27.12.2018

27.12.2018, पॊह (पौष) गटॖ पछॖ (कृष्ण पक्ष), पांच़म (पंचमी), ब्रसवार (वीरवार/ब्रहस्पतवार),श्री सप्तर्षि सम्वत 5094, राश सिंह (चलान), ऋतु (हेमन्त चलान)...
चूंकि पगाह छि शॆयम रावान, पगहुक वॊहरवोद यी ॳज़्य यानि पऻनंच़म द्वह
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: द्वदॖ डुल्य तॖ नाबद नऺट्य छि
         नॖ पोशान
    अ: सॊन्य-गरि वोतमुत माल छु
          नॖ पोशान
2. मु: द्वदॖक्य द्यार द्वदस तॖ
         आबॖक्य आबस
   अ:असलॖच कमऻय छि ॴखरस
        रॖच़ि कामि लगान
3. मु: द्वन बऻच़न हुन्द क्रूद गव
         वऺहरऻच़ रूद
    अ: द्वन बऻच़न हॖन्ज़ हर छॆ नॖ
         ज़्यादॖ कालस रोज़ान
4. मु: द्वन सलाह तॖ त्र्यन वाह-
         व्यला
    अ: द्वन बऻच़न मंज़ छु सलाह
         रोज़ान तॖ त्र्यन मंज़ नॖ
5. मु: द्वसि प्यठ कॊम-यऻज्य, न
         पिल्यस च्यऻन्य मऻज्य न
         पिल्यस म्यऻन्य मऻज्य
    अ: ज़्वन/त्युथ चीज़ युस नॖ
         कऻन्सि अथि यी
**************************
1. ल्यख....Abuse/Abusive/
                Rebuke
2. ल्यकॖ-ल्यख...Abuses/
        Showering of abuses
3. ल्यकन हलम दारुन...To
             show extragentle-
             ness
4. ल्यकॖ वातुल....One who
          uses abusive lang-
          uage
5. ल्यग....Eye wax
6. ल्यम्ब.....Mud/Dirt
7. ल्यॊब-थॊप करुन...To nip in
                  the bud/To hide
8. ल्यॊच़.......Weak/Feeble/
                    Lazy
9. ल्यॊल......A big pot
10. ल्यॆदॖर छ़ठ फेरॖन्य...To
            come pale (with
            fear)/To turn pale/
            To become weak
**************************
         गीता ज्ञान : अध्याय-9 :
पर्म भाव न ज़ानन वऻल्य मूर्ख
मनषि रूप किन्य म्यॆ ब्रह्मस करान शख
म्यॆ पर्म ईश्वरस छि तुछ ज़ानान
वॊन भगवानन गीता ज्ञान
**************************
ॳज़्यक्यन मुहावरन मंज़ छु पॗन्च़िम मुहावरॖ दरासल अख प्रऺच़। मुहावरॖस यानि दऺपिथ कऻशुर तॖ प्रऺच़ि मंज़ छि फ़र्ख यि ज़ि प्रऺच़ छि अकिस सवाल किस रूपस मंज़ यिवान वनॖनॖ तॖ जवाब प्यवान छु छ़ान्डुन मगर मुहावरस मंज़ छु नॖ ति कॆंह आसान बल्कि जवाब छु सॗती आसान। स्वर्गीय श्री ओंकार नाथ कौल सऻबनि अथॖ तयार कऺरमॖच़ किताब "कऻशिर दऺपिथ डिक्शनरी" प्यठॖ छुस बॖ यिम मुहावरॖ त्वहि ताम वातनावान अल्बतॖ प्रच़न हॖन्ज़ किताब गयि नॖ म्यॆ नज़रि वुन्युखताम कॆंह। योदवय कऻन्सि निश कॆंह प्रच़ॖ आसन पनॖनि ज़बऻन्य प्यठ या लीखित कुनि जायि सु ह्यॆकि म्यॆ फोन कऺरिथ तालाकि बॖ करॖ हऻसिल तऺमिस निशि तॖ ह्यकॖ त्वहि ताम वातनऻविथ। बॖ छुस प्रारान तुहॖन्दिस जवाबस
**************************
प्रथ रंगॖ कुशल-मंगल यछ़नुक मंत्र
"सर्वॖ मंगल मंगल्ये , शिवे सर्वार्थ साधिके, शरण्ये त्रयम्बके, गौरि नारायणि नमोस्तुते"
बुथ अथ छॆलिथ या श्रान करनॖ पतॖ यि मंत्र परनॖ सॗत्य छु मंगल प्राप्त सपदान
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)