़लान
4. मु: प्रानि वति पकुन
    अ: स्यॊद-सादॖ ज़िंदगी बसर
          करॖन्य
5. मु: प्रानि म्वन्जि गासॖ ख्यॊन
    अ: पऺत्यमि कमायि प्यठ गुज़ारॖ
          करुन
**************************
1. नम....Nail/To bow/Front
             portion of a boat/
             Shikara
2. नम दिन्य....To observe
             attentively/To
             search carefully
3. नमकीन....Salty/Saltish/
                    Saline
4. नमरावुन...To make soft/
                To card/To bend
5. नमनमथ....Ninetynine
6. नमथिम.....Ninetieth
7. नमथ........Ninety
8. नमदॖ......Woollen carpet
9. नमूनॖ.... Sample/Pattern
                 Type/Norm
10. नम्बल...Marshy land
**************************
     गीता ज्ञान  :  अध्याय-7 :
आदि बूत आदि दीव आदि यऺगन्य सान
युस प्वरुष म्यऻन्य रूप ज़ानान
अंत समयस वऻतिथ म्यॆ प्रावान
वॊन भगवानन गीता ज्ञान
**************************
ज़ऻच़ न्यबर खान्दर करनुक शोख़ छु द्वह ख्वतॖ द्वह रफ़्तार तेज़ रटान। थख छु नॖ गछ़ान। ज़ानि दय सऻन्य नाव कोरकुन छि पकान। क्याह वजह छु ज़ि सऻन्य शुर्य छि नॖ ह्यकान पनॖनि ज़ाच़ मंज़ पनुन बऻच़ छ़ऻन्डिथ। मुहावरॖ छु ब्यॆयिसुन्द मंदुल व्यॊठ बासान। म्यॆ छु बासान ज़ि यि मुहावरॖ छु पनॖनि असली मतलबॖ निशि दूर गऺछ़िथ व्वंय खान्दरॖ बापथ जान सजान। ब्यॆयि ज़ऻच़ हुन्द लडकॖ या कूर छि पनॖनि ज़ऻच़ हॖन्दि लडकॖ या कोरि ख्वतॖ स्यठाह जान बासनॖ यिवान। मोल मऻज्य छु नॖ परेशान बासान यि वुछिथ। यॊदवय ति आसिहे, तॆलि आसिहे नॖ युथ बदलाव आमुत। अथ मुद्दहऻस प्यठ बऺहस करुन छु म्यॆ बासान सख़ ज़रूरथ। सारेय कामि त्रऻविथ पज़ि असि अथ रसमस लाकम चीरॖ कसॖन्य तॆलि थमि यि च़लवुन गुर। यि ज़िम्वऻरी छि मऻलिस-माजि हॖन्ज़ ग्वडॖ। शायद छि नॖ तिम वऻकॖफ ज़ि ज़ऻच़ न्यबर युथ रिश्तॖ बनावनुक न्वख्सान कोताह संजीदॖ छु ।अम्युक असर कोताह दूर ताम छु वातान। रिश्तन किथ पऻठ्य छि तॖरॖ तॖरॖ गछ़ान। गरस किथॖकऺन्य छि छलॖ-छांगॖर गछ़ान। खान्दानुक नाव छु तिथय पऻठ्य बदलान यिथ पऻठ्य ॳज़िच सरकार छि पनॖनि मतलबॖ बापथ जायन हॖन्द्य नाव छि बदलावान।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.11.2018

07.11.2018, कार्तिक (कतक) गटॖ पछॖ (कृष्ण पक्ष), मावस (अमावसया), ब्वदवार (बुधवार),श्री सप्तर्षि सम्वत 5094,राश तुला (चलान), ऋतु हरुद (शरद) (चलान)...अज़ छि
दीवऻली।
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: प्राच़न द्वद लऻरिथ आसुन
    अ: नाबाल्यॆग आसुन/तजरुबॖ
         कम आसुन
2. मु: फरि च़ूरस दारि कॊंड
    अ: ग्वनाहगारस छु पनुनुय
