08.12.2018

08.12.2018,मॊन्जहोर (मार्ग/ मगर), ज़ूनॖ पछॖ (शुक्लॖ पक्ष), ऒक्दॊह (प्रथमा/प्रतिपदा), बटॖवार (शनिवार/शनिश्चरवार),श्री सप्तर्षि सम्वत 5094, राश धनु (6.5 बजि), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: हरफस गवाह तॖ म्यॆन्डिस
         शरीक
   अ: सॗत्य बोज आसुन/नज़दीकी
        ज़ऻन्यकार आसुन
2. मु: मऺहदॖ शाह ख्रोन्य तॆलि न तॖ
         व्वंय
    अ: बे-वख्तॖ कार/यॆलि नॖ कार
         शूबि तॆलि करुन
3. मु: हऻज़िरस बोग तॖ नऻज़िरस
         चौब
    अ: युस ब्रौंह कनि आसि तस
         बनि सोरुय
4. मु: हाल मतॖ प्रॖछ़तम रॊयि सॖय
         वुछतम
    अ: कऻन्सि हुन्द गुदरुन छु
         तसन्दि बुथि प्यठय ननान
5. मु: हमऻल्य तॖ दमऻल्य
    अ: पनॖन कथ बॆहनावनॖ खऻतरॖ
         शोर तुलुन
**************************
1. मोल.....Father
2. मूल......Root
3. मून......Wool
4. मूरिख... Historian
5. मूर्ख..... Unwise/Fool
6. मोरॖछल...Fan made of
            peacock's feathers
7. मॊकुर.....Dirty
8. मॊकुर गछ़ुन.....Dirty/Pro-
                     fane/Unholy
9. मॊकुर ख्यॊन....To eat
             impure/To take
             profane things
10. मॊलुत.....Dirty/Foul/
            Unclean/Defiled
**************************
       गीता ज्ञान : अध्याय-8 :
युस यूगी प्वरुष यि राज़ ज़ानान
वीद परन करन तप ज़प यऺगॖन्य दान
प्वन्य फल प्रऻविथ पर्म पद प्रावान
वॊन भगवानन गीता ज्ञान
**************************
फूर्सत छे नॖ। वख्त छु कम। वातुन छु वारिहान काम्यन। वारिहान जायन। जायि छि दूर-दूर। बूज़ुम ज़ि मरनॖ पतॖ पूरॖ द्वह यानि दऺहमिस दॊहस ताम प्रारुन छु व्वंय गछ़ान मुश्किल। व्वंय छि ह्यवान मदद ब्यॆयन शास्त्रन हुन्द। यानि आर्य समाज्युक। व्वंय छु बासान सुय शास्त्र छु जान ति क्याज़ि तमि शास्त्रॖ हिसाबॖ छि मरनॖ पतॖ दऺहव दॊहव बदलॖ च़ोर द्वह करान। कॆंच़व ह्यॊत यि रिवाज अपनावुन। राथ ऊतरय बूज़ुम ज़ि ॳक्य बटन छु कऻम ब्यॆयि छ़ॊटरावॖनॖ बापथ अख नॊव क़दम तुलमुत। सु गव यि ज़ि पतिम त्रॆ द्वह ति आयि अकीय द्वह करनॖ। यानि कऺहिम तॖ बऺहिम द्वह ति कॊर तऺम्य दऺहिमि दॊहन तॖ बचऻविन्य ब्यॆयि ज़ॖ द्वह। पंडित जियन बूज़ुम ह्यॊत पनुन फ़ीस पूर त्र्यनॖवुनी दॊहन हुन्द मगर क्रिया आयि करनॖ कुनी द्वह।यानि दऺहिमि द्वह। समय छु नॖ। कऻम यूत जल सप्दि त्यूत छु जान। विधि क्याह छि, व्वंय कथ छु तथ सनुन। असि छु वुछुन हाजथ पनुन। ति क्याज़ि असि छु नॖ मॊरदस पतॖ दवुन बऺल्कि छु हालात वुछिथ वख्तस पथ दवुन।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)