01.09.2019

01.09.2019 भऻद्रप्यथ(भाद्र)ज़ूनॖ पछॖ (शुक्ल पक्ष)द्वय (देवादेव) (द्विती) आथवार (रविवार/एतवार)श्री सप्तर्षी सम्वत 5095, राश कन्या (चलान),ऋतु वर्षा (चलान)...चूंकि पगाह छि त्रय रावान,पगहुक वॊहरवोद यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: दॊयव छु मोरमुत सॖह
    अ: यकुत हय आसि बडि
         ख्वतॖ बऺड कऻम छि अंद
         वातान
2. मु: देगि लदुन लायक़
    अ: अख वॊहव/बदज़ाथ/
          रऺज़ीलॖ
3. मु:  द्यद ति गऺयि बजायि
          वऻल्यदय
    अ: हिशी कथा
4. मु: दॆदि छि बऻच़ वॆदि
    अ: गरिकिस ज़िठिस छि बऻच़
         वनि आसान
5. मु: दॊयव अथन छि च़ऺर वज़ान
    अ: कुन ज़ॊन छु नॖ कामि
         पोशान
**************************
1. अंद....Last portion/Top
2. अंदुन....To be complete/
                Be fulfilled/Bring
                to an end
3. अंदेशॖ....Fear/Suspicion/
                Thought/Doubt
4. अंदकार.... Darkness/
                Harm/Wrong/
                Injustice
5. अंदकुन.....Aside
6. अंद वातुन....To complete
             To bring to an end
7. अनतहकरन....Mind/The
              soul/Understand-
              ing/Conscience
8. अन्यमस पावुन....To beat
             severely/Beating
9. अन्यमॖ.....Rice water/
                   Rice gruel
10. अन्यमॖदाम........A little
                 quantity of rice
                  water
**************************
         गीता ज्ञान  :अध्याय 16
मनॖच च़ंच़लता नॖ आसॖन्य, कऻन्सि
हॖन्ज़ नॖ ज़ान्ह निन्दा करॖन्य
सऻर्यसॖय ज़ीव ज़ऻच़ प्यठ दयावान
वॊन भगवानन गीता ज्ञान
**************************
संस्कारन हॖन्ज़ कथ छि चलान। अन्नप्राशन ति छु अख संस्कार युस शुर्य सॖन्दि ज़न्मॖ प्यठॖ श्यन रयतन अंदर अंदर यिवान छु करनॖ यथ मंज़ शुरिस अन्न आपरावान छि। प्रसाद यिवान बनावनॖ, पूज़ा यिवान करनॖ तॖ तमि पतॖ शुरिस यिवान अन्न दिनॖ। अथ संस्कारस मंज़ ति छि अख मान्यता ज़ि दपान कॊरि गछ़ि पॗन्च़मिस रयतस मंज़ॖय अन्नप्राशन करुन तिक्याज़ि कूर छि लडकस न्यसबतॖ जल जल बडान। अमि पतॖ छु ब्याख संस्कार सु गव कन च़ोम्बॖन्य।  लडकस तॖ लड़की द्वनवुनी गछ़न कन यिन्य च़ॊम्बॖन्य तिक्याज़ि कन च़ॊम्बनॖ सॗत्य छि वारियाह कॖसमॖच ब्यमारि दूर गछ़ान। कऻशिर कोरि छु कन च़ोम्बॖन्य ज़रूर तिक्याज़ि कोरि छु लागुन आसान खान्द्र विज़ि ड्यॆजहोर कनस मंज़। त्रुय ति छु अख संस्कार युस प्रसनॖ पतॖ त्रॆयिमि दुहुय छु यिवान मनावनॖ। अमि द्वह छि तलान तेल यथ सॗत्य रलावनॖ छि नाबद, डून्य गोजि,तॖ नून तॖ छु यिवान बऻगरावनॖ पनॖन्यन अंगन ॴश्यनावन मंज़।  प्रसनॖ पतॖ सति दोह्य यिवान छु हुरिस अंद्य अंद्य लिवनॖ तॖ हुर्य राज़नॖ नावॖ श्रूच़ पऻठ्य अन्न न्यबर त्रावनॖ। हालांकि अज़कल छु नॖ यि संस्कार यिवान करनॖ। च़रि-लछ़ॖज गर्म पऻनिस मंज़ मिलनऻविथ ओस यिवान लोसॖ श्रान करनॖ मगर यि प्रथा ति शायद बंद गऻमॖच़। खालॖय कांह मा आसि यि नियम पालान मगर म्यॆ छु नॖ बासान।यिमव संस्कारव सॗत्य दपान ओस मऻज्य तॖ शुर ह्रष्ट-पुष्ट रोज़ान। त्रुय तेल बऻगरावनॖ सॗत्य दपान ॴस्य शुरिस  भूत-प्रॗत तॖ अलायि बलायि दूर गछ़ान तॖ कऻन्सि हॖन्ज़ नज़र व लगान। यिमन कथन प्यठ आयि सऻन्य ज़िठ्य विश्वास करान अज़ताम मगर कऺशीरि न्यबर लगनॖ पतॖ कुस कोताह छु यिमन कथन प्यठ विश्वास करान यि वनुन छु ज़रा मुश्किल। कथ छि जऻरी
**************************
"पॊत ज़ूनि वऺथिथ मॊत बोलनोवुम
दग़ ललॖनऻवॖम दयॖ सॖन्ज़ि प्रहे
लल्य लल्य करान लाल वुज़ॖनोवुम
मीलिथ तस श्रूच़्योम देहे"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

31.08.2019

31.08.2019 भऻद्रप्यथ (भाद्र) ज़ूनॖ पछॖ (शुक्ल पक्ष) ऒक्दॊह(देवादेव) (प्रथमा) बटॖवार (शनिवार/शनिश्चर- वार),श्री सप्तर्षी सम्वत 5095, राश कन्या (रऻच़ हॖन्ज़ॖ 7.21 बजि प्यठॖ)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1.मु: खूनस छि रेह
   अ: पनॖन्यन छु च़ुक आसान
2. मु: खून छु बारव दिवान
    अ: खॊटमुत चीज़ छु नॖ खऺटिथ
          रोज़ान
3. मु: ख्वजन दॊपनम फऺटकय
    अ: बऺडिस मॊह्यनिवि सॖन्ज़ छ़ऺर
         कथ ति छि ख्वश करान
4. मु: ख्वजॖ ब्यूठ वान द्यगल्यव
         सान
    अ: बे-तरतीब कारॖबार/यि नॖ
         ज़रूरथ ती करुन
5. मु: ख्वफतन फ़क़ीर
    अ: किरायि गुन्डॖ
**************************
1. अनिगॊट तुलुन....Create
             disturbance/To
             cause darkness/
             Raise a quarrel
2. अनवुन...One who brings
3. अनवऻर्य.....Turn
4. अनॖनावुन..To make some
                    one to bring
5. अनॖ म्यॆट....Handful of
                     food
6. अनॖमान...  Presumption/
          Guess/Interference
          Judgement
7. अनॖ म्वठ......Handful of
                       rice
8. अनिगॊट....... Darkness
9.  अनज़ान...... Innocent/
                    Unacquainted
10. अनाथ..... Orphan/Help
                    less/Desolate
**************************
          गीता ज्ञान  :अध्याय 16
बदस सॗत्य ति नेक वरताव करुन
मन शान्त थवुन क्रूदी नॖ सपदुन
कर्म करुनुक त्रावुन अबिमान
वॊन भगवानन गीता ज्ञान
**************************
शुर छु थनॖ प्यनस ताम यऺड अन्द्रय संस्कारक्यव त्रॆयव तारव तरान। ज़्यनॖ पतॖ छि शुरिस बाकय संस्कारन हॖन्ज़ ज़ऻन्यकऻरी दिवान। यिमय संस्कार छि ॳमिस शुरिस जीवन यात्रायि मंज़ विज़ि विज़ि मेलान तॖ यि शुर छु बडान रोज़ान, ज़गॖ व्यवहारस मंज़ ख्वर त्रावान,गृहस्त आश्रमस मंज़ अच़ान, वान परस्थी प्रावान तॖ बुजरस मंज़ लूर डऺखरान तॖ ॴखॖर यथ संसारस नमस्कार कऺरिथ ब्यॆयि वापस गऺछ़िथ कथ ताम यूनि मंज़ प्रवेश करान। जीवन गाथा छि यिहऻय। ॳथ्य जीवन यात्रायि मंज़ छु मेल-मिलाप पनॖन्यन तॖ परद्यन सॗत्य, नव्यन तॖ प्रान्यन सॗत्य, द्वख स्वख भूगुन, मेलुन तॖ बिछडुन, ॳथ्य जीवन यात्रायि मंज़ छि ॳस्य मॊह मायायि किस ज़ालस मंज़ फसान तॖ अहम् ,क्रूद अबिमान तॖ लूब थवान, सॗत्य सॗत्य पऺतिमि ज़न्मस मंज़ कऺर्यमॖत्यन कर्मन हुन्द फल ति भूगान रोज़ान, यॆथ्य यात्रायि मंज़ छि ॳस्य पनॖन्य कर्म करान रोज़ान। लडऻय झगडॖ, माय महॊब्बत, मार दाड करान करान ॴखरस ॳछ वटान तॖ वुम्बरि हुन्द कमोवमुत  सोरुय यॆती त्रऻविथ नेरान पनॖनि वति।
सिरियस मंज़ छु तीज़ तॖ च़न्द्रमस मंज़ छि शीतलता। शुर्य सॖन्ज़ि जीवन यात्रायि मंज़ यिमन दॊनवॖन्य चीज़न हुन्द आसुन छु ज़रूरी। अमि म्वख छि अमिस शुरिस ज़न्मस यिनॖ पतॖय ग़्वडनिक्यन च़तजिहन  दॊहन मंज़ मंज़ॖय सिरिय सुन्द दर्शुन करनावान ताकि ॳमिस शुरिस खुलि पनुन भाग्य, तीज़ यियस ड्यकस प्यठ मान सम्मान मेल्यस तॖ सॗती छि च़न्द्रमॖ सुन्द ति दर्शुन करनावान ताकि यि शुर प्रावि शीतल स्वभाव, रोज़ि शुहुल प्रथ ॳक्यसॖन्दि खऻतरॖ तॖ पानस ति मेल्यस विज़ि विज़ि शेहजार पनॖनि जीवन यात्रायि मंज़। यिम  ज़ॖ संस्कार ति छि यिवान मनावनॖ। कथ छि जऻरी
**************************
" ज़न्म प्रऻविथ कर्म सोवुम
धर्म पोलुम सॊय छम सथ
न्यत्रन अन्दर प्रॆयम दोरुम
च़ोरुम तॖ मोनुम यिहोय अख"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

30.08.2019

30.08.2019 भऻद्रप्यथ (भाद्र) गटॖ पछॖ (कृष्ण पक्ष) मावस (देवादेव) (अमावस्या) शॊकुरवार (शुक्रवार/जुम्मा),श्री सप्तर्षी सम्वत 5095, राश सिंह (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ख्वजि छु यिनय तॖ टाव
         वॊथ ब्रौंठॖय
   अ: कऻन्सि हॖन्दि यिनॖच ख़बर
         ब्रुहींय वातॖन्य
2. मु: ख्वजा च़ॖ ति यिख नॖ ज़ांह
         बॖति समखय नॖ ज़ांह
    अ: यॆलि नॖ रलनस मेलनस
         कांह वथॖय आसि/यॆलि वतॖ
         अलग अलग आसन
3. मु: ख्वजि मूद तॖ च़ास ति
         बलेयि
    अ: मरनॖ सॗत्य छि वारियाह
         मसलॖ पानय हल गछ़ान
4. मु: ख्वजा गाम हा न्यूहऻय
         म्यॆ त्रोव पानय
    अ: युस अपुज़ ज़िछर हावि/
         युस न्वकसान गऺछ़िथ ति
         ब्यॆयिस बास दी नॖ
5. मु: ख्वजि छु खुशी करान ज़ि
         न्यॆचुव छुम गाटुल तॖ न्यॆचुव
         छुस पामॖ दिवान ज़ि मोल
         छुम बेकॖल
   अ: यॆलि बॊड ल्वकटिस यज़थ
         थवि तॖ ल्वकुट ज़ानि तस
         बेकॖल
**************************
1. उल्फत..... Attachment/
         Attraction/Affection
2. उल्टा पुलट....Side down
3. उजरथ.....Remuneration/
                 Compensation/
                 Wages
4. अहलिकार....Employee/
                 Public servant
5. अवॖ.........Yes
6. अवॖगॊन..Defect/Demerit
                  Fault/Blemish/
                  Worthless
7. अन्न.......Food/Grains/
                 Cooked food
8. अन....... To bring
9. अवमान....Insult/Disres-
                    pect
10. अवलिया.....Saint/Holy
                         man
**************************
          गीता ज्ञान  :अध्याय 16
मन वऻणी शरीर कऻन्सि कष्ट नॖ द्युन, पनुन तॖ परुद ह्यु ज़ानुन
दोस्त दुशमन ज़ानुन यकसान
वॊन भगवानन गीता ज्ञान
**************************
संस्कारन मंज़ छु अख संस्कार यथ वनान छि पुंसावना या पुंसवन। यि संस्कार छु यिवान करनॖ गर्भवती ज़नानि हॖन्दिस त्रॆयमिस रयतस मंज़। कॆंह छि वनान ज़ि पॗन्च़िमिस रयतस मंज़ छु यि संस्कार यिवान करनॖ। शुर चूंकि त्रॆयिमि रयतॖ प्यठय ह्यवान छु फऻम्फलुन, ॳमिसन्दि बॆहबूदी बापथ छु यिवान यि संस्कार करनॖ। भगवानस छि मंगान ज़ि यि शुर गछ़ि गर्भस मंज़ पलुन, बडुन कष्टॖव तॖ संकटव रॊस। कॆंच़न हुन्द वनुन छु ज़ि यॆमि संस्कारॖ दऺस्य छि यछ़ा यिवान करनॖ ज़ि न्यॆचुव गछ़ि ज़न्म ह्यॊन नवि रयॆत्य पतॖ मगर कऺमिस क्याह छु मेलान स्व छि ॳकिस ईश्वरसॖय यऻच़ ख़बर आसान। ॳथ्य सॗत्य छु ब्याख अख संस्कार ति यिवान करनॖ यथ नाव छु सीमन्तोन्नयन। यि संस्कार छु यिवान च़ूर्यमिस या पॗन्च़मिस रयतस मंज़ करनॖ यथ मंज़ माहर्यॆनि हॖन्दि मालिनि प्यठॖ द्वद छु वातान। यॆमि संस्कारुक महत्व छि दपान ईश्वरस यिवान मंगनॖ  माजि तॖ गर्भस मंज़ बडवुनिस शुरिस दॊनवऺनी हुन्द कल्यान तॖ शुर्यसुन्द यिनॖवोल वखत गछ़ि ह्रॊच़ तॖ फ्रूच़ न्येरुन तॖ अमि म्वखॖ छि करान रोज़ान बजन कीर्तन तॖ भगवान सुन्द गुन-गान। मतलब छु ज़ि शुर छु अनमोल रत्न यिवान मानॖनॖ। कूर या न्यॆचुव छि गरुक मान सम्मान बऺंडरावान, वंशस व्यस्तार दिवान तॖ क्वलुक नाव तॖ प्रज़नथ ज़िन्दॖ थवान। यिम ज़ॖ संस्कार छि स्यठाह महत्वपूर्ण यिवान मानॖनॖ तिक्याज़ि ॳमिस शुर्य सॗन्दि ज़्यनॖ पतॖ ॳम्यसॖन्द्यव जान या नाकारॖ कर्मव सॗत्य छु गर्युक आकार त्युथॖय रंग रटान। कथ छि जऻरी
**************************
"ओमकार शरीर कीवल ज़ोनुम
शब्द स्पर्श रूप रस गन्द सॗत्य ह्यथ
आत्म स्वरूप सु पानय ओसुम
परम् तत दोरुम शेरस प्यठ"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