         शख आसान
3. मु: प्रयागॖच बून्य
    अ: दॊहय ह्युवुय/युस चीज़ नॖ
         हुरि तॖ न गछ़ि कम
4. मु: परस दोद पानि ख्वतॖ शुहुल
    अ: ब्यॆयि सुन्द दोद छु नॖ
         इन्सानस परेशान करान
5. मु: पर-गगुर छु च़ानान गर-
         गगरस लार
    अ: व्वपर कडान मऻल्यकसॖय
         न्यबर/यॆलि व्वपर मऻलिख
         लागि
**************************
1. नुमऻयिश...... Exhibition/
                        Display
2. नुमऻयिश-गाह.... Exhibition
                             ground
3. नुमऻयिन्द ..... Representa-
                         tive
4. नुमऻयिन्दगी....Representa-
                         tion
5. नम्बर......Number/Marks
                   Award
6. नमस्कार....Salutation/
                      Wishing
7. नमक/नून....Salt
8. नमक हराम... Ungrateful/
                  Unfaithful
9. नमक हलाल... Grateful/
                       True/Loyal
10. नंगॖ......Naked/Bare/
                  Shameless
**************************
    गीता ज्ञान   :  अध्याय-7 :
शर्ण गऺछ़िथ म्यॆ यिम छि स्वरान
बुजर तॖ मरनॖकि भयि मुक्त सपदान
तिम ब्रह्म उतम ज्ञान तॖ कर्म ज़ानान
वॊन भगवानन गीता ज्ञान
**************************
त्वहि सारिनीय छुवॖ अज़ दीवऻली मुबारक। कऻशिर्य-बटसॖन्ज़ दीवऻली कशीरि मंज़ तॖ कऺशीरि न्यबर, दॊनवऺन्य मंज़ छि आमॖच़ ज़मीन-आसमानॖच फर्ख। चूंकि कऻशिर्य बटॖ ॴस्य आमॖतय शिवजियस पूज़ान तन मनॖ सान बाकय त्यौहारन कुन ॴस्य नॖ ज़्यादॖ सनान। चाहे सु हूल्य आसिहे या दीवऻली आसिहे। बटस ओस नॖ ज़्यादॖ असर प्यवान। ज़्यादॖ ख्वतॖ ज़्यादॖ अन्येयोन मिठायि किलो, ज़ॖ किलो सु ति रलॖ-मिलॖ तॖ करेयोन श्वगुला। अल्बतॖ बटॖ ॴस्य दीवऻली द्वह शामन सत्यदीव यानि पूर्य बनावान। प्रेप्युन हावान तॖ नवीद बऻगरावान। तासा वासा ॴस्य गिन्दान। टास या पटाखॖ ॴस्य पनॖन्यन पनॖन्यन आंगनन मंज़ त्रावान या गऺयेयि यारबल बऺठिस प्यठ तॖ ॴस्य चलावान ल्वकटि-ख्वतॖ बऺड्य टास। बटस रूद फ्रठ हमेशि सॗत्य सॗत्य। ति ज़न गव ज़ि यारबलस प्यठ टास त्रावनि विज़ि ओसुस खोच़ुन लगान ज़ि युथ नॖ अथ टासस बुथ लगि कुनि बहच़ि कुन या कुनि शिकारि कुन तॖ गऺयेयि लडऻय या ल्यकॖ-ल्यख शुरु। गरन मंज़ ति ॴस्य खूच़्य-खूच़्यी टास त्रावान ज़ि युथ नॖ कुनि दारि कुन स्यॆदि या कुनि छ़ॆयि-पशस कुन रॊख करि। सडकन प्यठ ॴस्य टास चलावान मंन्ज़्य-मंन्ज़्य सु ति कुनि बटॖ मऺहलस मंज़ॖय। मुसलमान मऺहलस मंज़ कति अनिहे बटॖ जिगरॖ तॖ टास चलावेह। पॊज़ हय बूज़िव कऻशिर्य बटस ॴस नॖ कॆंच़न मिठायन हॖन्द्य नाव ति