06.12.2018

06.12.2018, मॊन्जॖहोर (मार्ग/ मगर) गटॖ पछॖ (कृष्ण पक्ष),च़्वदाह (चतुर्दशी), ब्रसवार (वीरवार/ब्रहस्पतवार), श्री सप्तर्षि सम्वत 5094, राश वृश्चिक (चलान), ऋतु हेमन्त  (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: छानॖ ठुकस छु रस तयार
    अ: मऻहिर इन्सानस छॆ नॖ ख्यन
        ख्वरदनी हॖन्ज़ कमी आसान
        यॆलि कांह कऻम करि तस छु
        यज़थ मेलान
2. मु: छाव यिथ बतॖ तॖ दाव यिथ
         कथ
   अ: प्रथ कामि छु मॊक़स प्यठ
       क़दॖर आसान/बतॖ गछ़ि छाव
       यिथ ख्यॊन तॖ कथ गछ़ि
       सूंचिथ समजिथ करॖन्य
3. मु: छानॖ किज्य
    अ: कऻन्सि कऻसिबॖ सुन्द
          ज़ऻनिथ-मऻनिथ न्वकुस
          थवुन
4. मु: छानॖ ठुक
    अ: अडॖल्यॊक कार/य्यॊस
          कऻम नॖ पूरॖ छि गछ़ान
5. मु: छानॖ ट्वख छे नॖ बस्ति
         रोज़ान
    अ: कांह कऻम छे नॖ खऺटिथ
          रोज़ान
**************************
1. मॊहसन..... Benefactor/
                     Patron
2. मॊहसूस.... Feeling
3. मॊहफ़ूज़....Safe
4. मोलूम...... Obvious/Evi-
                     dent/Known
5. मोक़ूल...... Appropriate/
               Right/Correct/
               Reasonable/
               Worthy/Exact
6. मोल-मऻज्य....Father and
                        mother
7. मॊक़ॖ.... Occasion
8. मोक़ॖ द्युन....To give an
                      opportunity
9. मोक़ॖ आसुन.....To have
               time/To have an
              occasion/To have
              an opportunity
10. मॊकुल.... To have free
                      time
**************************
          गीता ज्ञान : अध्याय-8
यिम स्वकाम कर्मॖ वऻल्य यूगी ज़ान
स्वर्गस मंज़ श्वब फल प्रावान
फल बूगिथ ब्यॆयि वापस यिवान
वॊन भगवानन गीता ज्ञान
**************************
ॳस्य कऻशिर्य बटॖ छि जंत्री मुतऻबिकॖय पनॖनि दुहुक कार्य-क्रम करान। ज़ऻहिर छि ज़ि यि जंत्री गछ़ि सही पऻठ्य छापवनॖ यिन्य।माने छापनॖ ब्रुंहॗ अथ अख नज़र यिन्य दिनॖ ज़ि कांह ग़लती मा छि छापनस मंज़ रूज़मॖच़। मगर म्यॆ छु बासान ज़ि विजयेश्वर पंचाग (ओंकार नाथ शास्त्री जीयिन) जंत्री छापनॖ ब्रौंह छु नॖ यिवान अमि चीज़ुक ख़याल थावनॖ। ति ज़न गव ज़ि अज़ छु दिसम्बर श्यॆ मगर सानि अथ जंत्री मंज़ छु अज़ दिसम्बर पांछ़ आमुत छापनॖ। ग़लती छि गछ़वॖन्य मगर ग़लती छि सुधारॖन्य ति। ख़बर कऻत्या म्यऻन्य बऻय गछ़न अज़ दु-च़्यॆतिस मंज़ ज़ि अज़ छा पांछ़ किनॖ श्यॆ दिसम्बर। अथ जंत्री मंज़ छि ब्यॆयि ति कॆंह ग़लती छपायि मंज़ रोज़मच़ॖ तॖ तिम ग़लती छि वारियाह कालॖ प्यठॖ रोज़मच़ चलान मगर चूंकि तिम छि होरॖ-योर कॆंच़न मंत्रन मंज़, तिम छि ॳस्य नज़र-अन्दाज़ कऺरिथ सही परान मगर तऻरीखस मंज़ ग़लती रोज़ुन्य सॗत्य डलि परनवोल। असि बटन छि यछ़ पछ़ ॳथ्य जंत्री प्यठ। चाहे स्व पंडित ओंकार नाथ जियिन छा या पंडित मोहन लाल जियिन। असि छु नॖ ब्यॆयि कांह साधन यॆमि दऺस्य ॳस्य पनुन दुह्य चर्या ह्यकव करिथ। जंत्री छि अख महत्वपूर्ण पंचान्ग युस असि वतॖ-हावुक छु। यिहय अगर असि ग़लत ह्यॆछनावि स्यॆज़ वथ असि तॆलि कुस हावि।बॊठ कुस लागि सानि नावि
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)