29.08.2019

29.08.2019 भऻद्रप्यथ (भाद्र) गटॖ पछॖ (कृष्ण पक्ष) च़्वदह (चतुर्दशी) ब्रसवार (वीरवार/ ब्रहस्पथवार),श्री सप्तर्षी सम्वत 5095, राश सिंह (रऻच़ हॖन्ज़ॖ 8.10 बजि प्यठॖ),ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: हॊकमि हऻकिम मरगि
         मफाजात
    अ: हऻकिमि सॖन्दिस हॊकुमस
         छि प्यवान तऻमील करॖन्य
2. मु: हिसाब छु हारि तॖ
         बखशऻयिश छय खरवारि
    अ: यॆलि यार दोस्त या नऺज़दी-
         की नफ़र रच़न तॖ पींच़न
         हिसाब करनि बॆहन
3. मु: मऺहदॖ शाह ख्रॊन्य तॆलि न तॖ
         व्वंय
    अ: बे-वखतुक कार/यॊलि नॖ
         कार शूबि तॆलि करुन
4. मु: हरामुक माल हरामचि वति
         न यॆति न तति
    अ: हरामॖच कमऻय हरामचि
         वति गछ़ॖन्य
5. मु: हलहऻस हिसाब तॖ हरामस
         अज़ाब
    अ: हलालकिस पूरॖ हिसाब
        थवुन तॖ हरामस सज़ा तुलुन
**************************
1. यिनतिज़ाम..... Arrange-
          ment/Management
          Regulation/Adminis
          tration
2. यिनतिखाब.....Election/
          Selection/Revenue
          record/Choice
3. यिनतिकाल....Death/
          Alienation/Trans-
          mission/Departure
4. यंत्र.........Machine
5. यिनॖवोल वख.....Coming
                 events/Future
6. यॆन्यवोल......Marriage
          party/Bridegroom's
          party
7. युवनुक.......First born
8. यॊत...........Here
9. यॊत ताम.....Upto this
              point/As long as/
              While
10. यॊदवय.....Even if/Even
              though/Although
**************************
          गीता ज्ञान  :अध्याय 16
अगनॖ होत्रॖ तॖ जान कर्म करान
वीद शास्त्र परान तॖ परनावान
भगवत ग्वनन हुन्द कीर्तन करान
वॊन भगवानन गीता ज्ञान
**************************
संस्कारन हॖन्ज़ कथ छि जऻरी। सोन ग्वडन्युक संस्कार छु बीजवापन या गर्भादाना। यि संस्कार छु शुर्यसॖन्दि प्यठय शुरु। माननॖ छु आमुत ज़ि शुर छु माजि हॖन्ज़ि यऺड मंज़ॖय गर्भ दारनॖ पतॖ त्रॆयि रयॆत्य पनॖनिस द्यमागस ह्यवान कऻम ह्यॆन्य। यॆलि ॳमिस शुरिस पनुन नबॖज़ ह्यवान छु कऻम करुन संस्कार छि अमि शुरिस अमी वख्तॖ प्यठॖ शुरु गछ़ान मगर अमि ब्रौंठ ति छु अख संस्कार यिवान मानॖनॖ यॆलि बऻच़ ज़ॖ खान्दरॖ पतॖ ग्वडनिकि  फिरि सम्भोग करान छि। दपान स्व गऺर  गछ़ि रॖच़ आसॖन्य य्वस शुरिस ज़्यनॖ पतॖ फ्रूच़ नेरान छि। अमि बापथ छि ग्वडॖ गणेश जियिन पूज़ा करनॖच अख विधि तॖ अख संक्लप यिवान करनॖ ज़ि युस शुर ज़न्मस यी सु गछ़ि आसुन संस्कऻरी। तवय छि यथ संस्कारस नाव प्यॊमुत बीजवापन या गर्भदाना। माजि हॖन्द्य यिथ्य आच़रन आसन त्युथुय प्रभाव छु शुरिस प्यठ प्यवान गर्भस अंदरॖय। आज़मावनॖ छु आमुत ज़ि मऻज्य यिम यिम व्यच़ार पानस मंज़ यिवान रोज़न जान या नाकारॖ तमिच छाप छि प्यवान रोज़ान नवन रयतन शुरिस गर्भस मंज़ॖय।
गर्भकिस त्रॆयमिस रयतस मंज़ छु  संस्कार यिवान मनावनॖ।पाठ पूज़ा करान तॖ तिमव मंत्रव दऺस्य छु माजि तॖ ॳमिस शुरिस पानवुन्य ज़ग व्यवहार रूपॖ  संपर्क सपदान। कथ छि जऻरी
**************************
"ऒमुय अकुय अछुर पॊरुम
सुय हा मालि रॊटुम व्वंदस मंज़
सुय हा मालि कनि प्यठ गॊरुम तॖ च़ॊरुम
ॴसॖस सास तॖ सऻन्पनॖस स्वन"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

28.08.2019

28.08.2019 भऻद्रप्यथ (भाद्र) गटॖ पछॖ (कृष्ण पक्ष) त्रुवाह  (त्रॆयॊदशी) ब्वदवार (बुधवार) श्री सप्तर्षी सम्वत 5095, राश कर्कट (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: हर्फस गवाह तॖ म्यॆन्डिस
         शऺरीक
   अ: सॗत्य बोज आसुन/नऺज़दीकी
         ज़ऻन्यकार आसुन
2. मु: हमऻल्य तॖ दमऻल्य
   अ: पनॖन्य कथ बॆहनावनॖ खऻतरॖ
        शोर तुलुन
3. मु: हवऻल्यह्यथ तॖ दास दारऺज़
    अ: पनुन पनुन कॖस्मत
4. मु: हीलॖगऺरिस बहानॖ बिस्यार
    अ: यस नॖ करनस ग़रज़ आसि
          सु छु वारियाह हीथ रटान
5. मु: हरकत कर बरकत करी
    अ: दय करि तऺस्य बरकत युस
         पानॖ कॆंह करि
**************************
1. यलॖ त्रावुन.....To set free
2. यलॖ रोज़ुन....To be free
3. यलगार........Forced/
                    March of army
4. यल द्युन.....To rid oneself
                      of
5. यीमानदार...Honest/Faith
                   -ful/Upright/
                   Trustworthy/
                    Loyal
6. यॆम्बॖरज़ल..... Narcissus
7. यनामॖ.......Prize/Reward/
                    Gift
8. यनामॖ द्युन...To give prize/
                       To reward
9. यनॖ......... .From the time
                     since
10. यॆन्दॖर......Spinning
                     wheel
**************************
       गीता ज्ञान  :अध्याय 16
देश काल व्यच़ऻरिथ दान दिवान
यॆन्द्रय तॖ मन कऻबू थवान, दीव-
ताहन तॖ गुरुजियन आसि पूज़ान
वॊन भगवानन गीता ज्ञान
**************************
स़स्कारन हॖन्ज़ कथ छि चलान। ब्यॊन ब्यॊन जायन तॖ ब्यॊन ब्यॊन
ज़ऻच़न मंज़ छि संस्कारन हॖन्ज़ ग्रन्द ति ब्यॊन ब्यॊन। वुछनॖ छु आमुत ज़ि दक्षण भारतस मंज़ छि कॆंच़न तबकन च़दजिह संस्कार तॖ कॆंच़न छि अरतऻजिह संस्कार आमॖत्य थवनॖ तॖ व्वतरॖ तरफ़ छि च़ॊवुह संस्कार आमॖत्य थवनॖ। ज़्यनॖ प्यठॖ मरनस ताम छि ॳकिस इन्सानस आमॖच़ कॆंह ज़िम्मवऻरी दिनॖ कॆंह रसम रिवायत वर्तावनॖच यथ मंज़ कॆंह छि धर्मॖकिस आधारस प्यठ तॖ कॆंह छि सामजिकस आधारस प्यठ आमॖत्य मानॖन। सोन पान गछ़ि श्वद्  रोज़ुन, सऻनिस द्यमागस मंज़ गछ़न जान जान व्यच़ार रोज़ॖन्य, सारी वऻन्सि गछ़व रॖत्य कर्म करॖन अदय मेलि रुत फल पनॖनि वुम्बरि मंज़, स्वख तॖ शऻन्ती, थज़र तॖ बजर मेलि तॖ मरनॖ पतॖ ति मेलि सदगऺति। यिम चीज़ मध्यनज़र थऺविथ छि असि ऋशयव मुनियव सान्यव ज़िठ्यव पनॖनि पनॖनि तजरुबॖ मूजूब तॖ धर्मॖ शास्त्रॖ मूजूब यिम रसॖम या रीच़ॖ दोपमुत वयतरावॖन्य तॖ वरतावॖन्य। यिमन रसमन या रीतियन छु द्युतमुत नाव संस्कार। यिम संस्कार छि सऻन्य पहचान बनावान, सोन स्वभाव बनावान, सोन मेल मिलच़ार बनावान वगैरा वगैरा। अख कर्मॖकांड ति छु बनोवमुत सान्यव ऋश्यव मुनियव युस सऻनिस ज़िन्दगी हॖन्दिस सफ़रस मंज़ सॗत्य सॗत्य पकान छु असि ह्यॆछनावान धर्म क्याह गव अधर्म क्याह गव, श्रूच़ क्याह गव छ़्यॊट क्याह गव, जान नाकारॖ क्याह गव, मान सम्मान क्याह गव, ज़्युठ कूंस क्याह गव वगैरा वगैरा। यि कर्म कांड ति छु अलग अलग ऋश्यव अलग अलग ज़ऻच़ बापथ ल्यूखमुत, वॊनमुत, बॊज़नोवमुत तॖ तऺथ्य परम्पराय तहत छि आमॖत्य ॳस्य पकान वुन्युखताम तॖ रोज़व ब्रौंहकुन ति पकवॖन्य। असि कऻशिर्य बटन हुन्द कर्मकान्ड छु लोगाक्ष्य ऋश्यन ल्यूखमुत युस ॳस्य वरतावान छि। कथ छि जऻरी
**************************
"ओमकार येलि लयि ऒनुम
वुही कॊरुम पनुन पान
शिवॊत त्रऻविथ सथ मार्ग रॊटुम
त्यॆलि लल बॖ वऻच़ॖस प्रकाशस्थान"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
  नऺविव तॖ फॊलिव
    भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.08.2019

27.08.2019 भऻद्रप्यथ(भाद्र)गटॖ पछॖ (कृष्ण पक्ष)बाह (द्वादऺशी)बॊम्वार (मंगलवार),श्री सप्तर्षी सम्वत 5095, राश कर्कट(रऻच़ हॖन्ज़ॖ 7.21 बजि प्यठॖ)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: चन्दस ह्यु नॖ बांधव कांह
    अ: पौंसॖ छु सऻर्य ख्वतॖ बॊड
          दोस्त
2. मु: च्यॊन म्वन्गॖ त्रख सोन स्युन
         अख
   अ: यॆलि ख़र्च ज़्यादॖ आसि/
         बऺड नज़र आसॖन्य
3. मु: च्योन नॖ सॖथॖर तॖ म्यऻन्य नॖ
         कतवऺन्य
    अ: न मूल तॖ न सूद
4. मु: हाल मतॖ प्रॖछ़तम रॊयसॖय
         वुछतम
    अ: कऻन्सि हुन्द गुदरुन छु तस
          सॖन्दि बुथि प्यठॖ ननान
5. मु: हऻज़्यरस बोग तॖ नऻज़्यरस
         चौब
    अ: वख्तस प्यठ हऻज़िर आसॖ-
          नस छु फ़ऻयदॖ
**************************
1. यकुत..Oneness/Unison/
               Sameness/Union
2. यकुत करुन....To unite
3. यकसान.... Equal/Same/
              Similar/Uniform/
               Even
4. यकुम.......First
5. यकॖ...... Vomiting
6. यकॖ वटॖ.....Together
7. यकमुश....At once/At a
                    stretch
8. यल.......Twist/Turn
9. यलॖ.......Open
10. यगजाह....Together
**************************
         गीता ज्ञान  :अध्याय 16
          श्री भगवान वनान
युस बेखोफ़ छु आसान, ब्यॆयि यस
अंत:कर्ण श्वद्ध आसान
लगातार आसि म्योन ध्यान दारान
वॊन भगवानन गीता ज्ञान
**************************
सानि ज़ऻच़ मंज़ छि आमॖत्य कुल च़ॊवुह (24) संस्कार मानॖन यिम सान्यव ऋश्यव मुनियव दऺस्य आयि असि ताम वातनावनॖ धर्म-शास्त्रॖ दऺस्य,धार्मिक-किताबव  दऺस्य या सान्यव पूर्वजव दऺस्य विज़ि विज़ि। यिमन संस्कारन हॖन्ज़ वखनय करॖन्य छि सोन ति फ़र्ज़ बनान ताकि यि परम्परा रोज़ि चलवॖन्य सान्यन नवॖवुन्य तॖ फ्वलवुन्य शुर्यन ताम ति। ग्वडॖ वुछव ॳस्य ज़ि संस्कार गयि क्याह तॖ यिम संस्कार अंद वातनावॖन्य क्याज़ि छि ज़रूरी। यिमन संस्कारन हुन्द महत्व छु क्याह। हालांकि यि विषय छु स्यठा ज़्यूठ तॖ व्हाटसापस प्यठ यी नॖ वनॖनॖ सोरुय अल्बतॖ अख नज़र त्रावव ॳस्य यिमन संस्कारन प्यठ प्यॆठ प्यॆठ ताकि सान्यन शुर्यन गछ़ि ज़ऻन्यकऻरी ज़ि यि छु क्याह। ग्वडॖ वुछव ॳस्य यिम च़ॊवुह संस्कार छि क्याह।
1. गर्भादान 2. सीमांतोन्नयन
3. पनसुवन 4. लठ म्वकलावॖन्य
5. त्रुय   6. श्रान स्वन्दर  7. नाम- करण   8. ज़ातॖ कर्म/काह-न्येथॖर
9. सिरियि दर्शुन  10. मास न्येथॖर
11. शिशुर   12. नवशीन
13. निष्क्रमण   14. दंत दावन
15. अनुप्राषण   16. ज़रकासय
17. वॊहरवोद   18. कर्ण भेदन
19. यॊनि/मेखल/उपनयन/यज्ञो-
पवीत  20. समावर्तन:  21.विवाह/खान्दर/न्येथॖर
22. गृहस्थ   23. वानपरस्थ
24. अन्त्येष्टि
यिमन संस्कारन प्यठ करव ॳस्य चर्चा यॊछ़ हय भगवानन पगहॗकि प्यठॖ। मगर अख म्यऻन्य व्यनती त्वहि सारिनी छि यि ज़ि पनॖन्यन शुर्यन दीव ज़ऻन्यकऻरी यिमन चीज़न हॖन्ज़।
**************************
"अकुय ओमकार युस नाबि दरे
कुम्बय ब्रह्मांडस सुम गरे
अख सुय मंथॖर च़्यतस करे
तस सास मंथॖर क्याह करे"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