पताह। हलवऻयिसॖय ॴस्य ओंगजव सॗती हावान ज़ि यॆमि मंज़ॖ ति त्राव तॖ हुमि मंज़ॖ ति त्राव। बटॖ ओस नॖ मिठऻय ख्यनस ति लगान ज़्यादॖ। मगर कशीरि न्यबर याम ॳस्य कऻशिर्य द्रायि ॳस्य आयि न ठऺठ्य कुनि। असि खुलेयि ॳछ, असि खुल्यव ॴस, असि खुल्यव अथॖ ति तॖ चन्दॖ ति। सारिवॖय ख्वतॖ बठ्यव दिल। फ्रटॖ-फ्रठ च़ॊल। दीवऻली सॗत्य सॗत्य ल्वकॖट दीवऻली, धनतेरस, गोवर्धन पूजा वगैरा वगैरा ह्योत मनावुन। बदलोव बटन क़मीज़ि हुन्द बटुन तॖ ह्यॊतुन खुल-डुलॖ नच़ुन। कथ जि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

06.11.2018

06.11.2018, कार्तिक (कतक) गटॖ पछॖ (कृष्ण पक्ष), च़्वदह (चतुर्दशी), बॊम्वार (मंगलवार), श्री सप्तर्षि सम्वत 5094, राश तुला (दुहचि 8.12 बजि प्यठॖ), ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1.मु: पऺतरन सग तॖ मूलन दरोत
   अ: श्तुरथ करुन तॖ अम्युक बास
         नॖ द्युन
2. मु: पतॖ बऺडिस छि नज़र बऺड
    अ: बॊड मोहन्युव छु बॊडुय
         आसान/खानदऻनी बजर
3. मु: फिटॖ फिटॖ आसुन
    अ: छ़्वख आसुन
4. मु: पितुर छुय हून तॖ वूंगि ना
    अ: प्रथ कऻन्सि छु कांह न तॖ
         कांह पितुर आसान/हंगॖ तॖ
         मंगॖ शुतॖरथ
5. मु: पुजिस प्रॖछ़ेय्योख ॳडिजि
         कोनॖ पचय, दॊपनख पनुन
         आव नॖ कांह
    अ: पनॖनुय छु पनॖनिस पोशान/
          दोखॖ छु अक्सर पनॖनुय
          दिवान
**************************
1. ननॖवोर....Bear footed
2. नन्यर......Clearness/
                  Appearance
3. नन्यर करुन...To disclose
              a secret/To reveal
4. नवजवान...Young/In a
                      prime of life
5. नवशीन....First snow fall
6. नव-उम्र.... Inexperienced
                    Too young
7. नव-निहाल...Young man
8. नव-बहार...Early spring/
                     Full bloom
9. नवरोज़...A new yea's day
             A Persian festival
10. नवम्बर.....November
**************************
      गीता ज्ञान  : अध्याय-7 :
यिम नेष्काम तॖ स्रैष्ठ कर्म करान
तिहॖन्द्य सऻरी पाफ़ नष्ट सपदान
राग दूश मॊह त्रऻविथ म्यॆ बजान
वॊन भगवानन गीता ज्ञान
**************************
सालॖ कार्डस प्यठ छु लीखिथ आसान बरऻच़हॖन्ज़ि यिनुक वख्तस या बरऻच़ सॗत्य गछ़नुक वख्त। मगर माहराज़ छु नॖ ज़ांह वख्तस प्यठ वातान। खाल कुनि सातॖ, खाल कांह कांह, खाल कुनि कुनि जायि छु माहराज़ वूछमुत म्यॆ वख्तस पाबंद। वख्तॖच पाबंदी थवॖन्य गऺयि स्यठाह जान। न्यॆचिव वाल्यन पज़ि एहसास आसुन कोरिवाल्यन हुन्द तॖ च़ेर ताम प्रारनावनुक अभ्यास पज़ि असि मऺशरावुन। म्यऻन्य