30.12.2018

30.12.2018, पॊह (पौष) गटॖ पछॖ (कृष्ण पक्ष),नवम (नवमी), आथवार (एतवार/रविवार),श्री सप्तर्षि सम्वत 5094,राश तुला (रऻच़ हॖन्ज़ि 8.16 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: दऺछनिस अथस छु ख्ववुर
         छलान तॖ ख्ववरिस दऺछुन
    अ: अलज़ुन-पलज़ुन/अख
         ॳकिस बकार युन
2. मु: द्रास ह्यॆनि म्यूलुम नॖ द्रास
         कॖनॖनि तॖ पॊकुम नॖ
    अ: यॆलि प्रथ अंदॖ मोयूसी
          लबनॖ यी
3. मु: द्राग च़लि तॖ दाग़ च़लि नॖ
    अ: सख्ती छि हमेशि याद
          रोज़ान
4. मु: दऺरियावॖ निवान कांह आब
         बूतीमार दिवान बुथि बुथि
  अ: अखा छु ॴश करान ब्यॆयिस
        छु यिवान अज़रवुन/ब्यॆयि
        खुशी नॖ बर्दाश्त गछ़ॖन्य
5. मु: दज़ि वाज़स तॖ वुच़ि वाज़स
    अ: ज़िम्वऻरी कऻन्सि पुशरिथ
         थावॖन्य
**************************
1. ला......Without
2. लापता.....Unknown/
               Without address
3. लापरवाह....Careless/
            Negligent/Heed-
            less/Inattentive
4. लातेदाद.....Countless/
                     Innumerable
5. लासऻनी..... Unparallel/
            Matchless/Incom
            parable/Unique
6. लाज....Shame/Shyness
                Honour/Bashful
                ness
7. लाजवाब...... Speechless
            Matchless/Silent
8. लाचार......Helpless/
            Destitute/Miser-
            able/Compelled
9. लाखऻर....Ingratefulness
                   Gratitude
10. लादवा.....Incurable
**************************
      गीता ज्ञान  :अध्याय-9 :
म्यऻन्य बखॖत्य म्यॆ लगातार स्वरान
प्रणाम छिम बारबार करान
छि सदा म्योनुय ध्यान दारान
वॊन भगवानन गीता ज्ञान
**************************
असि ॴस्य कऺशीरि मंज़ वारियाह चीज़ मुफ्तस मंज़ मेलान तॖ ॴस्य खुलॖ-डुलॖ छावान। म्यॆ छु याद यिवान ज़ि ल्वकचारस मंज़ ओसुस बॖ पनॖन्यन ज़िठ्यन सॗत्य यारबल वसान तॖ यारबलस मंज़ छि म्यॆ छ़ान्ठ वायिन ह्यॆछमॖच़। मगर अज़ यॆलि बॖ पनॖन्यन ल्वकट्यन ल्वकट्यन शुर्यन कुन वुछान छुस बॖ छुस पऺज़्यपऻठ्य हऻरान गछ़ान यि वुछिथ ज़ि तिमन छि छ़ान्ठ ह्यॆछनॖ बापथ रॊपियि-रूद प्यवान ख़र्च करुन। पतॖ गोस प्यठॖ श्रानुक ड्रस सु अलग। यिथय पऻठ्य शीन छावुन ति ओस मुफ्त। यॆति प्यठॖ छि शुर्य निन्य शिमला वगैरा यॆति शीन प्यवान आसि। ग्वडॖ छे नॖ शुर्यन फुर्सथॖय ओरॖ योर गछ़नॖ बापथ। परनन थऻव्यमॖत्य आवॖर्य। मोल मऻज्य ति छि व्यसत पनॖन्यन पनॖन्यन काम्यन सॗत्य तिमन ति कति छु वार-व्यस्तार ज़ि नच़हऻन तॖ फेरहऻन। अल्बतॖ कॆंह म्यऻन्य बऻय छि यिछ़ि व्यस्तॖतायि मंज़ ति बहार छावान या शीन छावान। मगर कऺशीरि ओस पनुन अख चम खम। कति वुछव ब्यॆयि तिम द्वह बस सुय छुम ग़म।
**************************
"गुरु ब्रह्मा: गुरु विष्णो गुरु साक्षात
महेश्वरा: गुरु एव जगत् सर्वं तस्मै श्री गुरवे नम:"
यि मंत्र गछ़ि लगातार परुन यॆमि सातॖ ति समय मेलि। यि छि गुरुस्तुति। यि परनॖ सॗत्य छि मन शऻन्ती मेलान
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)