26.08.2019

26.08.2019,भऻद्रप्यथ (भाद्र) गटॖ पछॖ (कृष्ण पक्ष)दऺहम(देवादेव)दशमी,च़ऺन्दॖरवार (सोमवार),श्री सप्तर्षी सम्वत 5095, राश मिथुन(चलान) ऋतु वर्षा (चलान)....चूंकि पगाह छि काह रावान, पगहुक वॊहरवोद यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: चॊटन्य ज़ि टपास
    अ: पॊतुस पथ थापॖर
2. मु: च्यॆटि नूर शाह
    अ: हंगॖ तॖ मंगॖ लांज बार ह्यॊन
3. मु: छानस तोरि छपॖ पानस
         कुन
    अ: ग़रज़मन्द छु हमेशि पानस
         फ़ऻयदॖ वातनावानॖच कूशिश
         करान
4. मु: छानस यॆलि प्यॆयि पानस
         प्यठ यीकॖल तुलि शानन
         प्यठ
    अ: मजबूरी मंज़ हॆकि इन्सान
         कॆंह ति कऺरिथ
5. मु: छानॖ ट्वख छु नॖ बसतॖ
         रोज़ान
    अ: कांह कऻम छॆ नॖ खऺटिथ
          रोज़ान
**************************
1. यक़बाल.....Luck/Dignity/
              Eminence/Power
              Good fortune/
              Acceptance
2. यक़रार..... Agreement/
             Promise/Assuran-
             ce/Acknowledge-
             ment
3. यकीन......Faith/Confiden
                    -ce/Truth/Cer-
               tainty/Assurance
4. यक़ीन आसुन....To have
                            faith
5. यक़ीन थवुन.....To keep
             faith/Be confident
             Be sure
6. यक़ीनन....In fact/In deed
             Certainly/Definite-
             ly/Positively
7. यक....One/Single
8. यकबार....One time/Once
               One supreme
             effort/All together
9. यकजहती....Unity/Unani-
              mity/Agreement/
              Accord
10. यकजा....Together/In
                     one place
**************************
        गीता ज्ञान  :अध्याय 15
हे अर्ज़न यि गुप्त तॖ पुर असर ज्ञान म्यॆ वॊन ज़ानि युस प्वरुश तत्वॖ सान, छु सु क्रतारथ तॖ ज्ञानवान बनान,
 वॊन भगवानन गीता ज्ञान
**************************
च़ॊवुह अगस्त 2019 तॖ बटॖवारि द्वह सपॖज़ अख मीटिंग YMCA-किस आडिटोरियमस मंज़ यथ मंज़ शिरकथ कऺर ब्यॊन ब्यॊन संस्थायक्य सदस्यव। यि मीटिंग ॴस आमॖच़ बुलावनॖ यकजुट गऺछ़िथ मोदी जियस तॖ ॳमित शाह सऻबस मुबारकबाद दिनॖ खऻतरॖ ति क्याज़ि तिमव नी कऺशीरि मंज़  धारा 370 तॖ 35A ख़तम कऺरिथ। अथ मीटिंगि मंज़ ॴस्य कऻशिर्य समाजिक कॆंह ज़ऻन्यकार लीडर आमॖत्य। ज्यॆमि जगती प्यठॖ ति ओस अख नुमायन्दॖ आमुत अथ मीटिंगि मंज़ शिरकथ करनॖ बापथ।  पनॖन्य पनॖन्य व्यच़ार आयि व्यक्त करनॖ तॖ   जान राय तॖ तदबीर आयि दिनॖ ज़ि किथपऻठ्य ह्यकव ॳस्य ॳकसॖय सायेबानस तल रूज़िथ रऺलिथ तॖ मीलिथ तॖ अख ॳकिस सॗत्य  अथवास कऺरिथ पनॖन्य दऻद्य सरकारस बऻविथ। मीटिंग रूज़ सफल हालांकि अख ज़ॖ शेतान दपान ॴस्य आमॖत्य अथ मीटिंगि मंज़ बंगॖज़ऺर करनि मगर आयख नॖ ति करनॖच अथ वथ। तिमन ॴस नॖ शायद नियथ साफ़। तिमव करेयेय रंगस बेऱगी करनॖच कूशिश मगर त्युहॖन्द मनशा गव नॖ पूरॖ। आडिटोरियम ओस लूकव सॗत्य बऺरिथ। ख्यनॖच च्यनॖच व्यवस्था ति ॴस आमॖच़ करनॖ। श्री अरुन जेटली  सॖन्ज़ स्वर्गवास गछ़नॖच ख़बर आयि तॖ नन्यव ज़ि तमिकिन्य ह्यॊक नॖ चीफ़ गैस्ट मीटिंगि मंज़ वऻतिथ मगर तिमव ॴस्य पनॖनि बदलॖ कॆंह मॆहमान सूज़्यमॖत्य।थोड़ा सा मुच़ुकरी गछ़नॖ पतॖ ति रूज़ मीटिंग स्यठाह सफल यम्युक श्रेय छु गछ़ान तिमन कार्यकर्ताहन यिमव इकॖवटॖ गछ़नुक अख स्वपुन साकार बनोव।
**************************
"लल बॖ लूसॖस छ़ान्डन तॖ ग्वारन
हल म्यॆ कॊरमस रसॖनि शिति
वुछुन ह्यॊतमस तऻड्य डींठमस बरन
म्यॆति कल गनेयम ज़ि ज़ोगमस तती"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

25.08.2019

25.08.2019, भऻद्रप्यथ (भाद्र) गटॖ पछॖ (कृष्ण पक्ष) नवम (देवादेव) (नवमी) आथवार (रविवार/एतवार),श्री सप्तर्षी सम्वत 5095, राश मिथुन (दुहचि 4.12 बजि प्यठॖ) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: छानॖ ठुक
    अ: अडॖल्यॊक कार/य्वस कऻम
         नॖ पूरॖ छि गछ़ान
2. मु: छानस नॖ चोंचॖ खारस नॖ
         क्रॊछ़
    अ: युस यॆमि कारुक मऻहिर
         आसि तस छु नॖ सु चीज़
         गरि आसन
3. मु: छानॖ किज्य
. अ: कऻन्सि कऻसिब सुन्द
        ज़ऻनिथ मऻनिथ न्वकुस
        थवुन
4. मु: छानॖ ठुकस छुय रस तयार
    अ: मऻहिर इन्सानस छॆ नॖ ख्यनॖ
      खॊरदऺनी हॖन्ज़ कऺमी आसान/
       यॆलि कांह कऻम करि तस छु
       यज़थ मेलान
5. मु: छाव यिथ बतॖ दाव यिथ
         कथ
   अ: प्रथ कामि छु मॊकस प्यठॖ
        क़दॖर आसान/बत्तॖ गछ़ि
        छाव ॳनिथ ख्यॊन/कथ
        गछ़ि सूंचिथ समझिथ करॖन्य
**************************
1. यॆच़कऻल्य.....After a long
                       time
2. यछ़.....Wish/Appetite/
               Will/View/Inten-
               tion
3. यछ़ुन......To desire/To
               wish/To want/To
               propose
4. यछ़ पछ़......Belief/Hope/
               Trust/Support/
               Reliance/Confi-
               dence
5. यच़......Much more/
               Plentiful/Abun-
               dant
6. यच़काल......For a long
                       time
7. यसलॖ...... Often/Fully/
               Innumerable/
               Countless
8. यसास कमतरी..Inferiority
                           complex
9. युस......Who/Which one
10. यश...Fame/Greatness
               Reputation/Glory
               Character/Splen-
               dor/Renown
**************************
        गीता ज्ञान  :अध्याय 15
युस ज्ञऻनी म्यॆ त्वतवॖ सान ज़ानान
परशोतम नावॖ ज़ानि म्यॆ सुय ज्ञानॖवान
सु लगातार म्यॆ वासॖदीवस बजान
वॊन भगवानन गीता ज्ञान
**************************
ज़रमॖसतम आयि मनावनॖ ऊतरॖ यानि त्रॊवुहमि अगस्त 2019  सानि ज़ऻच़ दऺस्य बडॖ हर्षोल्लासॖ सान। प्रथ गरन मनऻव पनॖनि पननि तऺरीकॖ। यि द्वह आव मनावनॖ वारिहान संस्थायन मंज़ ति ब्यॊन ब्यॊन जायन बडॖ जान पऻठ्य। अथ सिलसिलस मंज़ कऺड प्रगाश संस्थायि, वैशाली, ग़ाज़ियाबादॖ  राथ यानि च़ॊवुहमि अगस्त 2019 अख झांकी ति य्वस फीर वैशाली मंज़ॖय द्वन त्र्यन स्यक्टरन मंज़। अथ झांकी मंज़ ॴस्य ल्वकॖट्य बालक/बालिकायि आमॖत्य कृष्णॖ भगवान तॖ राधा बनावनॖ, कृष्णॖ लीलायि आयि ग्यवनॖ तॖ कॆंच़व भक्तव कॊर नच़ुनाह ति तॖ सऻर्यसॖय वति दिच़ॖख त्रेश, ज्यूस, म्यवॖ तिमन सारिनी भक्तजनन यिम अथ झांकी सॗत्य सॗत्य पकान ॴस्य।
प्रगाश संस्थायि ॴस येमि लटि वृद लूकन हॖन्दि बापथ बैट्री-रिख्शायन हॖन्ज़ ति व्यवस्था कऺरमॖच़। बडॖ जान पऻठ्य आयि यि झांकी कडनॖ प्रगाश संस्थायि दऺस्य तॖ यिमन वोत पऺतिम्यव पांच़व वऺरियव प्यठॖ कडान यि झांकी वैशाली गोपी नाथ जी कि आश्रमॖ वैशाली, स्यकटर च़ोरि प्यठॖ। कथ जि जऻरी।
**************************
"स्वर्गस फीरॖस बऺरगस बऺरगस
त्वर्गस खऺसिथ मऻरिम छ़ॊह
अंद नो लॊबमो चऻनिस वर्गस
बॖ क्वस लल तय म्यॆ क्याह नाव"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