व्यनती छि पनॖन्यन संस्थायन ज़ि तिमन पज़ि ग़ोर करुन ज़ि किथ पऻठ्य ह्यकन तिम पनॖनि संस्थायि वख्तॖ वख्तॖ जंजगरस मंज़ तबदील कऺरिथ तॖ पनॖन बऻय फज़ूल या हदॖ ख्वतॖ ज़्यादॖ ख़रॖच जंजगरन प्यठ करनॖ निशि बचऻविथ तॖ पनॖन आमदनी ति बऺडरऻविथ। हालांकि सामूहिक मेखलायि छि यिवान करनॖ कुनि कुनि मंदरस मंज़ ज्यॆमि तॖ ज्यॆमि न्यबर ति मगर रफ़्तार छि कम। ब्यॆयन ज़ऻच़न मंज़ छु नज़रि यिवान शादीगर/कॊम्युनिटी हाल,अग्रवाल सम्ति, सिन्धी हाल, पंजाबी बवन वगैरा वगैरा। तिम छि कम ख्वतॖ कम किराय ह्यवान पनॖन्यन ज़ऻच़क्यन खांदरन-व्वछ़बन तॖ बाकॖयन ह्यवान अगनस द्वगन। मगर तोति छि सहूलियत वातान प्रथ गरस।
असि ति पज़ि ओरकुन क़दम तुलुन। यि छि वख्तॖच आवाज़।
सॗती छि म्यऻन्य व्यनती म्यान्यन बायन-ब्यॆन्यन ज़ि ज़ऻच़ न्यबर खांदर करुन कऺर्यतव बंद। यि करनॖ सॗत्य छि ॳस्य दु-तरफानॖ न्वख्सान बुगतान। तॖ पनॖन प्रज़नथ छि रावान गछ़ान रसॖ-रसॖ
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

05.11.2018

05.11.2018, कार्तिक (कतक) गटॖ पछॖ (कृष्ण पक्ष), त्रुवाह (त्रयोदशी), च़न्दॖरवार (सोमवार), श्री सप्तर्षि सम्वत 5094, राश कन्या (चलान), ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: फ़ातॖ छऻन्य गरा च्यऻन्य तॖ
         गरा म्यऻन्य
    अ: बे-वॊफ़ा/बॆ-पछ़ ज़नान
2. मु: फ़ागुन ज़्यॊवरावुन
    अ: पज़नॖ प्यॆठी ख़र्चावुन/
          बॆदर्दी सान ख़र्चावुन
3. मु: पानसॖय ख्यैयतन असि मतॖ
         दीतन
    अ: रॖच़र कांछुन/शुर अगर
          बजाह आसि च़म छि
          शिहिज
4. मु: पानस पॖर-पॖर लूकन
          तबाबथ
    अ: पानॖ नाकारॖ कामि कऺरिथ
          लूकन रॖच़ कऻम करनॖच
          नसीहत करॖन्य
5. मु: पऺतिम गऺर छि सख़
    अ: बुजरिक द्वह छि मुश्किल
         आसान
**************************
1. नि......Take
2. निब.....Nib
3. नियथ.... Intention/Wish/
                  Determination/
                  Purpose/Intent
4. नियथ आसॖन्य...To have
              determination/To
              have will/To have
              intention
5. नियथ बदलॖन्य..To deceive
              To change one's
             mind/To have evil
             Intention
6. नियाज़...To offer some-
            thing for achieving
            a wish
7. नीलाम.... Auction
8. निश्चय थावुन...To deter-
            mine/To make up
         one's mind/To deem
9. नेब...... Address
10. नेर..... Go/Leave
**************************
     गीता ज्ञान  : अध्याय-7 :
यिम सम्सारुक स्वख छि यछ़ान
