18.12.2018

18.12.2018, मॊन्जॖहोर (मार्ग/ मगर), ज़ूनॖ पछॖ (शुक्लॖ पक्ष), दऺहम (दॊयिम), दश्मी (अधिक), बॊम्वार (मंगलवार), श्री सप्तर्षि सम्वत 5094, राश मेष (चलान) ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ख़रन नर तॖ नरन ख़र
    अ: यॆलि ना-बराबर रून तॖ
         ज़नान आसि/यॆलि नॖ मनॖ
         मुवऻफ़िक नफ़र प्यॆयि/
         ह्यिवस ह्यु नॖ प्यॊन
2. मु: ख़रॖ पूतिस गुर्य-पूत प्यॆठ-
         वऻन्य
    अ: यॆलि ल्वकचि कामि ख़ऻतरॖ
          बॊड मुवाज़ॖ मंगनॖ यी
3. मु: खर खसनय खर खाव
    अ: हंगॖ मंगॖ बदनाम
4.मु: ख़र क्याह ज़ानि ज़ाफ़रानुक
        क़दॖर
   अ: ज़ानन वोलुय छु चीज़स
         क़दॖर ज़ानान
5. मु: ख़र ह्यंग तॖ वूंटॖ नच़ुन
    अ: बऺल्य नाराज़ॖ गछ़ुन या
          ज़िदस लायनॖ युन
**************************
1. मोर.....Killed/Pea cock
2. मूर..... A thin stick/A
               branch of a tree
3. मूड.....Mood
4. मुडॖ.....Foolish/A simple-
               ton/An idiot
5. मोड...Turn/Twist
6. मूर्ती....An idol
7. मुनतज़ीम...Manager/
          Master of ceremon-
          ies
8. मुनतज़िर.... Waiting/
                       Awaiting
9. मुनतिशिर...Dispersed
          (Crowd)/Distracted
          (Ideas)
10. मुनतिख़ब...Chosen/
           Selected/Elected
**************************
         गीता ज्ञान : अध्याय-9 :
यि म्यऻन्य ईश्वरी यूग शक्ती ज़ान
बॖय ज़ीवन पऻदॖ तॖ पालन करान
बॖ तिमन मंज़ नॖ दऺरिथ रोज़ान
वॊन भगवानन गीता ज्ञान
**************************
यीरॖवुन्य नावा तॖ ब्यॆयि नॖ कॆंह। पंडित ओंकार नाथ जीनि जंत्री मंज़ छि दऺहम ज़ॖ हाविमच़ॖ मगर पंडित मनमोहन जीनि जंत्री मंज़ छि दऺहम बजायि नवम ज़ॖ हाविमच़ॖ। ब्याख पंचाग ति छु हावान नवम ज़ॖ गछ़ान। गयि ॳस्य कऻशिर्य बटॖ परेशान ज़ि नवम छा ज़ॖ गछ़ान किनॖ दऺहम छि ज़ॖ गछ़ान। पॊज़ कऺम्यसुन्द मानव? असि छु नॖ पूरॖ ज्ञान अमि चीज़ुक। ॳस्य ह्यकव नॖ ठोक के वऺनिथ ज़ि अख छु ग़लत तॖ ब्याख छु ठीख। मगर ग़लत छु अख न तॖ अख। बॖ छुस करान इस्तिमाल ओंकार नाथ जीयिन जंत्री ग्वडॖ प्यठय यानि पंडित प्रेम नाथ शास्त्रीयनि वख्तॖ प्यठॖ तॖ म्यॆ ल्यूख एमीय जंत्री मुतऻबिक तिथि तॖ वार। त्युथुय सूज़ कऻन्सि मित्रन ब्यॆयि द्वन जंत्रीयन हॖन्द्य फोटू व्हाटसापस प्यठ यथ मंज़ नवम छि ज़ॖ आमॖच़ हावनॖ। म्यॆ कॊर विजयेश्वर कार्यालय फ़ोन तॖ प्रुछ़मख फ़रॖख आसनुक वजह।जवाब म्यूलुम ज़ि सोन गणित छु सऺही तॖ दॊयिमि जंत्री मंज़ आसि कम्प्यूटर दऺस्य गलती रूज़मॖच़। सॗतीय वॊनॖनम ज़ि त्रॆयिम पंचांग छु नॖ कऻशिर्य बटन हुन्द तॖ तमि हिसाबॖ छु नॖ पकुन। बोज़नाह कॊरूम तॖ पॊकुस ब्रौंहकुन पानस। पंडित मनमॊहन कार्यालय फोन कऺरिथ नेरिहेनॖ मतलब कांह। सु वनिहेनॖ पानस ग़लत। तॖ असि त्रॆयिम वथाह छॆ नॖ कांह। ॳछ वऺटिथ विश्वास करुन। अमि हिसाबॖ आसि म्यान्यन वारिहान बायन-ब्यॆन्यन तिथि मानॖनस मंज़ मुगाल्तॖ गोमुत। तॊह्य ति मजबूर तॖ बॖति मजबूर। यी मन पनुन वनि ती छु मन्ज़ूर। ज़ानि दय कॊत्ताम रोज़ि जऻरी यि दॊस्तूर।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)