24.08.2019

24.08.2019 भऻद्रप्यथ (भाद्र) गटॖ पछॖ (कृष्ण पक्ष) ॴठम (देवादेव) अष्टमी, बटॖवार (शनिवार/शनिश्चरवार),श्री सप्तर्षी सम्वत 5095, राश वृष(चलान)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: छलन मल छा अच़ान किनॖ
         नेरान
    अ: कथ कथ करनॖ सॗत्य छि
          फुठ नेरान
2. मु: छत्र बून्य
    अ: बऺडद्यद यस वारियाह ज़ुर्य
          पथुर्य आसन
3. मु: छम छिठ तॖ छॆमा कऻन्सि
    अ: अपुज़ मपुज़ थ्यकॖनावुन
4. मु: छऺल्य छऺल्य माहाराज़ॖ
    अ: साफ़ पलव लऻगिथ नेरन-
          वोल
5. मु: छॆनी मॖट छि वज़ान
    अ: छॊन इन्सान छु ज़्याद
         थ्यकान
**************************
1. यज़थ..... Honour/Repu-
             tation/Respect/
             Dignity/Esteem
2. यज़थ दार.... Respectable
3. यज़थ द्युन....To respect/
               To confer honour
               or dignity
4. यज़थ रावुन....To lose
                          respect
5. यज़थ वालुन....To insult/
               To dishonour/To
                disgrace
6. यऺज़मन....One who offers
                money to Brah-
            mans/Host/Father
             of bride or bride-
             groom
7. यऺज़मनबाय....Hostess/
             Mother of bride or
             bridegroom
8. यिज़ाह...... Trouble/Pain/
               Distress/Difficul-
            ty/Hardship/Agony
9. यिज़ाह तुलुन......To face
                 hardship/Pain
10. यिज़ाह द्युन....To trouble
                 someone/To
                 harm/To hurt/
                To annoy
**************************
          गीता ज्ञान  :अध्याय 15
तिक्याज़ि बॖ नाशवान जड वर्गॖ यच़ दूर, अविनऻशी ज़ीव आत्मा निशि पुरनूर
तवय वीदन मंज़ म्यॆ प्वरशोतम वनान
वॊन भगवानन गीता ज्ञान
**************************
नऻर्यवनॖच कथ छि चलान। यि छु आमुत मानॖनॖ रक्षासूत्र। तॊत ताम छे नॖ कांह पूज़ा सम्पन्न सपदान यॊत ताम नॖ ट्यॊक यी लागनॖ  तॖ नऻर्यवन यि गन्डनॖ। मानॖनॖ छु यिवान ज़ि नऻर्यवन छु इन्सान सुन्द बॖल्ड प्रशर नियन्त्रनस मंज़ थवान। यिति छु यिवान मानॖनॖ ज़ि पांच़न वऺरियन लगातार नऻर्यवन गन्डनॖ सॗत्य छि इन्सान सॖन्ज़ॖ वारियाह ब्यमारि दूर गछ़ान ख़ास तोर पऻठ्य दिलॖच ब्यमऻर्य कम करान, द्यमागॖच सूजन च़ऺलरावान तॖ रक्तचाप यानि बॖल्ड प्रशर म्वकलावान।नामकरन संस्कारॖ प्यठय छि नऻर्यवन गन्डनॖच प्रथा चलान रोज़ान।अकि वॊहरवादि प्यठॖ ब्यॆयिस वॊहरवऻदिस ताम गछ़ि यि नऻर्यवन युन गन्डनॖ।वॊहरवऻदिस प्यठ छु असि कऻशिर्यन नऻर्यवनस अलगॖय महत्व आसान तिज़न गव ज़ि नऻर्यवन अख रक्षासूत्र मऻनिथ छि ॳस्य नऻर्यवनस विष्णु सुन्द रूप दिवान तॖ अथ सथ गन्ड सप्तार्षि हॖन्दि नावॖ करान तॖ ॳकिस थालस मंज़ कुनि कटोरि प्यठ थऺविथ पूज़ान यानि मंत्र पऺरिथ तॖ पां धार त्रऻविथ, पऻनिस मंज़ अर्ग-पोश,माछ,द्वद ओम्-ज़ामुत,वगैरा मिलनऻविथ
शक्ति-युक्त बनावान तॖ अदॖ नरि प्यठ गन्डान सॗती छि ताहरि प्रेप्युन हावान। अथ नऻर्यवनस यिमन चिरजीवी ऋष्यण हॖन्दि नावुक ब्रह्म-गन्ड यिवान छु दिनॖ तिमन ऋष्यन हुन्द नाव छु अश्यवत्थामा, बलि, व्यास, हनुमान, कृपाचार्य, मार्कंडेयि तॖ परशुराम।यिहॖन्ज़ पूज़ा कऺरिथ छि ताहरि नवीद करान तॖ यिथ पऻठ्य छु नऻर्यवनस ॳस्य कऻशिर बटॖ महत्व बऺडरावान।
**************************
"लोलॖकि व्वखलॖ वऻन्लिज पिशिम
क्वकल च़ऺजिम तॖ रूज़ॖस रसय
बुज़ॖम तॖ ज़ऻजिम पानस च़ॖशिम
कव ज़ानॖ तव सॗत्य मरॖ किनॖ लसॖ"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

23.08.2019

23.08.2019,भऻद्रप्यथ (भाद्र) गटॖ पछॖ (कृष्ण पक्ष) सतम (देवादेव) (सप्तमी) शॊकुरवार (शुक्रवार/जुम्मा),श्री सप्तर्षी सम्वत 5095,राश वृष (दुहचि 8.57 बजि प्यठॖ),ऋतु वर्षा (चलान)...अज़ छि ज़रमॖ-सतम यानि जन्माष्टमी ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: जहनमुन च़ॊक
   अ: सख़ अज़ाब/अज़ाबॖच जाय
2. मु: जहनऺम्य तऻव
    अ: तापॖ च़ऺन्ड/सख़ गरम
3. मु: जोदगारस जोद गरस
    अ: युस ब्यॆयिस दोखॖ करि तस
          छु पानस दोखॖ वातान
4. मु: जवानस क्याह करि द्रठॖ-
         पऻन्च़ुक
    अ: बहॊदरस छॆ नॖ बलाय
         पोशान
5. मु: जंगॖ मीर
    अ: बऺल्य प्यठोवऺली करनवोल
**************************
1. यख़......Cold/Ice
2. यखॖन्य....A meat dish
                  cooked in curds
3. यख्तियार.....Authority/
             Power/Command
             Control/Choice/
             Option
4. यख़लाक़......Character/
                        Manners
5. यऺडॖल.....One who eats
                  more/Glluton
6. यड........ Abdomen
7. यऺड दोद....Stomach ache
8. यीरवुन...... Floating
9. यीरवॖन्य नाव.... Floating
             boat/Confusion/
             Strained circums-
             tances
10. येर......Wool
**************************
        गीता ज्ञान  :अध्याय 15
यिमन द्वन मंज़ उत्म ब्याखॖय ज़ान
छु त्रॆयन लूकन तॖ सारिनी पालान
तस अविनऻशियस पर्म ब्रह्म वनान
वॊन भगवानन गीता ज्ञान
**************************
राथ ज़ोन असि ट्यॆक्युक महत्व, ट्यॆकिक्य कॖसॖम वगैरा वगैरा। यिथय पऻठ्य छु नऻर्यवन ति सऻनिस रसमॖ रिवाजस सॗत्य जुडिथ। हवनस प्यठ, वॊहरवऻदिस प्यठ, बऺडिस तॖ लूकिस दॊहस प्यठ छि आमॖत्य ॳस्य नऻर्यवन गन्डान सऺदियव प्यठॖ। मर्द छि दऺछिन नरि हॖन्दिस हऺच़िस गन्डान, कोरि ति छि दऺछनिस हऺच़िस गन्डान मगर विवाहित  ज़नानॖ छि यि नऻर्यवन खोवर्य नरि हॖन्दिस हॖच़िस गन्डान। केसरी तॖ सफ़ेद रंगुक कचॖ सूतॖ पन छु बनान नऻर्यव। कऻशिर्य पंडितन युस नऻर्यवन यिवान गन्डनॖ छु सु छु ग्वडय त्र्यन च़्वन पन-दावन मंज़ वुठिथ आसान तॖ युस बाकय हॆन्द्य नऻर्यवन गन्डान छि स्व छि कुनीय पनॖ दाव आसान य्वस नरि प्यठ यिवान छि गन्डनॖ त्र्यॆ या च़ोर वार दिथ। यि फरॖख क्याज़ि छि, कति प्यठॖ चलान आमॖच़ छि यि वनुन छु ज़रा मुश्किल। मगर हक़ीक़त छि यि ज़ि न छु प्रॖछ़नस कांह तॖ न छु वनॖनस कांह। नऻर्यवन आयि गन्डान सऻरी यऻरी कऺरिन्य असि सारिनी मऻज्य दीवी। कथ ज़ि जऻरी
**************************
"ललि म्यॆ दॊपुख लूख हांड करनय
तवय च़ऺजिम मनॖच शेंख
माघ नोवुम नार च़ोलुम
क्रयि हॖन्ज़ कऻसॖम मनस शेंख"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

22.08.2019

22.08.2018 भऻद्रप्यथ (भाद्र) गटॖ पछॖ (कृष्ण पक्ष) शॆयम(देवादेव) (षष्ठी) ब्रसवार (वीरवार/ब्रहस्पथवार),श्री सप्तर्षी सम्वत 5095,राश मेष (चलान) ऋतु वर्षा (चलान)...अज़ छि दॊयिम शॆयम तॖ शॆयम हुन्द
 वॊहरवोद यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: जऺच़ रॊस हून
    अ: स्यठाह ग़रीब/शिकसलद
2. मु: जगॖ यॆज़मन
    अ: कुनि वॊसि-द्रॊसि मंज़ हंगॖ-
          तॖ मंगॖ होरॖ-योर करनवोल
3. मु: जमाथ गऺयि करामात
    अ: अख तॖ अख गव काह/
          इतिहादस छु ताक़त
4. मु: जन्नतुक माज़ॖ द्वगुल
    अ: स्यॊद सादॖ इन्सान/युस नॖ
         चालाक आसि
5. मु: जन्दगऺर्य बापार
    अ: बे-तरतीब/खुर्यलद
**************************
1. यिथऻय..... Little/Very
                    little/The least
2. यिथय......Free/Without
                   cost
3. यिथय प्यॊन....To get free
4. यत्रुन........To bear/To
                     endure
5. यथ.........To this
6. यिथ.......After you come
7. यिथॖपऻठ्य....Like this
8. यिथॖपऻठ्य तिथॖपऻठ्य..Some
            - how/By hook or
              by crook
9. यऺट.....A basket used for
              carrying load on
              shoulders
10. यठ........Jerk
**************************
         गीता ज्ञान  :अध्याय 15
सम्सारस मंज़ अविनाशी तॖ नाशवान, खीर अखीर द्वयि प्रकऻर्य प्वरुश आसान।
आत्मा अविनऻशी तॖ शरीर नाशवान।
वॊन भगवानन गीता ज्ञान
**************************
 ट्यॆकिच कथ छि जऻरी। यूग्य तॖ साधक छि ट्यॆकिक ग्वन ग्यवान रोज़ान। दपान साधनायि वख्तॖ या प्राणायाम अभ्यास करनॖ सॗत्य छु ड्यकस प्यठ तच़र यिवान या जलन हिश पऻदॖ सपदान। अमि मूजूब छु सान्यव ऋश्यव मुनियव यि राय दिच़मॖच़ ज़ि अथ समयस प्यठ गछ़ि ड्यकस प्यठ ठंडॖ चीज़ युन लगावनॖ। च़न्दुन छु आमुत मानॖन शुहुल तॖ च़न्दन ट्यॊक करनॖ सॗत्य छु ड्यकस शेहजार मेलान, द्यमाग़ छु तरो-ताज़ॖ रोज़ान। स्यॆन्दॖर दपान छि आसान गर्म असरदार। दॊहय स्यॆन्दरि ट्योक करुन छु नॖ ठीख रोज़ान ख़ास कर गर्म अलाक़स मंज़। कऺशीरि मंज़ दपान स्यॆन्दरि ट्यॊक ओस ठीख रोज़ान। क्वोंगुक तऻसीर ति छु गर्म यिवान मानॖनॖ, कऺशीरि मंज़ ओस क्वॊगॖ ट्यॊक ति यिवान करनॖ। यज्ञ्यस हवनस मंज़ छि भस्मुक-क्रुहुन ट्यॊक लागनॖच प्रथा चलान। दक्षण दिशायि मंज़ बसकीन छि भस्मॖ ट्यॊक ड्यकस प्यठ द्वन आकारन मंज़ लगावान। यिम शिव उपासक आसान छि तिम छि ड्यकस प्यठ त्र्यॆ रॖखॖ बनावान तॖ यिम विष्णु उपासक छि आसान तिम छि ड्यकस प्यठ ह्यॆरि प्यठॖ ब्वन ताम ड्यकस मंज़ ज़्यूठ आकार गोलऻयी मंज़ ट्यॊक करान रोज़ान। यिथय पऻठ्य सानि माजि ब्यॆनि छि नक़ली मानि प्लास्टिक ट्यॊक लागान रोज़ान। अमि ट्यॆकि सॗत्य छु नॖ ड्यकॖ खऻल्य बासान मगर अमि ट्यॆक्युक महत्व छु नॖ किहीं ति आसान। यि छि सिरिफ अख नज़ाकथ तॖ ब्यॆयि नॖ कॆह। तवय छे नॖ च़लान असि पनॖन्य तॆह
**************************
"युसहो मालि ह्यड्यम ग्येल्यम
मसखऺरी कर्यम
सु हो मालि मनस खर्यम नॖ ज़ांह
शिव पनुन यॆलि अनुग्रह कर्यम
लूकॖ ह्यडुन म्यॆ कर्यम क्याह"
  पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.08.2019

21.08.2019 भऻद्रप्यथ (भाद्र) गटॖ पछॖ (कृष्ण पक्ष) शॆयम (षष्ठी) ब्वदवार (बुधवार) श्री सप्तर्षी सम्वत 5095, राश मेष (चलान) ऋतु वर्षा (चलान)...चूंकि शॆयम छि ज़ॖ गछ़ान, ॳज़्युक वॊहरवोद यी पगाह मगर अज़ छि च़न्दन षष्ठी व्रत
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: जिगरय छु करान कार
    अ: ह्ममथ छि बऺड
2. मु: जऻनी यार तॖ नऻनी यार
    अ: असली तॖ मतलबी यार/
          द्वन दोस्तन मंज़ फ़रॖख
          करॖन्य
3. मु: जानॖ मरगॖ हॖन्द्य केरन
    अ: सख़ खॊडॖ-फ्यॆचि आसनि
4. मु: जिगर पारचि
    अ: स्यठाह टोठ
5. मु: जन्दस पऻर्य वन्दस कऺर्यज़ि
         राहत
    अ: मोमूली चीज़ ति ह्यॆकि
         वखति ज़रूरत फ़ऻयदॖ दिथ
**************************
1. यथ दमस ताम....Up to this
                             moment
2. यथ बजाय..... Instead of
                          this
3. इतमिनान.....Confidence/
             Satisfaction/Com-
             fort/Ease
4. इतमिनानॖ सान....With con-
            fidence/With satis-
            faction/With ease/
            With comfort
5. यिथॖ तिथॖ....Some how/
           By hook or by crook
6. यिथय ह्यु....Sadness
7. युथ........This type of
8. युथुय......As soon as/Of
            the same type/Of
            the same shape
9. युथ त्युथ.....Ordinary/
            Normal/Usual/
            Common/Medium
            Average
10. यिथॖ किन्य....Like this/
                         This way
**************************
          गीता ज्ञान  :अध्याय 15
अंतरयऻमी रूपॖ हृदयन मंज़ बसान
सुमरॖच़ ज्ञानॖ तॖ वीद ज़ाननॖ यिवान
वीदांत बनावान बॖय वीद ज़ानान
वॊन भगवानन गीता ज्ञान
**************************
ट्यॆकिच कथ छि चलान। ब्यॊन ब्यॊन कॖसॖम छि ट्यॆकिक। च़न्दन ट्यॊक, सॆन्दॖरि ट्यॊक, क्वन्गॖ ट्यॊक, भस्मॖ ट्यॊक, नक़ली ट्यॊक, रंगोलि ट्यॊक। प्रथ ट्यॆकिस छु ब्यॊन ब्यॊन तऻसीर आसान। दपान छि ट्यॆकिस मंज़ छि ईश्वर शक्ति आसान। यि शक्ति आसनॖ म्वखॖ छु इन्सान बुर कामि करनॖ निशि बचान रोज़ान। ट्यॆकिच मर्यादा छि इन्सानस प्यवान याद करॖन्य। मान्यता छि यॆमिस इन्सानस ट्यॊक कऺरिथ आसि, तमि मंज़ छु अख विश्वास व्वपदान। तऺमिस छि विकासॖच अख सऺही दिशा मेलान। यॆमिस इन्सानस मस्तक यानि यि ड्यकॖ ट्यॆकि रॊस आसि तऺमिस मंज़ छि भाग्यहीनता नज़र यिवान। व्वदऻसी हिश बासान। ड्यकस प्यठ द्रह हिश बासान। यिम नॖ ट्यॊक करान छि, तिमन छु नॖ बासान कॆंह ठीख या ग़लत। मगर यिमन ईश्वरस मंज़ आस्था छि आसान, यिम ट्यॊक कऺरिथ पनॖन्य दिन-चर्या करान रोज़ान छि, तिमन छु अम्युक महत्व बासान विज़ि विज़ि। तिमन यॊदवय ट्यॆकिस थख गछ़ान छु, वनॖनॖ छु यिवान ज़ि तिमन छु बासान ज़ि तिम छि तमि द्वह, तमि वख्तॖ स्यठाह कमज़ोर बासान। तिमन छु बासान ज़ि तिम छि शक्तिहीन ज़न। वनुन छु यि ज़ि ट्यॊक ड्यकस प्यठ आसनॖ सॗत्य छि मनस शऻन्ती मेलान। तऺमिस छि कॖस्मतॖक्य दर्वाज़ॖ मुच़रनॖ यिवान।यि ह्यॆकि सुय वऺनिथ, युस ट्यॊक करनॖ तॖ न करनॖस मंज़ फरख ह्यॆकि च़ीनिथ। कथ छि जऻरी। त्वहि यऻरी करुन दय
**************************
"मनसॖय मान भवसरस
छ्युर कूपा न्यॆर्यस नारॖ छ्वख
ल्यकॖ-ल्यख य्वद तुलि कूट्य
तुलि तुल तय तुल ना कॆंह"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

