04.12.2018

04.12.2018, मॊन्जॖहोर (मार्ग/ मगर) गटॖ पछॖ (कृष्ण पक्ष),बाह (द्वादशी) बॊम्वार (मंगलवार)श्री सप्तर्षि सम्वत 5094,राश तुला (चलान)ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: चन्दस ह्यु नॖ बान्दव कांह
    अ: पौंसॖ छु सारिवॖय ख्वतॖ बॊड
          दोस्त
2. मु: चन्दॖ बान्दव
    अ: आसनॖ-बासनॖ विज़ि यारज़
         लागनवोल
3. मु: चायि तॖ लायि गछ़ि ऒगुन
         आसुन
    अ: दॊयमि सॖन्दि मदतॖ वरऻय छु
         नॖ कार अंदान
4. मु: चन्डालॖ बापार
    अ: बद-मिज़ऻजी
5. मु: च्योन म्वंगॖ त्रख सोन स्युन
         अख
    अ: यॆलि ख़र्च ज़्यादॖ आसि/
          बऺड नज़र आसॖन्य
**************************
1. मॆहर....Kindness/Favour
               Love/Affection/
               Compassion
2. मॆहरबान....Kind/Consider
              able/Affectionate
              Friendly/Loving/
              Compassionate
3. मॆहरबान गछ़ुन...To be kind
                  To show favour
4. मॊहलत....Respite time/
             Grace/Deferment
5. मॆहमान.....Guest
6. मॆहमान-खानॖ......Guest
                              house
7. मॆहमान-नवऻज़ी.....Hospi-
                                  tality
8. महात्मा.....Pious/Lofty
              minded/Generous
        Noble/Magnanimous
9. मॊमॖ च्यॊन....To suck milk
10. मॊमॖ दाम....A drink of
                       breast milk
**************************
          गीता ज्ञान : अध्याय-8 :
मऺरिथ अमि वति गछ़न वऻल्य यूगी
तिमन दीवताहन हन्दि मदतॖ सॗती
छि परम ब्रह्मस प्राप्त सपदान
वॊन भगवानन गीता ज्ञान
**************************
ईश्वर आश्रम छु स्वामी लक्ष्मी जियुन आश्रम सरिता विहारॖ, प्वाक्यट डी, आर-5, दिल्लि मंज़।अतिक्यव सदस्यव छु अकि हफ़्तुक प्रोग्राम शुरु कॊरमुत यथ प्रोग्रामस मंज़ यछ़न वऻल्य बख्त ह्यकन शिवस्त्रोतस प्यठ ज्ञान प्राप्त कऺरिथ। परॖनावन वाल्यन हुन्द इन्तिज़ाम छु आमुत करनॖ। अथ प्रोग्रामस मंज़ शिरकत करनॖ बापथ छु फ़ीस-वीस ति यिवान ह्यनॖ। रोज़नुक इन्तिज़ाम, ख्यनॖ-च्यनुक इन्तिज़ाम ति छु आश्रमॖ दऺस्य आमुत करनॖ। म्यॆति आव मॊकॖ ग्वडनिकि द्वह प्रवचन बोज़नुक। पूरॖ दॊहस रूद कार्यक्रम चलवुन। प्रवचन दिनॖवऻल्य व्यदवान ॴस्य आमॖत्य। अति नन्योम ज़ि अथ आश्रमस मंज़ अथ प्रोग्रामस मंज़ शिरकत करनवाल्यन मंज़ ॴस्य सऻरी विद्यार्थी ब्यॊन-ब्यॊन जायव प्यठॖ आमॖत्य क़रीबन पंदाह-वुह नफ़र यिमन मंज़ ओस सिरिफ़ अख कऻशिर महिला बंगॖलोरॖ प्यठॖ आमॖच़ तॖ अख कऻशुर लऺडकॖ ति ओस यिनॖवोल। बाक़य सऻरी ॴस्य सऻनि ज़ऻच़ न्यबरॖकी। ब्यॆयि यि म्यॆ नज़र आव सु गव यि ज़ि प्रवचन ग्वडनिकि दॊहन ति बोज़न वऻल्य सानि ज़ऻच़ हॖन्दि ॴस पंच़ाहि वुहॖर्य ह्यॊर-ह्यॊरॖय तॖ ब्वन नॖ कांह। हालांकि म्यॆ छु बासान ज़ि सान्यन शुर्यन गॊछ़ अम्युक फ़ऻयदॖ ज़्यादॖ ख्वतॖ ज़्यादॖ वातुन मगर ति छु नॖ सपदान। सान्यन शुर्यन छु नॖ म्वकलनॖ पाय पनॖनि सबक़ॖ तलय तॖ यथ सबक़स किथ पऻठ्य वातन। मगर दॊयिम तरफ़ॖ छुस वुछान ज़ि यिम अथ प्रोग्रामस मंज़ ज्ञान प्राप्त करनि बच्चॖ आमॖत्य ॴस्य तिम ति छि नॖ कम पायिक कॆंह। जान पऺर्यमॖत्य-लीख्यमॖत्य। जान-जान गरन हॖन्द्य। शिवस्त्रोतुक ज्ञान प्राप्त करनॖच अख अभिलाषा ह्यथ छि आमॖत्य। त्रॖह-पांच़ॖत्रॖह वुहिर्य तामॖक्य। तिमन किथ पऻठ्य छि फुरसत तॖ असि छॆ नॖ। सौंचॖनॖच कथ छि।
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)