21.12.2018

21.12.2018, मॊन्जॖहोर (मार्ग/ मगर), ज़ूनॖ पछॖ (शुक्लॖ पक्ष), च़्वदाह (चतुर्दशी), शॊकुरवार (शुक्रवार/जुम्मा),श्री सप्तर्षि सम्वत 5094, राश वृष (चलान)ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ख्वजा च़ॖ ति यिख नॖ बॖति
         समखय नॖ
    अ: यॆलि नॖ रलनस-मेलनस
          कांह ब्रांथॖय आसि/यॆलि
          वतॖ अलग अलग आसन
2. मु : ख्वजॖ मूद तॖ च़ास ति
          बलेयि
    अ: मरनॖ सॗत्य छि वारियाह
         मसलॖ पानय हल सपदान
3. मु: ख्वजॖसऻबा गाम न्यूहोय
         म्यॆ त्रोव पानय
    अ: युस अपुज़ ज़िछर हावि/
         युस न्वख्सान गऺछ़िथ ति
         ब्यॆयिस बास दी नॖ
4. मु: ख्वजा दि सऻ बतॖ, सु
         तुलान पानॖ पऺथरॖ
    अ: तस शख्सस कॆंह मंगुन
         यह नॖ पानस आसि
5. मु: ख्वदाय सॖन्ज़ खॖर तॖ
         नऻयदॖसॖन्ज़ च़्यफ़
    अ: यस मुसीबतस प्यठ
          मुसीबत यी
**************************
1. माल.....Goods/Cargo/
                Riches/Wealth/
                Property
2. माल/माला... Rosary/
          Garland/Necklace
3. माल फिरॖन्य....To count
          one's beads/To pray
4. मऻलिश.... Massage
5. मालदार.....Rich/Wealthy/
                     Moneyed
6. मालि ग़नीमथ....Booty
7. मालि मुफ्त.....Free/Some-
          thing without effort
8. मऻली...... Financial
9. माली...... Gardener
10. मऻलियि....Land revenue
**************************
      गीता ज्ञान : अध्याय-9 :
प्रकृच़ हुन्द स्वबाव कऺरिथ सुमरन
प्रतंत्री गऻमॖच़ सारिनी ज़ीवन
कर्मव अनुसार छुसख पऻदॖ करान
वॊन भगवानन गीता ज्ञान
**************************
ॳज़्यकि प्यठॖ गव चिल्लॖय कलान
शुरु। चिल्लय कलान यानि तॗर शिदतॖच या सख़। यि तॗर रोज़ि चतजीहन द्वहन तॖ अदॖ गछ़ि शुरु
चिल्लॖ ख्वरुद यॆम्युक मियाद छु रोज़ान वुहन द्वहन। तॖ ॴखरस मंज़ छु रोज़ान चिल्लॖ बच्चॖ दऺहन द्वहन। कुल मिलऻविथ छि यि तॗर रोज़ान सत्तथन द्वहन। मगर यि ग्रन्द अमि तॗरिहॖन्ज़ ॴस्य ॳस्य करान रोज़ान कऺशीरि मंज़ वख्तॖ अकि। च़ाटॖहाल ॴस्य गछ़ान बंद। शीनॖय शीन ओस आसान च़्वपऻर्य। व्वंय छि कऺशीरि मंज़ ति तथ तॗरि मंज़ कति कोर फ़रॖख आमॖच़। चिल्लय कलानुक यॆति ज़िकिर करुन छु नॖ कांह मतलब थवान। तॗर छि रोज़ान मगर कति कऺशीरिहॖन्ज़ तॗर तॖ कति यॆतिच तॗर। ज़मीन आसमानॖच फरॖख। यॆति छु यि माजि बतॖ। कऺशीरि हॖन्ज़ि तमि तॗरि निशि त्राहि त्राहि।
पलवन प्यठॖ पलव लगऻव्य लगऻव्य ॴस्य नेरान। कांगॖर बॆबिस मंज़ ॴस्य आसान। दफ्तरन मंज़ ॴस बुखार्यॆन बोश आसान। वुनि ति छु तॗरि हुन्द माहौल त्युथुय दफ अमापॊज़ फरॖख छि वारियाह आमॖच़। मौसमस मंज़ छु बदलाव आमुत। पलवन मंज़ ति छि हना नज़ाकत आमॖच़। खऻर असि गयि व्वंय त्रॖह वऺरी कऺशीरि द्रामतिस। सान्यन शुर्यन छॆ नॖ ब्वयी अमिच तॖ न ह्यकव ॳस्य तिमन व्यखनऻविथ ज़ि सु दौर क्युथ ओस। यॆलि असि अथस मंज़ छ़िरॖ च़ॊट तॖ फ्यरनॖ नऺरिस प्यठ म्वगल्य-चायि खोस आसान ओस
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)