20.08.2019

20.08.2019 भऻद्रप्यथ (भाद्र) गटॖ पछॖ (कृष्ण पक्ष) पऻन्च़म (पन्चमी) बॊम्वार (मंगलवार)श्री सप्तर्षी सम्वत 5095, राश मॆष(दुहचि 10.27 बजि प्यठॖ)(द्रठॖपऻन्च़ुक समाप्त),ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: थ्वकॖ न्यॆचुव म्वकॖदम
    अ: नाक़ऻबिल इन्सान ज़्युठ
          बनुन
2. मु: तेलॖ-फॊल छु ख्यॊमुत सतव
         बारन्यव
    अ: इन्सानस पज़ि बऻगरिथ
         ख्यॊन
3. मु: थरि पोश वरि गोम
    अ: कांह ख्वहऻयिश मुश्किलन
          पूरॖ गछ़ॖन्य
4. मु: तॆलि तोश यॆलि न्वश गरॖ
         वाति
    अ: कऻम अंद वातनॖ ब्रौंठॖय
          पज़ि नॖ इतिमीनान करुन
5. मु: तऺहर कमव ख्यॆयि परद्यव
         म्यॆ दॊप पनॖन्यव मा
    अ: पनॖनिस कुन फिरिथ रोज़ुन
          तॖ व्वपरस कुन तवजु द्युन
**************************
1. यिबलीस.... Mischievous
             person/Satan/The
             devil
2. यब.........Going back/
                    Retract
3. यब करुन.... To deny/To
                        retract
4. यपऻर्य......From this way/
                   Hence
5. यपऻर्य किन्य...From this
                   way/Hence
6. यपोर......This side
7. यपऻरिम......Of this side
8. यतीम....... Orphan/
                      Matchless
9. यतीम खानॖ.... Orphanage
                          home
10. यॆत्यथ......Here/At this
                      place/Hither
**************************
         गीता ज्ञान  :अध्याय 15
सऻरी ज़ीव शऺरीरन मंज़ रोज़ान
प्राण अपान यॆलि वॆश वानर ॳग्न बनान
च़ोरि प्रकऻर्य अन्न छुस श्रपॖरावान
वॊन भगवानन गीता ज्ञान
**************************
माननॖ छु आमुत ज़ि वैदिक कालॖ प्यठॖ छि हिन्दू समाजस मंज़ ड्यकस प्यठ ट्यॊक लागनॖच अख परम्परा रूज़मॖच़। मगर वुछनस तल छु यिवान ज़ि यि प्रथा छन ह्यॆच़मॖच़ छ़ॊकॖन्य। कॆंह छि वुनि अथ रसमस थफ़ कऺरिथ ति ज़न गव ज़ि तिम छि वुनि ति दॊहय ट्यॊक लागान मगर वारियाह लूख बऺड्य किहो ल्वकॖट्य छि पकान ट्येकि रॊस्तुय। अथ रसमस कत्यन लॊग थख, क्याज़ि लॊग थख यि वनुन छु हना मुश्किल। म्यॊन नमन छु तिमन यिम वुनि ति छि यि परम्परा सम्बऻलिथ पकान।
दपान छि ट्यकिस मंज़ छु परमात्मा सुन्द या ज़िठ्यन हुन्द ॴशिर्वाद आसान। यिति छि अख मान्यता ज़ि ट्योक ड्यकस प्यठ आसॖनॖ सॗत्य छु अहंकार च़लान।सवाल छु ज़ि स्यमंज़ ड्यकसॖ प्यठ क्याज़ि छि ट्यॊक लागान। दपान चूंकि इन्सानसॖन्द्य ज्ञान-नेत्र छि ॳथ्य जायि यानि द्वन बुमन मंज़ॖय मुच़रनॖ यिवान।ऋषयव मुनियव छु दपान यि परखोवमुत तॖ मोनमुत ज़ि अथ जायि ट्यॊक करनॖ सॗत्य छु ज्ञान बडान, अहम् यानि अहंकार दूर गछ़ान, मनॖच शऻन्ति मेलान। शिवॖ सुन्द त्रॆयिम नेत्र ति छु ॳथ्य जायि यिवान माननॖ। यिति छु अख तरक यिवान दिनॖ ज़ि यॆलि ति कऻन्सि इन्सानस क्रूध आसान छु या हऻरऻनी सपदान कुनि चीज़स वुछिथ या कुनि कॖसमॖच परेशऻनी आसान छि, तमि सातॖ छि त्रॖवऺत्र खसान ड्यकस प्यठ। यिमन लक्षनन शान्त करनॖ बापथ दपान यिवान छु च़न्दन ट्योक करनॖ ति क्याज़ि च़न्दन छु शुहुल असर करान तॖ क्रूध,हऻरऻनी वगैरा छु वशस मंज़ रोज़ान। ट्यॊक लागनॖ सॗत्य छि ॳमिस इन्सानसॖन्ज़ ज़ाथ ति ननान। ट्योक ति छु ब्यॊन ब्यॊन प्रकारुक यिवान लगावनॖ जायि मुतऻबिक, मोसमॖ मुतऻबिक, ज़ऻच़ मुतऻबिक, दीवी देवताहॖन्ज़ि पूज़ायि मुतऻबिक वगैरा वगैरा। चर्चा छि जऻरी। यऻरी कऺर्यनव दय
**************************
"प्रथॖय तीर्थन गछ़न सन्यास
ग्वारनि स्वदर्शन म्युल
चित्ता पऺरिथ मव न्यशपथ आस
डेंशख दूरे द्रमुन न्यूल"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

19.08.2019

19.08.2019 भऻद्रप्यथ (भाद्र) गटॖ पछॖ (कृष्ण पक्ष) च़ोरम (चतुर्थी) च़ऺन्दॖरवार (सोमवार)श्री सप्तर्षी सम्वत 5095, राश मीन (चलान),द्रठॖपऻन्च़ुक (पंचक)(चलान), ऋतु वर्षा (चलान)...
अज़ छि संकट च़ोरम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: त्यॊंगल हऻकिम
    अ: हऻकिम त्रॊश आसुन/
         हऻकिमॖसुन्द त्रॊशर वरतावुन
2. मु: त्यॊंगलन प्यठ
    अ: बे-क़रार आसुन/कन्ड्यन
         प्यठ आसुन
3. मु: तॊन्दुरस नखॖ कॊन्डुल
    अ: ल्वकटिस मॊहनिवॖसुन्द
         बऺडिस सॗत्य द्रसॖ द्युन
4. मु: तेशल गऺयखय पशेमान
    अ: किबरस छु ज़वाल
5. मु: तेलॖ अन्दरय छु तील नेरान
    अ: ल्वकॖट्य चीज़ ति छि
         म्वलॖल्य आसान
**************************
1. यावॖ....Lovely/Beautiful/
             Handsome/Pretty
2. यावुन...Youth/Manhood
                Adolescence/
                Puberty
3. यावुन आसुन....To be you-
                 thful/Ardour of
                 youth
4. यावुन युन..To be in youth
            To be adolescence
5. यावरी......Kindness/
             Assistance/Aid/
             Reinforcement
6. यायम करुन....To be all in
                    all/To take all
                   responsibilities
7. यपरावुन.....To digest/To
                      adjust
8. यऻर.........Pine tree
9. यऻरी.....Kindness/Assis-
                tance/Help
10. याशा..All of a sudden/
                At once/With the
                name of God
**************************
        गीता ज्ञान  :अध्याय 15
पृथ्वी मंज़ ॳच़िथ पनॖनि शक्ती सान, सऻरी ज़ीव पालान पोशान
अमृतॖच च़ऺन्द्रमॖ अवशज पॊठरान
वॊन भगवानन गीता ज्ञान
**************************
लऻन छि लगान हवनस प्यठ लूकन हॖन्ज़ ट्यॊक करनॖ बापथ।
ब्रह्मा जी छु ट्यॊक करान, नऻर्यवन गन्डान तॖ चलता करान। ट्यॊक कऺरिथ तॖ नऻर्यवन गन्डिथ छि भक्त ब्रह्मा जियस ब्रौंहकनि थऺविथ थालस मंज़ यथा शक्ती कॆंह न तॖ कॆंह त्रावान यानि रॊपय, ज़ॖ रॊपियि, पांछ़, दऺह रॊपियि तॖ पकान ब्रोंहकुन। म्यॆ तॊर नॖ वुन्यखताम फिकिरी ज़ि अथ थालस मंज़ कयाज़ि छि ॳस्य पऻन्सॖ त्रावान। अथ थालस मंज़ पऻन्सॖ त्रावनस ति छि लऺज्यमॖच़ मान मान। रॊपय या ज़ॖ रॊपियि त्रावन वोल छु ज़न मन्दछान तॖ छु बडॖ खुशी सान पऺरॖस खूलिथ दऺह्युन, वुह्युन या कांह कांह पन्च़ऻह्युन ति त्रावान। कांह बऺदिश छॆ नॖ, कांह पृछ़गऻर ति छॆ नॖ, कांह वननवोल ति छु नॖ ज़ि क्याह छि त्रावान, क्याज़ि छि त्रावान, कोताह छि त्रावान। दपान ऒन दांद छु सासस इन्सानस वथ रावरावान। ॳथ्य हवनस मंज़ छि आदि-दर्शुन करान। ग्यव कटोरि मंज़ श्रीफल चमचस प्यठ थऺविथ रॊपियहुन्द सिक्कॖ या दु-रॊपियुन सिक्कॖ ह्यथ ग्यवस मंज़ पनॖन्य शकॖल वुछिथ यि सिक्कॖ त्रावान अथ कटोरि मंज़ मगर नोठ त्रावनॖच छे नॖ प्रथा चलान।सिक्कय छि वुनि चलान। यि कयाज़ि छि करान, कऺम्यसुन्द दर्शुन छि करान, कमि सातॖ छि करान, अम्युक ति छु नॖ हिसाबा किताबा कॆंह तॖ न छु वनन वोल कांह। योदवय ब्रह्मनस पताह आसि ति, म्यॆ बूज़ नॖ वुन्युखताम ज़ांह ति सु वनान ज़ि अम्युक महत्वॖ क्याह छु, किथॖपऻठ्य छु वगैरा वगैरा। मगर करान छि सऻरी ॳन्यसऻरी मंज़। यिथय पऻठ्य हवन पतॖ युस ब्रह्मा जी हवनुक ट्यॊक करान छु तमि सातॖ कयाज़ि छि नॖ पऻन्सॖ तऺमिस ब्रह्मा जियस या युस सु ट्यॊक करान छु तऺमिस यिवान दिनॖ। यिम ल्वकचि ल्वकचि कथॖ छि म्यॆ बासान महत्वपूर्ण तॖ पज़न असि ह्यॆछिनि।
ट्यॊक कयाज़ि छि करान हवनस प्यठ तॖ पतॖ क्याज़ि छि नॖ करान यिति गछ़ि रोज़ुन चर्चायि हुन्द अख हिसॖ
**************************
"तनॖ मनॖ गऺयस बॖ तस कुनुय
बूज़ुम सतुक गन्टॖ वज़न
तथ जायि धारनायि धारना दिच़ॖम
आकाश तॖ प्रकाश कॊरुम सरॖ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