तिम द्वख रूपॖ मॊह ज़ालॖ फ़सान
तिम अज्ञानस छि प्राप्तॖ सपदान
वॊन भगवानन गीता ज्ञान
**************************
खान्दरन मंज़ माहराज़ सुन्द वख्तस प्यठ वातुन छु अख बॊड सवाल। माहराज़ॖ यॊदवय च़ीर्य यी,  तस सॖन्दिस  इस्तिकबालस खड़ा लूख छि हना लोसान, तंग यिवान, खड़ा रूज़्य रूज़्य वॊमान।अंदॖर्यय अंदॖर्य  तबचॖ परान तॖ न्यॆबॖर्य नॖ बास दिवान ख़ास कऺरिथ यैलि माहराज़स हदॖ ख्वतॖ ज़्यादॖ च़ेर लगान छु वातनस।  कोरिवोल छु पनॖन किन्य पूरॖ कूशिश करान ज़ि कुनि कॖस्मॖच कमी गऺछ़ नॖ रोज़ॖन्य यॆनिवऻल्य सॖन्दिस स्वागतस तॖ आवबगतस।  न्येचुव वोल ति छु पनॖन किन्य बडॖ कूशिश करान वख्तस प्यठ बरऻत्य जायि मुकामस ताम वातॖनावनॖच। मगर च़ेर छु लगान रोज़ान। वजूहात छि वारियाह। बैंड बाजि तॖ तथ सॗत्य नच़नवाल्यन हुन्द नच़ुन यड बऺरिथ छु अख ख़ास वजह।कुनि कुनि सातन छु ज़ॖ डाय गन्टॖ ति प्यवान प्रारुन स्वागत करनवाल्यन।  प्रारुन छु कुनि कुनि सातन प्यॆठ प्यवान। अज़कल कति छि तीच़ त्वछ़। सारिनीय छुस वुछान अज़कल छि ज़ंगन हुन्द मसलॖ। ज्यादॖकालस छिनॖ ह्यकान खडा रूज़िथ। दपान यिहे माहराज़ जल जल। पोशॖमाल छ़ुनॖहऻस तॖ अदॖ सु ज़ानि तॖ गुरु जी ज़ानि। ग्वडॖ छु अकि द्वह यिवान तीत्य खांदर ज़ि प्रथ खांदरस वातुन छु गछ़ान मुहाल। अख छु लन्दनॖ तॖ अख छु लाहोरॖ। वऻतिथ छि नॖ ह्यकान। प्यठॖ यॆलि कुनि जायि माहराज़ॖ च़ीर्य यी।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

04.11.2018

04.11.2018, कार्तिक (कतक) गटॖ पछॖ (कृष्ण पक्ष), बाह (द्वादशी), आथवार (रविवार/एतवार), श्री सप्तर्षि सम्वत  5094 राश कन्या (चलान), ,ऋतु हरुद (शरद) (चलान)
**************************
नमस्कार माहरा त्वहि सारिनी म्योन। त्वहि सारिनी ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: पान्यो पान्यो
    अ: ख्वदग़र्ज़ी
2. मु: पांच़ऻलिस रोज़ि नॖ दॊहय
         वाव
   अ: मुसीबथ छु नॖ अकी डंजि
         रोज़ान
3. मु: पांतॖछॊकॖ न्वश्यन स्वख तॖ
         कोर्यॆन द्वख
   अ: ॳकिस जायि ॳकिस स्वख
         तॖ ॳकिस द्वख
4. मु: पऻन्सस निश छु पऻन्सॖ
         वातान
    अ: पऻन्सॖवऻलिस निश छु पऻन्सॖ
          वातान
 5. मु: पऻन्सि थऺव्यज़ि म्वर्दस प्यठॖ
          सु ति गछ़ि ज़िन्दॖ
    अ: पऻन्सस छु स्यठा ज़ोर
**************************
1. नून.....Salt
2. नून-प्यॊन....To feel badly/
                      To be in pain
3. नूर....Grace/Brilliance/
             Splendour/Light
4. नूरॖमुत.....Graceful/Pretty
                   Handsome
5. नजूमी.... Astronomy
6. नॊर.....Hand cuff/Sleeve
