07.12.2018

07.12.2018, मॊन्जॖहोर (मार्ग/ मगर), गटॖ पछॖ (कृष्ण पक्ष), मावस (अमावसया), शॊकुरवार (शुक्रवार/जुम्मा),श्री सप्तर्षि सम्वत 5094, राश वृश्चिक (चलान), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: छलन मल छा अच़ान किनॖ
         नेरान
    अ: कथ कथ करनॖ सॗत्य छि
          फुठ नेरान
2. मु: छम छिट तॖ छमा कऻन्सि
    अ: अपुज़ मपुज़ थ्यकनावुन
3. मु: छऺल्य छऺल्य माहराज़ॖ
    अ: साफ़ पलव लऻगिथ नेरन
          वोल
4. मु: छ्यन्य मऺट छि वज़ान
    अ: छ्यॊन इन्सान छु ज़्यादॖ
         थ्यकान/बेकलस छि कथॖ
         ज्यादॖ
5. मु: छऺतॖरॖ बून्य
    अ: बऺड द्यद यस वारियाह जुर्य
         पुत्र आसन
**************************
1. मल....Dirt/Rub
2. मिल.....Mill/Factory
3. मलॖ......Boatman
4. म्यूल.....Has found/Has
                met
5. मऺल्य....Buy/Purchase
6. मऺल्य ह्यॊन....To buy
              against payment/
              To purchase
7. मोम....Wax
8. मोमजामॖ....Tarp cloth/Oil
               cloth/Tarpaulin/
               Cover
9. मोमबॖत्य..... Candle
10. मोम गछ़ुन.....To be soft-
            ened/To be appea-
            sed
**************************
        गीता ज्ञान  : अध्याय-8 :
दॊयि प्रकऻर्य वतॖ यिम ज़गतॖच ज़ान
शॊक्लॖ तॖ कृष्णॖ पछि दीवयान पत्रयान
यॆमि वति सनातन मानव यिवान
वॊन भगवानन गीता ज्ञान
**************************
समय कति छु? फुर्सथ कऺमिस छि? आवर्यर छु प्रथ ॳकिस। खांदरन कुस वाति, क्वत वाति, कऺच़न दॊहन प्यठ वाति? परेशान छु ॳज़ इन्सान। खासकर ॳस्य कऻशिर्य बटॖ। माहराज़स छि बरात निन्य जेमि प्यठॖ विशाखापट्नम।
माहराज़ॖ छु ख्वख। तमिस छि ब्वकॖ फॊलान ज़ि तऺम्य पटऻव विशाखापट्नमॖच कूर मगर बरऻच़ मंज़ कत्याह नफ़र नी सॗत्य। यारन दोस्तन मंज़ ह्यॆच़न छटऻय गछ़न्य।अंगन ॴशनावन मंज़ ति ज़ि कुस निमोन तॖ कुस निमोन नॖ। सॗत्य गछ़न वाल्यन पनॖन परेशऻनी। कऺच़ दॊह लगन यिनछ़ तॖ गछ़न,पतॖ गव बाकॖय प्रोग्राम ति ज़न गव ज़ि रिस्यपशन छु, गरॖ अच़ुन छु, गरॖ च़ानॖन छि। अगर मेखल ति आसि तॆलि हर्यॆयि ब्येयि द्वह। अमि ख्वतॖ छु न गछ़नुय जान। समय ति बचि तॖ पौंसॖ ति। मगर खांन्दरवोल करि क्याह? तऺम्य छु पनॖनि तरफ़ॖ यूत पौंसॖ ॴडरोवमुत। तऺमिस छु तमाह ज़ि खांदर करि शुरिस चिकॖ-चावॖ सान। कशमॖकश छि दॊनवुनी तरफ़न। छुट्टी छॆ नॖ ज़्यादॖ कालस।सऻरी छि नॖ ह्यकान वऻतिथ अख ॳक्यसॖन्दिस खांदरस। तसलाह छु न यिवान। मगर दवॖ-दवॖ छि, दौरॖ-दौर छि, तृफॖ-तृफॖ छि। समय छु न। वख्त छु नोज़ुक, नौकरी छि थफ करॖन्य। प्राइवेट मामलॖ छु, बरोसॖ छु नॖ। मगर वातुन ति छु। अजब हलचल छि नज़र यिवान। प्यठॖ अकीय सातॖ खांदरन हॖन्ज़ लऻन लगान। सारिनॖय खांदरन छि नॖ ह्यकान वऻतिथ। यॆमिस निश नॖ वातव सुय नाराज़। कऺशीर्य यंज़ ॴस्य त्र्यन-त्र्यन च़्वन-च़्वन खांदरन ह्यकान वऻतिथ मगर बाल यपऻर्य यिथ मॊठ सु सोरुय। नारस दिया नरि। गछ़ि क्वत क्वत। यि छु नॖ हब्बॖकदॖल तॖ ज़ऻनॖकऺदॖल। यि छु दिल, हर्याना, यूपी, भारतॖक दूर दूर आलाकॖ। ख्यॆ कथ व्वंय च़ॖ पानस काकॖ। ख्वश छु कऺशीरि मंज़ बिहित ऱज़ाकॖ वुछान तमाशा ज़ि बटन क्याह गव।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)