18.08.2019

18.08.2019 भऻद्रप्यथ (भाद्र) गटॖ पछॖ (कृष्ण पक्ष) त्रय (तृतीय) आथवार (रविवार/एतवार)श्री सप्तर्षी सम्वत 5095, राश मीन (दुहचि 10.9 बजि प्यठॖ) द्रठॖपऻन्च़ुक (पंचक)(चलान), ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: पॊत छॊकि थऺन्य
    अ: बुडिथ काम्यऻबी मेलॖन्य
2. मु: पीरॖ सुन्द यज़थ च़ूरॖ सॖन्ज़
         रऻछ
    अ: बॆ-पछ़ इन्सानस प्यठ
          बरोसॖ
3. मु: पीरव मोर दांद बॖ क्याज़ि
          वनॖ कऻन्सि
    अ: लूकन हॖन्दिस मामलस
          मंज़ ज़ंग छ़ॖनॖन्य
4. मु: पॊत्रॖ ब्वछि यछ क्वछि
    अ: बॆ-पॊतुर ॴसिथ लूकन
        हॖन्द्यन शुर्यन वलॖ वलॖ करुन
5. मु: पूशुख नय तॖ च़ॊलुख ति ना
    अ: यस नॖ पॊशन पाय आसि
          तऺमिस पज़ि च़लुन
**************************
1. यि.......This
2. यी.......Will come
3. योर.....This side/Here
4. यीरॖ.....Float
5. यीत्य....So much/That
                much
6. यॆति/यॆतिनस.....Here
7. येर.........Wool
8. यॆयिन्य.....Wrap
9. यॆति योर....From now
                    onwards
10. यॆमि पतॖ....After this
**************************
          गीता ज्ञान  :अध्याय 15
सिर्युक युस तीज़ ज़गत प्रज़लावान, युस तीज़ च़न्द्रमस ति
ॳगॖन आसान।
यि सोरुय प्रकाश म्योनॖय ज़ान
वॊन भगवानन गीता ज्ञान
**************************
परदॖ ह्यॊतुन व्वथुन कऺशीरि सारिनॖय बंद्यशन। स्कूल दपान खुलन पगहॗकि प्यठॖ। हालातन प्यठ कोबू प्रावुन छु अख बॊड मुहिम मर्कज़ी सरकारॖ बापथ।
हालांकि राथ दपान सथ-ॴठ लूख ॴस छ्वकॖलद गऻमॖत्य कॆंच़न जायन। यि नन्यव टी वी खबरव तलॖ। व्वमेद छि ज़ि तनाव हमि वारॖ वारॖ।
राथ लॊग नार दिल्लि मंज़ ऐमॖज़ अस्पतालॖकिस कथ ताम हिसस तॖ लूख गऺयि सख़ परेशान। ब्यमार आयि वातनावनॖ महफ़ूज़ जायन। खलबऺली मचेयि वारिहास कालस। वारियाह बम्ब-गाडि लजि नार छ़्यतॖ करनस मंज़। नागहॗच्यन बलायन निशि गछ़ि मऻज्य पनुन अनुग्रह करॖन्य। नार गव मार। यॆलि लगान कुनि जायि यि छु नॖ पथ-ब्रोंह वुछान। ॳथ्य छि वनान क्वदरयतुक कऺहर। अस्पतालस मंज़ दऻखॖल गऻमॖत्य कॆंच़न ब्यमारन आसि नारुक नाव बूज़िथॖय न्यसॖफ ज़ुव द्रामुत। तिमन ब्यमारन हॖन्द्यन तीमार दारन क्वस वॊसॖ द्रॊस ॴसि वऺछ़मॖच़ तॖ च़लॖ लार आसि लऺज्यमॖच़ यि ह्यकन तिमय वऺनिथ।
**************************
"कॆंच़न द्युतथम ऒरय आलव
कॆंच़व रचेयि नालय व्यथ
कॆंच़न मस च्यथ ॳछ लऺज्य तालव
कॆंच़न पऺपिथ गऺयि हालव ख्यथ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

17.08.2019

17.08.2019 भऻद्रप्यथ (भाद्र) गटॖ पछॖ (कृष्ण पक्ष) द्वय (द्विती) बटॖवार (शनिवार/शनिश्चरवार)श्री सप्तर्षी सम्वत 5095,राश कुम्भ (चलान),द्रठॖपऻन्च़ुक (पंचक) (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: फॆकि फॆकि दवा
    अ: वयवुन चीज़/रास यिनॖवोल
2. मु: फॊति फॊति फिरिथ छ़ॖनुन
    अ: वुछान वुछान बजर युन
3. मु: पूत्य गंज़ॖरावुन्य ठूलन फा
         दिनॖ ब्रौंठॖय
    अ: ख़यऻली प्वलावॖ
4. मु: पॊरुमुत छु गॊरुमुत स्वन
    अ: गाटॖजारस छु प्रथ कुनि
         जायि म्वल
5. मु: पॊत्रॖ खर हा च़ॊल बबा पानॖ
         रटुन तॖ खऺसिथ अनुन
    अ: नाफ़र्माबरदऻरी हॖन्ज़ अख
          मिसाल
**************************
1. यार..... Friend/Compan-
                ion/Supporter
2. यारानॖ.... Friendship/
                  Acquaintance
3. यारबाश....Friendly/Jolly/
                  Consolable/
                  Cordial
4. यारजऻनी.....Fast friend/
                   Bosom friend
5. यार बोज....Friend
6. यार बरादऺरी.... Friendship
7. यार लागुन..To be friendly
8. यारानॖ च़टुन....To snap
                      friendly ties
9. याल......Mane/The large
                 long hair on the
                 neck of certain
                 animals
10. याम....When/As soon
                 as
**************************
          गीता ज्ञान  :अध्याय 15
यत्न करन वऻल्य यूगी तॖ ज्ञानवान
पननिस हृदयस दऺरिथ आत्माहस रोज़ान
अज्ञऻनी यत्न कऺरिथ ति नॖ ज़ानान
वॊन भगवानन गीता ज्ञान
**************************
रमेश जी पंडिताहन, युस ग्रेटर फ़ऺरीदाबादॖ छु बसान, ओस ऊतरॖ न्यमंत्रन द्युतॖमुत् वैकुण्ठ मंडली वाल्यन पनुन गरॖ बजन-कीर्तन करनॖ बापथ।  चूंकि सु द्वह ओस रुत तॖ रॖच़ कऻम करनॖ बापथ ॴस्य सऻरीय सदस्य अमि मंडली-हॖन्द्य सम्यॆमॖत्य रमेश जीनि गरि। फोटुवव तलॖ छु बासान ज़ि मंडली  हुन्द आकार छुन ह्यॊतमुत वारॖ वारॖ बड्यॆमुत तॖ जान तॖ ज़बर कथ छि यि ज़ि अथ मंडली मंज़ छि कॆंह शुर्य ति शिरकथ करान। ज़रूरी ति छु ती ताकि सानि ज़ऻच़ हुन्द यिनवोल पगाह रोज़ि महफ़ूज़ तॖ सान्यन संस्कारन वाति रऻछ यिमन शुर्यन हॖन्दि दऺस्य। दय दीनख ह्यमथ।
रक्षाबंधन आव बडॖ हर्षोल्लासॖ सान मनावॖनॖ। ब्यॆन्यव गन्जि बायन हॖन्ज़न नर्यन प्यठ राखी।अथ त्यौहारस प्यठॖ ति यॊदवय वुछव छि व्वंय दरार ह्यॆच़मॖच़ प्यॆन्य। राखी हुन्द मतलब छु कमॖय पाहन यिवान वर्तावनॖ मगर फऻशन तॖ देखा-दीखी मंज़ छु हुर्रॆर दॊह ख्वत दॊह सपदान। खऻर यि रीथ छि यिवान वुनि पालनॖ हालांकि मुद्दा राखी हुन्द छु श्रॊकान दॊह पतॖ दॊह।
श्रावनॖ पुनिम ति मनऻव लूकव पनॖनि पनॖनि अंदाज़। शेंकराचारस खसनॖच हऻलॖय गऺयि मऺशिथ यिमन त्रॖहन वऺरियन मंज़। नव्यन शुर्यन ह्यकव नॖ बऻविथ ति ज़ि किथॖपऻठ्य ॴस्य प्रभात फॊलनॖ प्यठय रस्तॖ लगान शंकराचारस।
गऺयि तिम द्वह।
**************************
"कुस बब तय क्वसो मऻजी
कमी लऻजी बऻजी वठ
कऻल्य गछ़ख कॊंह नॖ बब
कॊंह नॖ मऻजी
ज़ऻनिथ कवॖ लऻजिथ बऻजी वठ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.08.2019

16.08.2019,भऻद्रप्यथ(भाद्र) गटॖ पछॖ (कृष्ण पक्ष) ऒक्दॊह (प्रथमा) शॊकुरवार (शुक्रवार/ जुम्मा)श्री सप्तर्षी सम्वत 5095,राश कुम्भ(चलान) द्रठॖपऻन्च़ुक (पंचक)(चलान), ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: जान गव सु युस जान वर-
         तावि
    अ: जानियर छु न सिरिफ वनॖनॖ
         सॗती आसान बऺल्कि हऻविथ
         द्युन प्यवान
2. मु: जऻहिल बटन छु ठोकुर
         च़लनोवमुत
    अ: जाहलत छि न्वकसान वातॖ
          नावान
3. मु: जान ऒर तॖ जहान् ऒर
    अ: ऒरज़ुव छु सोरुय जान
         आसान
4. मु: जान छु पनुनॖय पान
    अ: ब्याख ह्यॆकि तॆलि जान
         ॴसिथ यॆलि पानॖ जान
         आसि
5. मु: जंगस मंज़ छि ठील्य ति तॖ
         गूल्य ति
    अ: यॆति जान फ़ऻयदॖ छ़ान्डव
         तति छु न्वकसान खऻतरॖ ति
         तयार रोज़ुन
**************************
1. हापुथ....Bear
2. हापथ न्यॆन्दॖर.Sound sleep
3. हापथ यारज़.....Risky
                         friendship
4. हाठ.....Big whip
5. हार....Defeat/Necklace/
              Garland/Failure
6. हारॖ.....Money/Cowerie
              (a small shell)
7. हार मानॖन्य....To accept
                        defeat
8. हार-फॊल....A bead of a
                        Necklace
9. हारॖ वोल.....Rich/Wealthy
10. हारुन.....To lose/To be
               unsuccessful/To
               fail/To abandon
**************************
        गीता ज्ञान  :अध्याय 15
शरीर त्यागान या अथ मंज़ दऺरिथ
रोज़ान, विशय बूगान यात्रायि ग्वन
वरतावान
अज्ञऻनी नॖ ज़ानान ज्ञऻनी ज़ानान
वॊन भगवानन गीता ज्ञान
**************************
धारा 370 तॖ 35A गव ख़तम कऺशीरि मंज़ मगर चर्चा छि वुनि चलान अथ विषयस प्यठ। सऻरी ज़ऻन्यकार, इतिहासकार, कोनूनदान तॖ सानि समाजिक कॆंह नामावार सदस्य छि जायि जायि गऺछ़िथ पनॖनि बरादऺरी पनॖन्यव ल्यकचर दऺस्य फ़ऻयदॖ तॖ न्वकसानॖच ज़ऻन्यकऻरी दिवान ज़ि यि धारा ॴस क्याह,करॖ प्यठॖ ॴस,कऺहन्दि बापथ ॴस।कमव कमव तुल जऻयिज़ या नाजऻयिज़ फ़ऻयदॖ। कुस रूद महरूम फ़ऻयदॖ तुलनॖ निशि वुन्युखताम वगैरा वगैरा। कऻशिर्य बटस क्याह म्यूल वुन्युखताम तॖ व्वंय क्याह आशा छस मेलनॖच अथ प्यठ छु व्यच़ार यिवान करनॖ। तनाव छु बरक़रार अल्बतॖ वुरनिस तलॖय छु वुनि।दय करि सऺहलॖय। हालस मीज्य सान्यन लीडरन अख नऺव कऻम।
व्यथ रोज़ि पकवॖन्य।
**************************
"मायि ह्यु नॖ प्रकाश कुने
लयि ह्यु नॖ तीर्थ कांह
दयस ह्यु नॖ बांधव कुने
भयस ह्यु नॖ स्वख कांह"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.bligspot.com ति वुछिव)

15.08.2019

15.08.2019 श्रावणॖ (सावन) ज़ूनॖ पछॖ (शुक्ल पक्ष) पुनिम(देवादेव) पूर्णिमा, ब्रसवार (वीरवार/ ब्रहस्पथवार),श्री सप्तर्षी सम्वत 5095, राश कुम्भ(रऻच़ हॖन्ज़ि 9.27 बजि प्यठॖ) तॖ द्रठॖपऻन्च़ुक (पंचक) शुरु, ऋतु वर्षा (चलान)....अज़ छु रक्षाबंधन/श्रावनॖ पुनिम तॖ स्वतंत्र दिवस ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: टरॖ मीरॖन्य राद
    अ: अपज़्यऻर्य सॖन्द्य अपऺज़्य
          कॖसॖ
2. मु: टोडरमऺल्य हिसाब
    अ: प्यॆठ्य प्यॆठ्य अंदाज़ॖ लगा-
          वुन
3. मु: टोठ छु नेक
    अ: पनुन चीज़ छु रुत बासान
4. मु: ट्यॆंड खाव
    अ: य्यॊस लिखऻय परनॖ यी नॖ
5. मु: ठूलॖ च़ूरि प्यठय छु मूलॖ च़ूर
         बनान
    अ: ल्वकचि च़ूरि प्यठय छु अथॖ
         दरान
**************************
1. वाबस्तॖ.....Connected/Re-
                     lated/Bound/
                    Together
2. वाबस्तॖ गछ़ुन....Be depen-
                dent on/To be
                attached to/To
             be connected with
3. वापस......Back/Behind/
                   Returned/Give
                   back
4. वापसी.....Returned/Re-
                fund/Repayment
5. वाफ......Season/Proper
                 time
6. वातॖनावुन..To take some-
           thing to some one/
           Cause to send /
       Supply/Bring/Convey
7. वातुल..... Cobbler/Shoe-
              maker/Scavenger
8. वातलगी.....Rustic way/
             Meanness/Vulgari
             ty
9. वातलवान.... Cobbler's
             shop/Dirty place/
         Disorganized place/
         Place full of filth/
        Refuse/Dirt etc.
10. वातॖज....Cobbler's wife
**************************
         गीता ज्ञान  :अध्याय 15
यि ज़ीव आत्मा ॳछव तॖ कनव सॗत्य, नस्ति ॴसॖ तॖ मनॖ क्यव
ख़यालव सॗत्य
यिहॖन्दय मदतॖ विशय बूग बूगान
वॊन भगवानन गीता ज्ञान
**************************
अज़ चूंकि बॊड द्वह छु वारियाहव रऺन्ग्य, अज़ थवव ॳस्य ति पनुन पान आ़ज़ाद तॖ रोज़व तनाव-मुक्त, मनावव रक्षाबंधन, करव शिव-दर्शन,तॖ कडव द्वह असान तॖ गिन्दान। येति छु नॖ शेंकराचार् कशीरि हुन्द, तॊत वातनॖ बापथ मा छ़ान्डि मोदी जी सानि बापथ दॊयिमि वऺरियि कॆंह सऺहल वथा। प्रारव ॳस्य ति।
**************************
"ॳछन ह्यु नॖ प्रकाश कुने
कॊठ्यन ह्यु नॖ तीर्थ कांह
चंदस ह्यु नॖ बांधव कुने
खनि ह्यु नॖ स्वख कांह"
पऺरिव यि स्यदमऻल्य सुन्द वाख ति
**************************
खनि माने च़ादर या वुरुन। खनि गव दर-असल कॊंगॖ-पोशिक प्यॆठिम त्रॆ वऺथॖर
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