7. नऺर......Arm
8. नार.....Fire
9. नोर/नोल.....Pipe/Tube
10. नॊन नेरुन...To be clear/
                   To be visible
**************************
     गीता ज्ञान  : अध्याय-7 :
पथकालॖ यिम ॴस्य तिम छि वुन्यक्यन
ब्रौंठॖकुन आसनवऻल्य छुसख ज़ानान
म्यॆ श्रदायि रॊस छु नॖ कांह ज़ानान
वॊन भगवानन गीता ज्ञान
**************************
खांदरन हॖन्ज़ कथ छि चलान। जंजगर छि व्वंय वति वति। लूख ति छि ॳड्य शोकिया तॖ ॳड्य मजबूरी मंज़ यिमन जंजगरन हुन्द इस्तिमाल करान। इन्सानसॖन्ज़ि मजबूरी हुन्द फऻयदॖ तुल यिमव जंजगरॖवाल्यव। बॖ छुस वुछान ज्यॆमिस मंज़ आयि कुनॖवुहशथ तॖ नमतॖ प्यठॖ जंजगर यस्लॖ बारसस। क़दमॖ-क़दमॖ पतॖ छु जंजगर बनिथ तॖ सोन कऻश्यर्यॆन हुन्द पऻन्सा छु लगान यिमनॖय वतन। इका-दुका कऻशिर बटन छु जिगरॖ कऺरीथ जंजगर ज्यॆमिस मंज़ बनोवमुत। बाकय सऻरी जंजगर छि ज्यॆमक्यव डूगरव नीमॖत्य बनऻविथ। तिमन आयि अकॖल मगर असि क्याह कॊर हऻसिल। हां असि बनऻव्य आश्रम। कऺशीरि नीरिथ यपऻर्य यपऻर्य बटॖ आव छऺकॖरनॖ, तत्यन तत्यन बनोवु आश्रम। गोपी नाथुन आश्रम,मस्तॖ बबुन आश्रम, क्राल बबुन आश्रम, नन्दॖ बबुन आश्रम, पोशॖ बबुन आश्रम, वगैरा वगैरा। ॳस्य रूद्य आश्रम बनावान तॖ दॊयिमि ज़ऻच़ हॖन्द्य लूख गऺयि जंजगर बनावान। ॳस्य लऺग्य हवनन पतॖ तिम लऺग्य ओंगलस प्यठ बौंगलॖ बनावनस तॖ रॊपियि कमावनस। कोताह जान गछ़िहे अगर ॳस्य कऻशिर्य बटॖ त्रावहऻव यलॖ खांदरव व्वछ़बव बापथ कम कॗमतस प्यठ  यॆतिनस ततिनस तॖ पनुन बटॖ बोय बचिहे ज़्यादॖ खर्चनॖ निशि। ब्यॆयन हॖन्द्य चन्दॖ बरनॖ ख्वतॖ यॊदवय पनॖनी चन्दॖ बरहऻन कोताह जान गछ़िहे।
कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

03.11.2018

03.11.2018, कार्तिक (कतक), गटॖ पछॖ (कृष्ण पक्ष), काह (एकादशी) बटॖवार (शनिवार/ शनिश्चरवार), श्री सप्तर्षि सम्वत 5094, राश कन्या (रऻच़ हॖन्ज़ॖ 4.25 बजि प्यठॖ), ऋतु हरुद (शरद)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु : ब्यॆयिसुन्द वुछिथ ऒश युन
    अ: लूकॖहॖन्दिस करनस प्यठ नॖ
         ख्वश गछ़ुन/अज़र्वुन युन
2. मु: ब्यॆयिसुन्द शुर मंदल-व्यॊठ
    अ: अज़र्वुन युन/ब्यॆयि सुन्द नॖ
         ख्वश युन
3. मु: बॆहनॖ ख्वतॖ बॆगऻर्य जान
    अ: कॆंह नतॖ कॆंह कऻम गछ़ि
          ज़रूर करॖन्य
4. मु: बॆगऻर्य ते आसि गछ़ुन गछ़ि
         ब्रौंठॖय
    अ: म्वकॖ गछ़ि नॖ ज़ांह ति राव-
         रावुन
5. मु: बीरबलुन कठ
    अ: खुशी सॗत्य सॗत्य ग़म ति
          आसुन
**************************
1. नछ़...... To dance
2. नस...... Nose
3. नॊस..... Small nose/Pig-
                 nosed
