01.01.2019

01.01.2019, पॊह (पौष) गटॖ पछॖ (कृष्ण पक्ष) काह (एकादशी)
बॊम्वार (मंगलवार),श्री सप्तर्षि सम्वत 5094,राश वृश्चिक (रऻच़ हॖन्ज़ॖ 3.22 बजि प्यठॖ) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
*****************"********
1. मु: डेडि तलॖय चरॖस दज़ान
    अ: यॆलि बऺडिस हऻकिमस ब्रौंह
         कनि कांह वुल्टॖ कऻम सप्दि
2. मु: डंगॖ सॖह
    अ: गरस मंज़ ज़ऻलिम मूजूद
         आसुन
3. मु: डॊम्बि शुर्यन ख्वखॖ ब्रऻर
    अ: तस रोब हावुन यस नॖ
         व्यच़ानॖय आसि
4. मु: डेन्जि तॖल्य पन तॖ पनॖ
         तऺल्य डीन्ज्य
    अ: ओरुक योरुक वऺनिथ
          बराबरी अनॖन्य
5. मु: डबॖ डबॖ गव वऺड रब
    अ: महशूर स्यठाह तॖ ह्यॊन
          द्यॊन कमॖय
**************************
1. लाब.....Gain/Profit/
                Advantage
2. लाब तुलुन.....To gain/To
                 benefit/To profit
3. लाबुर.....Slope/Side of a
                  hill
4. लाटरी.... Lottery
5. लाश...... Dead body/
                   Corpse
6. लाफ़...... Boast/Brag/
                   Self praise
7. लागत....Cost/Expenses
                  Expenditure
8. लागत लागॖन्य....To spend
                  money (on)
9. लाल...... Favourite/Dear
                  Darling/Red
10. लाल परी...Fairy dress-
                  ed in red
**************************
        गीता ज्ञान  : अध्याय-9 :
यगॖन्य बॖय ॳग्न बॖय ॳग्नॖ वऺत्र बॖय
अवशदी ॳग्न ग्यव तॖ मंत्र बॖय
कर्म वोल बॖ हवनॖच क्रॆया म्यॆ ज़ान
वॊन भगवानन गीता ज्ञान
**************************
मुबारक त्वहि सारिनी ॳज़्यकि दुहुक ति क्याज़ि अज़ गव शुरु ईसऻई सम्वतुक नॊव वऺरी यानि 2019 अज़ रऻच़ हॖन्ज़ॖ बाहि बजि प्यठय रूद्य मोबाइलन प्यठ लूख अख ॳकिस मुबारक-बाद दिवान तॖ अख ॳक्यसुन्द रुत कांछान।सऻरी छि यछ़ान प्रथ पल, प्रथ क्षण, प्रथ विज़ ज़िन्दगी हॖन्ज़ गछ़ि नेरॖन ह्रच़ तॖ फ्रूच़,असान तॖ गिन्दान, ख्वश तॖ ख्वशहाल। पऺतिमि वऺरियुक समय बन्यव अख ख़्वाब, अख स्वपनाह, अख कथा। वऺरी बदल्यव, नॊव जोश आव, नऺव्य व्यच़ार आयि मनस मंज़, नव्यन चीज़न हॖन्ज़ आश थवव। ईश्वर कऺरिन ज़ि सोन मन लऺगिन रॖच़न रॖच़न काम्यन कुन। यॆछ़िन असि अख ॳकिस पलज़ुन। अख ॳक्यसुन्द मान सम्मान थवुन। अख ॳकिस नखि-डखि रोज़ुन। मऺशरावव पतिमि वऺरियिक गिलॖ-शिकवॖ।
अथवास कऺरिथ पकव तॖ ॳकसॖय रज़ि सऻरीय समिथॖय लमव। असान गिंदान ॳस्य सऻरीय ख्यमव च्यमव।
**************************
"अज्ञानतिमरान्यधस्य ज्ञानन्यजन शलाकया, चक्षुर्-उन्मीलितं येन तस्मै श्री गुरवे नम:"
गुरु स्तुति मंत्र गछ़ॖन दॊहय परॖन
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
************"*************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)