14.08.2019

14.08.2019 श्रावणॖ (सावन) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी)ब्वदवार (बुधवार),श्री सप्तर्षी सम्वत 5095,राश मकर (चलान) ऋतॖ वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: थ्यकन थऻज्य
    अ: पनॖन्य बऺडीमी हावॖन्य/
          पानस तऻरीफ़ करॖन्य
2. मु: थ्वख निशानॖ
    अ: जलदी करनॖ खऻतरॖ कऻन्सि
         वनुन/जलद म्वकलनॖ वोल
         चीज़
3. मु: थ्वकन अथॖ दारॖन्य
    अ: ताब्यॆदऻरी करॖन्य/नाज़
         बरदारी करॖन्य
4. मु: थ्वकॖ जोद
    अ: अपुज़ वाठ
5. मु: थ्वकि प्यठ रिकिन्य
    अ: मॊमूली चीज़ॖ सॗत्य या
         ग़लती सॗत्य न्वकसान
         वातुन
**************************
1. ना आशना....Unknown/
            Unfamiliar/Unacq-
            uainted
2. ना इतिफ़ाक.... Discord/
            Disagreement/
            Indifferences
3. ना उमेदी.... Hopeless-
           ness/Despondency
4. ना अहल.....Undeserving/
                       Inefficient
5. ना बालॆग...Minor/Not yet
                     of age
6. नाबकार.....Wicked/Good
                      for nothing
7. नाबूद......Non-existance/
                  Annihilated
8. नाबीना......Blind
9. नापाक......Impure/Dirty/
             Polluted/Unclean/
             Defiled
10. नापायदार....Unstable/
                   Frail/Transitory
**************************
          गीता ज्ञान  :अध्याय 15
यिथॖपऻठ्य वाव पानस सॗत्य मुशुक निवान, ज़ीव आत्माहस मनस यऺन्द्रियन सान
अख शऺरीर त्यागान ब्यॆयिस मंज़ ज़्यवान
वॊन भगवानन  छु ज्ञान
**************************
गरस मंज़ यॊदवय व्यच़ार आसन नॖ मेलान गरिक्यन बऻच़न पानॖवुन्य, गरस मंज़ छु तनाव व्वपदान। दपान अथस मंज़ छि ओंगजि पांछ़ यिम ति छॆ नॖ पानॖवुन्य हिशय आसान। वयच़ार छि व्यक्तिगत, प्रथ ॳकिस छि पनॖन्य राय, व्यच़ार, द्दष्टिकोण युस सु यछ़ान छु व्यक्त करुन, प्रॊखुट करुन विज़ि विज़ि। कूशिश छि ॳकिस परिवारस मंज़ यि रोज़ान ज़ि सऻरी बऻच़ गछ़न अकी लऻनि पकॖन्य, ॳक्यसॖन्दिसॖय ईशारस प्यठ पकॖन्य। यॊदवय यि मिशन पूरॖ गछ़ि तॆलि छु वनॖनॖ यिवान ज़ि गरॖ छु जान, गरिक्य बऻच़ छि संस्कऻरी, अख-ॳकिस मान तॖ यज़थ थऻविथ छि पकान। हालांकि कॆंच़न बऻच़न छि मुच़ुकरी ति रोज़ान दफ अमापॊज़ बास छि नॖ दिवान। शर्म हय्या भय भीम छु यिमन बऻच़न ॳक्यसॖय मालि मंज़ वुरिथ थवान। ज़िठ्यन हुन्द सायि प्यठॖ आसनॖ सॗत्य ति छु गरॖ ॳकिस गुलदस्तॖक्य पऻठ्य गऺन्डिथ थवान। गरॖ छु शोलान। अथ मंज़ कांह शक छु नॖ ज़ि कॆंच़न बऻच़न हॖन्द्यन व्यच़ारन आसि खलबऺली मचान मगर वाव वुछिथ छि सऻरी नाव पकनावान तॖ कुनि बऺठिस छि लगान। मगर कॗतिस कालस? अथ माहोलस छु नॖ मियाद कांह। दपान ज़्यव ज़बान तॖ चौब लबान या दपान ज़्यव छॆ नॖ शमशीर मगर तोति छि च़टिथ त्रावान। यिथ्यन मॊकन प्यठ छु यिवान अक्सर वनॖनॖ ज़ि छ़ॊपॖ छय रॊपसॖन्ज़ तॖ करखय स्वनसॖन्ज़। द्वह द्वह छु नेरान मगर अंदरिम लावॖ ति छु रोज़ान वुहान। यान्य गर्युक ज़्युठ ॳछ वटान छु, लावॖ छु कऻन्सि न तॖ कऻन्सि हॖन्दि मनुक फटान। तॖ छ़्यनान छि रिश्तॖ।
**************************
"सिरियस ह्यु नॖ प्रकाश कुने
गंगि ह्यु नॖ तीर्थ कांह
बऻयिस ह्यु नॖ बांधव कुने
ज़नि ह्यु नॖ स्वख कांह"
पऺरिव यि वाख ति युस ललेश्वरी  हन्द्य रॗन्य दपान छु वॊनमुत
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

13.08.2019

13.08.2019 श्रावणॖ (सावन) ज़ूनॖ पछॖ (शुक्ल पक्ष) त्रुवाह(देवादेव) त्रयोदशी,बॊम्वार (मंगलवार),श्री सप्तर्षी सम्वत 5095, राश मकर (दुहचि 9.25 बजि प्यठॖ),ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: तॊह ठगस म्यंगन ठग
    अ: अख ॳक्यसॖन्दि ख्वतॖ
          दोखॖबाज़
2. मु: त्वमलॖ सेरस यॆलि शिकमस
         अंदर बत्तॖ श्रॆपि कथ श्रॆपिना
    अ: कथ श्रऺपरावॖन्य छॆ नॖ
          मुश्किल
3. मु: तनि नॖ ज़ऺट, ॴसस नॖ म्यट
         बिहिन्य नॖ जाय
    अ: न्यथॖ नॊन तॖ अथॖ छॊन
4. मु: तिम गोरि गऺयि द्वद कॖनिथ
    अ: तिम द्वह गऺयि/बदलुन/
         हालात बदलॖन्य
5. मु: त्वमलस मंज़ कनॖ
    अ: स्यठाह कम तेदाद
**************************
1. मातॖहत....Subordinate/
                   Under/inferior
2. माजरॖ......Event/Happen-
                  ing/Occurrence
3. माहोल.... Environment/
                   Surroundings/
                   Milieu
4. मासिवाय...Besides/Addi-
                  tion to
5. मात....... Defeat
6. मात दिन्य....To beat/To
                       defeat
7. मात ख्यॆन्य...To be defeat-
                       ed
8. मातम...... Mourning/
                    Grief
9. माता......... Mother
10. मातमपुरसी....Condol-
                            ences
**************************
         गीता ज्ञान  :अध्याय 15
यथ दिहस मंज़ यि ज़ीव आत्मा ज़ान, छु म्योनुय सनातन अनुश आसान, प्रकृति दऺरिथ मनस छु
यऺन्द्रियन खींचान
वॊन भगवानन गीता ज्ञान
**************************
ईद मुबारक छु सानि तरफ़ॖ सारनी मुसलमान बायन युस यॆतिनस छु।
खुशी गऺयि यि बूज़िथ ज़ि जॊमू  कऺशमीरस मंज़ ति आयि ईद जोशो ख़रोशॖ सान मनावनॖ। माहोल दपान रूद रुत। एहसास छु शायद ह्यॊतमुत सपदुन तति बसकीनन ज़ि हऻसिल यी नॖ कॆंह क्रकॖनाद तुलनॖ सॗत्य।शऻन्ती मंज़ॖय छु मेलान दिलस क़रार।लडायव तॖ झगडव सॗत्य छु नॖ कॆंह हऻसिल यिवान ति आसि तति बिहिथ लूकन तॊरमुत फिकिरी। तिम मा ॴसन च़ऺप्य ह्यवान पानस ज़ि क्याज़ि च़ऺलॖरऻव्य कऻशिर्य बटॖ अज़ त्रॖह वऺरी ब्रौंठ। कऻशिर्य बटव सॗत्य ॴस कऺशीरि शूब। अज़ छि कऺशीर बासान दॖयान ज़न। कऻशिर्य बटॖस ति छु बासान कमिताम चीज़ॖच कऺमी हिश। व्वथवुन बॆहवुन यॊत ताम नॖ तऺमिस कऺशीरि हॖन्ज़ कांह कथ करि तऺमिस बासान ज़न कथ रूज़ ॳडी।व्वंय हट्यव धारा 370 तॖ 35A ति।
ज़बर गव, मऺरिथ गव, सतथ वुहुर गव, ज़न ब्रऻर्यर ख्यव, ह्यथ सॗत्य ग्यव, न फोर्योस ट्यंव, न फोर्योस म्यव, प्रथ कांह ख्वश गव,कॆंच़न गऺयि दंदस तल ज़्यव, हऻरान गऺयि ज़ि रऻत्यनि मंज़्य गव, हर शखॖस ज़न आसॖमानॖ प्यव,ॳस्य अज़ पगाह अपोर तरव, राज करन ताज करव, गरॖ नवि सरॖ करव।कऺशीरि लोला बरव। ज़बर गव मऺरिथ गव, 370 हऺरिथ प्यव तॖ 35A ज़न होन्यव ख्यव। ज़बर गव जान गव। कुस ताम अज़ पायस प्यव। रुत गव।रुत गव।स्यठाह रुत गव, दिलस व्वंय शेहजार प्यव।कुस ताम अज़ हुश्यार गव
**************************
"नऻबिस्थानॖ छय प्रकरथ ज़लवॖनी
हिडिस ताम यॆति प्राण वतॖगॊत
ब्रह्मांडस प्यठ सॗत्य नदि वहवनी
हह तवॖ तुरुन तॖ हाह तवॖ तॊत"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.08.2019

11.08.2019,श्रावणॖ (सावन) ज़ूनॖ पछॖ (शुक्ल पक्ष) काह (देवादेव)(एकादऺशी) आथवार (रविवार/एतवार),श्री सप्तर्षी सम्वत 5095, राश धनु(चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: पांच़ऻलिस रोज़ि नॖ दॊहय
         वाव
   अ: मुसीबथ छु नॖ अकी डंजि
        रोज़ान
2. मु: पऻन्सॖ गव पारुद तॖ म्यकॖ-
          राज़
    अ: पऻन्सस छु हदॖ ख्वतॖ ज़्यादॖ
          ताक़थ
3. मु: पादॖशाह सऻबॖनिस दीवानॖ
         खानस तति च़ऻन्ग्य दज़ान
         छि
    अ: सऻरी गछ़ान पानस पानस
         कुनुय ज़ॊन रोज़ान छुय/
         यि छि ज़िन्दगी हॖन्ज़ ना-
         पऻयदऻरी प्यठ वनॖनॖ यिवान
4. मु: पऻन्सस निश छु पऻन्सॖ
          वातान
    अ: पऻन्सॖवऻलिस निश छु
          पऻन्सि वातान
5. मु: पऻन्सॖ थऺव्यज़ि म्वर्दस प्यठॖ
          सु ति गछ़ि ज़िन्दॖ
    अ: पऻन्सॖस छु स्यठाह ज़ोर
**************************
1. ला........Without
2. ला पताह.....Unknown/
                 Without address
3. ला परवाह.....Careless/
                Negligent/Heed-
                less/Inattentive
4. ला तेदाद.... Innumerable/
                      Countless
5. ला सऻनी.... Matchless/
               Incomparable/
              Unparallel/Unique
6. ला जवाब ....Silent/Match
              less/Speechless
7. लाचार.... Helpless/Desti
              tute/Compelled/
              Miserable
8. लाचऻरी...... Helplessness
              Inability/Poverty/
              Necessity
9. लाचार गछ़ुन....To become
           helpless/Be forced
           to/Be disabled
10. लाज..Shame/Shyness
                Honour/Bashful-
                ness
**************************
          गीता ज्ञान  :अध्याय 15
सु पर्म पद म्योन यऺच़ प्रकाशॖमान,
सिर्यि च़ऺन्द्रमॖ छिनॖ त्यूत तेज़वान
स्व पद प्रऻविथ मनुश्य ज़्यनॖ मरनॖ
म्वकलान
वॊन भगवानन गीता ज्ञान
**************************
कऺशीरि हॖन्ज़ किताबॖ आयि मुच़ॖरावनॖ तॖ यिमव यिमव य्यॊस य्यॊस किताब पऺर, तिमव ह्यॊत कऺशीरि मुतलक तिम तिम चीज़ लूकन ताम वातनावॖन यॆमिच नॖ वारिहान लूकन ब्वयी आसिहे। कऻन्सि वॊन कुनवुह शथ तॖ अकत्रॖहुक बटॖ लूठ, कऻन्सि वॊन पंंडित नेहरु जियस तॖ शेख मॊहम्मद ऒबदुल्लाह सॖन्ज़ गनिष्ठ मित्रता, कऻन्सि वॊन सरदार पटेल सॖन्दिस नेहरु-अस मशवरॖ दिनस मुतलक, मतलब म्योन वनुन छु ज़ि धारा 370 तॖ धारा 35A.हस मुतलक आव वारियाह कॆंह वनॖन ज़ि यि धारा हटावुन कोताह ज़रूरी ओस तॖ कम कम व्वलाबॖ आयि तॖ कम कम रुकावटॖ आयि विज़ि विज़ि यॆमि दऺस्य यि धारा आयि नॖ हटावनॖ। यिति आव वनॖनॖ ज़ि कऺमिस कॊताह फ़ऻयदॖ वोत यि धारा आसनॖ सॗत्य वुन्युखताम तॖ कम कम रूद्य वंचित फ़ऻयदॖ तुलनस मंज़ तॖ यिमव धारावव दऺसय कोताह ज़ख वोत जम्मू कशमरस तॖ लद्दाखस मंज़ रोज़न वाल्यन लूकन। यिति आव वनॖन ज़ि कऺशीरि मंज़ आतंकवाद तॖ अलगाव वाद व्वपद्यव यि धारा आसनॖ म्वखॖ। सारांश छु यि ज़ि जम्मू कऺशमीर गव आज़ाद यिमव हऻन्कलव निशि तॖ आज़ऻदी मीज्य लद्दाखक्यन लूकन ति। ॳड्य गऺयि ख्वश तॖ अड्यव त्रोव व्वश।
ॳस्य तोषव तॆलि यॆलि न्वश गरॖ वाति।
**************************
"अव्यसतऻर्य पोथ्यन छिय हो मालि परन
यिथॖ तोतॖ परन राम पंजरस
गीता परन हीथा लबन
परन गीता परन छस"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