4. नाव.......Name/Shikara
5. नॊव...... New/Fresh
6. नविसरॖ....All over again
7. नव....... Nine/Flourish
8. नवुन तॖ फॊलुन..To flourish
                 To be happy and
                  wealthy
9. नवरॆह....New year's day
10. नऺहर....Canal
**************************
      गीता ज्ञान : अध्याय-7  :
कम अकॖल म्यॆ अविनाशियस छिनॖ ज़ानान
ब्रह्मस मनशॖ सॖन्द्य पऻठ्य वुछान
ज़्यनॖ मरनॖ वोल अख इन्सान मानन
वॊन भगवानन गीता ज्ञान
**************************
अज़कल छि खांदरॖ-खांदरय। पऺद्य छिनॖ लूकन अथि यिवान। व्वसॖ-द्रॊस छि असि बटन मंज़ अज़कल नज़रि यिवान। बॖति ओसुस ॳकिस खांदरस मंज़ गोमुत। कथ कथ करान नन्योम ज़ि कॆंह म्यऻन्य बऻय छि परेशऻनीकिस दौरस मंज़ यिम खांदरॖक्य द्वह निभावान। लडकॖ वोल या कोरि वोल। द्वनवय दऺर्य। खास वजह छु कऺशीरि न्यबर नेरनुक। त्रॖह वऺरी गयि असि पनॖन पनॖन गरॖ त्रऻव्यमॖतिस मगर मूल छु तऺती। कल छि तूर्यकुन। कुनि न तॖ कुनि रंग्य। वारियाह बटॖ छि ज्यॆमिस मंज़ रोज़ान। बाकय बटॖ छि ॳड्य लार तॖ ॳड्य दार। मगर कॆंच़न छु ज्यॆमिस मंज़ॖय खांदर करनस यिवान वार तॖ व्यसतार। असि छि लंग-लंजि ज्यॆमिस सॗत्य ति जुडिथ। युन-गछ़ुन छु मुश्किल। खांदरन मंज़ रुकुन छु मुश्किल। लडकॖ वोल यछ़ान ज़ि कोरिवोल गॊछ़ नऺज़दीख आसुन तॖ कोरिवोल यछ़ान ज़ि लडकॖवोल गॊछ़ नऺज़दीख आसुन। जायिहॖन्ज़ व्यछ़य छि द्वनवुन्य दर्यन बापथ। वनिथ छि नॖ ह्यकान अख ॳकिस मगर तिहिन्द्य बुथ्य छि तिहॖन्द्य अफ़सानॖ बयान करान। समय छु कति ज़ि ख्वर वाहरऻविथ या नरि ज़ंगॖ वाहरऻविथ बॆहियेय खांदरवाल्यन निश यिथ पऻठ्य प्रऻन्य पऻठ्य कऺशीरि मंज़ खांदरन मंज़ ॳस्य ॴस्य करान रोज़ान। वख्तन द्युत व्वलगॊतुन। बदल्यव सोरुय। खांदरन हुन्द चिकॖ-चाव, खांदरन मंज़ जोश-खरोश, शोर-ओ-गुल, क्रख-चिख। वॖरॖ तॖ वॖरॖबल। तास गिन्दन वाल्यन बापथ अलग जाय तॖ कोरिवाल्यन हॖन्ज़ स्व माय तॖ माज़रथ। कहवॖ ना द्वद ना, लिप्टन चाय, क्वाफ़ी, माहराज़ॖ बूठ च़ूरि थावुन। वगैरा वगैरा। अज़ छे नॖ फुर्सतॖय कऻन्सि। पॊत खॊर्यन प्यठॖय छि सऻरी आसान। खांदर छि अज़ ति सपदान मगर खांदरुक सु वलॖवल छु बासान ज़ि कि ताम रूद पथकुन
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
   नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

02.11.2018

02.11.2018, कार्तिक (कतक) गटॖ पछॖ (कृष्ण पक्ष), नवम (नवमी), शॊकुरवार (शुक्रवार/ जुम्मा), श्री सप्तर्षि सम्वत 5094, राश सिंह (चलान), ऋतु हरुद (शरद)(चलान)
**************************
चूंकि दहम छि रावान, दऺहम हुन्द  वॊहरवॊद यी ॳज़्य यानि नवम द्वह
