20.12.2018

20.12.2018, मॊन्जॖहोर (मार्ग/ मगर), ज़ूनॖ पछॖ (शुक्लॖ पक्ष) त्रुवाह (त्रयोदशी), ब्रसवार (वीरवार/ब्रहस्पतवार), राश वृष (दुहचि 9.58 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ख्वजि छु यिनय तॖ टाव
         वॊथ ब्रोंहठॖय
    अ: कऻन्सि हॖन्दि यिनॖच ख़बर
          ब्रुंहॖय वातॖन्य
2. मु: ख्वजि ज़ांह मेलय नॖ वानि
         ज़ांह समखय नॖ
    अ: अलग अलग वथ रटॖन्य
3. मु: ख्वजि सऻब बिदाद गोम नॖ
         वऺनिथ थोवुम
    अ: ब्रौंहठॖय व्यलाफ़ करॖन्य
4. मु: ख्वजि ब्यूठ वान द्यगल्यव
         सान
    अ: बॆ-तरतीब कारॖबार/यि नॖ
         ज़रूरथ ती करुन
5. मु: ख्वजि मानख ना तॖ मनॖट्य
         दब ख्यथ
    अ: यस पऻज़ारन लायक़ बुथ
         आसि सु छु नॖ पथ बिहान
**************************
1. माशोक़....Beloved
2. मऻश........ Buffalo
3. मऻशॖक्रऻर...A milk-product
4. मऻल.....Appetite/Hunger
            Need/Want/Desire
5. मऻलॖ.....Dirty/Filthy/Fair/
          Crowd/Assemblage
6.मऻर.....Tributary/Tract of
               land
7. मऻर्यमॊन्द.... Beautiful/
            Charming/Grace-
            ful
8. मऻदॖ.....Fine flour
9. मऻदान.....Ground/Plain/
                Field/Shit
10. मऻन्ज़.... Myrtle
**************************
      गीता ज्ञान : अध्याय-9 :
कल्पॖकिस अंतस सऻरी ज़ीव ज़ात
म्यानि पृक्रच़ ब्यॆयि सपदान प्राप्त
कल्पॖकिस आदस मंज़ छुसख ब्यॆयि रचान
वॊन भगवानन गीता ज्ञान
**************************
पनुन गणित तॊर नॖ म्यॆ मुडस वुनि ति फिकिरी सु ज़न गव ज़ि दपान पॊह लॊग तॖ साथ ति ख़त्म तामथ। मगर सानि पंचान्गॖ हिसाबॖ छु वुनि मॊन्जॖहोरॖय चलान तॖ पॊह गछ़ि शुरु त्रॊवुहमि दिसम्बरॖ प्यठॖ अल्बतॖ विक्रमी सम्वतॖ हिसाबॖ च़ाव पॊह ऊतरॖ शुरऻहमि दिसम्बर। तम्युक मतलब गव ज़ि ॳस्य छि पॊह अच़ुन मानान विक्रमी सम्वत हिसाबॖ तॖ बाकय तिथि सप्तर्षि सम्वत हिसाबॖ। अथ प्यठ कऺमिस सॗत्य करव कथ तॖ कऺम्यसुन्द बोज़व। म्यॆ छु व्वंय ज़्वन प्यवान ॳस्य ॴस्य कऺशीरि मंज़ सऻंक्रात मनावान तॖ म्यऻन माता श्री ॴस अमि द्वह फ़ाकॖ ति दवान तॖ ब्यॆयि ॴस स्व सत्यदीव यानि पूर्य ति बनावान मगर भगवान ज़ानि स्व प्रथा क्याज़ि तॖ कर रुकेयि मगर व्वंय छि वुछान ज़ि जंत्री मंज़ छि हावान विक्रमी सम्वतस मंज़ मासान्त तॖ पतॖ संक्राति वृत। गव ज़ि ॳस्य छि शायद दॊनवऺनी सम्वतन थफ कऺरिथ पकान आमॖत्य। तॖ व्वंय रॊट असि दामानॖ आर्यसमाजकिस पंचान्गस ति तॖ ह्यॊत मरनॖ पतॖ च़ोरय द्वह करॖन्य, मेखल छ़ॖनॖन्य, वगैरा वगैरा। मतलब द्राव म्यॆ बासान यि ज़ि ॳस्य छि नॖ ॳकिस डंजि तॖ लंजि रूज़िथ। असि छु द्वन नावन मंज़ ख्वर। असि कुस बनि ग्वर। बॖ छुस सौंचान
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)