10.08.2019

10.08.2019 श्रावणॖ (सावन) ज़ूनॖ पछॖ (शुक्ल पक्ष) दऺहम(देवादेव)(दशमी)बटॖवार,श्री सप्तर्षी सम्वत 5095, राश धनु(रऻच़ हॖन्ज़ि 11.5 बजि प्यठॖ)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: बाबॖ मत्यव तॖ द्यद ति
    अ: गरॖक्य सऻरी बऻच़ नाराज़ॖ
         गछ़ॖन्य
2. मु: बान्दव कुस ज़ि चन्दॖ
    अ: द्यारव सॗत्य छि व्वपर ति
         पनॖन्य बनान
3 .मु: बाबॖ आदमस ज़ॖ गबर
         ॳक्य रऺट आवर्यॆन तॖ ब्यॆय
          क़बर
    अ: मतलब छु ज़ि ह्यॊन्द तॖ
         मुसलमान छि बारॖन्य
4. मु: बानॖ हतस दीज़ि ठानॖ हथ
         ॴसॖ हतस कऺर्यज़ि क्याह
    अ: यॆलि कथ लूकन अथि छि
         लगान, पतॖ छु नॖ तथ चारॖ
         बनान/लूख छि कथन पखॖ
         लागान
5. मु: बागि बोग नानि क्युथ टोक
    अ: बे-मन्दछ लागुन/ज़्यादॖ
         लालॖच करुन
**************************
1. गाटॖ....Deficit/Deficiency
              Damage
2. गाटॖ आसुन...To be at loss
3. गाटॖजार... Wisdom/Wit/
            Intelligence/Know-
            ledge
4. गाटॖ द्युन....To educate/To
            guide/To instruct/
            To advise
5. गाटुल...Intelligent/Wise/
                Talented
6. गाठ....River bank/Bath-
              ing place
7. गाड....Fish
8. गाडॖ बतॖ....Rice and fish/
              A ritual for Kash-
              miri Pandits
9.  गाडॖ तील....Cod liver oil
10.गाडॖ हऻन्ज़...Fisherman
**************************
       गीता ज्ञान  :अध्याय 15
यिमन कामनायि पूरॖ नष्ट सपदान,
स्वख द्वख क्यव द्वंदव मुक्त आसान, तिम ज्ञऻनी प्वरुश पर्म पद प्रावान
वॊन भगवानन गीता ज्ञान
**************************
त्रॖहन वऺरियन हुन्द आच़ार-व्यच़ार गव पऻनिस सॗत्य। सानि सारॆय संस्थायि छि ॴसस थॊप दिथ। हालातन साम ह्यवान। सऻरीय छि असमन्जस मंज़ ज़ि छॆडव हय तॖ छॆडव क्वस कथ। ग्वडॖ छु नॖ यकुत अख संस्था गऺयी अंदीय मेलनि केन्द्रिय गृह मंत्री कार्यालयकिस कसताम सदस्य सॗत्य तॖ बाकयन संस्थायन थऺवॖख नॖ ख़बरॖ। पानय गऺयी तथाकथित समाजिक ठेकॖदार बऺनिथ समाजॖच दऻद्य कांगॖर बावनि। तिमन मीलिथ त्रोवुख डाकुर अकि पोस्टॖ दऺस्य। ज़ानान छि यिम ति ज़ि यिहन्दिस वनॖनस करि नॖ कांह विश्वास। ज़ानान छि यिहन्दिस कथ करनस छु नॖ कांह म्वल फकथ पानॖवुन्य मुच़ुकरी बऺडरावॖन्य छु यिहुन्द मुद्दा म्यॆ बासान यिहन्ज़व अलामातव तलॖ।
वुन्यक्यनस छु नोज़ुक दौर चलान, हालात किथ्य रऺग रटि वुनि छि सऻरी ॴस बऺद तॖ ॳछ वाहरऻवित बिहिथ। अंदरूनी तॖ बीरूनी हालात छि तनाव बऺरिथ। लावॖ कर फटि, कति फटि कुस यी वलनॖ कति यी वलनॖ, कऻन्सि छॆ नॖ कॆंह ख़बर। अल्बतॖ क़यास छि सऻरी करान पनॖनि पनॖनि जायि। असि ति पज़ि ताब थावुन। वुछव ॳस्य ति कथ रंगस मंज़ यिमव रंगनॖ।
माजि दीवी मंगव रुतुय रुत।
**************************
"लतन हुन्द माज़ लार्योम वतन
ॳकी हऻवनम अकिची वथ
यिम यिम बोज़न तिम कोनॖ मतन
ललि बूज़ शतन कुनी कथ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

09.08.2019

09.08.2019 श्रावणॖ (सावन)ज़ूनॖ पछॖ (शुक्ल पक्ष)नवम(देवादेव)(नवमी) शॊकुरवार (शुक्रवार/जुम्मा)श्री सप्तर्षी सम्वत 5095,राश वृश्चिक (चलान)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ऒंगजि प्यठ नच़नावुन
    अ: पनॖन्यन इशारन प्यठ
          पकनावुन
2. मु: ऒंगलस प्यठ बौंगलॖ
    अ: कम जाय प्यठ बऺड ईमारत
          ल्वकटिस चीज़स बॊड
          फ़ऻयदॖ आसुन
3. मु: ऒन क्याह ज़ानि प्रॊन बतॖ
    अ: बेकॖल क्याह ज़ानि जान
          क्याह तॖ नाकारॖ क्याह
4. मु: ऒन दांद रावॖरावान सासन
         दांदन वथ
    अ: अख बेकॖल छु सासन
          इन्सानस वथ डालान
5. मु: ऒरज़ुव तॖ दॊरकॊठ
    अ: रुत सेहत कांछुन/
         रॖच़र कांछुन
**************************
1. खापॖर..... Cranium/Skull
2. खासॖर..... Skull/Head
3. खाद.......Manure/Dung/
          By-product or waste
4. खातॖ.......Ledger/A day
               book/A register
5. खार..... Blacksmith/
              About 80 kgm
6. खारॖ......Longing/An
                 ardent desire
7. खारॖट..Mare/An impulse
                Cupidity
8. खारुक....Horse
9. खाल कांह....Hardly any-
               one/Uncommon/
               Scarce
10. खासॖर वालॖन्य....To beat
**************************
        गीता ज्ञान :अध्याय 15
युहुन्द मोह तॖ मान आसि नष्ट गोमुत, आसक्ति रूपॖ दूष आसि ज़्यूनमुत, यि परम ब्रह्मस मंज़ दऺरिथ रोज़ान
वॊन भगवानन गीता ज्ञान
***********************
 राथ शामन द्युत मोदी सऻबन ज़बर्दस्त भाषण यथ मंज़ तऺम्य कऺशीरि हॖन्द्यन लूकन पूरॖ तसली द्युत ज़ि यि धारा 370/35A हटावॖन्य ओस ज़रूरी लूकन हॖन्ज़ि जऻनी बापथ। अथ भाषणस मंज़ वॊन मोदी सऻबन वारिया कॆंह मगर कऺशीरि मंज़ बिहित तिमन लूकन कोताह आसि विश्वास आमुत मोदी जीन्यन यिमन कथन प्यठ, वादन प्यठ यि वनुन छु स्यठाह मुश्किल। अज़ छु जुम्मा तॖ मशीदन मंज़ समन मुसलमान बऻय दुहॖचि न्यमाज़ परनॖ बापथ।वुछुन छु ज़ि अज़ कुस बनि त्यूहुन्द लीडर तॖ क्याह पऻग़ाम वातनावि सु पनॖनि बरादॖरी मंज़। म्यऻन्य बेकॖल अकॖल छि वनान ज़ि कऺशीरि मंज़ हालात संदरनस लगि वख। कोताह वख लगि यि ति ह्यकव नॖ वऺनिथ। भगवानस मंगव रुतुय रुत। योत ताम कऺशिर्य पंडितन-हॖन्दि वापस कऺशीरि गछ़नुक  तॖ तित मुस्तकॖल तोर पऻठ्य रिहऻयिश करनुक सवाल छु, म्यॆ छु बासान ज़ि पान्च़न सतन वऺरियन पज़ि नॖ अथ कथि मुतलक सौंचनुय। कऻशिर्य बटॖन बगऻर कुस तॊत गछ़ि, कर गछ़ि, क्याह करनि गछ़ि, कऺमिस निश गछ़ि यि वनुन ति छु मुश्किल। हालात बदल्यॆयि पज़नॖ प्यॆठी। सोन च़्रंगुन, ख्वश गछ़ुन, वॊटॖ तुलनि, मुबारक-बाद अख ॳकिस द्युन कुस रंग अनि सानि बापथ, कर अनि, किथॖ पऻठ्य अनि, यि वनुन ति छु हना मुश्किल। जुम्मा पतय छि ईद ति यिनॖ वाज्न। कऻत्याह मनावन, कति मनावन, कुस कुस मनावि यि रोज़व ॳस्य ति वुछान। दय कऺरॖन्य पनुन अनुग्रह कुल आलमस तॖ तिहॖन्दी दऺस्य सऻनिस समाजस।
**************************
"हे ग्वरा परमीश्वरा
बावतम च़्यॆय छुय अंतर व्यॊद
द्वशवय व्वपदन कंद पुरा
हूह कवॖ तुरुन तॖ हाह कवॖ तॊत"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.08.2019

08.08.2019, श्रावणॖ (सावन) ज़ूनॖ पछॖ (शुक्ल पक्ष) ॴठम(देवादेव)(अष्टमी) ब्रसवार (वीरवार/ब्रहस्पथवार),श्री सप्तर्षी सम्वत 5095,राश वृश्चिक(दुहचि 3.25 बजि प्यठॖ)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: कऻन्य ॳछ वॖज़ि क्याह
          न्यॆन्दॖर
    अ: यथ नॖ यलाज आसि तऺथ्य
          मुतलक़ सौंचुन छु ग़लत
2. मु: काली दास तालि च़्यल
    अ: गाटलिस छि मुसीबथ
         प्यवान तुलॖन्य
3. मु: कऻम गऺयि हून्य दॖरॖ कॊरुस
          तॖ गऺयि
    अ: कऻम छि लॊतान यकदम
     सिरिफ गछ़ि शुरु करनॖ यिन्य
4. मु: कानि बन्यॆयो रून तॖ श्वॊंगुन
         क्युथ बन्यॊस नॖ कुठ
    अ: यॆलि कांह कऻम मुश्किलन
       अंद वाति तोति प्यॆयस पुशि/
        अख मसलॖ हल गछ़ान तॖ
        ब्याख पऻदॖ।
5. मु: कामि टोठ व्यपान प्रथ
          जायि तॖ माजि टोठ माजि
          निशी
    अ: कऻम करन वोल छु प्रथ
         कऻन्सि टोठ गछ़ान
**************************
1. काबुल.....Name of the
           capital of Afganis-
           tan
2. काबुली चन्नॖ....Large white
                         gram
3. कऻतिब..... Calligraphist/
                     Scribe
4. काठ.....Ring finger/
                Wooden pieces/
          Dry branch of trees
5. काठॖ बर....Door made of
               wooden pieces
6. काठ गछ़ुन....To be tired/
         To strain/To fatigue
7. काज........Button hole
8. काजि वठ.....A mortar
                        stone
9. काजू.......Cashew nut
10. काद.....A joint effort/
             Group of workers
             at work
**************************
         गीता ज्ञान :अध्याय 15
अमि पतॖ सु पर्म पद छ़ान्डान, यॊत गऺछ़िथ ब्यॆयि वापस छु नॖ यिवान।
भगवानस शरन गछ़ि श्रदायि सान
वॊन भगवानन गीता ज्ञान
**************************
तनाव छु बराबर जऻरी मगर कोबू-हस मंज़ छु। कऺशीरि मंज़ छि वुनि चपस चपस प्यठ फौजी जवान हिफ़ाज़त कऺरिथ ताकि तत्युक कांह फर्दिबशर
युथ नॖ कांह फ़साद तुलि तॖ  निज़ामस कुनि कॖस्मुक ज़र्र वातनावि। द्वह खन्ड ब्येयि रोज़ि यि  तनाव  तॖ पतॖ यी च़्वपऻर्य प्रकाशॖय प्रकाश।
राथ गऺयि श्रीमॖती सुषमा स्वराज स्वर्गवास। स्यठाह नाम ओसुन कमोवमुत पनॖनि कार्यकालस मंज़ जान जान कामि कऺरिथ। वऻन्सि ॴसॖस नॖ ज़्यादॖ, सिरिफ सतहऻठ वऺरिश। मगर मोतस क्याह कऺरज़ि। काल सुन्द पंचांग छु तऺम्यसॖय ख़बर।कऻन्सि निवान ब्रौंठॖय तॖ कऻन्सि निवान च़ीर्य। युस आव योर तस छु वापस गछ़ुन।मोतस क्याह करि सोन पशुन। नेरान अकि फिरि फ़ेरान नॖ वापस फेरान मगर तमिकुय कॆंह कालस। नम गछ़ान ॳछ यॆलि फ्युर लगान ख़यालस। दमफुट्य गछ़ान लगान ब्यॆयि तऺथ्य जंजालस। सऻरी नेतागण सत्ताहस मंज़ रोज़न वऻल्य या सत्तहऻस न्यबर रोज़न वाल्यव, नऺव्य तॖ प्रऻन्य, दूरिक तॖ नऺजदीकिक्य प्यॆयि वऻतिथ श्रीमती सुषमा स्वराजि भाव पूर्वक श्रद्धांजली दिनॖ बापथ। विष्णुबवनस ॴस्यनस जाय।
**************************
"ह्यथ कऺरिथ राज फेरिना
दिथ कऺरिथ त्रपति ना मन
लुभ व्यना ज़ीव मरि ना
ज़ीवंत मरि तऻय सुय छुय ज्ञान"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)