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: बे-ईमानस क्याह नी शेतान
    अ: बे-ईमान छु शेतानॖ सॖन्दि
         ख्वतॖ चालाख आसान
2. मु: बेमॖ हऺहरव छु सॖह मोरमुत
    अ: इतिफ़ाकस मंज़ छु ताक़त
3. मु: बॆपीरस गटॖकार बापीर छु
         गाशदार
    अ: यस इन्सानस नॖ रहबर
         आसि सु छु दरबॖदर गछ़ान/
         रहबर आसुन गव ॳछन
         गाश आसुन
4. मु: बेकॖल नॖ कांह गरॖ पतॖ काह
    अ: बैवकूफ़न हुन्द तेदाद छु नॖ
         कम आसान
5. मु: बॆहवाल क्याह करि देवारस
         ज़ॊद करि
   अ: बॆकार इन्सान छु बकवऻस्य
        आसान तॖ अक्सर ग़लत
        कथ करान
**************************
1. न्यॊठॖ.... Cunning/Deceit-
                 ful/Crafty
2. न्यथॖनॊन...Naked
3. न्यथॖनॊन गछ़ुन...To be nak-
            ed/To get exposed
4. नियम.....Will take me/
             Rule/Practice/Re-
             gulation/Manners
5. नेकनियथ....Good inten-
             tion/Well meaning
6. नेकनाम....Reputed/Hav-
             ing good name
7. नेक मशवरॖ...Good advice
8. नेक क़दम...Right step/
                    Welcome step
9. नेक सल्लाह..Good advice
                    Good council
10. नेरुन..... To depart/To
                    come out/To
                    set out
**************************
     गीता ज्ञान : अध्याय-7 :
बेकॖलन यि फल ॴखॖर नाशवान
दीवन पूज़न वऻल्य छि दीवनॖय प्रावान
म्यॆ बजन वऻल्य म्यॆ प्राप्त सपदान
वॊन भगवानन गीता ज्ञान
**************************
तरक पनुन पनुन प्रथ कऻन्सि। कुस छु ठीख तॖ कुस छु ग़लत, कलॖहेरि छि व्वथान ॳथ्य प्यठ। लडायि झगडॖ व्वथवार सोरुय छि ॳस्य वुछान ॳथ्य तरकस प्यठ। लफ़ज़ छु अख "तरक" मगर अंदॖ रोस छु यि लफ़ॖज़। बोय बऻयिस निशि छ़्यनान, मोल न्यॆचविस निशि ब्यॊन गछ़ान, दोस्त दोस्तस निशि दूरान, रून ज़नानि तलाक़ दिवान, यूत कऺरिथ ति छु नॖ ननान ज़ि ॴखॖर तरक कऺम्यसुन्द सना ओस ठीख। अदालतन ताम छु मामलॖ वातान। वकील छि कमावान ॳथ्य तरकस प्यठ। वऺरी-बद्यन छि नॖ ठऺठ्य यिवान लूख तिम यिम अथ तरकस मंज़ फसान छि। ॴखॖर छु क्याह यि तरक। क्याज़ि छु। कऺम्यसॖन्दि बापथ छु। क्याह ॴखरस हऻसिल नेरान छु। सऻरी छि सौंचान आसान मगर तरक छु पनॖन कामिहेन करान रोज़ान यानि इन्सान छु नॖ यि तरक त्रावनॖच कूशिश करान। म्यॆ बासान ज़ि यि छु अहम् युस असि तरक थावनस प्यठ मजबूर करान छु। तुहॖन्ज़ क्याह राय छि?
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
   नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

01.11.2018